Cia tus Ntsuj Plig Dawb Huv Coj Nej Kev

Hnub Easter Sunday no, peb xav txog tus Tswv Yexus Khetos txoj Kev Sawv Rov Los thiab txog qhov ntxa uas tsis muaj leej twg nyob haud uas ua rau txhua tus ntseeg muaj kev cia siab rau Khetos txoj kev kov yeej qhov uas lwm tus kov yeej tsis tau.Kuv ntseeg hais tias, zoo li tus Thwj Tim Povlauj, ib yam li Vajtswv “tsa Yexus Khetos sawv hauv qhov tuag rov qab los [Nws] yuav [txhawb peb] lub cev uas txawj tuag [kom muaj txoj sia] thiab rau qhov nws tus Ntsuj Plig nyob hauv [peb].”¹

Lo lus quicken nyob hauv nqe no txhais hais tias txhawb kom muaj txoj sia. Ib yam li Khetos ua rau peb lub cev rov qab muaj txoj sia tom qab peb tuag ntawm sab cev nqaij daim tawv dhau ntawm lub hwj chim ntawm Nws txoj Kev Sawv Rov Los, nws kuj txhawb tau peb kom rov muaj sia tom qab peb tuag ntawm sab ntsuj plig.² Nyob hauv phau Mauxes peb nyeem txog Adas rov muaj txoj sia zoo li no: “Ces nws tau ua kev cai raus dej li ntawd, thiab Vajtswv tus Ntsuj Plig nqis los rau nws, ces nws tau yug los ntawm tus Ntsuj Plig li ntawd, thiab txhawb nws lub siab lub ntsws.”³

Cov uas muab siab rau ntseeg Yexus Khetos txais tau ib lub txiaj ntsim uas sib piv tsis tau. Lub txiaj ntsim ntawd yog tus Ntsuj Plig Dawb Huv uas ua rau peb “nrog Khetos koom ib txoj sia” zoo li hais nyob hauv Phau Tshiab.⁴ Tiam sis peb puas saib ib lub txiaj ntsim zoo li no tsis rau nqi?

Cov kwv tij thiab cov muam, yeej yog ib lub sam xeeb zoo kawg nkaus vim peb muaj “tus Vaj Ntsuj Plig Dawb Huv ua [peb] tus coj kev”⁵ xws li yuav qhia nyob hauv zaj no.

Daim Duab

Tub Rog Frank Blair

Nyob hauv Kev Tsov Rog hauv Kaublim Teb, Tub Rog Frank Blair ua hauj lwm hauv ib lub nkoj thauj pawg tub rog nyob hauv Nyijpooj Teb.⁶ Lub nkoj loj tsis txaus kom muaj ib tug xib hwb thov ntuj, yog li ntawd tus thawj tub rog hais kom Tij Laug Blair ua lub nkoj ntawd tus xib hwb, vim nws pom tias tus tub hluas no ntseeg ntuj thiab ua raws li qhov yog, txhua tus thiaj li saib taus nws.

Daim Duab

Tub Rog Blair

Tub Rog Blair sau hais tias: “Peb lub nkoj raug cua daj cua dub loj heev. Dej nphau nphwv siab li 45 feet [14 m]. Yog lub sij hawm kuv zov nyas … thaum ib lub ntawm peb lub cav tsum tsis khiav lawm thiab muaj neeg qhia txog ib kab tawg pleb nyob nruab nrab ntawm lub nkoj. Peb tsuas muaj ob lub cav uas khiav lawm, ib lub khiav ceev npaum li ib nrab xwb. Peb muaj teeb meem loj heev.”

Tub Rog Blair ua nws lub sij hawm zov nyas tas thiab tab tom yuav pw thaum tus thawj tub rog khob qhov rooj. Nws nug hais tias, “Thov koj thov ntuj rau lub nkoj no.” Tub Rog Blair yeej txaus siab ua li ntawd.

Lub sij hawm ntawd, ntshe Tub Rog Blair thov tau hais tias, “Leej Txiv Saum Ntuj Ceeb Tsheej, thov foom koob hmoov rau peb lub nkoj thiab saib xyuas peb kom puaj phais,” ces mus pw xwb. Tiam sis, nws tau thov kom paub hais tias nws ua tau dab tsis kom pab lub nkoj yuav puaj phais. Tus Vaj Ntsuj Plig Dawb Huv tau teb Tij Laug Blair txoj kev thov, tshoov nws lub siab mus rau qhov chaw rau cov thawj coj, nrog tus thawj coj tham, thiab kawm ntxiv. Nws kawm hais tias tus thawj tub rog tab tom xav txiav txim siab yuav ua rau lub nkoj ob lub cav khiav ceev npaum li cas. Tub Rog Blair tau rov qab mus rau nws chav pw kom thov Vajtswv dua ntxiv.

Nws thov hais tias, “Kuv yuav ua li cas kom pab kho teeb meem ntawm ob lub cav no?”

Tus Vaj Ntsuj Plig Dawb Huv teb hais tias nws yuav tsum ncig mus lub nkoj thiab saib ntsoov kom paub ntxiv. Nws tau rov qab mus rau tus thawj tub rog thiab thov nws tso cai cia nws mus ncig qhov chaw sawv saib hav dej. Ces, nrog rau ib txoj hlua uas khi nws lub duav, nws tawm mus hauv cua daj cua dub.

Sawv rau ntawm tog tw nkoj, nws pom tej khaub lig loj heev thaum tawm hauv dej los thaum lub nkoj tab tom dhau ib nthw dej. Tsuas muaj ib lub uas kiv, thiab lub ntawd kiv ceev heev. Tom qab nws pom tej no, Tub Rog Blair rov qab mus thov Vajtswv dua ntxiv. Nws txais kev teb meej heev lub cav zoo ntawd khiav ceev dhau thiab yuav tsum muab lub cav ntawd khiav qeeb me ntsis. Yog li ntawd nws tau rov qab mus rau tus thawj tub rog thiab hais li ntawd. Tus thawj tub rog xav tsis thoob, qhia nws tias lub nkoj tus kws khiav tshuab tau hais kom ua qhov fab ntxeev—hais tias yuav ua rau lub cav zoo khiav ceev dua ntxiv kom tawm tau cua daj cua dub. Txawm li ntawd los, tus thawj tub rog xaiv ua raws li Tub Rog Blair tej lus thiab ua rau lub cav ntawd khiav qeeb me ntsis. Thaum txog kaj ntug txoog lub nkoj nyob hauv cov dej uas nyob tus.

Ob teev tom qab ntawd, lub cav zoo twb nres tsis khiav hlo li. Vim lub cav uas tseem tshuav khiav ib nrab xwb, lub nkoj ntawd maj mam mus txog chaw nres nkoj.

Tus thawj tub rog hais rau Tub Rog Blair, “Yog tias peb tsis tau ua rau lub cav ntawd khiav qeeb thaum peb ua li ntawd, ntshe peb yuav xiam lub cav ntawd thaum peb tseem nyob hauv cua daj cua dub.”

Yog tias tsis muaj lub cav ntawd, lawv yeej yuav tig tsis taus lub nkoj. Lub nkoj yuav ntxeev thiab tog mus rau hauv dej. Tus thawj tub rog tau ua tus tub rog hluas ntawm lub Koom Txoos tsaug thiab hais tias nws ntseeg tias qhov uas nws ua raws li Tub Rog Blair tej kev tshoov siab twb tau cawm lub nkoj thiab cov tub rog nyob haud.

Nim no, zaj dab neeg no hais txog ib qho teeb meem loj kawg. Thiab txawm yog peb feem tsawg yuav raug xwm txheej zoo li no, zaj no muaj tej ntsiab cai tseem ceeb txog tej yam peb ua tau kom txais tau tus Ntsuj Plig txoj kev coj tsis tu ncua.

Ntsiab cai thib ib, thaum hais txog kev tshwm sim, peb yuav tsum ua tib zoo mloog kom hnov tau lub suab ntawm lub ntuj ceeb tsheej. Tub Rog Blair ua neej huv thiab rau siab ntseeg. Yog tias nws tsis tau mloog lus, nws yuav tsis muaj kev ntseeg ntawm sab ntsuj plig kom thov Vajtswv zoo li nws tau thov kom nws lub nkoj puaj phais thiab kom nws txais tau tus Ntsuj Plig tej lus qhia tseeb li ntawd. Peb yuav tsum siv zog kom ua neej raws li Vajtswv tej lus txib Nws thiaj yuav coj peb txoj hau kev.

Tej lub sij hawm peb hnov tsis tau lub ntuj ceeb tsheej lub suab vim hais tias peb tsis tsim nyog. Kev hloov siab lees txim thiab kev mloog lus yuav ua rau peb rov qab txais tau tus Tswv tej lus meej. Lo lus hloov siab lees txim nyob hauv Phau Qub txhais tias “tig” los yog “tig mus.”⁷ Thaum nej xav tias nej nyob deb ntawm Vajtswv, nej yuav tsum txiav txim siab tig mus ntawm kev txhaum thiab nyob tab meeg tus Cawm Seej, thiab nej yuav pom Nws tos nej, nrog Nws txhais npab ncav. Nws xav xav coj nej mus, thiab yog nej thov ib zaug xwb ces nej rov qab txais tau Nws txoj kev coj dua.⁸

Ntsiab cai thib ob, Tub Rog Blair tsis tau thov tus Tswv kho nws qhov teeb meem. Nws thov seb nws yuav ua tau li cas kom kho tau qhov teeb meem ntawd. Tej zaum peb yuav xav thov zoo ib yam hais tias, “Kuv yuav tsum ua li cas kom kho tau qhov teeb meem no?” Tsim nyog uas peb tsis txhob qhia txog peb txhua qhov teeb meem thaum peb thov tus Tswv thiab thov kom nws kho tej ntawd, tiam sis peb yuav tsum xav txog tej yam peb xav tau ces xav txog tej yam peb ua tau kom thov tus Tswv txoj kev pab thiab cog lus tias peb yuav ua raws li tus Ntsuj Plig qhia.

Muaj ib lub ntsiab cai thib peb uas tseem ceeb nyob hauv Tub Rog Blair zaj no. Nws puas txawj nyob tus tus thov Vajtswv li no yog tias thaum yav tas los nws tsis tau txais tus Ntsuj Plig txoj kev coj? Lub sij hawm thaum muaj cua daj cua dub tsis yog lub sij hawm zoo kom nco txog lub txiaj ntsim Vaj Ntsuj Plig Dawb Huv thiab xav seb yuav siv li cas. Tus tub hluas no yeej ua raws li tus yam ntxwv uas nws twb tau siv ntau zaus ua ntej, tsis hais thaum nws yog ib tug tub txib los yog. Peb yuav tsum muaj tus Ntsuj Plig Dawb Huv coj peb kev nyob hauv cov dej uas nyob tus yog li ntawd peb yuav paub tseeb yog Nws lub suab thaum peb nyob hauv cua daj cua dub loj heev.

Tej zaum ib txhia yuav xav tias peb tsis tas cia siab tias tus Ntsuj Plig yuav coj peb kev txhua hnub vim “tsis tsim nyog kom [Vajtswv] yuav tsum txib txhua yam,” ntshe peb yuav ua cov tub qhe tub nkeeg.⁹ Tiam sis nqe vaj lug kub no yog hais rau ob peb tug tub txib uas xav kom Yauxej Xamiv txais kev tshwm sim rau lawv uas tsim nyog lawv txais rau lawv tus kheej. Nqe ua ntej hais tias, tus Tswv tau hais kom lawv mus rau qhov chaw tshaj tawm txoj moo zoo “raws li lawv sib sab laj nrog lawv tus kheej thiab nrog kuv.”¹⁰

Cov tub txib no lawv tau xav txais kev tshwm sim txog lawv txoj kev taug mus. Lawv tseem tsis tau kawm kom txais tau tus Tswv txoj lus qhia rau lawv tus kheej. Tus Tswv hais tias tus cwj pwm no yog kev tub nkeeg. Cov mej zeej ntawm lub Koom Txoos thaum ntawd los tej zaum lawv zoo siab heev vim muaj ib tug yaj saub tseeb ntshe lawv yuav raug xwm txheej vim lawv tsis tau kawm txais kev tshwm sim lawv tus kheej. Qhov uas peb vam khom peb tus kheej ntawm sab ntsuj plig yog qhov uas peb mloog tus Tswv lub suab dhau los ntawm Nws tus Ntsuj Plig kom coj tau peb lub neej.

Amas ntuas nws tus tub kom “sab laj nrog tus Tswv txog txhua yam uas koj ua.”¹¹ Kev ua neej zoo li no—uas peb hu ua “ua neej raws li tus Ntsuj Plig”—yeej yog ib lub cib fim zoo kawg. Kev ua neej zoo li no ua rau yus nyob tus thiab paub tseeb thiab txais tau tej yam zoo los ntawm tus Ntsuj Plig, xws li kev hlub, kev xyiv fab, thiab kev kaj siab lug.¹²

Tub Rog Blair txoj kev txawj txais tau kev tshwm sim tau cawm nws thiab nws cov phooj ywg kom tsis txhob raug cua daj cua dub. Muaj lwm yam cua daj cua dub niaj hnub nim no. Phau Ntawv Maumoos zaj lus piv txwv txog tsob ntoo uas cawm neeg txoj sia¹³ ua rau peb xam pom yuav ua li cas kom txais tau kev puaj phais ntawm sab ntsuj plig nyob hauv ib lub ntiaj teb zoo li no. Zaj ua npau suav no qhia txog txoj kev tsaus ntuj muaj huab zig niab uas ua rau cov mej zeej ntawm lub Koom Txoos raug puas tsuaj ntawm sab ntsuj plig thaum lawv taug kev rov qab mus cuag Vajtswv.¹⁴

Daim Duab

Lihais ua npau suav

Thaum kuv xav txog qhov no, ua rau kuv xam pom tib neeg coob uas taug txoj kev ntawd, ib txhia tuav rawv tus nqaj hlau, tiam sis feem coob cia li saib cov neeg nyob tom hauv ntej txhais ko taws raws li ntawd. Lawv ua li no los tsis tas xav ntau yam los yog siv zog. Yus cia li ua thiab xav tej yam uas lwm tus ua thiab xav. Thaum tshav ntuj nrig tsis ua li cas. Tiam sis tej cua daj cua dub uas yog kev ntxias thiab tej huab zig niab ntawm kev dag yeej los kiag. Thaum ntawd, qhov uas peb paub tus Vaj Ntsuj Plig Dawb Huv lub suab zoo yeej cawm tau peb sab ntsuj plig.

Nifais cov lus cog tseg yog hais tias “cov uas mloog Vajtswv txoj lus, thiab tuav txoj lus no tsis tso, … yuav tsis piam sij ib zaug li; thiab tej kev haub ntxias thiab tus yeeb ncuab tej xib xub hluav taws yuav kov tsis yeej lawv ua rau lawv dig muag, kom coj lawv mus rau txoj kev puas tsuaj.”¹⁵

Kev raws cov neeg uas taug txoj kev nyob tom hauv ntej yeej tsis txaus. Tsis tsim nyog peb ua thiab xav zoo li lwm tus ua thiab xav; peb yuav tsum muaj ib tug coj peb kev. Peb txhua tus yuav tsum tso ib txhais tes tuav tus nqaj hlau. Ces peb yuav txo hwj chim cia siab rau tus Tswv, vim peb paub tias Nws “yuav tuav tes coj [peb], thiab hais lus teb [peb] tej lus thov.”¹⁶ Los ntawm Yexus Khetos lub npe, amees.