Bōk Jetōb Kwojarjar eo āinwōt Am̧ Kam̧bōj
Ta ejjab juon menin letok ban keidi me ej itok n̄an ro rej likūt aer tōmak ilo Jisōs Kraist. Menin letok in ej Jetōb Kwojarjar eo.
Ilo Jabōt in Ijtō in, ļōmņak ko ad rej oktak n̄an Jerkakpeje eo an Irooj Jisōs Kraist im n̄an lōb eo ejjeļo̧k kobban me ej leļo̧k n̄an aolep ritōmak kōjatdikdik ilo anjo̧ eo an Kraist ijjelo̧kin n̄e enej ejjeļo̧k kōjatdikdik in jerkakpeje. Ij tōmak, ippān Rijilōk Paul, bwe baj āinwōt Anij “ear kajerkakpeje Jisōs jān ro re mej [barāinwōt] [Enaaj] kōmour [ami] ānbwinnen mej kōn Jetōb eo An Ej jokwe ilo [kōj].”1
N̄an kōmour meļeļein kōm̧m̧an bwen mour. Baj āinwōt an Kraist kōro̧o̧ltok kōj n̄an mour ālkin mej in kanniōk kōn kajoor eo an Jerkakpeje eo An, kōn menin E emaron̄ kōjerkak kōj, ak kōmour kōj, jān mej in jetōb.2 Ilo bok in Moses, jej riit kōn an Adam jelm̧ae kain kōmour in: “[Adam] eaar peptaij, im Jetōb eo an Anij eaar wōtlo̧kļo̧k ioon, im āindein eaar ļotak jān Jetōb eo, im kar ļijur armej ilo ilowa ilo e.”3
Ta ejjab juon menin letok ban keidi me ej itok n̄an ro rej likūt aer tōmak ilo Jisōs Kraist. Menin letok in ej Jetōb Kwojarjar eo ej letok n̄an kōj ta eo Kallim̧ur Ekāāl ej ņaetan “mour ilo Kraist.”4 Ak jet iien jej ke jab lukkuun ļōmņak kōn kain menin letok in?
Ro jeiū im jatū, ej juon kōjeraam̧m̧an eļap in kabwilōn̄lōn̄ n̄an “bōk … Jetōb Kwojarjar eo bwen [ad] kam̧bōj,”5 āinwōt an kōmeļeļeiki ilo en̄jake.
Ilo kar Pata eo an Rikorea, Ensign Frank Blair ekar jerbal ioon juon tim̧a ej kōm̧akūtkūt ritariņae ro ekar pād ilo Japan.6 Tim̧a in ekar jab lukkuun kilep bwen maron̄ wōr juon ribōk eddo in jar im kabun̄ ie, kōn menin kiaptin eo ekar kajjitōk ippān Jeid im Jatid Blair bwen erom̧ ribōk eddo in jar im kabun̄ ioon wa eo, ālkin an etale im jeļā bwe likao in ej juon armej in tōmak im pedped ko, jeļļa ro rekar kautieje.
Ensign Blair ekar jeje: “Tim̧a in waad ekar ioon juon taibuun kileplep. Ņo ko rekar bōlen 45 nee [14 km] utijier. Ke ikar jerbal im waj … ilo iien in juon iaan injin ko jilu ekar bōjrak an jerbal im juon kōk ilo ļain eo ilukwon tim̧a eo kar maron̄ ripoote. Ruo wōt injin rekar jerbal ippem ilo tim̧a eo, juon iaer jimettanin ekar jerbal. Kōm̧ kar pād ilo juon jorrāān eļap.”
Ensign Blair ekar jem̧ļo̧k an waj im ekar itōn kiki ke kiaptin eo ekar kōļļaļaļ ilo kōjem̧ eo an. Ekar kajjitōk, “Komaron̄ ke jouj im jar kōn tim̧a in.” Aaet, Ensign Blair ekar errā in kōm̧m̧an āindein.
Ilo iien in, Ensign Blair emaron̄ wōt kar baj jar, “Jemedwōj Ilan̄, jouj im kōjeraam̧m̧an tim̧a in waam̧ im kōjparok kōm̧,” innām etal im kiki. Ijjelo̧kin, ekar jar bwen jeļā eļan̄n̄e ewōr juon men E emaron̄ kōm̧m̧an n̄an jipan̄ lale kōjparok eo an tim̧a eo. Ilo uwaak n̄an jar eo an Jeid im Jatid Blair, Jetōb Kwojarjar eo ekar im̧we e bwen wanlōn̄ļo̧k n̄an jikin kiaptin eo ilōn̄, kōnono ippān kiaptin eo, im katak eļapļo̧k. Ekar loe bwe kiaptin eo ekar kajjieon̄ lale ewi jon̄an an iiūm̧ wa eo ilo an kōjerbal injin ko rej jerbal. Ensign Blair ekar bar ro̧o̧lļo̧k n̄an kabin eo an im bar jar.
Ekar jar, “Ta eo imaron̄ kōm̧m̧ane n̄an jipan̄ kwaļo̧k jorrāān eo ippān injin ko?”
Ilo uwaak n̄an jar eo, Jetōb Kwojarjar eo ekar unoojdikdik n̄an e bwe eaikuj in etetal ipeļaakin wa eo im lale n̄an aiin eļapļo̧k meļeļe ko. Ekar bar ro̧o̧lļo̧k n̄an ippān kiaptin eo im kajjitōk mālim n̄an an etetal ipeļaakin tek ko. Innām, ekar lukwōje ipin kōn juon to, im wanlaļļo̧k n̄an ļan̄ eo.
Jutak ilo stern eo ikabin wa eo, ekar loe ijin ko reļļap rewaļo̧ktok ioon iaijet ke tim̧a eo ekar pād ioon ņo̧. Juon wōt iaer ekar lukkuun jerbal, im ekar iiūm̧ an ro̧o̧l injin eo. Ālkin etale kein, Ensign Blair ekar bar jar. Uwaak eo ealikkar ekar bōke ekar bwe ijin eo em̧m̧an im ej jerbal ekar ļap an iūum̧ im aikuj in karum̧wijļo̧k. Kōn menin ekar ro̧o̧lļo̧k n̄an ippān kiaptin eo im kar kwaļo̧k ta eo raaikuj kōm̧m̧ane. Kiaptin eo ekar bwilōn̄, ba n̄an e bwe injineerin̄ eo an tim̧a eo ekar jiron̄ļo̧k e juon men eoktakļo̧k—bwe ren buuļiļo̧k injin eo em̧m̧an bwen m̧ōkajļo̧k jān ļan̄ eo. Mekarta, kiaptin eo ekar kālet n̄an ļoor kakobaba eo an Ensign Blair im kōraļo̧kļo̧k injin eo. Ilo joraanļo̧k in raan eo tim̧a eo ekar emmaan ioon dān ko reļae.
Ruo wōt awa ko tokālik, injin eo em̧m̧an ekar bōjrak an jerbal. Kōn wōt jim̧ettan in injin eo ej jerbal wōt, tim̧a eo ekar maron̄ in em̧m̧akūtļo̧k n̄an o̧b eo.
Kiaptin eo ekar ba n̄an Ensign Blair, “Eļan̄n̄e jeban kar kōraļo̧kļo̧k injin eo iien eo jekar kōm̧m̧ane, jemaron̄ kar jako ibuļōn ļan̄ eo.”
Eļan̄n̄e en kar jab injin eo, eban kar wōr iaļen ad kōjebwebweik wa in. Tim̧a eo en kar maron̄ okjak im tūm̧laļļo̧k. Kiaptin eo ekar kam̧m̧oolol opiija in em̧m̧an dettan ej LDS im ba ej tōmak im̧we kein ilo jetōb an Ensign Blair rekar lo̧mo̧o̧ren tim̧a eo im jeļa ro an.
Kiiō, bwebwenato in ebwe an kalimomo. Ilo ad maron̄ jab jelm̧ae āinwōt kain jekjek kein, bwebwenato in ewōr ie kam̧bōj ko raorōk kōn wāween ad maron̄ bōk tōl eo an Jetōb eo ļapļo̧k im emmakijkijļo̧k.
Kein kajuon, n̄e ej itok n̄an revelesōn, jej aikuj kajejjet taim̧ eo ad n̄an maron̄ bōk ainikien ko jān lan̄. Ensign Blair ekar mour juon mour erreo im etiljek. N̄e en ke bōt, en kar ejjeļo̧k ippān lōke ilo jetōb kōn aikuj eo n̄an jar āinwōt ekar kōm̧m̧ane n̄an kōjparok eo an tim̧a eo waan im n̄an an bōk jabdewōt kain tōl. Jej aikuj kajjojo iaad kijejeto n̄an kajim̧we mour ko ad ippān kien ko an Anij bwe jen maron̄ tōl jān E.
Jet iien, jemaron̄ jab ron̄ jōknōļ jān lan̄ kōnke jejjab erreo. Ukwelo̧k im pokake rej iaļ ko n̄an bōk juon ennaan ealikkar bar juon alen. Naan eo ilo Kallim̧ur M̧okta n̄an ukweļo̧k meļeļein “n̄an oktak” ak “oktak likļo̧k.”7 N̄e kwoj en̄jake am̧ ettoļo̧k jān Anij, kwoj aikuj in wōt kōm̧m̧an jokālet n̄an oktak jān jerawiwi im jelm̧ae Rilo̧mo̧o̧r eo, ijo kwonaaj loe E ej kōttar eok, Pein ej erļo̧kewaj. E ej kijerjer in tōl eok, im kwoj ettoļo̧k jān e kōn juon jar jān am̧ bōk tōl in bar juon alen.8
Kein karuo, Ensign Blair ekar jab baj kajjitōk ippān Irooj n̄an ņamejļan jorrāān eo an. Ekar kajjitōk ta ej aikuj in kōm̧m̧ane bwen pād im bōk koņaan im jipan̄. Āinļo̧k wōt menin, jemaron̄ kajjitōk, “Irooj, ta eo ij aikuj kōm̧m̧ane bwe in m̧ōttan wōt uwaak eo?” Ijjelo̧kin baj kōllaajraki jorrāān ko ad ilo jar im kajjitōk ippān Irooj n̄an ņamejļaer, jej aikuj in pukot wāween ko rewājabdikļo̧k n̄an bōk jipan̄ eo an Irooj im kallim̧ur n̄an kōm̧m̧ani ekkar n̄an tōl eo an Jetōb eo.
Ewōr juon katak eaorōk kein kajilu ilo bwebwenato eo an Ensign Blair. Emaron̄ ke kar jar kōn kain lōke in emeļak eļan̄n̄e ekar jab bōk tōl jān Jetōb eo kōn iien ko m̧oktaļo̧k? Itaaktok an juon taibuun ejjab juon iien n̄an menin letok eo an Jetōb Kwojarjar im pukōt elmen kōjerbale. Likao in em̧m̧an dettan ekar alikkar an ļoore juon jon̄ak ekar kōjerbal elōn̄ alen m̧okta, ekoba āinwōt juon mijenede ej jerbal aolep raan. Jej aikuji Jetōb Kwojarjar eo āinwōt ad kam̧bōj ilo dān ko reļae bwe Ainikien renej jāmin bōd n̄an kōj ilo ļan̄ ko rekaam̧jak.
Jet remaron̄ ļōmņak bwe jejjab aikuji tōl eo jān Jetōb eo aolep iien kōnke “ejjab ekkar bwe [Anij] aikuj jiron̄ kom̧ ilo men otemjeļo̧k,” ab n̄e jej erom̧ rikarejar ro rejerwaan.9 Eoon in, ijoke, ekar etal n̄an jet mijenede tōre ko m̧okta rekar kajjitōk ippān Josep Smith n̄an bōk revelesōn rej aikuj bōk revelesōn n̄an er make. Ilo juon eoon m̧oktaļo̧k, Irooj ekar ba n̄an er n̄an etal n̄an jikin mijenede eo aer “āinwōt ke renaaj bōk kapilōk ikōtaaer im N̄a.” 10
Mijenede rein rekōņaan kajjojo revelesōn kōn karōk in em̧m̧akūt eo aer. Rekar jan̄in de ekkatak n̄an pukot iaļ eo aer make ilo jekjek ko aer make. Irooj ekar ņaetan m̧wil in bwe ej: jowan. Membōr ro m̧okta an Kabun̄ in bōlen rekar lukkuun m̧ōņōņō bwe ewōr juon rikanaan em̧ool bwe rekar pād ilo kauwōtata ilo likjab in ekkatak wāween eo n̄an bōk revelesōn ko kōn er make. Ilo ad un̄n̄are peid make ej ron̄jake ainikien Irooj jān Jetōb eo An n̄an eo an mour eo ad make.
Alma ekar kakeememej ļaddik eo nejin n̄an “Pepe ippān Irooj ilo aolep kōm̧m̧an ko am̧.”11 N̄an mour ilo wāween in—emakijkij ad ņaetan “mour kōn Jetōb eo”—ej juon jeraam̧m̧an eutiej. Ej bōktok juon en̄jake in ineem̧m̧an im jeļā barāinwōt leen ko an Jetōb āinwōt iakwe, lan̄lōn̄, im aenōm̧m̧an.12
Maron̄ eo an Ensign Blair n̄an bōk revelesōn ekar lo̧mo̧o̧ren e im jeļļa ro m̧ōttan jān juon ļan̄ ekajoor. Kain ļan̄ ko jet rej ļan̄ ko renana rainin. Būrabōļ eo kōn wōjke in mour ilo Bok in Mormon eo13 ej letok juon pija ekajoor kōn wāween ad maron̄ bōk kōjparok in jetōb eo ilo laļ rot in. Ettōņak in ej jiron̄ kōn idin̄ in marok jilōn̄lōn̄ ko rej jerjer n̄an bōktok kakkure in jetōb n̄an membōr ro an Kabun̄ in rej jepļaakļo̧k ilo iaļ eo n̄an Anij.14
N̄e ij kōļmenļo̧kjeņ kake pija in, ij loe ļōmņak eo aō jarlepju in armej ro rellōn̄ rej etal ilo iaļ in, jet peier redim ilo aen in dāpdep eo, ak elōn̄ ro jet rej bar ļoor wōt bun̄tōn neen armej ro im̧aer. Jikinwe in ebōk jidik ļōmņak ak kijejeto ilo jerbal. Komaron̄ baj kōm̧m̧ane im ļōmņak ta eo ro jet rej kōm̧m̧ane im ļōmņake. Jerbal in em̧m̧an ilo juon mejatoto eo edet im ejjab wōt. Ak ļan̄ ko rem̧oņ im jarlepju in riab ko rej jārjār ilo ejjeļo̧k kakkōļ kaki. Ilo jekjek kein, ad tijem̧ļo̧k kōn ainikien Jetōb Kwojarjar ej juon men eaorōk ilo mour in jetōb im mej.
Kallim̧ur in ekajoor an Nipai ej bwe “eo enaaj kar eo̧ron̄ naan in Anij, im …jirok likatōtttōt ilo e … renaaj jamin jako; barāinwōt kapo ko im m̧ade kijeek ko an ri kapo rejamin anjo̧ iooer im kapiloik er, n̄an tōļļo̧k er n̄an jako.”15
Ļoor jenkwan neen armej eo im̧aam̧ ilo iaļ eo ejjab bwe. Jejjab maron̄ baj kōm̧m̧an im ļōmņak ro jet rej kōm̧m̧ane im ļōmņak; jej aikuj in mour juon ej tōl kōj. Kōj kajjojo aikuj in likūt pein ilo aen in dāpdep eo. Innām jemaron̄ etal n̄an Irooj kōn ettā in lōke, jeļā bwe Enaaj “tōl [kōj] kōn peim, im letok n̄an [kōj] uwaak n̄an jar ko [ad].”16 Ilo etan Jisōs Kraist, amen.