Gagmay ug Yano nga mga Butang

Minahal kong mga kaigsoonan, sama kaninyo, natandog kaayo ako ug nalig-on ug nadasig sa mga mensahe ug musika ug sa mga pagbati sa panagpundok karon. Sigurado nga mamulong ako kaninyo sa pagpahayag sa mga pasalamat sa atong mga kaigsoonan kinsa, isip mga instrumento sa mga kamot sa Ginoo, mihatag kanato sa makalig-on nga epekto niining panagpundok karon.

Mapasalamaton ko nga mamulong niining nanambong sa Pasko sa Pagkabanhaw. Karon miapil kita sa ubang mga Kristiyano sa pagsaulog sa Pagkabanhaw ni Ginoong Jesukristo. Alang sa mga miyembro sa Ang Simbahan ni Jesukristo sa mga Santos sa Ulahing mga Adlaw, ang literal nga Pagkabanhaw ni Jesukristo usa ka haligi sa atong pagtuo.

Tungod kay nagtuo kita sa mga istorya sa Biblia ug sa Basahon ni Mormon mahitungod sa literal nga Pagkabanhaw ni Jesukristo, nagtuo usab kita sa daghang mga pagtulun-an sa kasulatan nga ang susama nga pagkabanhaw moabut ngadto sa tanang mortal nga sukad nakapuyo niini nga yuta. Kana nga pagkabanhaw naghatag nato sa unsay gitawag ni Apostol Pablo nga “usa ka buhing paglaum” (1 Pedro 1:3). Kanang buhing paglaum mao ang atong kombiksyon nga ang kamatayon dili ang katapusan sa atong pagkatawo apan gikinahanglan nga lakang ngadto sa maloloy-ong plano sa atong Langitnong Amahan alang sa kaluwasan sa Iyang mga anak. Kana nga plano nagkinahanglan og transisyon gikan sa pagka-mortal ngadto sa pagka-imortal. Ang importante nga baruganan niana nga transisyon mao ang pag-abut sa kamatayon ug mahimayaong kabuntagon nga nahimong posible sa Pagkabanhaw sa atong Ginoo ug Manluluwas nga atong gisaulog niining Dominggo sa Pasko sa Pagkabanhaw.

Sa usa ka nindot nga himno kansang mga pulong gisulat ni Eliza R. Snow, kita mokanta:

Isip kabahin sa pagtuman nianang balaan nga plano ug panag-uyon, magpundok kita sa mga miting, lakip niini nga komperensya, sa pagtudlo ug pag-awhag sa usag usa.

Karong buntaga nadasig ako nga gamiton isip tema sa akong pakigpulong ang pagtulun-an ni Alma ngadto sa iyang anak nga si Helaman, nga narekord sa Basahon ni Mormon: “Pinaagi sa gagmay ug yano nga mga butang ang mga dagko nga butang ipahinabo” (Alma 37:6).

Gitudloan kita sa daghang gagmay ug yanong mga butang sa ebanghelyo ni Jesukristo. Kinahanglan nga mapahinumduman kita nga kon tingubon sulod sa taas nga panahon, kining daw gagmayng mga butang makahimo og dagkong mga butang. Aduna nay daghang mga pakigpulong niini nga hilisgutan sa mga General Authority ug sa ubang tinahud nga mga magtutudlo. Ang hilisgutan importante kaayo nga gibati nako nga balikon kini sa paghisgot.

Gipahinumduman ako sa gahum sa gagmay ug yanong mga butang sa unsay akong nakita samtang naglakaw ako usa ka buntag niana. Ania ang litrato nga akong nakuha. Ang baga ug lig-ong semento sa sidewalk nangliki. Resulta ba kini sa dako ug kusog nga pagtay-og gikan sa ilawom? Dili, ang hinungdan niini nga pagliki mao ang hinay, ginagmay nga pagtubo sa usa sa mga gamut nga migawas gikan sa duol nga kahoy. Ania ang susama nga ehemplo nga akong nakita sa laing dalan.

Imahe

Nangliki nga sidewalk

Imahe

Laing liki sa sidewalk

Ang kusog nga pagduot nga nakapaliki niining gahi nga semento sa sidewalk gamay ra kaayo kon sukdon sa inadlaw-adlaw o bisan binulan, apan ang epekto niini paglabay sa panahon dako kaayo.

Mao usab ang dakong epekto paglabay sa panahon sa gagmay ug yanong mga butang nga atong gitudlo diha sa mga kasulatan ug sa buhi nga mga propeta. Ikonsiderar ang pagtuon sa kasulatan nga gitudlo kanato nga iapil sa atong inadlaw-adlaw nga kinabuhi. O ikonsiderar ang personal nga mga pag-ampo ug ang pagluhod diha sa mga pag-ampo sa pamilya nga gihimo kanunay sa matinud-anong mga Santos sa Ulahing mga Adlaw. Ikonsiderar ang pagtambong sa mga klase sa seminary alang sa kabatan-onan o institute alang sa mga young adult. Bisan og ang matag usa niini nga mga buhat ingon og gagmay ug yano, paglabay sa panahon moresulta kini sa gamhanang espirituhanong pagbayaw ug pagtubo. Kini mahitabo tungod kay ang matag usa niining gagmay ug yanong mga butang nagdapit sa pagpakig-uban sa Espiritu Santo, ang Tigpamatuod nga molamdag ug mogiya nato sa kamatuoran.

Laing tinubdan sa espirituhanong pagbayaw ug pagtubo mao ang padayon nga buhat sa paghinulsol, bisan sa daw gagmay nga mga kalapasan. Ang atong kaugalingong dinasig nga pagtimbang-timbang sa kaugalingon makatabang nato nga makakita sa atong pagkapakyas ug unsaon nga makahimo kita og mas maayo. Ang maong paghinulsol kinahanglang mag-una sa atong sinemana nga pag-ambit sa sakrament. Ang pipila ka mga hilisgutan nga ikonsiderar niini nga proseso sa paghinulsol gisugyot sa himno “Have I Done Any Good?”

Tinuod gagmay ra kining mga butanga, apan kini maayong mga ehemplo sa unsay gitudlo ni Alma sa iyang anak nga si Helaman: “ Ug ang Ginoong Dios mibuhat sa pamaagi aron sa pagmugna sa iyang mahinungdanon ug walay katapusan nga mga katuyoan; ug pinaagi sa gagmay nga mga pamaagi ang Ginoo molibug sa maalamon ug mopahigayon sa kaluwasan sa daghan nga mga kalag” (Alma 37:7).

Si Presidente Steven C. Wheelwright mihatag sa nanambong sa Brigham Young University–Hawaii niining makadasig nga deskripsyon sa pagtulun-an ni Alma: “Si Alma mimatuod sa iyang anak nga sa pagkatinuod ang sumbanan nga gisunod sa Ginoo kon kita magpakita og pagtuo diha Kaniya ug magsunod sa iyang tambag sa gagmay ug yanong mga butang mao nga siya mopanalangin kanato sa ginagmay kada adlaw nga mga milagro, ug paglabay sa panahon, uban sa katingalahan nga mga buhat.”³

Si Presidente Howard W. Hunter mitudlo nga “kasagaran mao kini ang sagad nga mga buluhaton … nga may talagsaong positibo nga impluwensya sa kinabuhi sa uban, ikumpara sa mga butang nga sagad gipakita sa kalibutan kabahin sa kahalangdon.⁴

Usa ka makadani nga dili relihiyoso nga pagtulun-an niining sama nga baruganan nagagikan sa kanhi Senator Dan Coats sa Indiana, kinsa misulat: “Ang bugtong pagpangandam alang nianang importante nga desisyon nga makausab og kinabuhi, o gani sa usa ka nasud, mao kadtong gatusan ug liboan ka mga desisyon nga wala kaayo mahibaloi ug mga desisyon nga makatino kinsa kita, ingon og dili kaayo importante nga mga desisyon nga gihimo sa pribado.”⁵

Kadto nga “ingon og dili kaayo importante” pribado nga mga desisyon naglakip unsaon nato sa paggamit sa atong panahon, unsay atong tan-awon sa telebisyon ug sa internet, unsay atong basahon, sa art ug musika nga gipalibut nato sa atong kaugalingon sa trabahoan ug sa panimalay, unsay atong gipangita nga kalingawan, ug unsaon nato sa paggamit ang atong pasalig nga magmatinuoron ug magmatinud-anon. Laing gagmay ug yanong butang mao ang pagkamatinahuron ug pagkamalipayon sa atong mga inter-aksyon.

Wala niining gitinguha nga gagmay ug yanong mga butang ang makabayaw nato ngadto sa dagkong mga butang gawas kon ipadayon kini sa paghimo ug sa kanunay. Si Presidente Brigham Young gikareport nga nag-ingon: “Ang atong kinabuhi hinimo gikan sa ginagmay, yanong mga sirkumstansya nga mosangput ngadto sa dagkong butang kon ipunon, ug tingbon ang tibuok kinabuhi sa lalaki o babaye.”⁶

Gilibutan kita sa mga impluwensya sa media ug pagkakunhod sa kultura nga mopaubos sa atong mga sumbanan kon dili kita makigbatok kanunay. Aron makapadayon ngadto sa atong mahangturong tumong, kinahanglan nga kanunay gayud kitang magbugsay. Makatabang kon kita kabahin sa usa ka grupo nga nagbugsay, sama sa gipakita niini nga biswal sa usa ka pundok nga nagtinabangay. Sa paggamit niana nga ehemplo, ang sulog sa kultura kusog kaayo nga kon kita mohunong sa pagbugsay, ianud kita ngadto sa destinasyon nga wala nato tinguhaa apan mahimong dili malikayan kon kita dili kanunay maningkamot sa pagpadayon.

Human makasugilon sa ingon og gamay nga panghitabo nga adunay dakong mga sangputanan, si Nephi misulat, “Ug sa ingon kami nakakita nga pinaagi sa gagmay nga mga paagi ang Ginoo makapahinabo sa mahinungdanon nga mga butang.” (1 Nephi 16:29). Ang Daang Tugon naglakip sa usa ka halandumon nga ehemplo niini. Didto mabasa nato kon sa unsa nga paagi midagsang sa mga Israelites ang mga bitin nga mapintas. Daghang mga tawo ang nangamatay gikan sa mga pinaakan (tan-awa sa Numeros 21:6). Sa dihang nag-ampo si Moises alang sa kahupayan, nadasig siya sa paghimo og “bitin nga tumbaga, ug gibutang kini ibabaw sa bandila.” Dayon, “kon adunay bitin nga makapahit sa bisan kinsa kanila, sa diha nga siya makatan-aw sa bitin nga tumbaga, mabuhi siya” (bersikulo 9). Gamay kaayo nga butang alang sa milagroso nga resulta! Apan, sama sa gipasabut ni Nephi sa dihang iyang gitudlo kini nga ehemplo ngadto niadtong misukol batok sa Ginoo, bisan kon ang Ginoo nag-andam og yanong paagi diin sila mamaayo, “tungod sa pagkayano sa paagi, o sa kasayon niini, adunay daghan kinsa namatay.” (1 Nephi 17:41).

Kana nga ehemplo ug kana nga pagtulun-an nagpahinumdom nato nga ang kayano sa paagi o sa kasayon sa gisugo nga buluhaton wala magpasabut nga dili kini importante sa pagkab-ot sa atong matarung nga tinguha.

Sa samang paagi, bisan ang gagmay nga buhat sa pagsupak o gagmay nga mga kapakyasan sa pagsunod sa matarung nga mga buhat makadala nato ngadto sa sangputanan nga gipasidaan nga likayan. Ang Pulong sa Kaalam naghatag og ehemplo bahin niini. Ingnon ta nga ang epekto sa lawas sa usa ka sigarilyo o usa ka tungab sa alkohol o usa ka dosis sa lain nga druga dili masukod. Apan paglabay sa panahon, ang epekto dako kaayo ug dili na mausab pa. Hinumdumi nga ang pagliki sa sidewalk tungod sa hinay-hinay nga ginagmay nga pagtubo sa gamut sa kahoy. Usa ka butang nga sigurado, ang terible nga mga sangputanan sa paggamit sa bisan unsa nga makaadik, sama sa drugas nga moataki sa atong mga lawas o pornograpiya nga materyal nga makadaot sa atong mga hunahuna, sa hingpit malikayan kon kita dili gayud mogamit sa unang higayon—bisan kausa.

Daghang mga tuig na ang milabay, si Elder M. Russell Ballard mihulagway sa mga naminaw sa kinatibuk-ang komperensya “pagkagamay ug pagkayano sa mga butang nga mahimong negatibo ug makalaglag sa kaluwasan sa usa ka tawo.” Mitudlo siya: “Sama sa gabok nga hilo nga himoong lambo, dayon linubid, ug sa katapusan usa ka pisi, kining gagmayng mga butang kon hiusahon mahimong gahi kaayong putlon. Kinahanglang makahibalo kita sa gahum nga anaa sa gagmay ug yanong mga butang aron mapalambo ang pagka-espirituhanon. Sa samang higayon, kinahanglang makahibalo kita nga si Satanas mogamit sa gagmay ug yanong mga butang aron mawad-an kita og paglaum ug maalaot.”⁷

Si Presidente Wheelwright mihatag og susamang pasidaan ngadto sa naminaw niya sa BYU–Hawaii: “Ang pagkapakyas sa paghimo sa gagmay ug yanong mga butang maoy makaingon nga ang pagtuo mapaling-paling o mokunhod, mga milagro mohunong, ug ang kauswagan ngadto sa Ginoo ug sa Iyang gingharian mohunong ug dayon magsugod pagkunhod ang tinguha human ang gingharian sa Dios pulihan sa mas daghang temporal nga mga paningkamot ug kalibutanong mga ambisyon.”⁸

Sa pagpanalipod batok sa nagkahiusa nga negatibo nga mga epekto nga makalaglag sa atong espirituhanong kauswagan, kinahanglan kitang mosunod sa espirituhanong sumbanan sa gagmay ug yanong mga butang. Gihulagway kini ni Elder David A. Bednar sa usa ka BYU Women’s Conference: “Dili kita makakat-on og daghan mahitungod sa kinaiyahan ug kaimportante niining espirituhanong sumbanan gikan sa teknik sa … pagpatulo og tubig nga hinay kaayo,” sa pagtandi sa pagpabaha o pagsablig og daghang tubig diin wala kini kinahanglana.

Mipasabut siya nga: “Ang kanunay nga pagpatulo sa tubig motuhop ngadto sa yuta ug mohatag og grabe nga kaumog sa yuta diin ang mga tanom motubo. Sa samang paagi, kon ikaw ug ako makatutok ug kanunay makadawat og tinulo sa espirituhanong pag-amuma, nan ang mga gamut sa ebanghelyo makatuhop sa atong kalag, lig-on nga maestablisar ug adunay maayong pundasyon, ug makapamunga og dili ordinaryo ug lamian nga bunga.”

Sa pagpadayon, miingon siya, “Ang espirituhanong sumbanan sa gagmay ug yanong mga butang nga makahatag og dagkong mga butang makahimo og kalig-on ug pagkamakanunayon, nagkalig-on nga debosyon, ug mas kompleto nga pagkakabig ngadto ni Ginoong Jesukristo ug sa Iyang ebanghelyo.”⁹

Si Propeta Joseph Smith mitudlo niini nga baruganan sa mga pulong nga karon anaa na sa Doktrina ug mga Pakigsaad: “Himoa nga walay tawo nga moisip kanila ingon og walay hinungdan nga mga butang; kay aduna pay daghan nga umaabut, kalabut sa mga santos, nga misalig diha niini nga mga butang” (D&P 123:15).

Sumpay sa labing sayong mga pagsulay sa pag-establisar sa Simbahan sa Missouri, ang Ginoo mitambag og pagpailub alang sa “tanan nga mga butang kinahanglan gayud mahinabo diha sa ilang panahon.” (D&P 64:32). Dayon mihatag Siya niining talagsaong pagtulun-an: “Busa, ayaw pagluya diha sa maayo nga buhat, kay kamo nagpahimutang sa tukuranan sa usa ka mahinungdanon nga buhat. Ug gikan sa gagmay nga mga butang magagikan ang mga dagko” (D&P 64:33).

Nagtuo ko nga kitang tanan nagtinguha sa pagsunod sa hagit ni Presidente Russell M. Nelson sa pagpadayon “sa dalan sa pakigsaad.”¹⁰ Ang atong pasalig sa pagbuhat sa ingon malig-on pinaagi sa kanunay nga pagsunod sa “gagmay nga mga butang” nga gitudlo kanato sa ebanghelyo ni Jesukristo ug sa mga lider sa Iyang Simbahan. Mopamatuod ko ug motawag sa Iyang mga panalangin sa tanan kinsa nagtinguha sa pagpabilin diha sa Iyang dalan sa pakigsaad, sa pangalan ni Jesukristo, amen.