Ang Nagaluwas nga Mga Ordinansa Magahatag sa Aton sang Matahum nga Kapawa
Ang pagpartisipar sa mga ordinansa kag pagtuman sa kaupod sini nga mga kasugtanan magadala sa inyo sang matahum nga kapawa kag pagpangapin sa sining padayon nga nagadulom nga kalibutan.
Mga kautoran, malipayon gid ako nga makaupod kamo sa ebanghelyo, ukon doktrina ni Cristo.
Ang isa ka abyan sang una nagpamangkot kay Elder Neil L. Andersen, sadto miyembro sang Kapitoan, kon daw ano ang pamatyagan sang isa ka tawo nga nagapamulong sa atubang sang 21 mil ka mga tawo sa Conference Center. Si Elder Andersen nagsabat, “Indi ang 21 mil ka mga tawo ang nagapanerbyos sa imo; kondi ang 15 ka mga Brethren nga nagalingkod sa imo likoran.” Sadto nagkadlaw ako, apang karon mabatyagan ko ini. Ginapalangga ko gid kag ginasakdag ining 15 ka mga lalaki bilang mga propeta, mga mananan-aw, kag mga manugbugna.
Ang Ginuo nagsiling kay Abraham nga paagi sa iya kaliwat kag priesthood, ang tanan nga mga pamilya sa kalibutan pagabugayan “sang mga bugay sang Ebanghelyo, … bisan pa sang kabuhing walay katapusan” (Abraham 2:11; lantawa man mga bersikulo 2–10).
Ining ginsaad nga mga bugay sang ebanghelyo kag sang priesthood ginpanumbalik sa kalibutan, kag sadto, sang 1842, ang Propetang si Joseph Smith naghatag sang endowment sa pila ka mga lalaki kag mga babayi. Si Mercy Fielding Thompson isa sa ila. Ang Propeta nagsiling sa iya, “Ining [endowment] magadala paggwa sa imo halin sa kadulom padulong sa matahum nga kapawa.”1
Karon nga adlaw luyag ko magtumod parte sa nagaluwas nga mga ordinansa, nga magahatag sa inyo kag sa akon sang matahum nga kapawa.
Mga Ordinansa kag Mga Kasugtanan
Sa True to the Faith mabasa naton: “Ang isa ka ordinansa isa ka sagrado, kag pormal nga buhat nga ginhimo paagi sa awtoridad sang priesthood. [Ang] mga ordinansa [nga] kinahanglanon sa aton eksaltasyon … ginatawag nga nagaluwas nga mga ordinansa. Ang mga ini nagalakip sa bunyag, konpirmasyon, kag pag-ordin sa Melchizedek Priesthood (para sa mga lalaki), ang endowment sa templo, kag ang paghugpong sa kasal.”2
Si Elder David A. Bednar nagtudlo, “Ang mga ordinansa sang kaluwasan kag eksaltasyon nga ginahatag sa ginpanumbalik nga Simbahan sang Ginuo … nagabuhat bilang may awtoridad nga mga alagyan kon sa diin ang mga bugay kag gahum sang langit sarang mag-ilig padulong sa aton tagsa nga mga kabuhi.”3
Subong sang isa ka sensilyo nga may duha ka bahin, ang tanan nga mga ordinansa ginaupdan sang mga kasugtanan upod sa Dios. Ang Dios nagasaad sa aton sang mga bugay kon kita himpit nga magtuman sa yadtong mga kasugtanan.
Ang propetang si Amulek nagpahayag, “Ini … amo ang tion … sa paghanda nga mag-atubang sa Dios” (Alma 34:32). Paano kita maghanda? Paagi sa takos nga pagbaton sang mga ordinansa. Dapat man kita, sa mga pulong ni Presidente Russell M. Nelson, “magpabilin sa banas sang kasugtanan.” Si Presidente Nelson nagpadayon, “Ang panaad ninyo nga magsunod sa Manluluwas paagi sa paghimo sang mga kasugtanan sa Dios kag dayon ang magtuman sa yadtong mga kasugtanan magabukas sang ganhaan sang kada espirituhanon nga bugay kag pribilihiyo nga ara para sa mga lalaki, mga babayi, kag mga kabataan sa bisan diin.”4
Sanday John kag Bonnie Newman, kasubong sang madamo sa inyo, nakabaton sang espirituahanon nga mga bugay nga ginsaad ni Presidente Nelson. Isa ka Domingo, pagkatapos nga magsimba upod ang ila tatlo ka bata, si Bonnie nagsiling kay John, nga indi miyembro sang Simbahan, “Indi ko sarang mahimo ini nga nagaisahanon. Kinahanglan mo nga magpamat-ud kon bala mag-upod ka sa akon simbahan upod sa amon ukon magpili ka sang isa ka simbahan nga sarang kita tanan mag-ululupod, sanglit kinahanglan sang mga bata nga mabal-an nga ang ila amay nagapalangga man sa Dios.” Sang dason nga Domingo kag sa nag-abot pa nga mga Domingo, si John wala lamang magsimba; sia nag-alagad man, nagtokar sang piano sa madamo nga mga ward, mga branch, kag mga Primary sa nagligad nga mga tuig. Pribilihiyo ko nga makita si John sang Abril 2015, kag sa amon pagkit-anay, ginhambalan namon nga ang pinakamaayo nga paagi nga mapakita niya ang iya paghigugma kay Bonnie amo ang magdala sa iya sa templo, apang ina indi sarang nga matabo luwas lamang kon sia mabunyagan.
Pagkatapos nga nagsimba sa Ang Simbahan ni JesuCristo sang Mga Santos sa Ulihing Mga Adlaw sang 39 anyos, si John nabunyagan sang 2015. Pagkatapos sang isa ka tuig, si John kag Bonnie ginhugpong sa Memphis Tennessee Temple, 20 anyos pagkatapos nga si Bonnie nakabaton sang iya kaugalingon nga endowment. Ang ila 47-anyos nga anak nga lalaki, si Robert, nagsiling parte sa iya amay, “si Dad matuod-tuod gid nga nangin maayo sugod nga sia nagbaton sang priesthood.” Dugang ni Bonnie, “si John dalayon nga malipayon kag masinadyahon nga tawo, apang sa iya pagbaton sang mga ordinansa kag sa pagtuman niya sang iya mga kasugtanan, ini labi nga nagpalambo sang iya pagkamalolo.”
Ang Pagpasag-uli ni Cristo kag ang Iya Halimbawa
Madamo na nga tuig ang nagligad, si Presidente Boyd K. Packer nagpaandam, “Ang maayo nga pamatasan kon wala ang mga ordinansa sang ebanghelyo indi makatubos ukon makapahitaas sa katawhan.”5 Sa katunayan, indi lamang kinahanglan naton ang mga ordinansa kag mga kasugtanan agud makabalik sa aton Amay sa langit, apang kinahanglan man naton ang Iya Anak, si JesuCristo, kag ang Iya Pagpasag-uli.
Si Haring Benjamin nagtudlo nga paagi lamang sa ngalan ni Cristo nga ang kaluwasan sarang maangkon sang mga anak sang katawhan (lantawa Mosiah 3:17; lantawa man Articles of Faith 1:3).
Paagi sa Iya Pagpasag-uli, si JesuCristo nagtubos sa aton halin sa mga bunga sang Pagkapukan ni Adan kag ginhimo nga sarang mahimo ang aton paghinulsol kag palaaboton nga eksaltasyon. Paagi sa Iya kabuhi, Sia naghatag sang halimbawa para sa aton sa pagbaton sang nagaluwas nga mga ordinansa, kon diin “makit-an ang gahum sang pagkadiosnon” (D&C 84:20).
Pagkatapos nga mabaton sang Manluluwas ang ordinansa sang bunyag agud “magtuman sa tanan nga pagkamatarong” (lantawa 2 Nephi 31:5–6), si Satanas nagsulay sa Iya. Sa pagkapareho, ang aton mga pagsulay wala nagauntat pagkatapos sang aton bunyag ukon paghugpong, apang ang pagbaton sang sagradong mga ordinansa kag pagtuman sa kaupod nga mga kasugtanan nagapuno sa aton sang matahum nga kapawa kag nagahatag sa aton sang kabakod nga magpamatok kag maglutos sa mga pagsulay.
Paandam
Si Isaiah nagpanagna nga sa mas ulihing mga adlaw, “ang kalibutan mangin magarok … bangud ang katawhan … nagabaylo sa ordinansa” (Isaiah 24:5; lantawa man D&C 1:15).
Ang isa pa ka pareho nga paandam, ginbugna sa kay Propetang si Joseph Smith, amo nga ang pila ka tawo “magpalapit sa [Ginuo] paagi lamang sa ila mga bibig, … [kag] sila magtudlo bilang mga doktrina sang mga kasugoan sang tawo, nga may porma sang pagkadiosnon, apang ginapanginwala nila ang gahum sini” (Joseph Smith—History 1:19).
Si Paul nagpaandam man nga may madamo nga tawo nga may ara sang “porma sang pagkadiosnon, apang [ginapanginwala] ang gahum sini: palagyohi ang mga ini” (2 Timothy 3:5). Ginasulit ko, palagyohi ang mga ini.
Ang madamo nga mga pagpasala kag mga pagsulay sang kabuhi pareho sang “ginagutom nga mga lobo” (Matthew 7:15). Ang matuod nga manugbantay ang magahanda, magapangapin, kag magapaandam sa mga karnero kag sa panong kon ining mga lobo nagapalapit (lantawa John 10:11–12). Bilang kabulig nga mga manugbantay nga nagatinguha sa pagsunod sa perpektong kabuhi sang Maayong Manugbantay, indi bala mga manugbantay kita sang aton mga kalag subong man sa kalag sang iban? Dala ang laygay sang mga propeta, mga mananan-aw, kag mga manugbugna, nga bag-o lang naton ginsakdag, kag upod ang gahum kag dulot sang Balaan nga Espiritu, makit-an naton ang mga lobo nga nagapalapit kon kita nagabantay kag handa. Sa pagkatuhay, kon kita pasapayan nga mga manugbantay sang aton mga kalag kag sa mga kalag sang iban, laban nga may mga madula. Ang pagpasapayan nagapadulong sa mga pagkadula. Ginaimbitar ko ang kada isa sa aton nga mangin himpit nga manugbantay.
Eksperyensya kag Pagpamatuod
Ang sacramento isa ka ordinansa nga nagabulig sa aton nga magpabilin sa banas, kag ang pag-ambit sini sing takos amo ang ebidensya nga kita nagatuman sa mga kasugtanan nga kaupod sa iban pa nga mga ordinansa. Sang pila ka tuig nga nagligad, samtang ang asawa ko, si Anita, kag ako nagaalagad sa Arkansas Little Rock Mission, nag-upod ako sa duha ka batan-on nga mga misyonero agud magtudlo. Sa tion sang pagtudlo, ang maayo nga lalaki nga amon gintudloan nagsiling, “Nakasimba ako sa inyo simbahan; ngaa kamo nagakaon sang tinapay kag nagainom sang tubig kada Domingo? Sa amon simbahan, ginahimo namon ini sing duha lamang ka beses sa isa ka tuig, sa Domingo sang Pagkabanhaw kag sa Paskua, kag ina tuman ka makahulogan.”
Ginpaambit namon sa iya nga kita ginmandoan nga “magtililipon sang masami nga ululupod agud mag-ambit sang tinapay kag bino” (Moroni 6:6; lantawa man D&C 20:75). Ginbasa namon sing matunog ang Matthew 26 kag 3 Nephi 18. Sia nagsabat nga indi gihapon niya maintiendihan kon ngaa ini kinahanglan.
Dayon ginpaambit namon ining pagpaanggid: “Halimbawa naaksidente ikaw sang seryoso sa pagpamaneho. Nasamaran ka kag lipong. May nag-agi, kag sang makit-an ka nga lipong, nagtawag sa numero nga pang-emerhensya, 911. Gintabangan ka kag naumpawan liwat.”
Ginpamangkot namon ining utod, “Sang matalupangdan mo ang imo mga palibot, ano ang mga pamangkot mo?”
Siling niya, “Luyag ko mabal-an kon paano ako nakalab-ot didto kag kon sin-o ang nakasapo sa akon. Luyag ko sia pasalamatan kada adlaw bangud ginluwas niya ang akon kabuhi.”
Ginpaambit namon sa sining maayong utod kon paano ang Manluluwas nagluwas sa aton mga kabuhi kag kon daw ano naton dapat pasalamatan Sia sa kada adlaw, sa kada adlaw, sa kada adlaw!
Dayon kami nagpamangkot, “Sa pagkahibalo nga Sia naghatag sang Iya kabuhi para sa imo kag sa amon, pila ka beses ang luyag mo nga magkaon sang tinapay kag mag-inom sang tubig bilang mga simbolo sang Iya lawas kag dugo?”
Siling niya, “Naintiendihan ko na, naintiendihan ko na. Apang isa pa ka butang. Ang inyo simbahan indi pareho ka masinadyahon subong sang amon simbahan.”
Parte sina kami nagsabat, “Ano ang himuon mo kon ang Manluluwas nga si JesuCristo magsulod sa inyo simbahan?”
Siling niya, “Sa gilayon, magaluhod ako.”
Nagpamangkot kami, “Indi bala amo sina ang imo mabatyagan kon ikaw magsulod sa mga chapel sang mga Ulihing Santos—pagtahud para sa Manluluwas?”
Siling niya, “Naintiendihan ko na, naintiendihan ko na!”
Nagsimba sia sinang Domingo sang Pagkabanhaw kag nagpadayon sa pagbalik.
Ginaimbitar ko ang kada isa sa aton nga magpamangkot sa aton mga kaugalingon, “Ano nga mga ordinansa, kalakip ang sacramento, ang kinahanglan ko nga batonon, kag ano nga mga kasugtanan ang kinahanglan ko nga buhaton, tumanon, kag padunggan?” Ginasaad ko sa inyo nga ang pagpartisipar sa mga ordinansa kag pagtuman sa kaupod nga mga kasugtanan magahatag sa inyo sang matahum nga kapawa kag pagpangapin sa sining nagapadayon sa pagdulom nga kalibutan. Sa ngalan ni JesuCristo, amen.