Mekekerei e Beot el Tekoi

Rodam me a rodos er ngak, ak di uai kemeiu, ng mla rutechii a renguk emla ngmai a ulekrael er a ikal klumech ma chelitakl me a dolchesuar er tial taem el dedak. Ak medengei lomtechei er kid loureng a saulir a rodam ma rodos er kid el tir, el tir a dongu er a chimal a Rugbak, el mla smisichid er chelechal taem el dedak.

Ngdmeu a renguk el mengedecheduch er tial seked er a chelechal Sandei ra Baskua. Chelechal sils e ke de teloi ra rebebil ra Kristiano loldeu ra Okiis ra kodall er a Rubak el Jesus Kristo. A rechad ra Ikelesia er a Jesus Kristo e ra Uriul-klebesei el Santo, e denguu er kid ea meral Okiis ra kodellel a Jesus Kristo a uchul a klaumerang er kid.

Kid a oumerang a cheldecheduch ra Biblia ma Babier ra Mormon el kirel a meral Okiis ra kodall ra Jesus Kristo, kede dirrek el oumerang a betok el osisechakl ra chedaol llechukl el kmo a osisiu el okiis ra kodall a mora rokui el chad el mla kiei ra beluuelchad. Tial okiis ra kodall a meskid sel lolekoi er ngii a Apostol Petrus el kmo “ngar el urunguled” (1 Peterus 1:3). Tial urunguled a oterkeklii el kmo a kodall a diak el ulebongel er kid ngbai klou a belkul dauch ra chelsel a uldesuel a Demad ra Babeluades el kirel osebelir a Rengelekel. Tial uldasou a uchul e ke de mengodech el mo diak deluut el mad. Sel klou a belkul ra chelsel tial moktek a kodall ma klebokel el tutau ra Okiis ra kodall ra Rubak e Osobel el kid oldeu er ngii ra chelechal Sandei ra Baskua.

A kmal ungil chelitakl el tekoi ra chelsel a lul luches a Eliza R. Snow, el kmo:

Kid a melemolem ra tial chedaol moktek, ke de mora miting er kid, mora ongdibel, e olisechakl e mesebechakl ra tang ma tang.

Chelechal tutau ak mla omelchesiu lousbech a tekingel a Alma ra lolisechakl ra ngelekel ra Helaman, el llechukl ra Babier ra Mormon: “Okiu a mekekekrei ma beot el tekoi eng mekelou el tekoi a duubech” (Alma 37:6).

Kid a mla mosisechakl ra betok el mekekerei e beot el tekoi ra ebangkelio ra Jesus Kristo. Ng kired el mo medengei el chelsel a kemanget el taem aikal kora mekekerei e beot el tekoi a remuul a meklou el tekoi. Ng kmal betok el suobel a mla medung el kirel tiang ra General Authorities ma bebil ra resensei. Tiang a kmal klou a belkul el soak el  mengedecheduch el kirel.

Ak mlo lotkii a klisichel a mekekerei e beot el tekoi ra kmo ngerang el kilsang ra kurael ra tal tutau. Tiakid a siasing el kngiluu. Tial okrokl e mesisiich el sment el rael a mla obached. Tiang locha ngar ngii a klou e mesisiich loldubech er ngii? Ng diak, tial blached a dilubech el kekerei, e mekekokil lomekeroul a risel el kerrekar el mocha oberk. Tiakid a kuk tara okesiu el kilsang ra kuk tara rael.

siasing/Llecheklel

Blached el rael

siasing/Llecheklel

Dirrek el tara blachel el rael

A mesisiich lodubech el milached aikal okrokl el sment el rael a sebechel diak de betebengii ra bek el sils malechub a bek el buil, eng di cherengelel a taem a telmellel a kmal mo klou.

Ngosisiu ngii ma klisichela mekekrei e beot el tekoi el bladesuub ra chedaol llechukl ma rengar el profet. Kamomtab ra omesubel chedaol llechukl el kid a mla mosisechakl el mo meruul er ngii ra klengar kid ra bek el sils. Me a lechub a nglunguuch er kid ma telungalek el blechoel loruul a a re Urirul-klebesei el Santo. Ka momtab ra rengeasek el kirir el ngara seminary malechub a remeklou el kirir le ngara institute. Aikang a locha mekekerei el tekoi e beot, eng di cherengel a taem eng mo klisichel a reng er kid e sobecheklii a ulekeruled. Tiang a duubech le ikang el mekekerei e beot el tekoi a olechau ra Chedaol Reng, el Ouchais e omekellomes er kid e omekrael er kid ra klemrang, el uaikel bla lesaod a President Eyring.

Almuut el tang ra sobecheklii e smisichii a reng er kid a sel debelechoel meruul er ngii el ouchel a rengud, luldimukl a mekekerei el kengtid. Sel dilkid el omtab a omerelled eng ngosukid el mesa chelitechetud e mekera a bodungil er ngii. Tial ouchelreng a kirel oeakuchei ra dolai ra chedaol belsoil. A bebil ra tekoi el sebeched lomtab er tial ouchelreng a ngara chelsel a chelitakl el “Have I Done Any Good?”

Aikang a mekekerei el tekoi, eng ding meral ungil okesiu ra osischeklel a Alma el mora ngelekel ra Helaman: “A Rubak el Dios a oureor lokiu a kakerous el teletael el mo sebechel mekedmokl a diak a ulebengelel moktek; le ngokiu a mekekerei el tekoi ea Rubak … a olsobel er a betok el chad” (Alma 37:7).

A President Steven C. Wheelwright a milngedecheduch ra seked ra Brigham Young University-Hawaii er tial omekellomes el osischeklel a Alma: “A Alma a mle oterkeklii el mora ngelekel el uasebe a teletael el Rubak oltirakl er ngii sel dultuil ra klaumerang er Ngii e doltirakl a Llechul lokiu a mekekerei e beot el teletael, e Ngii a omekngeltengat er kid ra mekekerei el ongasireng ra bek el sils, e a cherengel a taem, eng mobengkel a ungil lurreor.”³

A President Howard W. Hunter a mle olisechakl el kmo “ng blechoel aikel doruul ra bek el sils … a klou a relii ra klengar ra rebebil, sel dongasisiu ra omeruul el beluulechad a omes el uase ng meklou a belkul.”⁴

Osisiu el osisechakl ra kuk diak el tekoi ra klechelid a ledilii a mle Senator Dan Coats ra Indiana, el milluches el kmo: “A dichimol kedmekled ra klou a belkul el uldasou el ngodechii a klengar, malechub a beluu, aikel dart me a telael el mle telkib a uldasou el kirel, lochotii a blekerdeled el chad, ma ikel diak a kmal belkul tekoi el berrotel el doruul.”⁵

Aikel “kora diak el meklou a belkul” luldasou el doruul a uldimukl a dousbech a taem, ngera domes ra tibi ma internet, ngera donguiu, a zunga ma chelitakl el meliuekl er kid ra ureor ma blai, aikel dosiik el mengelaod er kid, ma blakelreng er kid el mo bleketakl el chad. A tara kekerei e beot el tekoi a mo ungil chad ra buai e ngara deureng el teloi ra rechad.

Ng diak a tara ikal mekekerei e beot el tekoi el mo sobecheklid alsekum eng diak deblechoel e dolemolem el meruul. A President Brigham Young a louchais el kmo ng millekoi el uase: “A klengar kid a obengkel a mekekerei, e beot el teletael ma dodak el rokui eng rulii a klou el tekoi, e ochotii a meral klengar ra sechal ma redil.”⁶

Kid a meliuekl ra teletael ra media ma mekngit el siukang el mo mechitechut a rengud ra llach alsekum eng diak dotngakl aikang. Ma dorael morsel diak a ulebengelel moktek er kid, eng kired el melemolem el mesisiich. Ng ungil a dedak el kaingeseu , el ulecholt er tial siasing ra rechad el tmak el meius, el uaia rechad er omeius el meius. Muut el okesiul tiang, a berius a kmal mesisiich malsekum eng diak dolemolem el meius, eng sebeched lobitokl e merael morsel diak el ngii a dosiik er ngii e mo meringel alsekum eng diak dorael bedul uchei.

Uriul ra losaod ra kekerei el tekoi ng di ng klou a relii a Nephi a milluches el uase, “Kede mesang el kmo ngokiu a mekekrei e beot el tekoi e a Rubak a remuul a meklou el tekoi” (1 Nephi 16:29). A Chuodel Renged a ngar ngii okesiu el uaitiang. Kede menguiu el kirir a re Israelites el mlo dechelakl ra bersoech. Betok er tir a mlad ra lobangch (mesa Numbers 21:6). A Moses ra loluluuch lolengit a ngesou, eng mlo medengei el kmo ng kirel rullii a “deel el teletelel a bersoech, e nguu el turcheklii ra kerrekar.” E sel, “lobangch a chad ra bersoech, e ngii omes er tial deel el bersoech, eng diak el mad” (bades 9). Ng kmal beot el tekoi e mengasireng! Ngdi, Nephi a kmo sera lolisechakl er tial okesiu el mortirkel diak lorrenges ra Rubak, ea Rubak a mla kudmeklii a beot el rolel eng sebechir el moungil, “e ngii el mle kekerei el tekoi, malechub eng mle beot, e te betok a remlad(1 Nephi 17:41).

Tial okesiu me a tial osisechakl a omeklatk er kid el uase a betengel a tekoi malechub eng beot el ureor el kired el meruul ngii a diak el belkul a kmo ng diak el klou a belkul.

Osisiu, uldimukl ra mekekerei el llach el diak doltirakl ma lechub a mekekerei el kengtid a sebechel tomellid e mo ouchel a rengud ra uirul. A Word of Wisdom a ungil okesiu er tiang. A telemellel a bedenged ra chimol dekool malechub a illumel rrom malechub a chimol mekngit el kar a diak a kmal ngera el temellii. Eng di a cherengel a taem, eng klou a mo telmellel. Molatk er sel rael el mla obached a sment er ngii ra klemengetel a taem el risel a kerrekar a tomellii. Chimol tekoi el kmal klemerang, a kengtil sel dolai aikel mo uchul a mekngit el kse, el uaia mekngit el kar malechub a mekngit el osengel a deleboes el tekoi a tomellii a uldesued, meng kmal kired el mengeroid er kid er ngii alsekum ng dirkak a tal doruul—dirkak a tang.

Betok el rak ra mla memong, a President M. Russell Ballard a mle mesaod er a klou el ongdibel el mora rechad el kirel a “mekekerei e beot el tekoi a sebechel mo mekngit e tomellii a klengar ra chad.” Ng mle olisechakl” “Nguaia a mechitechut el rokodoll el rulii a yarn, el sebechel, mo klou el ekil, aikal mekekerei el klalou a lemodak eng sebechel mo mesisiich el diak el melodech. Ng kired el blechoel kerekikl ra klisichel a mekekerei e beot el tekoi ra reng er kid” ng millekoi. “Osisiu el taem, eng kired el mo kerekikl ra Diablong leng ousbech a mekekerei e beot el tekoi el melemall e mengetikaik er kid.”⁷

A President Wheelwright a dirrek el mle omeklatk ra rengalek ra skuul ra BYU-Hawaii: “Sel lak doruul aikel mekekerei e beot el tekoi e ngii a mo mechitechut a klaumera er kid, mo diak ongasireng, e omerolled el mora rengedel a Rubak a mo meterob e kid a mo diakk dosiik ra rengedel a Dios leng ke de bai mo osiik a tekingel a beluulechad ma klisiich.”⁸

A domecheliu er kid ra mekngit el sebechel tomellie a reng er kid eng kired loltirakl ra teletelel a chedaol tekoi ra mekekerei e beot el tekoi. A Elder David A. Bednar a milsaod er tial osisechakl el mora Ongdibel ra Redil ra BYU el kmo: “Ng sebechel betok a desuub ra blekeradel ma klou el belkul chedaol teletael ra okesiul a … olchars el ralm el mora cheslel a chutem el kmal soro,” el kakerous ngii ma klou el ralm el doba el melubs el ngii a diak a usbechellel.

Ng milsaod: “A kekerei el olechars el ralm ra sink el soiseb ra chelsel a chutem a uchul a dekdekims el chutem el sebechel a dellomel el duubech er ngii. Osisiu el teletael, alsekum e kau ma ngak a ultebechel e blechoel melai a mekekerei el olisiich ra chedaol tekoi, e sei kid a risel a ebangkelio a mora chelsel a rengud, el mo mesisiich el delalem, a mo bekerredechel.”

Ng millemolem, “A chedaol teletael ra mekekerei e beot el tekoi a omuchel a meklou e mesisiich, e dmolech el blakereng, ma cherrungel el belted el mora Jesus Kristo ma ebangkelio er Ngii.”⁹

A Profet Joseph Smith a mle oslisechakl er tial osisechakl loiak a tekoi llechukl ra Doctrine and Covenants el kmo a chad a kirel omtab a omerellel ra ngerchelel el uaia lemekekrei el tekoi, eng di ng kmal klou a relii ra Resanto el tir a ultuil ra ikal tekoi (mesa D&C 123:15).

Sera uchelel a teketekel a Ikelesia ra Missouri, a Rubak a dilu ra Resanto el mo klou a rengrir el rokui le tekoi a duubech loltirakl a temel (Mesa D&C 64:32). E Ngii a mle olisechakl el uase ng diak el kirel mo mesaul a rengud el meruul a ungil, le kid a meleketek ra dodai ra klou el ureor. Ea ikel mekekerei el tekoi el doruul a sebechel mokdubech a meklou el tekoi” (Mesa D&C 64:33).

Ak oumerang el kid a soad el mo oltirakl ra President Russell M. Nelson el mo melemolem el ngara “rolel a telbiil.”¹⁰ A blakelreng er kid el mo uaisei a mo mesisiich sel dolemolem el meruul a “mekekerei el tekoi” el kid a mla mosisechakl er ngii ra ebangkelio ra Jesus Kristo ma roungerachel ra Ikelesia. A kuchais el uase Ngii e meskemiu a klengeltengat er Ngii er mo er kemiu sel mosiik el mo oltirakl ra Rolel, el ngara ngklel a Jesus Kristo, amen.