Tej Kab Ke Cawm Seej Yuav Coj Qhov Kaj Zoo Kawg Nkaus Los rau Peb
Thaum nej koom ua tej kab ke thiab ua raws li tej kev khi lus ces nej yuav txais qhov kaj zoo kawg nkaus thiab kev pov hwm nyob hauv lub ntiaj teb tsaus ntuj nti no.
Cov kwv tij thiab cov muam, kuv zoo siab rau nej vim yog txoj moo zoo, los yog Khetos txoj lus qhuab qhia.
Muaj ib zaug Txwj Laug Neil L. Andersen, uas thaum ntawd koom Pawg Xya Caum, nws ib tug phooj ywg nug nws saib zoo li yuav hais lus rau 21,000 tus neeg hauv lub tsev rau rooj sab laj. Txwj Laug Andersen teb hais tias, “Tsis yog cov neeg 21,000 tus uas ua rau yus ntshai; twb yog 15 tug Kwv Tij uas zaum kuv nram qab uas ua rau yus ntshai.” Kuv luag thaum ntawd, tiam sis kuv kuj xav li ntawd tam sim no. Kuv hlub thiab txhawb nqa 15 tug txiv neej no ua yaj saub, neeg pom tau, thiab neeg qhia kev tshwm sim.
Tus Tswv qhia Anplaham hais tias dhau ntawm nws cov xeeb leej xeeb ntxwv thiab lub pov thawj hwj, tag nrho tej tsev neeg hauv lub ntiaj teb yuav tau koob hmoov “vim muaj tej koob hmoov ntawm txoj Moo Zoo, … twb yog lub neej nyob mus ib txhis li” (Anplaham 2:11; kuj saib nqes 2–10).
Tej koob hmoov cog tseg ntawm txoj moo zoo thiab lub pov thawj hwj rov qab los txum tim rau hauv lub ntiaj teb no, thiab tom qab ntawd, thaum xyoo 1842, tus Yaj Saub Yauxej Xamiv tau muab lub vaj txiaj ntsim rau ob peb tug poj niam thiab txiv neej. Mercy Fielding Thompson yog ib tug. Tus Yaj Saub hais rau nws hais tias, “Lub [vaj txiaj ntsim] no yuav coj koj tawm ntawm qhov tsaus los rau qhov kaj zoo kawg nkaus.”1
Hnub no kuv xav tsom ntsoov tej kab ke uas cawm tau peb, uas yuav coj nej thiab kuv los rau hauv qhov kaj zoo kawg nkaus.
Tej Kab Ke thiab Kev Khi Lus
Nyob hauv phau ntawv True to the Faith peb nyeem hais tias: “Ib txoj kab ke yog ib yam uas dawb ceev thiab coj tus tus thiab yog ua dhau ntawm txoj cai ntawm lub pov thawj hwj. [Tej] kab ke [uas] tseem ceeb tshaj plawg rau peb txoj kev tsa nto … yog hu ua tej kab ke cawm seej. Muaj kev cai raus dej, kev pom zoo, kev tsa rau lub Pov Thawj Hwj Mekixedes (rau txiv neej), lub tuam tsev lub vaj txiaj ntsim, thiab kev sib khi ua txij ua nkawm.”2
Txwj Laug David A. Bednar tau qhia hais tias, “Cov kab ke cawm seej thiab kev tsa nto uas ua nyob hauv tus Tswv lub Koom Txoos … yog tej txoj kev uas peb txais tau cov koob hmoov thiab lub hwj chim saum ntuj ceeb tsheej nyob rau hauv peb lub neej.”3
Ib yam li ob sab ntawm ib lub nyiaj npib, tag nrho tej kab ke cawm seej yog nyob ua ke nrog tej kev khi lus nrog Vajtswv. Vajtswv cog lus tias peb yuav txais tau koob hmoov yog tias peb saib tej kev khi lus ntawd rau nqi.
Tus yaj saub Amulej tau tshaj tawm hais tias, “Lub neej no yog lub caij…npaj mus ntsib Vajtswv” (Amas 34:32). Peb yuav ua li cas npaj? Thaum peb ua neeg dawb huv thiab txais tej kab ke. Peb kuj yuav tsum, siv Thawj Tswj HwmRussell M. Nelson cov lus, “taug raws txoj kev ua raws li tej kev khi lus.” Thawj Tswj Hwm Nelson hais txuas ntxiv hais tias, “Qhov uas nej cog lus tseg hais tias nej yuav ua raws li tus Cawm Seej hais thaum nej nrog Nws sib khi lus thiab tom qab ntawd ceev tej kev khi lus ntawd es ua li no yuav pab nej txais tau txhua txoj koob hmoov ntawm sab ntsuj plig uas nej txais tau, txawm yog nej yog txiv neej, poj niam, los yog me nyuam huv tib si.”4
John thiab Bonnie Newman, ib yam li nej coob leej ntau tus, yog neeg txais tej koob hmoov ntawm sab ntsuj plig uas Thawj Tswj Hwm Nelson cog lus tias yuav txais no. Muaj ib Hnub Caiv, tom qab Bonnie nrog nws peb tug me nyuam yau mus rau lub koom txoos, nws hais rau John, uas tsis yog mej zeej, hais tias, “Kuv ua li no tsis tau kuv ib leeg xwb. Koj yuav tsum txiav txim siab saib koj puas yuav mus tom kuv lub koom txoos nrog peb los yog koj xaiv lwm lub koom txoos uas peb mus tau ua ke, tiam sis cov me nyuam yuav tsum paub hais tias lawv txiv hawm Vajtswv thiab.” Hnub Caiv tom qab ntawd thiab txhua Hnub Caiv txij thaum ntawd, John mus rau lub koom txoos; tiam sis tsis yog li ntawd xwb, nws kuj ua hauj lwm thiab ntaus nkauj rau ntau pawg ntseeg, ceg ntseeg, thiab Koom Haum Me Nyuam Yaus. Kuv tau muaj lub cib fim ntsib John thaum lub Plaub Hlis Ntuj xyoo 2015, thiab thaum wb sib ntsib ntawd, wb tau sib tham txog qhov zoo tshaj uas nws ua tau kom qhia Bonnie tias nws hlub nws, es qhov ntawd yog John coj tau Bonnie mus tom lub tuam tsev, tiam sis ua tsis tau li ntawd mus txog thaum John ua kev cai raus dej.
Tom qab uas John mus tom Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg tau 39 xyoos lawm, nws ua kev cai raus dej thaum xyoo 2015. Ib xyoos tom qab ntawd, John thiab Bonnie ua kev cai sib khi hauv lub Tuam Tsev Memphis Tennessee, 20 xyoo tom qab Bonnie tau txais nws lub vaj txiaj ntsim. Nkawd tus tub muaj 47 xyoo, npe hu ua Robert, hais txog nws txiv hais tias, “Kuv txiv tau tawg paj txi txiv kawg nkaus li txij thaum nws txais tau lub pov thawj hwj.” Bonnie hais txuas ntxiv hais tais, “John yeej los yog ib tug neeg zoo siab thiab luag nyav, tiam sis qhov uas nws tau txais tej kab ke thiab hawm nws tej kev khi lus tau pab ua rau nws haj yam siab zoo.”
Khetos txoj Kev Theej Txhoj thiab Nws tus Yam Ntxwv
Ntau xyoo tas los no, Thawj Tswj Hwm Boyd K. Packer ceeb toom hais tias, “Kev coj cwj pwm zoo tiam sis tsis muaj tej kab ke ntawm txoj moo zoo yeej yuav cawm tsis tau los yog tsa nto tsis tau tib neeg ntiaj teb.”5 Tiag tiag, tsis yog peb toob kas tej kab ke thiab tej kev khi lus kom thiaj rov qab mus ntsib Leej Txiv xwb, tiam sis peb kuj toob kas Nws Leej Tub, Yexus Khetos, thiab Nws txoj Kev Theej Txhoj.
Vajntxwv Npeyamis qhia tias tsuas yog nyob hauv thiab dhau ntawm Khetos lub npe uas txoj kev cawm seej yuav los tau rau tib neeg ntiaj teb (saib Mauxiyas 3:17; kuj saib Tej Nqe Kev Ntseeg 1:3).
Dhau ntawm Nws txoj Kev Theej Txhoj, Yexus Khetos txhiv peb dim ntawm qhov uas muaj vim yog Adas txoj Kev Poob thiab ua kom peb thiaj hloov siab lees txim tau thiab txais tau txoj kev tsa nto. Dhau ntawm Nws lub neej, Yexus ua piv txwv rau peb txais tej kab ke cawm seej, es nyob hauv “pom tau lub hwj chim ntawm Vajtswv tshwm sim” (Q&K 84:20).
Tom qab tus Cawm Seej txais txoj kab ke ntawm kev cai raus dej kom “ua raws li txoj kev ncaj ncees” (saib 2 Nifais 31:5–6), Dab Ntxwg Nyoog ntxias Nws. Ib yam li ntawd, tej kev haub kev ntxias uas peb muaj tsis kawg tom qab ua kev cai raus dej los yog txoj kev sib khi, tiam sis qhov uas peb txais tej kab ke dawb ceev thiab ua raws li tej kev khi lus uas muaj nrog ua rau peb muaj qhov kaj puv npo thiab muab dag zog rau peb kov yeej tau thiab tiv tau tej kev haub kev ntxias.
Lus Ceeb Toom
Yaxayas qhia tej uas yuav muaj los yav tom ntej hais txog lub caij nyoog kawg hais tias, “lub ntiaj teb kuj raug puas lawm … vim lawv tau … hloov txoj kab ke” (Yaxayas 24:5; kuj saib Q&K 1:15).
Ib txoj lus ceeb toom zoo li ntawd, uas yog tshwm sim rau tus Yaj Saub Yauxej Xamiv, yog qhov uas ib txhia neeg “txav ze [tus Tswv] nrog lawv di ncauj, … [thiab] lawv muab neeg tej lus txib los ua lus qhuab qhia, lawv muaj tus yam ntxwv zoo li Vajtswv, tiam sis lawv xyeej lub hwj chim ntawd” (Joseph Smith—History 1:19).
Pov Lauj kuj ceeb toom hais tias coob leej ntau tus yuav “hais tias lawv yog cov uas ntseeg Vajtswv. Tiam sis lawv yeej tsis ua raws li Vajtswv txoj kev cai. [Nej] tsis txhob nrog cov neeg uas zoo li ntawd ua ke hlo li” (2 Timautes 3:5). Kuv rov qab hais dua ib zaug, txhob nrog cov neeg zoo li ntawd.
Tej kev haub kev ntxias ntau ntawm peb lub neej no yeej zoo li “hma uas ntxi hniav” (Mathais 7:15). Twb yog tus tseem tub yug yajj uas yuav npaj, pov hwm, thiab ceeb toom tus yaj thiab pab yaj thaum cov hma no tab tom nam los (saib Yauhas 10:12). Ua cov uas pab tus Tswv Yug Yaj Zoo thiab uas xav ua raws li Nws tus yam ntxwv zoo, puas yog peb yog tub yug yaj rau peb tus kheej ib yam li peb yog rau lwm tus neeg? Vim yog muaj tej lus qhuab qhia los ntawm cov yaj saub, cov pom tau, thiab cov txais kev tshwm sim uas peb nyuam qhuav tsa tes txhawb nqa, thiab thaum muaj lub hwj chim thiab qhov txiaj ntsim ntawm tus Vaj Ntsuj Plig Dawg Huv, peb pom tau cov hma nam los yog tias peb ceev faj thiab npaj zoo. Qhov fab ntxeev, thaum peb lam tau lam ua tub yug yaj rau peb tus kheej thiab lwm tus neeg, ces yeej yuav muaj kev puas tsuaj. Kev lam tau lam ua coj tau mus rau kev puas tsuaj. Kuv caw peb txhua tus los mus ua ib tug tub yug yaj zoo.
Qhov uas Muaj Los thiab Lus Tim Khawv
Lub cim nco txog yog ib txoj kab ke uas pab peb taug txoj kev yog, thiab thaum peb tsim nyog noj ces qhov ntawd ua puav pheej hais tias peb ceev tej kev khi lus uas nyob nrog lwm txoj kab ke. Ob peb xyoos dhau los, thaum kuv poj niam, Anita, thiab kuv ua hauj lwm rau hauv qhov Chaw Tshaj Tawm txoj Moo Zoo Little Rock, kuv tawm mus nrog ob tug tub txib mus qhia neeg. Thaum tseem tab tom qhia, tus neeg uas peb qhia ntawd hais tias, “Kuv twb mus tom nej lub koom txoos lawm; yog vim li cas nej thiaj yuav tsum noj khob cij thiab haus dej txhua Hnub Caiv? Hauv peb lub koom txoos, peb ua ib xyoos ob zaug, thaum hnub Easter thiab Christmas, thiab nws muaj nuj nqis heev rau peb.”
Peb tau qhia rau nws hais tias tus Tswv txib peb kom “sib ntsib ua ke tsis tu ncua noj cov mov mog thiab haus cov dej” (Maulaunais 6:6; kuj saib Q&K 20:75). Peb tau nyeem nrov Mathais 26 thiab 3 Nifais 18. Nws tseem teb hais tias nws tsis to taub ua li cas thiaj yuav tsum ua li ntawd.
Ces peb qhia ib qho piv txwv rau nws hais tias: “Cia li xav hais tias yog koj raug sab heev vim yog tsheb sib tsoo. Koj raug sab heev thiab looj hlias lawm. Muaj ib tug neeg khiav los, pom tias koj looj hlias lawm, ces nws ntaus tus naj npawb xov tooj rau kam ceev, 911. Muaj neeg tuaj pab koj thiab koj xeev los.”
Peb nug tus neeg no hais tias, “Thaum koj xeev los thiab pom tias koj nyob qhov twg, koj yuav muaj lus nug dab tsi?”
Nws teb hais tias, “Kuv yuav xav paub saib yog vim li cas kuv nyob ntawd thiab leej twg nrhiav tau kuv. Kuv yuav xav ua tus neeg ntawd tsaug txhua hnub vim nws cawm kuv txoj sia lawm.”
Ces peb qhia tus neeg siab zoo no hais tias tus Cawm Seej tau cawm peb txoj sia lawm thiab hais tias tsim nyog peb ua Nws tsaug txhua txhua hnub tiag!
Ces peb nug hais tais, “Nim no koj paub hais tias Nws muab Nws txoj sia theej koj thiab peb, ces koj yuav xav noj mov mog thiab haus dej ntau npaum li cas ua tej cim txog Nws lub cev thiab cov ntshav?”
Nws hais tias, “Kuv nkag siab lawm. Tiam sis ib qho ntxiv. Nej lub koom txoos tsis lom zem npaum li peb li.”
Ces peb teb hais tias, “Yog tias tus Cawm Seej Yexus Khetos tau nkag los hauv koj lub tsev, koj yuav ua li cas?”
Nws teb hais tias, “Kuv mam li txhos caug tam sim ntawd.”
Peb nug hais tias, “Puas yog koj xav li ntawd thaum koj nkag peb ib lub tsev teev ntuj—kev tswm seeb rau tus Cawm Seej?”
Nws hais tias, “Aws, to taub lawm, to taub lawm!”
Nws txawm tuaj rau lub koom txoos Hnub Caiv Easter ntawd thiab pheej rov qab tuaj.
Kuv caw peb txhua tus kom nug peb tus kheej hais tias, “Muaj tej kab ke twg, suav lub cim nco txog, uas tsim nyog kuv txais, thiab muaj tej kev khi lus twg uas tsim nyog kuv khi, ceev, thiab saib rau nqi?” Kuv cog lus hais tias thaum nej koom ua tej kab ke thiab ua raws li tej kev khi lus ces nej yuav txais ib qho kaj zoo heev thiab kev pov hwm nyob hauv lub ntiaj teb tsaus ntuj nti no. Los ntawm Yexus Khetos lub npe, amees.