Revelesōn n̄an Kabun̄ eo, Revelesōn n̄an Mour ko Ad
Ilo raan ko rej itok, enaaj maron̄ pen n̄an jo̧o̧r ilo jetōb ilo ad jab tōl, jineet, kaenōm̧m̧an, im bōk kareel eo an Jetōb Kwojarjar.
Ej juon jeraam̧m̧an aeboojoj bwe imaron̄ kōjeraam̧m̧an Ijtō in ippemi ilo Jabōt in an kweilo̧k in eļap! Ejjeļo̧k juon men emaron̄ ekkarļo̧k n̄an kōjeraam̧m̧an m̧akūtkūt in eaorōk me ej waļo̧k ilo laļ in ilo ad kabun̄jar n̄an armej eo eaorōktata im ekar etetal ilo laļ in. Ilo menin, Kabun̄ eo an Jisōs Kraist im Armej ro Rekwojarjar ilo Raan-ko Āliktata, jej kabun̄jar n̄an E eo ekar jino Pinmuur eo An eļap ilo Jikin Kallib Gethsemane. Ekar m̧ōņōņō in en̄taan kōn jerawiwi ko im m̧ōjņo̧ ko adwōj kajjojo, eo ekar kōm̧m̧an bwe E “n̄an bōtōktōk ilo aolepān Ānbwinnin.”1 Ekar dōbwāāl ioon Calvary2 im jerkak ilo raan eo kein kajilu āinwōt armej eo im̧aantata ekar jerkakpeje iaan ajri ro nejin Jemedwōj Ilan̄. Ij iakwe E im kam̧ool bwe E ej mour! Ej E eo tōl im jineete Kabun̄ in An.
Eļan̄n̄e ejjab Pinmuur eo eļap an Ripinmuur eo, ejjeļo̧k juon iaad enaaj kar wōr an kōjatdikdik n̄an an jepļaakļo̧k n̄an Jemedwōj Ilan̄. Eļan̄n̄e ejjab Jerkakpeje eo An, mej enaaj kar jem̧ļo̧k eo ad. Pinmuur eo an Rilo̧mo̧o̧r eo ad ekar kapidodoiki n̄an kōj mour indeeo im jab wabanban juon men em̧ool n̄an kōj aolep.
N̄e en kar jab mijen eo An ekabwilōn̄lōn̄ im aenōm̧m̧an eo Ej leļo̧k n̄an rikaļoor ro An bwe kōrā eo pāleeō, Wendy, im n̄a kōm̧ro kar en̄jake kaenōm̧m̧an eo ilo Jānwōde 2, 2018, ke kōm̧ro kar ruj kōn juon taļboon ko̧o̧ļ ej jiron̄ tok kōm̧ bwe Būreejtōn Thomas S. Monson ekar em̧m̧akūtļo̧k n̄an turājet in rōn̄ōl eo.
Ewi jon̄an ad on̄ kōn Būreejtōn Monson! Kōm̧ij kautiej mour eo an im bwebwenato eo an. Juon jetōb eineia, ekar likūt ippād ippān aolep ro rekar jeļā kajjeen im ioon Kabun̄ in ej iakwe juon kōkkaļļe ban meļo̧kļo̧ke.
Ilo Jabōt, Jānwōde 14, 2018, ilo ruum̧ eo ilōn̄ ilo Salt Lake Temple, Būreejtōnji eo Kein Kajuon ekar bar ejaak ilo jon̄ak eo eļam̧ waan im kwojarjar kar ejaake jān Irooj. Innām, ilo iien rejtake ritōl ro ad jibbon̄ in inne, membōr ro an Kabun̄ in ipeļaakin laļ in rekar kotak peier n̄an kapene m̧akūtkūt eo m̧oktaļo̧k ekar kōm̧m̧an jān Rijilōk ro. Ij ettā im kam̧m̧oolol kōn rejtak in rie eo ami.
Ij kam̧m̧oolol ro me rekar bōk jerbal in m̧okta jān n̄a. Ekar aō kōjeraam̧m̧an n̄an jerbal ilo Doulul eo an Jon̄oulruo Rijilōk ro ium̧win 34 iiō ko im kar jeļā kōn 10 iaan 16 Būreejtōn ro m̧oktaļo̧k an kar Kabun̄ in. Ikar ekkatak eļap jān er kajjojo.
Ij barāinwōt m̧uri n̄an rūtto ro jibū im jim̧m̧aō etto. Aolep rūwalitōk iaan ro jibū jibū im jim̧m̧aō jim̧m̧aō etto rekar oktak tok n̄an Kabun̄ in ilo Europe. Kajjojo iaan jetōb kein reperan rekar kaarmejete men otemjej bwe ren itok n̄an Zaion. Ilo epepen im bar epepen, Ijoke, ejjab aolep rūtto ro jibū im jim̧m̧aō rekar wujlepļo̧k. Āinwōt juon uwaak, ikar jab rūttoļo̧k ilowaan juon em̧ ej kaorōk gospel eo.
Ikar kautieje ro jinō im jema. Relukkuun aorōk n̄an n̄a im kam̧m̧oolol kōn er im kōn aer kar katakin eō katak ko raorōk. Ijjab maron̄ kam̧m̧oolol er eļap kōn mour in m̧ōņōņō eo aō ilo kapijuknen rekar ejaake n̄an n̄a im ro jeiū im jatū. Im aaet, ke ikar āinwōt juon ļaddik, ikar jeļā ekar jako juon men ippa. Juon raan ikar kālōn̄ļo̧k ioon juon streetcar im etal n̄an juon m̧ōnwia bok an LDS n̄an pukot juon bok kōn Kabun̄ in. Eļap an em̧m̧an ippa ekkatak kōn gospel eo.
Ke ikar jino meļeļe kōn Naan in Māletlet, ikar kōņaan bwe ro jinō im jema ren mour kōn kien in. Kōn menin, juon raan ke ikar dik wōt, ikar etal n̄an po eo ilaļ im rube aolep bato in dānin kadōk ioon piļoor jimeeņ eo. Ikar kōņaan bwe jema en kauweik eō, ak ekar jab kwaļo̧k juon naan.
Ke ekeke ļōmņak ko aō im ikar jino meļeļe karōk eo ekabwilōn̄lōn̄ an Jemedwōj Ilan̄, ekkā aō ba ippa make, “Ijjab kōņaan bar juon m̧weieō ilo Kūrijm̧ōj! Ikar kōņaan wōt in liāp ippān jinō im jema.” Jan̄uwaade in ekar jab bōk jikin m̧ae ro jinō im jema rekar 80 jim̧a aer iiō, innām ekar bōk jikin. Ijjab maron̄ lukkuun kwaļo̧k lan̄lōn̄ eo ikar en̄jake ilo raan ņe,3 im kajjojo raan ij en̄jake bwe lan̄lōn̄ in liāpe im aō kar maron̄ liāp n̄an er.
Ilo 1945, ke ikar pād ilo jikuuļ in taktō, ikar m̧areiki Dantzel White ilo Salt Lake Temple. Kōm̧ro kar jeraam̧m̧an kōn ratimjuon leddik ro nejūm̧ rem̧m̧an im juon ļaddik eaboojoj. Rainin baam̧le in am̧ ej eddōkļo̧k wōt rej juon iaan lan̄lōn̄ ko aō ilo mour in.
Ilo 2005, enan̄in 60 iiō ko in am̧ro m̧are, jitōn̄ bōro Dantzel ekar mej ilo ejjeļo̧k kar kōtmāne kake. Kōn juon un, aō lim̧ō ekar nan̄in ejjeļo̧k jon̄an. Ak ennaan eo an Ijtō im kallim̧ur eo kōn jerkakpeje rekar rie eō.
Innām Irooj ekar bōktok Wendy Watson n̄an turājetū. Kōm̧ro kar liāp ippān doon ilo Salt Lake Temple ilo Eprōļ 6, 2006. Ewi jon̄an aō iakwe e! E ej juon kōrā ekabwilōn̄lōn̄—ej juon kōjeraam̧m̧an n̄an n̄a, n̄an baam̧le eo am, im n̄an aolepān Kabun̄ in.
Kajjojo iaan kōjeraam̧m̧an kein rekar itok āinwōt juon uwaak eo̧ron̄ im̧we ko an Jetōb Kwojarjar. Būreejtōn Lorenzo Snow ekar ba, “En̄in ej juon kōjeraam̧m̧an kileplep an aolep Armej ro Rekwojarjar … bwe ej ad jim̧we bwe en wōr an kam̧ool ko an Jetōb eo aolep raan in ad mour.”4
Juon iaan men ko Jetōb eo emakijkij an im̧we ļōmņak eo aō jān tōre eo kūr in aō ekāāl āinwōt Būreejtōn eo an Kabun̄ in ej ewi jon̄an an Irooj m̧ōņōņō in kwaļo̧k ļōmņak im Ankilaan. Jeraam̧m̧an in ilo ad bōk revelesōn ej juon iaan menin letok ko reļļap an Anij n̄an ajri ro Nejin.
Jān kam̧ool kein an Jetōb Kwojarjar, Irooj enaaj jipan̄ kōj ilo aolep jibadbad ko rejim̧we. Ij keememej ilo juon ruum̧ in m̧wim̧wij, ikar kalimjōk juon rinan̄inmej—jab jeļā ewi wāween kōm̧m̧ane jerbal eo ijjan̄in kar kōm̧m̧ane—im en̄jake Jetōb Kwojarjar kōmeļeļeik kōl eo ilo ļōmņak eo aō.5
N̄an kōkajoorļo̧k kajjitōk in m̧are eo aō n̄an Wendy, ikar ba n̄an e, “Ijeļā kōn revelesōn im wāween bōke.” N̄an nōbar e—im, ke ikar ekkatak, kadkad in—ekar dedeļo̧k an pukot im bōk revelesōn eo an make kōn kōm̧ro, eo me ekar kōperan e bwen ba aaet.
Āinwōt juon membōr in Doulul eo an Jon̄oulruo Rijilōk ro, ikar jar aolep raan kōn revelesōn im kar kam̧m̧oolol Irooj kōn aolep iien Ekar kōnono n̄an būruwō im ļōmņak eo aō.
Pijaiki mōk kabwilōn̄lōn̄ in! Jekdo̧o̧n kūr rot eo ad ilo Kabun̄ in, jemaron̄ jar n̄an Jemedwōj Ilan̄ im tōl im jineet, maron̄ bōk kakkōļ kōn kauwōtata ko im kabōņōņō ko, im maron̄ kōttōbrak men ko jejjab maron̄ kōm̧m̧ane kōj make. Eļan̄n̄e jenaaj lukkuun bōk Jetōb Kwojarjar eo im katak n̄an kile im meļeļe im̧we ko An, jenaaj bōk tōl ilo men ko reļļap im reddik.
Ke ikar jelm̧ae jerbal in epen n̄an kālet ruo aō rikakpilōklōk, ikar bwilōn̄ kōn wāween aō kar maron̄ kālet ruo iaer jān jon̄oulruo em̧m̧aan ro ij iakwe im kautiej er.
Kōnke ijeļā bwe im̧we eo em̧m̧an ej pedped wōt ioon meļeļe ko rem̧m̧an, ikar kweilo̧k juon ilo̧k juon ippān kajjojo Rijilōk.6 Innām ikar etal ettoļo̧k n̄an juon ruum̧ ejjenolo̧k ilo tampeļ eo im pukot ankilaan Irooj. Ij kam̧ool bwe Irooj ekar kōmeļeļeik eō n̄an kālet Būreejtōn Dallin H. Oaks im Būreejtōn Henry B. Eyring n̄an jerbal āinwōt rikakpilōklōk ro aō ilo Būreejtōnji eo Kein Kajuon.
Ilo ejja wāween in wōt, ij kam̧ool bwe Irooj ekar im̧we n̄an kūr Elder Gerrit W Gong im Elder Ulisses Soares n̄an maron̄ ekkapit āinwōt Rijilōk ro An. N̄a im kōj jej karuwaineneik er n̄an jerbal in jem̧doon im jipan̄ in eaorōk.
N̄e jej koba ippān doon āinwōt juon Ko̧o̧njeļ an Būreejtōnji eo Kein Kajuon im Doulul eo an Jon̄oulruo Rijilōk ro, ruum̧ in kweilo̧k ko am rej erom̧ ruum̧ in revelesōn. Jetōb eo ej alikkar an pād ie. Ilo am otaak ippān kadkad in m̧wil kein, juon jerbal ekam̧ōņōņō ej erļo̧ktok ilo an kajjojo Rijilōk kwaļo̧k ļōmņak ko an im meļeļe eo an. Men̄e jemaron̄ oktak ilo kōļmenļo̧kjeņ ko am ilo jinoin, iakwe eo jej en̄jake n̄an doon ej emakijkij. Bōro kuk eo ad ej jipan̄ kōj n̄an jeļā ankilaan Irooj kōn Kabun̄ in An.
Ilo kweilo̧k ko am, ro rellōn̄ rejjāmin tōl. Kōmij ron̄jake doon im kōnono ippān doon m̧ae iien kōmij juon wōt bōro. Innām n̄e kōm̧ij lukkuun errā ippān doon, kajoor in ippān an Jetōb Kwojarjar ej men eo ekabwilōn̄lōn̄! Kōmij en̄jake ta eo Rikanaan Josep Smith ekar jeļā ke ekar katakin, “Jān am en̄jake ippān doon kōm̧ij bōk kajoor ippān Anij.”7 Ejjeļo̧k juon uwaan Būreejtōnji eo Kein Kajuon ak Doulul eo an Jon̄oulruo Rijilōk eo enaaj likūt jokālet ko kōn Kabun̄ in an Irooj n̄an en̄jake in kālet eo an make.
Ro jeiū im jatū, ewi wāween ad maron̄ erom̧ m̧aan im kōrā ro—rikarejar ro rej āinwōt Kraist—Irooj eaikuji er bwe ren āinwōt? Ewi wāween ad maron̄ lo uwaak ko n̄an kajjitōk ko me rej kapok kōj? Eļan̄n̄e en̄jake eo ekabwilōn̄lōn̄ an Josep Smith ilo Bukwin Wōjke ko ej katakin kōj jabdewōt men, ej bwe lan̄ ko rej peļļo̧k im bwe Anij ej kōnono n̄an ajri ro Nejin.
Rikanaan Josep Smith ekar kōm̧m̧ane juon jon̄ak n̄an kōj n̄an ļoore ilo ad ņamejļan kajjitōk ko ad. Kar tōlļo̧k e n̄an kallim̧ur in an Jemes bwe eļan̄n̄e jej aikuj māletlet jemaron̄ kajjitōk ippān Anij, ļaddik in Josep ekar bōk kajjitōk in kaju n̄an Jemedwōj Ilan̄.8 ļaddik eo Josep ekar bōkļo̧k kajjitōk in an kaju n̄an Jemedwōj Ilan̄. Ekar kappukot revelesōn eo an make, im kappok eo an ekar kōpeļļo̧k tōre in bōk eddo.
Ilo ejja wāween in wōt, ta eo kwonej pukote bwen peļļo̧k n̄an eok? Māletlet rot ejabwe ippem̧? Ta eo kwoj en̄jake ej juon menin ekairir n̄an jeļā ak meļeļe? N̄an waanjon̄ak an Rikanaan Josep. Pukot juon jikin elūr ijo me komaron̄ in etal n̄ane aolep raan. Kōttāik eok make im̧aan Anij. Leļo̧k aolepān būruwōm̧ n̄an Jemedwōj Ilan̄. Oktakļo̧k n̄an E kōn uwaak ko im kōn aenōm̧m̧an.
Jar ilo etan Jisōs Kraist kōn inepata ko am̧, am̧ mijak, m̧ōjņo̧ ko am̧—aaet, jan̄uwaade ko an būruwōm̧. Innām ron̄jake! Je ļōmņak ko me rej itok n̄an kōļmenļo̧kjeņ eo am̧. Ļo̧o̧ke en̄jake ko am̧ im wōnm̧aanļo̧k wōt kōn m̧akūtkūt ko me kwōj bōk im̧we n̄an kōm̧m̧ani. Ilo am̧ āliji jerbal in raan n̄an raan, allōn̄ n̄an allōn̄, iiō n̄an iiō, kwonaaj “eddōkļo̧k n̄an pedped in revelesōn.”9
Anij ej ke kōņaan kōnono n̄an eok? Aaet! “Ejja āinwōt an pen an armej erļo̧ke pein jidikdik n̄an kabbōjrake Missouri reba ilo kooj eo … āinwōt n̄an kapan̄ Eo Ekajoor Bōtata jān lutōklaļtak jeļāļo̧kjeņ jān lan̄ ioon bōran Ro Rekwōjarjar ilo Raan Ko Āliktata.”10
Kwoj jab aikuj kōļmenļo̧kjeņ kōn ta eo em̧ool.11 Kwojjab aikuj in ļōmņak wōn eo komaron̄ lōke e. Jān revelesōn ko am̧ make, komaron̄ bōk am̧ make kam̧ool bwe Bok in Mormon ej naan an Anij, bwe Josep Smith ekar juon rikanaan, im bwe en̄in ej Kabun̄ eo an Irooj. Jekdo̧o̧n ta ro jet remaron̄ ba ak kōm̧m̧ane, ejjeļo̧k juon emaron̄ bōkļo̧k juon naan in kam̧ool lewaj n̄an būruwōm̧ im ļōmņak eo am̧ kōn ta eo ej m̧ool.
Ij rōjan̄ kom̧ bwe kom̧in kōkankanļo̧k maron̄ in jetōb eo ami kiiō n̄an bōk revelesōn ko ami make, bwe Irooj ekar kallim̧ur bwe “eļan̄n̄e kom̧ naaj [kappukot], kom̧ naaj bōk revelesōn ioon revelesōn, jeļāļo̧kjeņ ioon jeļāļo̧kjeņ, bwe kom̧in maron̄ jeļā mennin ittino ko im mennin aenōm̧m̧an ko—men ko rej bōktok m̧ōņōņō, men eo ej bōktok mour indeeo.”12
O, elōn̄ men ko reļļap Jemōm̧ ilo Lan̄ ekōņaan bwe kwōn jeļā. Āinwōt an Elder Neal A. Maxwell katakin, “N̄an ro ewōr mejāer n̄an lo im lo̧jiln̄ier n̄an ron̄, elukkuun alikkar bwe Jemed im Nejin rej leļo̧k men ko rettiņo̧ an lan̄!”13
Ejjeļo̧k juon men ej kōppeļļo̧k lan̄ āinwōt kobain an ļapļo̧k erreo, jejjet pokake, tiljek kappukot, emakijkij kwojkwoj ioon naan ko an Kraist ilo Bok in Mormon,14 im aolep iien kallim̧ur n̄an etal n̄an tampeļ im jerbal in menmenbwij.
Bwen ejjeļo̧k pere, emaron̄ wōr iien n̄e kwoj en̄jake āinwōt n̄e lan̄ ko rekilōk. Ak ij kallim̧ur bwe ilo ami wōnm̧aanļo̧k im pokake, kwaļo̧k kam̧oolol kōn aolep kōjeraam̧m̧an ko Irooj ej liwaj, im ilo ami kijenmej kautiej karōkan iien ko an Anij, kom̧ naaj bōk jeļāļo̧kjeņ eo im meļeļe eo kom̧ij pukote. Aolep kōjeraam̧m̧an ewōr ippān Irooj n̄an kom̧—barāinwōt kabwilōn̄lōn̄—naaj ļoori. En̄in ej ta revelesōn eo an juon make naaj kōm̧m̧ane n̄an kom̧.
Ij en̄jake ineem̧m̧an im m̧ōņōņō kōn ilju im jekļaj. Enaaj obrak kōn jeraam̧m̧an ko n̄an kōj kajjojo n̄an eddōkļo̧k, leļo̧k, im bōkļo̧k gospel eo n̄an aolep kona ko an laļ in. Bōtaab ij barāinwōt kile kōn raan ko repād im̧aan. Jej mour ilo juon laļ eo me oktak in m̧wil im eļapļo̧k jab errā. Emakijkij an waļo̧k ilo social media im jerbal in etale ko im nuuj ko ilo kajjojo awa 24 awa rej jum̧ae kōj kōn naan ko rekakjon̄jon̄. Eļan̄n̄e jekōņaan bwe en wōr ippād jabdewōt kōjatdikdik ej etale juon men n̄an lale aorōk in elōn̄ meļeļe ko im katak ko an armej rej jum̧aeik m̧ool eo, jej aikuj in ekkatak n̄an bōk revelesōn.
Rilo̧mo̧o̧r eo ad im Ripinmuur, Jisōs Kraist, enaaj kōm̧m̧ane jet iaan jerbal ko An rekajoor ikōtaan kiiō im iien eo Ej bar itok. Jenaaj lo kakōlkōl ko rekabwilōn̄lōn̄ me Anij Jemed im Nejin, Jisōs Kraist, ej tōl Kabun̄ in ilo wōj im aeboojoj. Ak ilo raan ko rej itok, enaaj maron̄ pen n̄an jo̧o̧r ilo jetōb ilo ad jab tōl, jineet, kaenōm̧m̧an, im bōk kareel eo an Jetōb Kwojarjar.
Ro jeiū im jatū rejitōn bōro, ij akweļap ippemi n̄an kōļapļo̧k maron̄ in jetōb eo ami n̄an bōk revelesōn. Kōm̧m̧an bwe Jabōt in Ijtō in en erom̧ juon iien ej kōm̧m̧an oktak in m̧akūtkūt ilo mour eo ami. Kālet n̄an kōm̧m̧ane jerbal eo ekwojarjar eaikuje lan̄lōn̄ kōn menin letok eo an Jetōb Kwojarjar im eo̧ron̄ ainikien Jetōb eo emakijkijļo̧k im alikkarļo̧k.
Kōn Moronai, ij kōketak kom̧ ilo Jabōt in Ijtō in n̄an “itok n̄an Kraist, im ekkejel wōt ioon aolep mennin letok em̧m̧an,”15 ijjino ippān menin letok eo an Jetōb Kwojarjar, eo me menin letok emaron̄ im enaaj ukōt mour eo ami.
Jej rikaļoor ro an Jisōs Kraist. Mool eo eaorōktata Jetōb Kwojarjar eo enaaj kam̧oole n̄an kom̧ ej bwe Jisōs ej RiKraist eo, Maan Nejin Anij emour. E emour! Ej ad Rijojomar ippān Jemen, Ad Riwaanjon̄ak, im ad Ripinmuur. Ilo Jabōt in Ijtō in, jej kakeememej en̄taan in pinmuur eo An, An lukkuun Jerkakpeje, im An kwojarjar.
En̄in ej Kabun̄ eo An, kar kōjepļaaktok jān Rikanaan Josep Smith. Ij kam̧ool, kōn naan in iakwe n̄an kom̧ kajjojo, ilo et eo ekwojarjar etan Jisōs Kraist, amen.