Tin Baʼachig mab Moem Banʼen

Pi walageg, boed gimed, ma ke aw nge gumircha’eg e pi mulwol nge musik nge n’en ni gube thamiy ko ngiyal’ ney u ta’abang. Gu manang ni gube non ni pa’am ni gube pining e magaer ngak e pi walageg daed ni, yad e talne murwel u pa’ Somoel, nikar pi’ed gelngin daed u ta’abang.

Gub falfalen’ ni nggu non ko pi gidii’ ney ko Madnom ni Easter. Daba’ e gadaed be un ngak boech e Kristiano ni yibe falfalen’ ko fare Foskoyam’ rok Somoel ni Yesus Kristus. Chonggin e Galasia rok Yesus Kristus ni fan ko Gidii’en Got ko Tin Tomur e Rran, ma fare Fokoyam’ rok Yesus Kristus e rib ga’fan ko mich rodaed.

Ya mich u wan’ daed e pin’en nike buch u lane Bible nge fare Babyor ku Mormon ni mornga’agen Yesus Kristus nike Foskoyam’, ma kab mich u wan’ daed bukun e machib ni kura fas e gidii’ ko yam’ ni ki paer u fayleng. Binem e foskoyam’ e ke pi’ ngodaed e n’en nike yoeg Apostle Peter e “athap” ngay (1 Peter 1:3). Binem e athap e mich rodaed ni yam’ e gathi tomur rodaed machane ba kanawo’ nib ga’fan u lane tunom rok e Chitamangdaed nu Tharmiy ni fan ko thap ko pifaak. Binem e tunom e be thilyeg e gidii’ ngan manemus. N’en nib ga’fan e ke m’ay e yam’ m kan fas ko yam’ u dakean fare Foskoyam’ rok Somoel nge Tathapeg rodaed ni gadaed be falfalen’ ngay ko biney e Madnom ko Easter.

U lane tang nib falel’ ni thin riy e ke yoloey Eliza R. Snow, gadaed be yoen’ nibe ga’ar:

Bang nike fal’ ko re tunom nem nib thothup nge gapas, e gadaed ma yib ko mo’olung, nib mu’un e biney e mo’olung ngay, ni ngad pi’ed e athamgil ngodaed ma gadaed be fil ban’en ngodaed.

Biney e kadbul e ku thamiy ni mornga’agen e numon rog e fanow rok Alma ngak Helaman ni fak, nikan yoloey u lane fare Babyor ku Mormon: “Dakean e tin baʼachig mab moem banʼen e yima muguʼuliy e tin nib gaaʼ banʼen riy” (Alma 37:6).

Kan fil ngodaed bukun e tin ba’achig mab moem ban’en u lan fare gospel rok Yesus Kristus. Ba tu’uf ni ngan pogran nag daed ni ra peth e pin’ey nga ta’bang ma pin’ey nib achig e ma feek iyib e tin falel’ ban’en. Bukun e numon ni mornga’agen e pin’ey nike pi’ e pi General Authority nge kuboech e sensey. Mornga’agen e biney e rib ga’fan ni thingar gu weliy biyay.

Kug nang mornga’agen gelngin e n’en nib achig nge n’en nib moem nike buch ko n’en ni ku guy napan ni kug waen u buut’ ko reb e kadbul. Ba’aray e sasing ni ku feek. Kanawo’ nib simen nib gel ma ba dub’ag e be pil. Iraray e n’en nike buch u tanggin nibe pi’ ngalang? Danga’, biney nike pil e ke buch ni bachane lekngin ba gak’iy nib achig, nibe ga’ nib sag’al. Ba’aray e n’en nib ta’aborogon ni ku guy ko reb e binaew.

siasing/Llecheklel

Kanawo’ nike pil

siasing/Llecheklel

Kanawo’ ni kiki pil

Gelngin e n’en nibe pi’ ke pil e pi simen ney e rib achig ni ngan fulweg ni gubn e rran fa pul, machane rib gel gelngin.

Ku boed gelngin e pi n’en nib achig mab moem nikan fil ngodaed u lane pi chep nib thothup nge pi profet. Leam nag e chep nib thothup ningan fil nikan fil ngodaed nima ayuweg e yafas rodaed. Fa mu leam nag e pi meybil rom nge meybil ni tabinaew ni yibe gargbog nga but ni ke mang ban’en nima rrin’ Gidii’en Got ko Tomur e Rran. Leam nag i un ko seminary ni fan ko bitir fa clas ni fan ko fal’ yangren. Demtrug rogon nib achig e pin’ey mab moem, ma ra bangiyal’ ma ra gel gelngiy. Biney e be buch ni bachani ra reb e pin’ey nib achig maab moem e ma pining fare Kan ni Thothup, fare Tamicheg nima tamilang nag daed ma gagyeg nag daed ko n’en nib riyul’.

Kureb mornga’agen e n’en nib mangil ni ra buch e kalngan’uy ni yibe rrin’, nib mu’un e tin kireb nib achig ngay. Rogon ni gadaed be sap ngodaed e rayog ni nge ayuweg daed rogon ni kad mul gaed nge rogon ni rayog ni ngad mangil gaed. Kalngan’uy ni aram rogon e thingari fal’eg rogon e wik rodaed umon ni yibe feek e sacrament. Boech e pigpig ni ngan leam nag ko kanawo’en e kalngan’uy e kan noeg u lan fare tang nikan noeg e “Have I Done Any Good”.

Riyul’ ni pin’ey e ba achig, machane bogi ban’en nni fil Alma ngak Helaman ni faak: “Ma fare Somoel ni Got e muruwel nib yoʼor rogon ni nge muguʼuliy e gamʼing rokʼ nib gaʼfan mab manechubog; ma, u dakean e tin nib achig banʼen e ma athkuy Somoel … gagyeg nag woʼen e thap ko gidiiʼ ni poloʼ riy nib yoʼor” (Alma 37:7).

President Steven C. Wheelwright ke non u Brigham Young University–Hawaii mornga’agen e fanow rok Alma: “Alma e yoeg ngak faak ni riyul’ ni kanawo’ nima fol Somoel riy napan ni gadaed ra gel nag e mich rodaed Ngak man fol ko thin rok ni pin’en nib achig mab moem, e ra tawa’ath nag daed ko nochi ma’ang’ang nib gubin e rran, ma ra boran, ma bay e murwel riy nib falel’.”³

Ke fil Elder Howard W. Hunter ni “baga’ ni pi murwel ni gubin e rran … e ke ayuweg e yafas rok boech e gidii’, nib thil ko pin’en ni ma sap e tin fayleng ngay ni boed nib falel’.”⁴

Fanow nike yoloey ba Senator Dan Coats u Indiana ni mornga’agen ta ban’en, ni ga’ar: “N’en ni kemus ni ra fal’eg rogoy ko binem ni rayog ninge thilyeg yafas, fa naam, e pi bukun mira’ay nge biyu’ e tafney, rogoney, pi n’en ni yima dugliy ni gur rom.”⁵

Pi n’em ni yibe mel’eg ni “boed nib achig” e mu’un rogon ni gadaed ma murwel ko rran rodaed, n’en ni gadaed be guy ko tivi nge internet, n’en ni gadaed be bi’eg, art nge musik ni gadaed be liyeg dad’s riy ko murwel nge tabinaew, n’en ni gadaed be gay ninge feek mit daed, rogon ni gadaed be athamgil ni ngad yul’yul’ gaed. Kureb e n’en ni boed nib achig mab moem e ngan falfalen’ gaed.

Dariy reb e pinn’ey nib achig mab moem ni gadaed ba adag ni rayog ninge ayuweg daed ko pin’en nib falel’ nge taw ko ngiyal’ ni yibe paer ni yibe rrin’. President Brigham Young e kanoeg nike ga’ar: “Yafas rodaed e bay nochi, magawon riy ni baga’ fan napan ni yira feek nga ta’bang, me dag rogon e yafas ko pumo’on fa ppin.”⁶

Ke liyeg daed e tin tivi ban’en nge yilen ni ra feek daed ngad chuw gaed ko tin mangil fa’anra dabin ulul gaed i siyeg. Ra ngad gel gaed ngad taw gaed ko n’en nikad dugliyed nib manemus, e ngad ulul gaed ko athamgil. Ra ayuw fa’anra gadaed bang ko ulung nibe maman u ta’abang, ni rogon nikan dag ko biney e ya’an e ulung ni yaed be murwel. Ra ngan dag boech fare wo’, gelngin e n’ew e ba gel ni fa’anra gadaed ra tal ko mamon, ma gadaed ra un ko n’ew ngad taw gaed ko n’en ni darn gayed machane ra momaw’ fa’anra dabin gayed rogon ngad dared nga m’on.

Tomuren nikan weliy mornga’agen e n’en nike buch ni bay e magawon riy, me yoloey Nephi ni ga’ar, “Ere kadguyed ni pinʼen nib achichig ni yibe rinʼ e ma gagyeg nag Somoel ni nge yib e tin nib gaʼfan riy” (1 Nephi 16:29). Fare Bin Kakrom e M’ag e mu’un e wo’ riy ni mornga’agen e biney. U rom ma kad bi’eged rogon nike gafgow piyu Israel ko parchayog. Oren e gidii’ e ke yim’ nikan ka’ed raed (muguy ko Numbers 21:6). Napan ni meybil nag Moses e gapas, man noeg ngak ni nge fal’eg ya’an “ba parchayog ko brass, nge tay ko pol.” Ma arame, “fa’anra ke ka’ed bee’ e parchayog, ma napan ni ra sap ko fare brass ni ya’an e parchayog, me gol” (thalni 9). Ba achib ban’en nike buch e ma’ang’ang riy! Machane, boed rogon napan ni weliy Nephi e biney e wo’ ngak e pi’in nibe togpluw ngak Somoel, mus napan ni fal’eg Somoel e kanawo’ nib moem ni rayog ni ngar gol gaed riy, bachan e kemus ni rib moem e kanawoʼ riy, ara rib moem, ere boʼor iyaed e yimʼ” (1  Nephi 17:41).

Binem e wo’ nge binem e fanow e be pogran ngodaed ni fare kanawo’ nib moem fa murwel nib moem nikan noeg e gathi bachan ni dani ga’fan ningad rrin’ed e n’en nib mat’aw.

Chugur, ni mus ko mithmith nib achig ko togpluw fa kan mul ni dani fol ko pin’en nib mat’aw e rayog ni nge muleg daed ko n’en ni kan magar nag daed ni ngad palog gaed riy. Fare Falan e Gonop e ke pi’ e wo’ ko biney. N’en nima buch ko dowef napan ta’reb e tamagow fa ta’reb e rom fa ta’reb e drug e dabyog ni ngan nang urngin. Machane boch nga m’on, ma pow riy e rib gel ma ra alamrin. Tafneyem ko fare sidewalk nike pil ni bachan likngin bochi gak’iy. Rib riyul’, ni magawon nima buch ko pin’en ni yibe rrin’ ni dani mangil e rayog ni dabin pag, boed e drug nibe wereg e dowef rodaed fa pornography nibe kireb nag e tafney rodaed, e rrayog ni ngan taleg fa’anra ri dabin rrin’ ko somm’on—ta’abiyay ma dariy.

Bukun e duw kafram, me weliy Elder M. Russell Ballard ngak gidii’ nibay ko general conference “rogon ni pin’en nib achig mab moem nge thap rok bee’ ni ra kireb.” Ke ga’ar: “Boed e bate nima sunmiy e yarn, me arame ngal’ e tret, me arame ngal’ e gaaf, pin’ey nib achig nike peth nga ta’bang e rayog ni nge gel ni dabyog ni ngan tha’ab. Ngari no pa’ daed ko gelngin e pin’en nib achig nib moem e rayog nibe fal’eg rogoy ngan mangil,” nibe non. “Ta’ab ngiyal’, ma ngarin nanged ni Satan e ra murwel ko nochi ban’en nib achig ni nge gagyeg nag daed nga fithik e kirbaen’ nge kireb.”⁷

President Wheelwright e ke pi magar ngak e gidii’ u BYU–Hawaii: “Fithik e mo’owaer e yibe rrin’ e pin’en nib achig nib moem nibe mo’owaer e mich, me tal e ma’ang’ang, ma yan rodaed ngak Somoel nge gil’ilungun e ke tal me tabab i wagay rogon napan nike yoen’ e tin fayleng ban’en gil’ilungun Got.”⁸

Ran ngan ayuwegney ko tin kireb ban’en ni ra kireb nag rogdaed, ma ba tu’uf ni ngan fol ko tin thothup ban’en nib achig mab moem. Elder david A. Bednay e ke weliy u lane BYU Women’s Conference ni ga’ar: “Rayog ni ngad filed mornga’agen ban’en nge fan e ra wo’ ney nib mangil ko … raen nibe map nga fithik e buut nib boch’uw,” nib thil rogon ko raen nib gel nibe map ko gin ni dani tu’uf.

Ke weliy ni ga’ar: “Raen nibe lul’ e yan nga fithik e but me fal’eg e but ni rayog ni nge tugul e woldug riy. Boed e binem, ma fa’anra gur nge gaag e ri gadow be tiyan’uy ko tin mangil ban’en, ma arame fapi lekngin e gospel e rayog ni nge yan nga fithik daed, ma rayog ni nge paer nib gel, ma rayog ni nge falel’ me mangil rogon.”

Me ulul, ni ga’ar, “Wo’ ko pin’en nib achig nib moem e ma feek iyib e tin falel’ nima gel nigey, gel nag e yul’yul’, marin pi’ey ngak Somoel ni Yesus Kristus nge gospel Rok.”⁹

Fare Profet Joseph Smith nike fil e biney ko thin nikan yoloey u lane Doctrine and Covenants, ni fil ni dariy bee’ ni nge sap ko mithmith roraed nib ban’en nib achig, ya bay e pi gidii’en Got nima sap ko pin’ey (muguy ko D&C 123:15).

Napan kakrom ni yibe gay rogon ni ngan toey e Galasia u Missouri, me yoeg Somoel ni ngan sag’al ya gubin ban’en ma buch ko ngiyal’ nib mangil (muguy koD&C 64:32). Ma arame fil nib fel’ ngodaed ni dabin chalbey i rrin’ e pin’en nib mat’aw, ya gadaed be tabab nag ba murwel nib falel’. Ma dakean ban’en nib achig e ma buch ban’en riy nib falel’ (muguy koD&C 64:33).

Mich u wun’ug ni gadaed gubin ma gadaed ba adag ni ngad fol gaed ko thin rok President Russell M. Nelson ni ngan athamgil ko “fare kanawo’ ko m’ag.”¹⁰ M’ag rodaed e ngad rrin’ed e be pi’ gelingdaed e “pin’en nib achig” ni kan fanow nag daed riy ko fare gospel rok Yesus Kristus nge pi toygang’ ko Galasia Rok. Gube micheg Rok ma be pi’ e tawa’ath Rok ngak e pi’in nibe gay rogon ni nge paer ko kanawo’ Rok nib m’ag, u dakean fithngan Yesus Kristus, amen.