Otenanti ni Kamaiu E na Uota te Ota Nakoira ae Moan te Tamaroa
I berita bwa irakin otenanti ao karinean berita aika tabu akanne e na uota te ota ae moan te tamaroa nakoimi.
Tariu ao mwaneu, I kimwareirei ma ngkami inanon te euangkerio, ke ana reirei Kristo.
Te rao n te tai teuana e titirakina Unimwaane Neil L. Andersen, n te tai anne kain te kooram n te Itingaun, aron ana namakin n taetae i mataia 21,000 aomata n te Tienta ni Maungatabu. Unimwaane Andersen e kaeka, “Tiaki aomata aika 21,000 aika a kanakoa nanom, bon Taari ake 15 ake a tekateka iakuum.” I ngare n te tai anne, ma I a namakinna n te tai aei. I rang n tangiriia ao I kamatoaia mwaane aika 15 aikai bwa burabeti, taan mamata, ao taan karekei kaotioti.
Te Uea e tuanga Aberaam bwa rinanon ana kariki ao rinanon te nakoanibonga, ni kabane utu iaon te aba a na kakabwaiaki “ma ana kakabwaia te euangkerio … are te maiu ae akea tokina” (Aberaam 2:11; taraa naba kibu 2–10).
Berita ni kakabwaia akanne n te euangkerio ao te nakoanibonga a kaokaki nakon te aonaaba, ao imwiina n 1842, te Burabeti Iotebwa Timiti e karaoa te entaumente nakoia te mwaiti ae karako irouia mwaane ao aine. Mercy Fielding Thompson bon temanna mai ibuakoia. Te Burabeti e taku nakoina, “Te [entaumente aei] e na uotiko n otinako man te roo nakon te ota ae moan te tamaroa.”1
N te bong aei au marooro e na boboto iaon otenanti ni kamaiu—are e na uota te ota ae moan te tamaroa nakoim ao nakoiu.
Taian Otenanti ao Berita aika a Tabu
Inanon Te Koaua nakon te Onimaki ti warekia: “Te otenanti bon te mwakuri ae barongaaki raoi man ana kariaia te nakoanibonga. [Tabeua] otenant [ake] a kakawaki nakon te karietataaki .… ao aranaki bwa otenanti ni kamaiu. Kanoana bon te bwabetito, te kamatoaki, katabuaki nakon te Nakoanibonga ae te Merekitereka (ibukia mwaane), te entaumente n te tembora, ao te kabaeaki n te mare.”2
E reirei Unimwaane David A. Bednar, “Otenanti ni kamaiu ao n te karietataaki are e karaoaki n ana Ekaretia te Uea ae kaokaki … a karaoi aanga aika a kariaiakaki rinanona ike kakabwaia ma mwaakan karawa a riki bwa mwakoron maiura n aomata.”3
N ai aron te mwane are uoua iterana, otenanti ni kamaiu ni kabane a raonaki n ana berita aika tabu te Atua. Te Atua e berita nakoira kakabwaia ngkana ti kakaonimaki ni karinei berita akanne.
Te burabeti Amureki e taekinna, “Te maiu aei… bon aia tai … ni katauraoia ni kaitibo ma te Atua” (Aramwa 34:32). Tina kanga ni katauraoi? Man taura ni butimwaai taian otenanti. Ti riai naba, n ana taeka Beretitenti Nelson, “teimatoa ni karaoi berita ma te Atua.” Beretitenti Nelson e reitia, “Am motinnano n ira te Tia Kamaiu man karaoan berita aika tabu ma Ngaia ao ni kawakin berita aika tabu aikanne e na kauka te kawai nakon kakabwaia n tamnei ni kabane ao te tai ae tauraoi nakoia mwaane, aine, ao ataei n taabo ni kabane.”4
John ao Bonnie Newman, n ai aroia angiina iroumi, bon taan karekei kakabwaia n tamnei n aron are e berita iai nakoia Beretitenti Nelson. N te Tabati teuana, imwiin okina n taromauri ma teniman natina aika uarereke, Bonnie e taku nakon John, antai ae tiaki kaain te Ekaretia, “I aki kona ni karaoa aei ibon irou. Ko riai ni baireia ngkana ko kan ira au ekaretia ma ngaira ke ko rinea te ekaretia are ko kan nako iai n ikotaki, ma ataei a riai n ataia bwa tamaia e tangira naba te Atua.” Te Tabati are imwiina ao ni katoa Tabati ake imwiina, John e aki tii iri, e ibuobuoki naba, e katang biano ni uoote aika a mwaiti, mwaanga, ao Moanrinan inanon ririki. E reke au tai ni kaitibo ma John n Eberi 2015, ao ni kaitibora anne, ti maroroakinna bwa te kawai ae te kabanea n tamaroa e kona ni kaota ana tangira nakon Bonnie ni kairia nakon te tembora, ma e aki kona n riki aei ni karokoa e bwabetitoaki.
Imwiin taromaurina n Ana Ekaretia Iesu Kristo Ibukiia aika Itiaki ni Boong aika Kaitira inanon 39 te ririki, John e bwabetitoaki n 2015. Te ririki are imwiina, John ao Bonnie a kabaeaki n te Tembora i Memphis Tennessee, 20 te ririki imwiin reken ana entaumente neiei. Natiia te mwane ae 47 ana ririki, Robert, e taku nakon tamana, “Dad e a tia n rang n rikirake imwiin karekean te nakoanibonga irouna.” Bonnie e reitia, “John e a tia n riki bwa te aomata ae kukurei ao ni kakaunga, ma karekean ana otenanti ao karinean ana berita e a tia ni katamaroa arona ni karinerine.”
Ana Mwakuri ni Kamaiu Kristo ao Ana Banna ni Katooto
Ririki aika a bwakanako, Beretitenti Boyd K. Packer e kauring, “Aroaro aika raraoi n akean otenanti n te euangkerio e na bon aki kona ni kabooia ke ni karietataia aomata nako.”5 Ni koauana, ti tii kainnanoi otenanti ao berita aika tabu n oki nakon Tamara, ma ti kainnanoa naba Natina, Iesu Kristo, ao Ana Mwakuri ni Kamaiu.
Te Uea Beniamina e reirei bwa tii inanon ao rinanon aran Kristo are e na reke iai te kamaiuaki nakoia natiia aomata (taraa Motiaea 3:17; taraa naba Taekan te Onimaki 1:3).
Rinanon Ana mwakuri ni kamaiu, Iesu Kristo e kabooira man mwiin Bwakan Atam ao tia kona n rairannano ao n tokina te karietataaki. Inanon Maiuna, E katea te banna ni katooto nakoira ni karekean te otenanti ni kamaiu—are “e kaotaki iai mwaakan te aro n Atua” (R&B 84:20).
Imwiina te Tia Kamaiu e karekea te otenanti n te bwabetito “ibukin kakororaoan raoiroi ni kabane” (taraa 2 Nibwaai 31:5–6), Taatan e kaririia. N arora naba, kaririara e aki toki imwiin te bwabetito ke te kabaebae, ma karekean otenanti aika a tabu ao karinean berita ake irekereke a kaoniira n tamaroan te ota ao e anganiira te korakora ni kaitara ao n tokanikai iaon taian kariiri.
Kauring
Itaia e taetae ni burabeti bwa ni boong aika kaitira, “e kamaraiaki naba aon te aba … kioina ngkai a riaon taian tua” (Itaia 24:5; taraa naba R&B 1:15).
Te kauring naba anne, e kaotaki nakon te Burabeti Iotebwa Timiti, bwa bukina tabeman “a kaniia [te Uea] n riaia, … [ao] a reirei ibukin reirein aia tua aomata, ni karekea katotongan te atua, ma a kakea mwaakana.” (Joseph Smith—History 1:19).
Bwauro e kauring naba bwa a mwaiti aika “taani bakan tangira te Atua, ma [a kaakea ] mwakan tangirana: kona tannako mai irouia aikai” (2 Timoteo 3:5). I kaokia, man te tannako anne.
Mwaitin karirii ao kataaki n te maiu kaanga ai aron “kameanti aika kaakang”(Mataio 7:15). Bon te tia kawakin tiibu ni koaua are e tauraoi, kataniia, ao e kauringiia tiibu ao kain te ekaretia ngkana a roko kameanti (taraa Ioane 10:11–12). Ngkai taan ibuobuoki nakoia tiibu ake a ukoukoria ni katotonga maiun te Tia Kawakin Tiibu ae Raoiroi, tiaki ngaira taan kawakin tiibu naba n tamneira n aroia naba tabeman? Ma aia reirei burabeti, taan mamata, ao taan kaotioti, ao mwaakan ana bwaintangira te Tamnei aei Raoiroi, ti kona n nooria kameanti n roko ngkana ti taratara raoi ao n tauraoi. Ni kabotauana, ngkana ngaira taan kawakin tiibu aika ti aki kawakina raoi tamneira ao tamneia tabeman, a na kona ni kaoti ikoaki. Aki nanomwakara n tibwangara e karika maten tamneira ni kabane. I kaoi ngkami n tatabemani ngkami bwa kam na riki bwa taan kawakin tiibu aika kakaonimaki.
Taneiai ao te Koaua
Te toa bon te otenanti are e buokiira n reitinako ni karaoa ae raoiroi, ao n tau ni kanna bon kaotana bwa ti kawakin berita ni kabane ake a irekereke ma otenanti tabeua. Tabeua te ririki n nako, ngke kainnabau, Anita, ao ngai ti beku n te Mition i Arkansas Little Rock, I otinako n reirei ma uoman kairake ni mitinare. Inanon te reirei, te tari ae tamaroa are ti reireinna e taku, “I a tia n roko n ami taromauri, bukin tera ngkai kam riai ni kana te kariki ao ni mooi n te ran ni katoa Tabati? N ara aro, ti karaoia uoua te tai n te ririki, n te Itita ao n te Kiritimati, ao anne e rang n tau.”
Ti tibwaia ma ngaia te bwai are ti a tia n tuangaki bwa tina “aki toki ni bootaki n anaa te kariki ma te wain” (Moronaai 6:6; taraa naba R&B 20:75). Ti warekia ni kabaibati Mataio 26 ao 3 Nibwaai 18. E kaeka bwa e aki naba noora riaina.
Imwiina ti tibwa te kabootau aikai: “Iangoia bwa ko irekereke ni kabuanibwain te kaa ae rang kakaiaki. Kamwa tia n ikoaki ao kam kakaiaki. Temanna e biri irarikim, ngke e nooriko bwa ko kakaiaki, e orea te nambwa imetientii, 911. Ko a buokaki ao ni manga karekea te marurung.”
Ti titirakina te tari aei, “Ngke ko kona ni kina te tabo are ko mena iai, tera titiraki aika ko na anga?”
E taku, “N na tangiria ni kan ataia bwa I kanga n roko ikekei ao antai ae kuneai. N na bon bae ni karabwa teuanne ni katoa bong ibukina bwa e a tia ni kamaiuai.”
Ti tibwaia ma te tari ae raoiroi aei aron te Tia Kamaiu ni kawakin maiura ao arora are ti riai iai ni kaitaua ni katoa bong, ni katoa bong, ni katoabong!
Ngkanne ti titiraki, “N ataia bwa E anga Maiuna ibukim ao ibukira, ana mannra ae ko tangiria ni kana te kariki ao n nima te ran bwa kanikinaean Rabwatan ao raraan Kristo?”
E taku, “I a ota, I a ota. Ma teuana riki te bwai. Ami Ekaretia e kabotu.”
Nakon anne ti kaeka, “Tera ae kona karaoia ngkana te tia tei ibukin abam e rinnako ni mataroan mweengam?”
E taku, “N te tai naba anne, ni kibarake ma te kukurei.”
Ti titiraki, “Tiaki anne te bwai ae ko namakinna ngkan ko rianna n rinnako n aia umwantabu Aika Itiaki ni Boong Aika Kaitira—karinerine ibukin te Tia Kamaiu?”
E taku, “I a ota, I a ota!”
E kaoti n te taromauri n Taabatin te Itita anne ao e teimatoa n okioki.
I kaoira n titirakiniira ibon iroura, “Tera otenanti, n ikotaki ma te toa, ae I riai ni karekea, ao tera berita aika tabu aika I riai ni karaoia, kawakinna, ao ni karinea?” I berita bwa irakin otenanti ao karineaia berita aika tabu akanne e na uota te ota ae moan te tamaroa nakoimi. N aran Iesu Kristo, amen.