Ma Srihsrihk ac Fihsrwacsr
Kuht enenuh in ahkacsmakihnyeyuck lah ke luhpan ac puhlan pacl yohk se, oacna in ma srihsrihk uh oraclah ma luhlahp.
I.
Tamuhlwel ac tahmtahel sacohk wiyuck, oacna kom, puhlakihn yohk ac muhsahiyuck ac ahknuhnakyeyuck ke sramsram ac on ac puhla ke pacl in tuhkweni se inge. Nga etuh suwohs muh ngac sramsram fahkwack kuloh nuh sin tamuhlwel ac tahmtahel suc, ekihn kuhfa ke poun Leum, ma use nuh sesr eklac fokoko se ke pacl in tuhkweni se inge.
Nga srui kaksyak in sramsram nuh sin walihl se inge ke Easter Sabbath. Mihsenge kuht wi alu sahyac in ahkfuhlwactye sifil moulyak lal Leum Jisus Kraist. Nuh sin mempucr ke Alu luhn Jisus Kraist luhn Mwet Luhlahlfongi ke Lwen Sahflah, Sifil Moulyak luhn Jisus Kraist pa sropon luhlahlfongi lasr uh.
Ke srihpen kuht etuh ke ma sihmlac lun Puk luhn Bible ac Puk luhn Mormon ke Sifil moulyak luhn Jisus Kraist, kuht oacyacpac luhlahlfongi ke ma suhmuhslah puhkantwen luti lah sifil moulyak se pacna inge fah sikyak nuh sin mwet nuhkwewa ma moul muhta fin facluh se inge. Sifil moulyak se inge use nuh sesr ma Mwet Sap Paul el pahngon “sie finsrak moul” (1 Peter 1:3). Finsrak moul se ingacn pa luhlahlfongi kuh se lasr lah misact uh tiac pa sahflahiyacn finsrak lasr uh tuhsruhk pacna falkac enenuh se nuh ke plwacn pahkotwen luhn Pahpah tuhmasr Inkuhsrao nuh ke moul ma pahtpaht luhn tuhlihk Nahtuhl. Plwacn se ingacn enenuh eklac luhn moul kawihl nuh ke moul sukawihl. Mwe luti se ke eklac se ingacn pa misac ke pacl se faht ah tihli ac wolacnaiyacn lututwacng oreklac fihsrwacsr ke Sifil Moulyak luhn Leum ac Mwet Lahngo tuh kuht in ahkfuhlwactye ke Sacnri in Istuh se inge.
II.
Ke soko on wolacna suc kahs kac ah sihmlac sel Eliza R. Snow, kuht onkihn:
Fuhkah yohkiyac, fuhkah wolacnaiyac, fuhkah fohnlah la
Sifil Moulyak eis luhmah,
Yac nuhnuhnkuh, luhngse, ac pahkotwen ohsun
In harmony divine!1
Ke lihksreni luhn ohiyac muhtahl ac mihs, kuht oracni ke toeni, wiwina kanfracns luhlahp se inge, in luti ac ahkkweye sie sin sie.
Olutu se inge nga puhla tuh oacna ngacn ke orekmakihn ke sramsram se luhk inge ke mwe luti lal Alma nuh sin tuhlihk mukul se nahtuhl Helaman, sihmlac lun Puk luhn Mormon: “Ke ma srihsrihk ac fihsrwacsr ma yohk tuhkuh kac” (Alma 37:6).
Lutiyuck kuht ke ma srihsrihk ac fihsrwacsr puhkantwen ke wosasuc luhn Jisus Kraist. Kuht enenuh in ahkacsmakihnyeyuck lah ke orekweni kwewa lusen pacl na loeloes se ma srihsrihk ac fihsrwacsr inge liyeyuck in pahselah ma yohk. Oasr na sramsram puhs ke sifac se inge sin Mwet Kol ke Jacnuhruhl ac sin mwet luti ahkfuhlwactyeyuck sahyac. Sifac se inge arulacna yohk srihpac tuh ngacn puhla in ke sifil sramsram kac.
Ke nga oruh fahsr in lututacng luhk, tohkohyang nga liyacack sie ma ahkacsmakihnyeyuc ke kuh luhn ma srihsrihk ac fihsrwacsr. Pa inge petsac se nga eslah kac ah. Acn in fahsr simacn kwekwe ac fokoko se srasrwelihk. Kuh pa inge ma sikyak ke kuhtuh pahtokyuck kuh? Muoh, srasrwelihk se inge oreklac ke kahkahsrihk, kap srihksrihk luhn okah uh sukok acn fototo liki kuhpahsr luhn sahk soko. Pa inge sie pac atac nga liye ke sie pacna acn ma oacpacna.
Pahtpaht fokoko se ma oruh srasrwelihk ke acn in fahsr simacn kwekwe inge arulacna srihklaclac in srihkasrakuh nuh ke kais sie ma oreklac pengana lwen kuh finne mahlwem, tuh sikyak la an tukun pacl arulacna fokoko.
Oacpacna nuh ke ma sikyak upac tukun pacl ke ma srihsrihk ac fihsrwacsr lutiyuck lun ma suhmuhslah ac sin mwet pahluh moul. Nuhnkuh lutiyacn ma suhmuhslah kuht eis in weacng ma oasr ke moul lasr uh. Kuh nuhnkuh ke sifacna pruhe ac pruhe sikuckmuhtuhntei wi sucu pa kwacna orek nuh sin Mwet Luhlahlfongi suwohswohs. Nuhnkuh lwen tuhlihk fuhsr uh wiseminacri kuh institute luhn mwet lolacp fuhsr. Kais sie ohiyac inge sahp liyeyuck muh srihk ac fihsrwacsr, tukun pacl ma sikyak kac sruhkwack ac ahkkapye nguhn ke kuh. Ma inge sikyak ke srihpen kais sie ma srihsrihk ac fihsrwacsr kolyuck ke kahsruh luhn Nguhn Muhtahl, Mwet in Fahkwack suc ahkkahlwemye nuh sesr ac kolkuht nuh ke ma pwacye, oacna Prestuhn Eyring el ahkuhtweyac.
Sie pac ma sang sruhkwack ac ahkkapye nguhn uh pa in tahfwelah srihke auliyak, finne oacna in oasr tahfonglac srihsrihk. Mukwikwi lasr sifacna uh kuh in kahsrwekuht liye lah fuhkah luhpan fototolac lasr ac kuht ac ahkwoye fuhkah. Auliyak se suc enenweyuck in ahkfahsryeyuck ke wik nuhkwewa in ipeis ke kuhfa luhn Leum. Kuhtuh ohiyac wo in nuhnkuh ke atacn auliyak se inge pa fwackyuck ke on soko “Kuh Nga nuh Oruh Oacna Sie Ma Wo?”
Nuh oasr ma wo nga oraclah ke facluh se inge mihsenge?
Nga nuh kahsrwelah oacna sie mwet enenuh?
Nga nuh ahkpwacryeack mwet ahsor ac oruh sie mwet enganwack?
Fin tiac, pwacyena nga puhtatlac.
Nuh ma toasr luhn kuhtwena mwet ahkmuhlahlahyeyucklac mihsenge?
Mweyen nga luhngse in akacsruhi?
Mwet mas ac muhnahs nuh kahsrweyucklac ke acn elos oasr kac?
Ke elos enenuh kahsruh luhk yac nga nuh oasr we?2
Pwacyelah pa inge ma srihsrihk ac fihsrwacsr, tuh pwacyena lah pa inge srihkasrak wowo ke ma Alma el luti nuh sin tuhlihk se nahtuhl ah Helaman. “Ac Leum God El oruh orekma ke inkacnek in use srihpac yohk ac ma pahtpaht: ac ke inkacnek srihsrihk Leum El … use molwelah luhn moul pucspucs” (Alma 37:7).
Prestuhn Steven C. Wheelwright el akacsruhi nuh sin walihl se fin acn Brigham Young University–Hawaii ke ahkuhtweyac yohk mwe luti lal Alma: “Alma el ahkkweyelah tuhlihk se nahtuhl lah pwacyena pactuhn se Leum fahsr kac ke kuht ahsrosri luhlahlfongi lasr ke El ac ukwe mwe luti lal ke ma srihsrihk ac fihsrwacsr, pa el ac ahkinsewowoye kuht ke ma usrnguck srihsrihk pengana lwen, ac pacl tohkohyang, ke orekma yohk.” 3
Prestuhn Howard W. Hunter el luti lah “inkaiyacn pacl uh pa orekma lwen nuhkwewa … ma sang eklac yohk wowo sikyak ke moul luhn mwet sahyac, oacna ke kapsrweyuck ke ma facluh arulacna kwacna luhma muh yohk uh.”4
Sie mwe luti srihfeyuck ke mwe luti se pacna inge tuhkuh sin senator mah se Senator Dan Coats fin acn Indiana, suc suhmuhslah: “Ahkolah se muhkwena nuh ke sulwaclah yohk srihpac se suc kuh in ekuhllah moul, kuh finne muhtuhnfacl se, pa sulwaclah foko nuh ke tausin oreklac ke kahlwem luhn sulwaclah muhkwena, sifacna ahkuhtweyucki, wi kunacn pacna sulwaclah tiac yohk srihpac ma orek lukmac.” 5
Sulwaclah lukmac ma “oacna in tiac yohk srihpac” ingacn pa kuht orekmakihn fuhkah pacl lasr, meac kuht liye ke TV ac internet, meac kuht riti, luhmah ac on ke ma kuht rauni kuhtlac kac ke can orekma ac e lohm sesr, makuht suk in ahkpwacr, ac kuht sang fuhkah kihsackuhnlah lasr in suwohs ac pwacye. Sie pac ma oacna in srihk ac fihsrwacsr uh pa puhlaik ac engankihn ohiyac lasr sifacna.
Wacngihn sie kena srihsrihk ac fihsrwacsr inge kuh in sruhk kuhtyak nuh ke ma yohk ne ken a kuht pracktisi ac srihke tahkuhnlah na. Prestuhn Brigham Young el fahk oacna: “Moul lasr oreklac ke ma srihsrihk, fihsrwacsr ac sikyak nuh ke luhpan aetuhilac yohk ke elos orekweni nuh sie, ac toeni in oraclah fohnlah moul luhn sie mukul ac muhtwacn.” 6
Kuht rauniyucklac ke lohlah lasr ke kain in media ac muhnahslah luhn facsin ma ac fah ulkuhti nuh twen ke ohiyacsr fin kuht tahfwelah na in tiac lusrong. In fahsr nuh met nuh ke finsrak luhlahp lasr, kuht enenuh in koal na koal na met. Ac orekma fin kuht ekihn sie u ma tuhkweni koal, oacna ke sie u in koalinge oruh uh. In ahkyohkye srihkasraksacn, acsr uh arulacna upac kuht kuh pacna in tui ke koal uh, kuht ac fah usyucklac nuh ten ke kof uh som sun acn se kuht tiac finsrak nuh we tuh suc fah kuh in sikyak fin kuht tiac srihke in som na nuh met.
Tukun sruhmuhnyacn ma srihsrihk muh yohk ma sikyak kac, Nephi el sihmihs: “Na ohinge kuht liye lah ke ohiyac srihsrihk Leum El kuh in sang ma yohk” (1 Nephi 16:29). Olweacng Mahtuh oacyacpac sruhmuhn ke sie pac ahkuhtweyac yohk srihpac ke ma se inge. Insacn kuht riti lah fuhkah ke Mwet Israel ah tuh ahkkolukyeyuck sin serpent fihrihr se. Mwet pucspucs tuh misac ke ngalnguhli eltahl ah (liye Numbers21:6). Ke Moses el pruhe in ahkfihsracsryelah, el lut ke el oraclah “soko serpent ke bronze, ac likiyac fin soko sak.” Na, kutena mwet sungalnguli, elos ac ngetak nu ke serpent bronze soko ah, ac moul” (fuhs 9). Na, oacna ke Nephi el ahkuhtweyac ke el luti mwe srihkasrak se inge nuh sin suc oruh ma koluk lain Leum, finne ke Leum Elahkolah sie inkacnek tuhelos in muh kuh in ahkkweyeyucklac, “ac ke srihpen fihsracsriyacn inkacnek sac, kuh fihsrwacsriyac ah, puhs mwet misact” (1 Nephi 17:41).
Mwe srihkasrak ac mwet luti se ingacn ahkacsmakihnye kuht lah fihsracsriyacn inkacnek kuh fihsracsriyacn orekma sapkihnyuck uh tiac kuh in kalmac pa tiac yohk srihpac in kuhtanglah kena suwohswohs lasr uh.
Oacpacna, finne ohiyac srihsrihk nuh ke seahkostwen kuh puhtatlac srihsrihk in ukwe srihkasrak suwohs kuh in ulkuhti nuh ke ma sikyak se ma uliyuck nuh sesr in taranke. Kahs in Lahlmwetmwet sang srihkasrak se nuh ke ma se inge. Oacna ke ma sikyak nuh ke mahno se ke paip soko kuh mwe nihm se kuh sie pac ipin drug tiac kuh in srihkasrakuh. Tuhsruhk tukun pacl, ma sikyak kac uh upac ac pahlah. Esamwack ke srisrielihk luhn nien fahsr simacn se ke okahn sahk soko lahesyucklac uh. Ma kahlwem se lah, ma koluk sikyak ke eisyacn kuhtwena ma kuh in ahkpwahyekomlac, oacna drugs ma kuh in ahkkolukye mahnosr kuh petsac koluk ma kuh in ahkkolukyelah nuhnak lasr, pa sensenkihnyuck yohk fin kuht tiac ipeis finne pacl se emet—finne pacl se fanna.
Yac pucspucs somlah, Prestuhn M. Russel Ballard el ahkuhtweyac nuh sin walihl se ke toeni luhlahp se ke “ma srihsrihk ac fihsrwacsr uh kuh in tiacna wo ac kuh in kuhnahoslah moul ma pahtpaht luhn mwet se fuhkah.” El luti lah: Oacna ke ma fihsrwacsr se orekweni in oraclah koan tuhrwet soko,naahsoko, na fah sucl soko, ma srihsrihk inge orekweni tuhkweni nuh sie in fokoko tiac muhsahllah. Kuht enenuh in etuh ke kuh luhn ma srihsrihk ac fihsrwacsr sacn lah kuh in muhsaheack nguhn,” el fahk. “Ke pacl sacn pacna, kuht enenuh in etuh lah Satan el fah orekmakihn ma srihsrihk ac fihsrwacsr in kol kuhtlac nuh ke suhpwacr ac ahsor.”7
Prestuhn Wheelwright el sang pac kind mwe acsmak se inge nuh sin walihl se lal fin acn BYU–Hawaii: “Puhtatlac in oruh ma srihsrihk ac fihsrwacsr uh pa oruh tahfuh luoiyac ke luhlahlfongi, ma usrnguck uh tui, ac kapwack suwohsiyac nuh ke tohkohsrahi Lal tilokihn ac na fah muhtwacack in puhtatlac oacna ke sukyacn tohkohsrahi luhn God aholyucklac ke kuhtuh kena ac finsrak luhn facluh.”8
In karihngihn ma orekweni koluk sikyak mwe kuhnaostwen nuh ke kapkapwack luhn nguhn, kuht enenuh in ukwe ohiyac luhn nguhn ke ma srihsrihk ac fihsrwacsr. Elder David A. Bednar el ahkuhtweyac ke mwe luti yohk se inge ke Toeni luhn BYU Muhtwacn: “Kuht kuh in etwaclah kuhtuh ke ohiyac ac yohk srihpaciyacn inkacnek muhtahl se inge ke atac luhn … tultul in kof se nuh ke fohk uh kais kuhtuh,” sielacna nuh ke sronotiyac kuh fwellac luhpan kof yohk se suc kuh pacna in tiac enenweyuck.
El ahkuhtweyac: Tul in kof se tihli neke loaliyacn acn twen ac oraclah luhpan sroksrok luhlahp se lun fohk uh suc ma sahk uh kuh in kapwack wo we. Oacpacna, fin kom ac nga lohacng ac kwacna eis tul in mwe ahkmongo luhn nguhn, na okah ke wosasuc uh kuh in tihli som loal nuh lun nguhnasr, kuh in akiyucki kuh ac kapwack, ac kuh in oswelah fahko usrnguck ac emwem.
Tahfwelah na, el fahk, “Ohiyac nguhn luhn ma srihsrihk ac fihsrwacsr use ma wo oswelah kuh, kwacfweacng, yohkiyacn insacnweacng, ac kuhtuh eklac ahksahfyeyucklac nuh sin Leum Jisus Kraist ac wosasuc Lal.” 9
Mwet Lahngo Joseph Smith el luti mwe luti yohk se inge ke kahs ituckyang ingena nuh lun Doctrine and Covenants, suc el luti lah wacngihn mwet fah nuhnkuh ohiyaclos in ahkfalyelah ma kunaclos in srihk, tuh oasr sukyac nuh sin Mwet Luhlahlfongi ma epacl nuh ke ma inge (D&C 123:15).
In kapsrenisrihkasrak se emet in oakiyac Alu fin acn Missouri, Leum el sramsram nuh sin Mwet Luhlahlfongi in muhtweng mweyen ma nuhkwewa fah tuhkuh sikyak ke pacl fal lalos (D&C 64:32). Na Elluti tuh kuht in tiac fuhlweack in oruh ma wo, tuh kuht akiyac pwelucng luhn orekma wo. Ac ma tuhkuh ke ma srihsrihk fah oreklac suc pa yohk D&C 64:33).
Nga luhlahlfongi, kuht nuhkwewa kena in ukwe srihkasrak lal Prestuhn Russell M. Nelson in kwacfweacng nuh met nuh ke inkacnek in olwelah.”10 Kihsackuhnlah lasr in oruh ohinge ahkkweyeyuck ke kuht tahfwelah in ukwe “ma srihsrihk” kuht lotwelah ke wosasuc luhn Jisus Kraist ac sin mwet kol ke Alu Lal. Nga fahkwack Kacl ac sang mwe ahkinsewowo Lal nuh facn mwet nuhkwewa ma suk in sruokyacna inkacnek in olwelah, ke inen Jisus Kraist, amen.