Angei ewe Ngun mi Fel pwe Noum Chon Emwen
Mwa met me eingeingen ew niffang ese wor tappin a tori ekkewe mi nuku non Jises Kraist. Ena niffang ina ewe Ngun mi Fel.
Non ei Raninifenin Paska, ach ekiek ra kunu ngeni ewe Manausefanin ewe Samon Jises Kraist me pwan ngeni ewe peias mi pȍn mi awora apinukunuk ngeni meinisin chon nuku usun an Kraist win ngeni kufungauan mano. Ua nuku, non ewe chok pwan napanap ewe Aposel Paul a fori, usun chok Kot mi “amanauata Jises seni Mano [nge] I epwe pwan [emwitiri] [inisich] kewe mi tongeni mano ren Ngunun a pwan nom [rech].“1
Ewe kapas emwitiri a wewe amanaua. Usun chok Kraist mi amanauasefanni inisich mwirin manon inis ren manamanen An Achasefan, I a pwan tongeni emwitirikich, ika amanuakich, seni manon ngun.2 Non ewe puken Moses, sia anneani usun an Adam a weri ei sokkun emwitir: Adam a paptais, me ewe Ngunun Kot a totiw won, me iwe a uputiw non Ngun, me a emwitir non inisin.3
Met me eingeingen ewe niffang ese wor tappin a tori ekkewe mi nuku non Jises Kraist. Ena niffang ina ewe Ngun Mi Fel mi awora ngeni kich minne ewe Testamen Sofo mi eitena ngeni “manau non Kraist.”4 Nge fan ekkoch sise fen afanni ena niffang?
Pwi me fefine, iei ach tufich mi amwarar pwe ewe Ngun mi fel epwe ach chon emwen,5 usun minne mi esinesin non ei porous.
Non ewe moun an Muun Korea, Ensign Frank Blair a angang won efoch wan sounfiu sipw a nonnom Sapan.6 Ewe sip ese wate an epwe wor emon mi kefinita epwe aninis non pekin namanam won ewe sip, iwe ewe kaptin a tingorei Pwipwi Blair an epwe wisan aninis non pekin namanam won ewe sip, fan itan a kuna pwe ewe anuon i emon mi nuku me tupwen, emon mi nap sufonun me ren unusan chon ewe sip.
Ensign Blair a makkei: “Wach ewe sip a ono ren ew watten menumen. Ekkewe no mi ukukun 45 fit tekian. Ngang ua wisen mas ... non ena atun ew me nein ekkewe unufoch mwesin a ta me ra repotei pwe a wor ekis mwok nukanapen ewe sip. Mei wor ruu mwesin nusun, efoch mi chok angang ren esop chok an pechekun. Aua nom non ew watten osukosuk.”
Ensign Blair a awesino an wisan mas me a tota won an we pet nupwen ewe kaptin a fichifich won asaman we. A eisini, “Kose mochen kopwe ioteki wach ei sip?” Ewer, Ensign Blair a tipew ngeni.
Non ena fansoun, naman Ensign Blair epwe chok iotek, “Samach won Nang, kose mochen kopwe efeiochu wam ei sip o tumunukem,” o pwan annuteno. Nge, a iotek an epwe sinei ika mei wor mettoch i mi tongeni fori minne epwe afata tumunun ewe sip. Ren penuan an Pwipwi Blair we iotek, ewe Ngun mi Fel a ereni epwe feinno ngeni nenian ekkewe chon nemeni fetanin ewe sip, fos ngeni ewe kaptin, me pwan kaeo ekkoch. A kuna pwe ewe kaptin a achocho ne ekieki epwe ifan mwitirin ewe sip mi tufich ren ekkewe mwesin nusun. Ensign Blair a niwiniti rumwan o a iotek sefan.
A iotek, “Met ngang mi tongeni fori ne anisi ewe osukosuk ren ekkewe mwesin?”
Ren penuan, ewe Ngun mi Fel a mongungu ngeni pwe a auchea an epwe fetan fein won ewe sipw o nenengeni an epwe pwan ioni ekkoch porous. A niwin ngeni ewe kaptin o a tingor ren mwumwutan an epwe fetan fein won ewe sipw. Mwirin, fiti efoch senin amanau a fot ngeni inisin, a tou nukun non ewe menumen.
A uta winikaamen ewe sip, a nenengeni ekkewe watten tapen nupwen ra pwata seni ewe sat nupwen ewe sip a nom asen ew no. Efoch chok mi kunnuoch, me a kunnu mwitir. Mwirin an kuna ekkei, Ensign Blair a iotek sefan. Penuan mi fatoch i a angei pwe ewe ew mwesin nusun mi kan weires me mi namwot epwe amangeno. Iwe a niwin ngeni ewe kaptin me a ereni met repwe for. Ewe kaptin a mairu, a ereni pwe ewe sou sinenapei mwesinen ewe sip a ereni osokurun met ewe a ureni epwe fen fori—pwe repwe emwitiri ewe mwesin mi och pwe repwe mwitir seni ewe menumen. Nge inamo, ewe kaptin a fini an epwe fiti kapasen Ensign Blair me amangeno ewe mwasin. Sorotan ewe sip a fen nom non sat kinamwe.
Mwirin chok ru awa, ewe mwesin mi och a tano. Ren ewe efoch a chok esop pochokunan, ewe sipw a tongeni sa pwetetenong non ewe noom.
Ewe Kaptin a ereni Ensign Blair, “Ika sise amangano ena mwesin nupwen sia fori, sipwe fen morukono non ewe menumen.”
Ika ese wor ena mwesin, esapw tufichin kerik ewe sip. Ewe sip epwe fen, nupono, o kokono. Ewe kaptin a apasa an kinisou ngeni ewe anuon soun fiu chon LDS me a ereni pwe a nuku ren an apwonueta minne Ensign Blair a mefi me non ngun mi amanaua ewe sipw me amanaua ekkewe aramas won.
Ei pworaus mi kan amairu. Naman kich sisap kuna ena pekin osukosuk mi efeignau chapur, non ei porous mei wor kapasen emwen mi kan auchea won ifa usun sia tongeni angei an ewe Ngun mi Fel emwen fan chommong non manauach.
Aewin, ika tori atun pwarata, sipwe okunuochu ach nenien rongorong ngeni pworausen nang. Ensign Blair a manaueni ew manau mi nimoch o tupwen. Ika i emon mi anneasonap, esap wor ren ewe tipepwosun ngun mi namwot an epwe iotek usun met a fori ren tumunun ewe sipw me angei tichikin kapasen emwen. Sipwe pwisin achocho ne aweneweneochu manauach ngeni annukun Kot pwe sipwe angei emwen me ren I.
Fan ekkoch sise tongeni rong kapasen nang pun sise nimoch ngeni. Aier me anneasochis ir ewe an minne sipwe auseningochu sefan. Ewe kapasen Testamen Nom ren aier mi fen awewei “siwin” are “kunnuno.”7 Nupwen oua mefi pwe oua touau seni Kot, mi namwot chok oupwe fini pwe oupe kunnu seni tipis me nennengeni ewe Chon Amanau, ikkeweia oupwe kuna pwe I mi sounikemi, pounkewe mi fen itiu. A mochen emwenikemi, me ami mi chok nom aukukun taman ew iotek pwe oupwe angeisefanni ena emwen.8
Aruan, Ensign Blair ese chok tingorei ewe Samon an epwe pwisin ewesano an osukosuk. A tingor ren met i mi tongeni fori pwe i epwe chon atawei ewe osukosuk. Usun chok sia tongeni tingor, “Samon, met ngang mi namwot upwe fori pwe ngang upwe winiti chon atawei ewe osukosuk?” Sisap chok ateteni ach osukosuk non iotek me tingorei ewe Samon an epwe forir, sipwene fen kutta met sia tufichin fori pwe sipwe angei an ewe Samon aninis me pwon pwe sipwe apwonueta emwenin ewe Ngun.
Mei wor pwan ew eunugnatin minen kaeo non an Ensign Blair pworaus. Mi tufich pwe i epwe iotek non an tipepwos kinamwe ika i ese fen mefi emwenin ewe Ngun fan fitu me akkomw? Wareton ewe menumen esap ewe fansoun mi fich pwe sipwe chechemenisefanni seni nom ewe niffangen ewe Ngun mi Fel me achocho ne kaeo mokutukutun. Ei anuan mi fen fofori non manauan ew tapin mokutukut i mi fofori seni nom, fiti pwan an fansoun i emon misineri. Mi namwot pwe ewe Ngun mi Fel epwe wisan emwenikich non sat mi kinamwe pwe sipwe tongeni esinnaochu mwongungun ngeni kich non menumen mi fitikoko.
Ekkoch ra ekieki pwe sisap ekkieki pwe sipwe angei emwenin ewe Ngun iteitan ran pun ese fich pwe Kot epwe annuku ngeni kich mettoch meinisin, ika ina sipwe winiti chon angang mi chipwang.9 Nge ei wokisin a mak ngeni ekkoch misinerin nom mi tingorei Joseph Smith an epwe angei pwarata ir repwene fen tufich angei pwisin. Non ew wokisin mwirin, ewe Samon a erenir pwe repwe feito ngeni ewe nenian angangen misineri ir me ewe Samon ar repwe aninnis fengen.10
Ekkei misineri mi mochen angei tichikin pwarata usun ar kokotun sai. Rese mwo kaeo ar repwe pwisin kuta emwen ngeniir pwisin. Ewe Samon a eita ngeni ei mokutukut ren pwisin itan: chipwang. Chon Mwichefen me akkom repwe fen pwapwa ren an wor nour ennetin soufos pwe ra nom non osukosuk ren ar tur non ar repwe kaeo ifa ussun ar repwe angei pwarata won pusin inisir. Ach pusin anongonong won winikapach non pekin ngun sia tongeni ach sipwe rongorong mongungun ewe Samon seni Ngunun ewe ren pusin manauen emon.
Alma a auroura noun we an epwe “aurour ngeni ewe Samon non meinisin om foffor.”11 Ach sipwe manau non ei napanap—minne sia eita ngeni “manau ren ewe Ngun”—ina ew tufich napanap. A awora kinamwe me fatafatoch me pwan uwan ewe Ngun, usun tong, pwapwa, me kinamwe.12
An Ensign Blair nipwakochun angei pwarata mi amanawa i me chinan kewe won ewe sipw seni ew menumen mi fitkikoko. Mei wor pwan ekkoch sokkun menumen mi eniweniw ikkenai. An ewe Puken Mormon pworaus monomon usun ewe iran manau13 mi awora ew minen awewe mi manaman ren ifa usun sia tongeni angei tumunun ngun non ena sonkun fonufan. Ei tan a awewei usun kuchun rochopwak mi esinepato tatakisin ngun ngeni ekkewe chon Mwichefen mi fetan won ewe an ngeni Kot.14
Ren ai ua anchangei ei sasing, ua kuna non mesan ai ekiek chommong aramas mi fetan won ena an, ekkoch mi kamwochunuk won ewe wok mecha, nge chommong mi chok tapw mwirin pechen ekkewe aramas mwer. Ei sokkun mokutukut ese weires, ese namwot ekiek. Ka tongeni pwisin fori me ekkiek usun met pwan ekkoch ra fori o ekkiek. Ena mi och non ranoch. Nge ekkewe menumenen nikotuputup me kuchun mwaken mi war me rese esinesin repwe war. Non ekkei fansoun, ach sipwe esinna neuwan ewe Ngun mi Fen mi esinepato manauan ika manon ngun.
An Nifai pwon mi amwarar pwe, “iwe ika ion epwe aneasochis ngeni ewe kapasen Kot, me … kamwochunuk ngeni … resap tongeni mano non ngun; iwe pwan ekkewe sossot me ekkewe nikappich mi ngetenget an ewe chon ungeni rese tongeni nemenireno me ochunnereno, an epwe emmwenireno ngeni kiteter.”15
Ami oupwe tapw mwirin pechen ekkewe mwemi won ewe an ese naf. Sise tongeni chok fori me ekkieki usun chok met ekkoch mi fori o ekkiek; sipwe manaueni ew manau fan emwen. Mi namwot ngeni kich meinisin me pwisin kamwoch ewe wok mecha. Iwe sipwe tongeni feino ngeni ewe Samon non tipepwosun tipetekison, o sinei pwe I epwe emweni kich non poun me penueni ach kewe iotek.16 Non itan Jises Kraist, amen.