Kworom blong Ol Elda
Blong gat wan kworom blong Melkesedek Prishud insaed long wan wod i mekem ol man we oli holem prishud oli kam wan blong save mekem wok long evri saed blong wok blong fasin blong sevem man.
I no longtaem we oli oganaesem Jos long las dispensesen ia, Lod i talem long wan revelesen: “Mo tru long prea blong fet, bambae yufala i kasem loa blong mi, blong yufala i save olsem wanem blong lidim jos blong mi, mo mekem evri samting long oda long fored blong mi.”1 Prinsipol ia, yumi bin stap folem insaed long Jos—mo promes ia, Lod i bin ona long hem—stat long taem ia i kam. Ol paten blong oganaesem prishud mo seves, Lod i bin talemaot, wanwan taem, stat wetem Profet Josef Smit taem oli bin stanemap ol prishud ofis mo kworom, long taem blong yumi. Ol bigfala jenis blong mekem hemia i gud moa, Lod i bin talemaot mo oli bin yusum long taem blong Presiden Brigham Yang, John Taylor, Spencer W. Kimball, wetem sam moa long saed blong Kworom blong Olgeta Twelef, Olgeta Seventi, ol hae pris, mo ol nara ofis mo kworom insaed long tugeta, Melkesedek mo Aronik Prishud.2 Nao, long wan histri toktok we i jes kamaot, Presiden Russell M. Nelson i anaonsem wan impoten jenis.
Sapos mi save ripitim sam toktok blong hem: “Tunaet, mifala i stap anaonsem wan bigfala jenis long kworom blong Melkesedek Prishud blong save mekem wok blong Lod i kam gud moa. Long wanwan wod, ol hae pris mo ol elda, naoia bae oli kombaen long wan kworom blong ol elda … mo huia we bae i stap insaed long stek kworom blong hae pris, bae i folem ol prishud koling we oli gat i stap.”
Presiden Nelson i ademap:
Ol jenis ia, oli bin stadi long olgeta blong plante manis. Mifala i bin filim se i gat bigfala nid naoia blong kam antap long wei we yumi stap kea long ol memba blong yumi. …Blong mekem gud hemia, yumi nidim blong mekem ol prishud kworom blong yumi oli kam strong moa, blong givim moa daereksen long wok blong givhan wetem lav mo sapot we Lod i wantem blong olgeta Sent blong Hem.
“Ol jenis ia, oli kam tru long insperesen blong Lod. Taem yumi stap yusum i go, bambae yumi wok gud moa bitim bifo.”3
Olsem we Fas Presidensi i talem, Elda Ronald A. Rasban mo mi, bae i ademap sam moa ditel we mifala i sua se bae i ansarem ol kwestin we yufala i gat.
Ol Kworom blong Ol Elda mo Hae Pris
Faswan, blong talem bakegen, ?wanem nao i nid blong stretem long ol grup blong wod hae pris mo kworom blong ol elda? Long ol wod, ol memba blong kworom blong ol elda, mo grup blong ol hae pris, naoia, bambae oli kombaen long wan kworom blong Melkesedek Prishud wetem wan kworom presidensi nomo. Kworom ia, bae namba blong hem i kam bigwan mo i moa yunaet, bae i stap olsem “kworom blong ol elda.” Bae i nomo gat ol grup blong ol hae pris. Kworom blong ol elda, insaed i gat evri elda, mo fiuja elda blong wod, mo tu, ol hae pris we oli no givim seves long bisoprik, long stek presidensi, long hae kaonsel, o oli ol petriak. Kworom blong ol hae pris insaed long stek, bae i gat ol hae pris ia we oli stap givim seves long stek presidensi, long bisoprik, long hae kaonsel, o oli ol petriak.
Presidensi blong Kworom blong Ol Elda
?Olsem wanem presidensi blong kworom blong ol elda bae i oganaes? Stek presidensi bambae i rilisim ol lidasip blong ol grup blong hae pris we oli stap naoia, wetem ol presidensi blong kworom blong ol elda, mo bambae oli singaotem wan niu presiden blong kworom blong ol elda, wetem ol kaonsela insaed long wanwan wod. Niufala presidensi blong kworom blong ol elda, insaed i save gat ol elda, mo ol hae pris, we oli gat ol defren yia mo eksperiens, we oli givim seves tugeta long wan kworom presidensi. Wan elda o wan hae pris, i save stap olsem presiden blong kworom ia, o olsem wan kaonsela insaed long presidensi ia. Hemia i no ol hae pris we oli “tekova” long ol kworom blong ol elda. Mifala i wantem luk se ol elda mo ol hae pris oli wok tugeta long eni kworom presidensi, mo long seves blong kworom. Ol jenis long kworom ia, oli mas mekem naoia, kwiktaem olsem we i posibol.
Ol Prishud Ofis insaed long Kworom blong Ol Elda
?Jenis ia long kworom i jenisim prishud ofis we ol memba blong kworom oli stap long hem? No. Aksen ia i no kanselem eni ofis blong prishud we oli bin odenem ol memba blong kworom long hem bifo. Olsem we yufala i save, wan man, oli save odenem hem long ol defren prishud ofis ova long wan laeftaem, mo hem i no stap lusum o givap long eni odinesen taem hem i kasem wan niuwan. Long sam ples, wan we i kasem prishud i save givim seves long moa long wan ofis long wan taem, olsem taem wan hae pris i stap tu olsem wan petriak, o wan bisop, be hem i no stap wok long evriwan long ol prishud ofis ia long semtaem. Ol bisop mo Olgeta Seventi, eksampol, oli no wok long ol ofis ia taem oli rilisim olgeta o mekem olgeta oli emeritus. Olsem ia nao, wanem prishud ofis, o ol ofis we wan man i holem, taem hem i wan memba blong kworom blong ol elda, hem i stap olsem wan elda.
Sam yia i pas, Presiden Boyd K. Packer i bin talem se: “Prishud i moa bigwan bitim eni ofis blong hem. …Prishud, oli no save serem. Wan elda i holem hamas prishud semmak olsem wan Aposol. (Luk long D&C 20:38.) Taem wan man, oli givim prishud long hem, hem i kasem evriwan long prishud ia. Be, i gat olgeta ofis insaed long prishud—oli serem atoriti mo responsabiliti …Samtaem, yumi stap talem se wan ofis i ‘hae moa’ o ‘i daon moa’ long wan nara ofis. Oli no hae moa o daon moa, be ol ofis insaed long Melkesedek Prishud oli ripresentem ol defren eria blong givim seves.” Ol brata. Mi rili hop se bambae yumi nomo tokbaot se yumi “advens” o “muv i go antap” i go long wan nara ofis long Melkesedek Prishud.
Ol elda, bambae oli gohed blong odenem olgeta ol hae pris taem oli singaotem olgeta long wan stek presidensi, hae kaonsel, o bisoprik—o sam nara taem, olsem we stek presiden i jusum tru long hevi tingting mo insperesen tru long prea. Taem we taem blong seves blong olgeta insaed long wan stek presidensi, hae kaonsel, o bisoprik i finis, ol hae pris oli go joenembak kworom blong ol elda insaed long wod blong olgeta.
Daereksen blong Presidensi blong Kworom blong Ol Elda
?Hu i lidim wok blong presiden blong kworom blong ol elda? Stek presiden i prisaed ova long Melkesedek Prishud insaed long stek. From hemia, presiden blong kworom blong ol elda i ansa stret i go long stek presiden, we i givim trening mo help we i kam long stek presidensi mo tru long hae kaonsel. Bisop, olsem prisaeding hae pris insaed long wod blong hem, i mit tu oltaem wetem presiden blong kworom blong ol elda. Bisop i kaonsel wetem hem, mo i givim stret daereksen long hao blong givim bes seves mo blesem ol memba blong wod, mo wok wan wetem evri oganaesesen blong wod.5
Stamba Tingting blong Ol Jenis Ia
?Wanem nao stamba tingting blong ol jenis ia long kworom blong Melkesedek Prishud?Blong gat wan kworom blong Melkesedek Prishud insaed long wan wod i mekem ol man we oli holem prishud oli save mekem wok long evri saed blong wok blong fasin blong sevem man, wetem wok blong tempol mo famli histri, we bifo, ol hae pris grup nao oli stap lidim. Mo tu, i letem ol kworom memba, i nomata yia mo bakgraon blong olgeta, blong benefit long lukluk mo eksperiens blong wanwan long olgeta mo olgeta we oli stap long wan defren taem long laef. Hem i givim moa janis blong olgeta prishud we oli gat moa eksperiens blong tijim tingting blong olgeta, wetem tu ol fiuja elda, ol niu memba, ol yang adalt, mo olgeta we oli stap kambak aktiv long Jos. Mi no save talem stret hamas mi glad tumas taem mi lukluk long impoten rol we ol kworom blong ol elda bae oli gat long fiuja. Waes, eksperiens, namba, mo paoa we bae oli faenem insaed long ol kworom ia, i minim wan niu dei, mo wan niu standet blong prishud seves raon long Jos.
Twante yia i pas, long jeneral konfrens, mi talem stori we Elda Vaughn J. Featherstone blong Olgeta Seventi i bin talem we mi bilivim se i gud blong ripitim long ples ia.
“Long 1918, Brata George Goates i bin wan fama we i stap planem ol suga bit long Lihae, Yuta. Winta i kam eli long yia ia mo i mekem fulap bit krop blong hem oli aes insaed long graon. Long George mo yang boe blong hem, Francis, wok blong pikimap kaekae i slo mo i had. Semtaem, wan strong flu i stap go raon. Nogud sik ia i tekemaot laef blong boe blong Joj, Jals mo trifala smol pikinini blong Jals—tu smol gel mo wan boe. Long sikis dei nomo, George Goates we i stap krae sore, i mekem trifala defren trip i go long Ogden, Yuta blong tekem ol bodi ia oli kambak hom blong berem olgeta. Long en blong hemia, George mo Francis oli jiam long wagun blong tufala mo gobak long garen blong suga bit.
“Long rod blong tufala, oli bitim fulap wagun blong suga bit, we oli pulum olgeta i go long faktri, mo ol fama we oli neiba nao oli draevem olgeta. Taem oli stap bitim wan, wanwan draeva bae i sakem wan gud toktok: ‘Halo anggel Joj,’ ‘Sore tumas, Joj,’ ‘Stap strong Joj,’ ‘Yu gat plante fren Joj.’
“Long las wagun, i gat wan man we fes blong hem i ringkel, Jasper Rolfe. Hem i saksakem han wetem smael mo i singaot:‘Hemia evriwan long olgeta Anggel George.’
“Brata Goates i tanem hem i go long Francis, mo talem: ‘Sapos nomo, evriwan wagun ia oli blong yumitu.’
“Taem hem i kasem get blong fam, Francis i jiam aot long big red bit wagun ia, i openem ol get mo papa blong hem i draev i go long garen. Joj i pulum rop blong hos, i stopem tim, … i lukluk long garen …I nomo gat wan suga bit i stap long ful garen. Nao i tingbaot wanem Jasper Rolfe i minim taem i singaot: ‘!Hemia evriwan long olgeta Anggel George!’
“George i jiamaot long wagun, i pikimap rij braon graon we hem i lavem tumas long han blong hem, mo i lukluk hed blong suga bit, mo i lukluk ol saen blong wok blong hem, olsem se hem i no save bilivim wanem hem i stap luk.
“Nao hem i sidaon antap long hip blong ol top blong sugabit —man ia we i karem fo memba blong famli i kambak hom blong berem olgeta long sikis dei nomo; we i bin mekem ol kofin, i bin digim ol gref, mo i iven help blong putum klos blong berem man—gudfala man ia we i neva slakem tingting, o komplen, o muvmuv tru long bigfala trabol blong hem—i sidaon antap long hip blong sugabit top, mo i krae olsem wan smol pikinini.
“Nao hem i girap, i ravem ae blong hem, i lukluk i go long skae, mo talem: ‘Tangkyu Papa, from ol elda blong wod blong mifala.’6
Yes, tangkyu long God from ol man blong prishud mo from seves we bambae oli givim yet blong leftemap wanwan man, woman mo famli, mo blong stanemap Saeon.
Fas Presidensi, Kworom blong Olgeta Twelef Aposol, mo Presidensi blong Olgeta Seventi, oli tingting hevi long ol jenis ia blong wan longfala taem. Wetem plante prea, plante stadi long skripja fandesen blong ol kworom blong prishud, mo konfemesen se hemia i tingting blong Lod, yumi stap muv fored we yumi evriwan i agri long wanem we, long ril laef, i wan moa step i go blong Restoresen i gro. Daereksen blong Lod i kamkamaot, mo mi glad long hemia taem mi stap witnes blong Hem, prishud blong Hem mo odinesen blong yufala long prishud ia, long nem blong Jisas Kraes, amen.