Ti Elders Quorum
Ti kaadda ti maysa a korum ti Melchizedek Priesthood iti ward ket mamagkaykaysa kadagiti priesthood holder a mangipatungpal iti amin nga aspekto ti aramid ti pannakaisalakan.
Nabiit kalpasan a nabukel ti Simbaan itoy maudi a dispensasion, kinuna ti Apo iti paltiing, “Ket babaen ti kararag ti pammatiyo awatenyonto ti paglintegak, tapno ammoyo ti mangituray iti simbaanko ket adda amin a banag iti sangok.”1 Daytoy a prinsipio ti nasuroten iti Simbaan—ket dayta a kari ket dinayawen ti Apo—manipud pay idi. Naipalgak dagiti pagtuladan iti organisasion ken serbisio iti priesthood manipud ken ni Propeta Joseph Smith idi maipasdek dagiti saad ken korum ti priesthood iti panawentayo. Naipalgak ken naipatungpal dagiti napateg a pangpasayaat bayat ti panagserbi da President Brigham Young, John Taylor, Spencer W. Kimball, maibilang ti dadduma pay, no maipanggep iti Korum ti Sangapulo-ket-dua, Pitupulo, high priest, ken dadduma pay a saad ken korum iti agpada a Melchizedek ken Aaronic Priesthood.2 Ita, iti napnuan pakasaritaan a mensahe itay laeng, impakaammo ni President Russell M. Nelson ti nayon a napateg a panagbalbaliw.
No maulitko ti sumagmamano a mensahena: “Ita, ipakaammomi ti napateg a pannakabukel manen dagiti korum ti Melchizedek Priesthood tapno nasamsamay a maipatungpal ti aramid ti Apo. Iti tunggal ward, dagiti high priest ken elder ket agtipon itan nga agbalin a maysa nga elders quorum… [ken] ti pannakabukel ti [stake high priests] quorum ket maibatayto kadagiti agdama a priesthood calling.”
Innayon pay ni President Nelson:
“Adu a bulan a naadal dagitoy a panagbalbaliw. Nariknami ti dakkel a panagkasapulan a mangpasayaat iti wagas a panangaywantayo kadagiti miembrotayo. …Tapno maaramid a nasaysayaat dayta, nasken a papigsaentayo dagiti korumtayo iti priesthood tapno maited ti dakdakkel a direksion iti panagserbi iti ayat ken suporta nga insangrat ti Apo kadagiti Santona.
“Pinaregta ti Apo dagitoy a panagbalbaliw. No ipatungpaltayo dagitoy, ad-addanto a nasamsamaytayo ngem iti sigud.”3
Iti direksion ti Umuna a Panguluen, nayonanminto ken Elder Ronald A. Rasband iti sumagmamano a detalye a pagtalkanmi a mangsungbat iti mabalin a saludsodyo.
Dagiti Elders ken High Priests Quorum
Umuna, a maulit, ania dagiti panagbalbaliw iti high priests group ken elders quorum iti ward? Kadagiti ward, agtiponto dagiti miembro ti elders quorum ken high priests group iti maysa a Melchizedek Priesthood quorum nga addaan maysa a quorum presidency.Daytoy a korum, nga immadu iti bilang ken kaykaysa, ket maawaganto iti “elders quorum.” Maisardeng ti high priests group. Mairaman iti elders quorum ti amin nga elder ken prospective elder iti ward kasta met dagiti high priest a saan nga agdama nga agserserbi iti bishopric, iti stake presidency, iti high council, wenno kas agak-akem a patriarch. Buklento ti high priests quorum iti stake dagiti high priest nga agdama nga agserserbi iti stake presidency, iti bishopric, iti high council, ken kas agak-akem a patriarch.
Ti Elders Quorum Presidency
Kasano ti pannakabukel ti elders quorum presidency? Ti stake presidency ti mangi-release kadagiti agdama a high priests group leadership ken elders quorum presidency ket umawagto iti baro nga elders quorum president ken counselors iti tunggal ward. Mabalin a mairaman iti baro nga elders quorum presidency dagiti elder ken high priest, iti agduduma nga edad ken padas, a sangkamaysa nga agserserbi iti maysa a quorum presidency. Mabalin nga agserbi ti maysa nga elder wenno high priest kas quorum president wenno kas counselor iti presidency. Saan a “takeover” daytoy dagiti elders quorum dagiti high priest. Namnamaenmi nga agtitinnulong nga agtrabaho dagiti elder ken high priest iti ania man a panagkadua iti quorum presidency ken iti serbisio ti korum. Nasken a maipatungpal dagiti panagbalbaliw iti korum iti kabiitan a panawen no mabalin.
Dagiti Priesthood Office iti Elders Quorum
Baliwan kadi daytoy a panagbalbaliw iti quorum structure ti priesthood office nga iggem dagiti miembro ti korum? Saan, saan a waswasen daytoy a tignay ti ania man a priesthood office a nakaordenan ti asino man a miembro ti korum iti napalabas. Kas ammoyo, maordenan ti maysa a lalaki iti agduduma a priesthood office bayat ti panagbiagna, ket dina mapukaw ti ania man nga immuna nga ordinasion no umawat iti baro. Idinto nga iti dadduma a kasasaad makapagserbi ti priesthood bearer iti nasurok ngem maysa a saad iti maminsan, kas iti high priest no agserbi pay kas patriarch wenno bishop, gagangay a dina akmen nga aggigiddan ti amin a saadna iti priesthood. Dagiti bishop ken Pitupulo, kas pagarigan, saan ngaaktibo nga agserbi kadagita a saad no ma-release-da wenno agbalin nga emeritus. Ngarud, ania man a priesthood office wenno saad nga akmen ti maysa a lalaki, no miembro isuna iti elders quorum, agserbi kas elder.
Tawtawen ti napalabas, naammuan ni President Boyd K. Packer a “ti priesthood ket dakdakkel ngem iti ania man a saadna. … Saan a mabingay ti priesthood. Aduan iti takem ti maysa nga elder iti priesthood kas Apostol. (Kitaen iti DkK 20:38.) No ti maysa a lalaki [a naited kenkuana ti priesthood], awatenna amin daytoy. Nupay kasta, adda dagiti saad iti priesthood—dagiti dibision ti turay ken pagrebbengan. … No dadduma maisao ti maysa a saad kas ‘nangatngato ngem’ wenno ‘nababbaba ngem’ iti sabali a saad. Imbes a ‘nangatngato’ wenno ‘nababbaba,’ ibagi dagiti saad iti Melchizedek Priesthood ti agduduma a tay-ak ti serbisio.”4 Sapay koma ta ditayton agsao no maipanggep iti “pannakaital-o” iti sabali a saad iti Melchizedek Priesthood.
Agtultuloyto a maordenan a high priest dagiti elder no maawaganda iti stake presidency, high council, wenno bishopric—wenno iti sabali a gundaway kas inkeddeng ti stake president babaen ti nainkararagan a konsiderasion ken inspirasion. No nalpasen ti terminoda iti serbisio iti stake presidency, high council, wenno bishopric, tumiponto manen dagiti high priest iti elders quorum iti wardda.
Panangiturong para iti Elders Quorum President
Asino ti mangiturong iti aramid ti elders quorum president? Ti stake president ti mangidaulo iti Melchizedek Priesthood iti stakena. Ngarud, ti elders quorum president ti direkta a responsable iti stake president, a mangted iti training ken pangiwanwan manipud iti stake presidency ken babaen ti high council. Ti bishop, kas presiding high priest iti ward, ket regular a makipagmiting pay iti elders quorum president. Ti bishop ti mangbalakad kenkuana ken mangted iti umno a direksion maipanggep no kasano ti kasayaatan a panagserbi ken panangbendision kadagiti miembro iti ward, nga agtrabaho a maitunos iti amin nga organisasion iti ward.5
Ti Panggep Dagitoy a Panagbalbaliw
Ania ti paggep dagiti panagbalbaliw kadagiti korum ti Melchizedek Priesthood? Ti kaadda ti maysa a korum ti Melchizedek Priesthood korum iti ward ket mamagkaykaysa kadagiti priesthood holder iti pannakaipatungpal ti amin nga aspekto ti aramid ti pannakaisalakan, agraman ti aramid iti templo ken family history a sigud nga inurnos dagiti high priests group. Daytoy ti mangpalugod kadagiti miembro ti korum ti amin nga edad ken backgroud tapno mairanud iti pannirigan ken padas ti tunggal maysa ken dagiti adda iti agduduma nga agpang ti biag. Daytoy pay ti mangted iti nayon a gundaway kadagiti addan padasna a priesthood holder a mangisuro iti dadduma, agraman dagiti prospective elder, baro a miembro, babbaro, ken nagsubli iti panagaktibo iti Simbaan. Diak umdas a maipeksa ti gagarko a mangutob iti dumakdakkel a napateg nga akemto dagiti elders quorum iti masakbayan.Ti sirib, padas, kabaelan, ken pigsa a masarakanto kadagitoy a korum ket mangitanda iti baro nga aldaw ken baro a pagrukodan ti serbisio iti priesthood iti intero a Simbaan.
Duapulo a tawen ti napalabas iti sapasap a komperensia, insaritak ti estoria nga immuna nga insarita ni Elder Vaughn J. Featherstone ti Pitupulo a patiek nga uliten ditoy.
“Idi 1918 mannalon ni Brother George Goates nga agpatpatanor iti sugar beets in Lehi, Utah. Nasapa a dimteng ti panawen ti lam-ek dayta a tawen ket nagyelo ti kaaduan nga apitna. Para ken George ken ti baritona a ni Francis, nabayag ken narigat ti agani. Dayta a panawen, nagwaras ti sakit a tragkaso. Ti nakabutbuteg a sakit ti pimmatay iti anak ni George a ni Charles ken tallo a babassit nga annak ni Charles—dua a babbai ken maysa a lalaki. Iti innem laeng nga aldaw, namitlo a nagbiahe ti agladladingit a George Goates iti Ogden, Utah, a nagyawid kadagiti bangkay tapno maitabon. Iti gibus daytoy nakaam-ames a pangrugian, naglugan da George ken Francis iti karisonda ket nagsublida iti talon.
“[Iti dalan] nalabsanda dagiti agsasaruno a karison a napno iti beets a mapan iti paktoria ken inuggor dagiti kaarruba a mannalon. Iti panaglabasda, kumablaaw ti tunggal drayber: ‘Kamusta, Uncle George,’ ‘Ladingitek, George,’ ‘Narigat, George,’ ‘Adut’ gayyemmo, George.’
“Iti maudi a karison … ti lakayen a Jasper Rolfe. Siraragsak nga inkablaawna nga impukkaw: ‘Isu amin dayta, Uncle George.’
“Tinaliaw ni [Brother Goates] ni Francis ket kinunana: ‘Kukuata la koma amin dayta.’
“Idi nakadanonda iti ruangan ti talon, timmapuak ni Francis iti karison ket linuktanna ti ruangan bayat ti panagmaneho ti [amana] a mapan iti talon. Pinasardeng ni [George] ti karison, … ket kimmita iti talon. … Awan pulos maysa a sugar beet iti intero a talon. Idi a naipalagip kenkuana ti kayat a sawen ni Jasper Rolfe idi impukkawna ti: ‘Isu amin dayta, Uncle George!’
“Bimmaba ni [George] iti karison, nangrakem iti nabaknang a daga nga ipatpategna unay, sa … rangaw ti beet, ket kinitana iti apagkanito dagitoy simbolo ti bannogna, a di nakapappapati kenkuana.
“Sa nagtugaw [isuna] iti sangabunton a rangaw ti beets—daytoy a tao a nagyawid iti uppat nga ipatpategna a maitabon iti uneg ti innem laeng nga aldaw; nagaramid iti lungon, nagkali iti tanem, timmulong a nagaramid iti pangtabon a kawes—daytoy a tao di pulos nagduadua, iti unos ti narigat a panagsagabana—nakatugaw iti rabaw ti beets ket nagsangit a kasla bassit nga ubing.
“Sa timmakder, pinunas ti luana, … tinangadna ti langit, ket kinunana: ‘Agyamanak, Ama, kadagiti elder ti wardmi.’”6
Wen, agyamanak iti Dios kadagiti lallaki iti priesthood ken ti serbisio nga ipaaydanto iti panagserbi kadagiti indibidual ken pamilia ken iti pannakaipasdek ti Zion.
Imbilang ti Umuna a Panguluen, ti Korum ti Sangapulo-ket-dua nga Apostol, ken ti Panguluen ti Pitupulo dagitoy panagbalbaliw iti atiddog a panawen. Iti adu a kararag, naannad a panagadal iti pundasion dagiti priesthood quorum a mainaig iti nasantuan a kasuratan, ken pammatalged a pagayatan ti Apo daytoy, agtultuloytayo iti naan-anay a panagkaykaysa iti maysa pay nga addang iti pannakaipalgak ti Pannakaisubli. Maipakita ti direksion ti Apo, ket maragsakanak iti daytoy, bayat ti panagpaneknekko Kenkuana, ti priesthoodna, ken dagiti ordinasionyo iti dayta a priesthood, iti nagan ni Jesucristo, amen.