Ang Elders Korum
Ang pagpahamtang sang isa lang ka Melchizedek Priesthood korum sa ward nagaisa sang mga priesthood holder sa pagtuman sang tanan nga aspeto sang buluhaton sang kaluwasan.
Wala madugay pagkatapos naorganisar ang Simbahan sa sining katapusan nga dispensasyon, ang Ginuo nagpahayag sa rebelasyon nga paagi sa matinuohon nga pangamuyo mabaton naton ang iya layi, agud nga makahibalo kita kon paano dumalahan ang iya simbahan kag matadlong ang tanan sa iya atubang.1 Ining prinsipyo ginasunod sa Simbahan—kag inang promisa ginatuman sang Ginuo—humalin pa sang nabaton ining rebelasyon. Ang mga sulundan sa pag-organisar kag pag-alagad sa priesthood ginapahayag sa nagakaigo nga tinion sumugod kay Propetang Joseph Smith sang ang mga palangakuan kag mga korum sang priesthood ginpahamtang sa aton panahon.Importante nga mga pagpauswag ang ginpahayag kag ginpatuman sa panahon sang pag-alagad sang mga Pangulong sanday Brigham Young, John Taylor, kag Spencer W. Kimball, lakip sang iban pa, parte sa Korum sang Dose, Seventy, mga high priest, kag iban pa nga mga palangakuan kag mga korum sa Melchizedek kag Aaronic Priesthood.2 Subong, sa makasaysayan nga pahayag bag-o gid lang, gin-anunsyo ni President Russel M. Neson ang dugang nga importante nga mga pagbag-o.
Kon mahimo suliton ko ang pila sang iya ginhambal: “Sini nga gab-i, ginaanunsyo namon ang isa ka importante nga pagbag-o sa aton mga korum sang Melchizedek Priesthood agud mahimo sing mas epektibo ang buluhaton sang Ginuo.Sa tagsa ka ward, ang mga high priest kag mga elder tingbon na karon sa isa ka elders korum … [kag] ang mga priesthood calling sa karon amo ang basehan sang mangin katapo sang [stake high priests] korum.”
Si President Nelson nagdugang:
“Ining mga pagbag-o gintun-an sa madamo nga mga binulan. Nakabatyag kami sang daku nga kakinahanglan nga mas kaayohon ang paagi sang pagtatap naton sa aton katawhan. …Agud mahimo ina sing mas maayo, kinahanglan naton pabakuron ang aton mga priesthood korum agud madumalahan sing mas maayo ang paghatag sang pagpalangga kag suporta nga luyag sang Ginuo para sa Iya mga Santos.
“Ining mga pagbag-o inspirado sang Ginuo. Kon aton ipatuman ang mga ini, mangin mas epektibo kita sangsa nagligad.”3
Sa sugo sang Unang Pangulohan, si Elder Ronald A. Rasband kag ako magadugang sang pila ka detalye nga ginasaligan namon magasabat sang inyo mga pamangkot.
Mga Elders kag High Priests Korum
Una, sa pagsulit, ano ang mga pagbag-o sa mga korum sang high priest group kag elders sa ward?Sa mga ward, ang mga miyembro sang elders korum kag high priests group tingbon na karon sa isa ka korum sang Melchizedek Priesthood nga may isa ka pangulohan sang korum.Ining korum, nga may dugang nga kadamuon kag pag-isa, pagatawgon nga “elders korum.”Ang mga high priests group indi na pagpadayunon. Ang elders korum magalakip sang tanan nga mga elder kag potensyal nga mga elder sa ward kag amo man sang mga high priest ngawala na sa karon nagaalagad sa bishopric, stake presidency, high council ukon nagaserbe nga patriarch. Ang high priests korum sa stake pagatapuan sang mga high priest nga sa karon nagaalagad sa stake presidency, bishopric, high council kag nagaserbe nga mga partriarch.
Ang Pangulohan sang Elders Korum
Paano organisahon ang pangulohan sang elders korum? Irelease sang stake presidency ang mga lider sang high priests group kag pangulohan sang elders korum nga nagaalagad sa karon kag magtawag sang bag-o nga pangulo sang elders korum kag mga manuglaygay sa tagsa ka ward ukon branch.Ang bag-o nga pangulohan sang elders korum magalakip sang mga elders kag mga high priest sing nagkalainlain nga edad kag ekskperiyensia, nga mag-alagad sing ulupod sa isa ka pangulohan sang korum. Isa ka elder ukon high priest ang sarang mag-alagad bilang pangulo sang korum ukon bilang manuglaygay sa pangulohan. Indi ini “pagbulos” sa elders korum sang mga high priest.Ginapaabot namon nga ang mga elder kag mga high priest ulupod nga magpangabudlay sa bisan ano nga kombinasyon sa pangulohan sang korum kag sa pag-alagad sa korum.Ining mga pagbag-o sa korum dapat ipatuman sa pinakamadali nga panahon nga posible.
Mga Priesthood nga Palangakuan sa Elders Korum
Ini bala nga pagbag-o sa istruktura sang korum magaliwat sang palangakuan sa priesthood nga ginakaptan sang mga miyembro sang korum?Indi, ini nga kahimoan wala nagabawi sang bisan ano nga palangakuan sa priesthood sa diin ang isa ka miyembro sang korum naordinan na sang nagligad.Sa inyo nahibal-an, ang isa ka tawo sarang maordinan sa nagkalainlain nga palangakuan sa priesthood sa bilog niya nga kabuhi, kag indi makuha ukon mabawi sa iya ang bisan ano nga nagligad nga ordinasyon kon magbaton sia sing bag-o. Bisan nga sa pila ka mga sitwasyon ang isa ka priesthood holder mahimo mag-alagad sa masobra isa ka palangakuan sa isa ka tion, pareho abi kon ang isa ka high priest nagaalagad man bilang patriarch ukon bishop, sa kinaandan wala sia nagahikot sa tanan niya nga palangakuan sa priesthood sing dulungan.Ang mga bishop kag mga Seventy halimbawa, wala nagaalagad sa sinang mga palangakuan sing aktibo sa tion nga marelease sila ukon himuon nga emeritus.Gani, bisan ano man nga palangakuan sa priesthood ang kaptan sang bisan sin-o, mientras miyembro sia sang elders korum, magaalagad sia bilang elder.
Pila ka tuig ang nagligad, si President Boyd K. Packer nagsiling nga “ang priesthood labaw sangsa bisan ano pa man nga mga palangakuan sini. …Ang priesthood indi mabahinbahin.Ang elder nagakapot sing pareho lang nga priesthood sa isa ka Apostoles.(Tan-awa sa D&C 20:38.) Kon ang isa ka tawo [ginahatagan sang priesthood], ginabaton niya ang kabug-osan sini. Ugaling, may mga palangakuan sa priesthood—mga bahin sang pagbulut-an kag responsibilidad.…Kon kis-a ang isa ka palangakuan ginasiling nga ‘mas mataas’ ukon ‘mas manubo’ sangsa isa.Imbis nga ‘mas mataas’ ukon ‘mas manubo,’ ang mga palangakuan sa Melchizedek Priesthood nagarepresentar sang lainlain nga bahin sang pag-alagad.”4 Nagalaum ako sing hugot nga indi na kita magsiling nga “mapaabanse” sa isa ka palangakuan sa Melchizedek priesthood.
Ang mga elder padayon nga ordinan sa pagkahigh priest kon ginatawag sila nga mag-alagad sa pangulohan sang stake, high council, ukon bishopric—ukon sa iban pa nga tinion suno sa pagpamat-od sang stake president paagi sa mapangamuyuon nga pagbinagbinag kag inspirasyon.Kon ang tion sang ila pag-alagad sa stake presidency, high council, ukon bishopric matapos na, ang mga high priest magabuylog sa elders korum sa ila ward
Giya para sa Pangulo sang Elders Korum
Sin-o ang nagadumala sang buluhaton sang pangulo sang elders korum?Ang stake president amo ang nagapanguna sa Melchizedek Priesthood sa iya stake.Gani, ang pangulo sang elders korum direkta nga responsable sa stake president, nga nagahatag sang paghanas kag paggiya halin sa pangulohan sang stake kag paagi sa high council.Ang bishop, bilang ang nagapangulo nga high priest sa ward, nagamiting man sing masunson sa pangulo sang elders korum. Ang bishop nagapakighinun-anon sa iya kag nagahatag sang nagakaigo nga direksyon kon paano alagaran kag bugayan sing pinakamaayo ang mga miyembro sang ward, nga nagahikot nga may pag-isa sa tanan nga organisasyon sa ward.5
Ang Katuyuan Sining mga Pagbag-o
Ano ang mga katuyuan sang mga pagbag-o sa mga korum sang Melchizedek Priesthood?Ang pagpahamtang sang isa lang ka korum sang Melchizedek Priesthood sa ward nagaisa sang mga priesthood holder sa pagtuman sang tanan nga bahin sang buluhaton sang kaluwasan, lakip na ang buluhaton sa templo kag family history nga sang una ginahikot sang mga high priest group. Nagatugot ini sa mga miyembro sang korum sa tanan nga pangidaron kag ginhalinan nga makabenepisyo sa panan-aw kag inagihan sang tagsa-tagsa kag sang mga yara sa lainlain nga halintang sang kabuhi.Nagahatag man ini sang dugang nga mga oportunidad sa eksperiyensyado nga mga priesthood holder nga magtudlo sa iban, lakip na sa potensyal nga mga elder, bag-o nga mga miyembro, young adults, kag mga nagabalik sa pagkaaktibo sa Simbahan.Indi ko lubos nga mapabutyag ang akon kakunyag sa paghunahuna sang tuman ka importante nga papel sang elders korum sa palaabuton.Ang kaalam, eksperiyensia, ikasarang kag kabakod nga makita sa sining mga korum nagapatimaan sang bag-o nga adlaw kag bag-o nga talaksan sang priesthood nga pag-alagad sa bilog nga Simbahan.
Beinte anyos ang nagligad sa pangkabilogan nga komperensya, nagsugid ako sang isa ka istorya nga una ginsaysay ni Elder Vaughn J. Featherstone sang Seventy nga sa akon pagpati dapat isugid liwat.
Sang 1918 si Brother George Goates isa ka mangunguma nga nagapatubas sang sugar beets sa Lehi, Utah.Temprano nag-abot ang tigtulugnaw sadto nga tuig kag nagyelo ang madamo sang iya pananom nga wala pa naani.Para kay George kag iya lamharon nga anak nga si Francis, ang ani mahinay kag mabudlay.Sadto man nga tion, nagduging ang epidemia sang trangkaso. Ang ginakahadlokan nga balatian nag-utas sang kabuhi sang anak ni George nga si Charles kag tatlo sini ka magagmay nga kabataan—duha ka babayi kag isa ka lalaki. Sa anum lang ka adlaw, ang nagakalisod nga si George Goates katatlo magbalikbalik sa Ogden, Utah agud dalhon pauli ang mga bangkay para malubong.Pagkatapos sining masubo nga hitabo, ginhanda ni George kag Francis ang ila bagon kag nagpadulong balik sa talamnan.
“[Pagpakadto] nalabyan nila ang madamo nga mga bagon nga puno sang sugar beets nga ginahakot sang kaingod nga mga mangunguma pakadto sa pabrika. Sa paglabay nila, ang kada kotsero nagakompas sang panamyaw: ‘Tiyoy George,’ ‘Ginakasubo gid namon,’ ‘Ahay, George,’ ‘Madamo ang mga abyan mo, George.’
“Sa katapusan nga bagon ato didto ang … pikason nga si Jasper Rolfe.Nagkompas sia sing masadya nga panamyaw kag nagsinggit:‘Amo na ini tanan, Tiyoy George.’
“Si [Brother Goates] nagbalikid kay Francis kag nagsiling:‘Tani aton ato tanan.’
“Pag-abot nila sa puerta sang uma, si Francis naglukso halin sa daku nga bagon kag ginbuksan ang puertahan samtang ang [iya amay] nagmaneho pasulod sa talamnan.Ginpapundo ni [George] ang mga kabayo, … kag gintulok ang duta. … Wala bisan isa ka sugar beet sa bilog nga uma.Dayon nakamarasmas sia sang buot silingon ni Jasper Rolfe sang nagsinggit ini: ‘Amo na ini tanan Tiyoy George!’
“Nanaog si [George] sa bagon, nagpulot sang isa ka hakop sang matambok nga duta nga ginahigugma gid niya, kag dayon … isa ka pungango sang beet, kag nagtulok makadali sa sining mga simbolo sang iya pagpangabudlay, nga daw indi makapati sang iya nakita.
“Dayon nagpungko [sia] sa tumpok sang mga pungango—ining tawo nga nagdala pauli sang apat ka mga pinalangga agud ilubong sa sulod sang anum lang ka adlaw; naghimo sang mga lungon, nagkutkot sang mga lulubngan, kag nagbulig pa sa mga bayo panglubong—ining dalayawon nga tawo nga wala gid nagluya, ukon nag-isol, ukon nag-alaala sa bilog sining mabug-at nga pagtilaw—nagpungko sa isa ka tumpok sang mga pungango kag naghibi nga daw bata.
“Dayon nagtindog sia, ginpahiran ang iya mga mata, … nagtangla sa langit, kag nagsiling: ‘Salamat, Amay. sa mga elder sang amon ward.’”6
Huo, salamat sa Dios sa mga kalalakihan sang priesthood kag sa serbisyo nga ila pa himuon sa pagpangalagad sa mga indibidwal kag mga pamilya kag sa pagpahamtang sang Sion.
Ang Unang Pangulohan, Ang Korum sang Dose ka Apostoles, kag ang Pangulohan sang Seventy nagbinagbinag sining mga pagbag-o sa malawig nga panahon.Upod sang madamo nga pangamuyo, maid-id nga pagtuon sang mga pundasyon sang priesthood korum suno sa balaan nga mga kasulatan, kag kumpirmasyon nga ini ang pagbuot sang Ginuo, nagasulong kita nga may pag-isa sa pagkamatuod isa pa ka tikang sa katumanan sang Pagpanumbalik. Ang paggiya sang Ginuo maathag, kag nagakalipay ako sa sini, samtang nagasaksi ako sa Iya, sa Iya priesthood kag sa inyo mga ordinasyon sa sinang priesthood, sa ngalan ni Jesucristo, amen.