Pwihn en Elder Kan
Pwihn en Prihsduhd en Melkisedek nan ehu ward pahn kaminiminihpene me kolokol prihsduhd pwe ren kak kapwaiada doadoahk en komour.
Kisin ahnsou kis mwurin koasoansoandien Mwomwohdiso nan kaimwiseklahn ahnsou wet, nan kaudiahl ehu, Kauno ketin mahsanih, “Sang ni kapakap en amwail pwoson, kumwail pahn alehdi ahi kosonned, pwe kumwail en ese wiepen kaunda ei mwomwohdiso oh mehkoaros en pwung mwohi.”1 Mwomwohdiso wet kin kalemengih padahk mehlel wet—oh Kauno ketin kapwaiadahr inowo—leledo met. Koasoandien prihsduhd oh papah kin sansalda ekei pak, tepisang Soukohp Joseph Smith ni ahnsou me pwukoa en prihsduhd oh pwihn en prihsduhd tepin koasoansoandi. Mie soang kamwahu kesempwal kei me sansalda oh wiawihda ong Pwihn en Ehk-Riemeno, Isiakan, samworo lapalap kan, oh pwukoa oh pwihn en prihsduhd en Melkisedek oh Aaron nan mwehin Preseden Brigham Young, John Taylor, oh Spencer W. Kimball.2 Ahnsou wet, nan pakair kesempwal ieu ninkapwan, Preseden Russell M. Nelson pakairkidahr pil ehu kamwahu kesempwal.
I pahn pwurehng wadek ekis sang ah pakairo: “Pwongpwong wet, se pakairki kawekala kesempwal ieu nan pwihn en Prihsduhd en Melkisedek kan pwehn kapwaiada mwahu doadoahk en Kauno. Nan ward kan, kohpene en samworo lapalap kan oh pwihn en elder kan pahn ehupene wiahla ehu pwihn en elder kan … [oh] koasoandien pwihn en [samworo lapalap kan en steik] pahn poahsoanki malipilip kan en prihsduhd me aramas kolokolmet.”
Preseden Nelson kapatahieng:
“Petehkpen kamwekid pwukat wiawier erein sounpwong kei. Se kehn anahn karuaru en kamwahuiala mwomwen atail apwalih neitail towe kan. … Pwehn kapwaiada met, kitail anahne kakehlakada atail pwihn en prihsduhd kan pwehn sewesehkin irail kaweid ni palien limpoak oh utuht me Kauno ketin kupwurki ong Sapwellime Souleng kan.
“Kamwekid pwukat pwilisang rehn Kauno. Ni atail pahn kapwaiada met, kitail pahn koahiek sang mwoweo.”3
Pahn kaweidpen Presedensi Keieu, ngehi oh Elder Ronald A. Rasband pahn oaritikihada duwen met pwehn sapeng amwail peidek kan.
Pwihn en Elder kan oh Samworo Lapalap Kan
Keieu, I men pwurehng koasoaia, dahme pahn wiawi nan pwihn en samworo lapalap kan oh elder kan? Nan ward kan, tohn pwihn en elder kan oh samworo lapalap kan pahn kohpene wiahla pwihn en Prihsduhd en Melkisedek teieu oh presedensi teieu. Pwihn wet, pahn tohtohla oh miniminpene, oh pahn kadanikihla “pwihn en elder kan.” Solahr kohpene en samworo lapalap kan. Pwihn en elder kan pahn wiawikihda elder kan koaros, ohl koaros me lelehr sounpahr en elder nan ward oh pil samworo lapalap kan me sohte papah nan pisoprik, steik presedensi, soun papah lapalap akan, de patriak. Pwihn en samworo lapalap nan steik pahn wiawikihda samworo lapalap kan mepapah nan steik presedensi, pisoprik, soun papah lapalap akan oh patriark.
Presedensi en Pwihn en Elder Kan
Ia mwomwen koasoandien presedensi en pwihn en elder kan? Steik presedensi pahn kakommoaldi kaun kan en samworo lapalap kan oh presedensi kan en pwihn en elder kan oh malipe preseden kapw en pwihn en elder kan oh sounsawas kan nan ehu ehu ward oh prahns. Presedensi kapw en pwihn en elder ko kak kohsang nanpwungen elder kan de samworo lapalap kan, mah de pwulopwul, wia doadoahkpene nan presedensi en pwihn teieu. Emen elder de emen samworo lapalap kak wia preseden en pwihno de sounsawas nan presedensi. Kaidehn samworo lapalap kan pahn “kalowehdi” pwihn en elder kan. Se kasik elder kan oh samworo lapalap kan en doadoahkpene nan presedensi oh papah nan pwihn. Mwekid pwukat nan pwihn kan anahne wiawi ahnsou karuaru.
Pwukoa nan Pwihn en Elder Kan
Mwekid pwukat nan koasoandi en pwihn pahn wekidala pwukoahn prihsduhd me tohn pwihn pwukoahki? Soh, mwekid wet sohte pahn kapwurehsang pwukoahn prihsduhd me emen tohn pwihn kasarawihlahngehr. Duwen amwail eseier, ohl emen kak kasarawihla ong soangsoangen pwukoahn prihsduhd nan eh mour, oh e kasarawihla kan sohte pahn kapwurpwursang ahnsou me e pahn pwurehng kasarawihla. Ekei pak soun kolokol prihsduhd kin pwukoahki pwukoa riau ahnsou tehkis, duwehte samworo lapalap men me iang ahniki pwukoahn patriark de pisop, palilaud en ahnsou e sohte pahn doadoahk nan pwukoahn prihsduhd riau ahnsou teieu. Karasepe, Pisop kan oh Isiakan, solahr pahn papah nan ar pwukoah kan mwurin ar pahn kommoaldihsang. Eri, pwukoahn prihsduhd kan sohte lipilipil me ohl emen pahn kolokol, ni ahnsou me e tohn pwihn en elder kan, e pahn papahki nin duwen emen elder.
Pahr kei samwalahro, Preseden Boyd K. Packer padahngki me “prihsduhdo me kesempwal sang pwukoa kan … prihsduhd sohte kin pwalpeseng. Emen elder kin kolokol prihsduhdohte me emen Wahnpoaron kin kolokol. (Tehk D&C 20:38.) Ni ahnsou me ohl emen kin alehdi prihsduhd, e kin alehdi koaros. Ahpw, mie pwukoah kei nan prihsduhd – wekpesengen mweimwei oh pwukoa kan … Ekei pak aramas kin koasoaia me ehu pwukoa kin ‘laud sang’ de ‘tikitik sang’ pwukoa teikan. Pwukoa kan sohte kin ‘laud’ de ‘tikitik,’ ahpw pwukoa kan nan Prihsduhd en Melkisedek kin wekpeseng.”4 Riei ohl oko, I koapworopworki mehlel me kitail solahr pahn koasoaia duwen “kesepwildahng” ehu pwukoa nan prihsduhd en Melkisedek.
Elder kan pahn doulahte kasarawiala en wiahla samworou lapalap ni ahnsou me re pahn malipilipdahng steik presedensi, soun papah lapalap akan, de pisoprik – de ehu ahnsou tohrohr pahn kaweid en steik preseden. Ni arail ahnsouhn papah nekiehr nan steik presedensi, soun papah lapalap akan, de pisoprik, samworo lapalap kan pahn pwurala rehn pwihn en elder kan nan arail ward.
Kaweid ong Preseden en Pwihn en Elder Kan
Ihs me kin kaweid doadoahk en preseden en pwihn en elder kan? Steik preseden me kin kakaun Prihsduhd en Melkisedek nan ah steik. Eri, preseden en pwihn en elder kan kin mih pahn kaweidpen steik preseden, ah steik presedensi oh soun papah lapalap akan me kin kaiahne irail oh kaweid irail. Pisop, me kakaun en samworou lapalap nan ah ward, pil kin kalapw tuhwong preseden en pwihn en elder kan. Ih oh pisop pahn wie lamalampene oh pisop pahn kaweidki dahme pahn keieu mwahu pwehn kapaiada oh papah tohn ward kan, sang ni minimin en doadoahkpene rehn pwihn teikan koaros nan ward.5
Kahrepen Wekidekla Pwukat.
Ia kahrepen wekideklahn pwihn en Prihsduhd en Melkisedek kan? Pwihn en Prihsduhd en Melkisedek nan ehu ward pahn kaminiminihpene me kolokol prihsduhd pwe ren kak kapwaiada doadoahk en komour, iangahki doadoahk en tehnpas sarawi oh poadopoad en peneinei me samworo lapalap kan kin koasoanehdi mwoweo. E pahn sewese tohn pwihn en prihsduhd en ehupene mendahte ma re mah de pwulopwul de wasa re tikida ie, irair en emenemen ah mour oh ah koahiek pahn mwahu ong nanpwungarail. E pahn pil mwahu ong me kolokol prihsduhd me mah kan en sewese mehteikan, iangahki me saikinte wiahla elder kan, towe kapw kan, me pwulopwul kan, oh ihr akan me apwtehn pwurala sarawi. I sohte kak kawehwe ia uwen ahi pereniki medemedewe duwen doadoahk kesempwal me pwihn en elder kan pahn wia nan ahnsou kohkohdo. Soangen kupwurokong, wehwe, koahiek oh kehlail me pahn dierek nan pwihn pwukat kasalehda tepdahn mwekid kesempwal oh kapw ehu nan doadoahk en prihsduhd nan Mwomwohdiso wet.
Sounpar rieisek samwalahro nan kapokon lap, I koasoia duwen soai pwoat me sang rehn Elder Vaughn J. Featherstone sang pwihn en Isiakan, me I men pwurehng koasoia ahnsou wet.
Nan pahr 1918 Brother George Goates emen soumwet me kin kawosada wahn sugar beet nan Lihai, Utah. Ahnsoun lemwulemwur mwadang kohdo nan pahro oh palilaud en wahn eh mwahto ohkihla lemwulemwur. Doadoahk en dohlung inenen wawai oh apwal ong George oh nah kisin pwutak Francis. Ahnsouohte soumwahu en wai rekla wasa koaros. Nein George nah pwutak Charles oh nah kisin seri silemen—kisin serepein riemen oh emen pwutak, mehkihla soumwahu kamasapweko. Erein rahn weneu, George Goats, me inenen pahtou mehlel, kohla Ogden, Utah pak siluh pwehn kapwurehla paliwararail kan ong seridi. Mwurin ahnsou kansensuwed mehlel wet, George oh Francis ale neira mahn kan oh pirehiong ni kurama, oh pwurala ni mwetuwelo.
“[Ni ara kohkohwei] ira daulih ireklahn kuruma kei me weren mehn mpe kan me audaudki wahn tuhke beet me pahn wisiklahng ni pactorio. Emen emen soun katanga kuruma ko kin rahnmwahuki: Kaselehlie Uncle George,” George, komw kupwurmahk,” “George, I poakpoakeiukadahr,” “George, dir kempoakepahmw.”
“Nan kuruma me keieu mwuhr … mie kisin pwutak adanki Jasper Rolfe mwohd loale. E rahnmwahu oh nda ni ngihl laud: “Uncle George, re nekier.”
“[Brother Goates] sohpeilahng Francis oh nda: “I mentehno me wahn ata mwetuwel mwohkan.”
Ni ara lelehr ni ewen kehl en mwahto, Francis lusdihsang werara kuruma weitahtao oh ritingada kehl ah [eh pahpao] kohlongala nan mwahto. [George] waikada sahl oh kauhdi nah mahn ko, …kilengseli nan mwahto. … sohte ehu sugar beet nan mohso pwon. E ahpw wehwehkihda dahme Jasper Rolfe koasoaia ni ah nda: Uncle George, re nekier!”
“[George] keredihsang pohn kurumao, ale pwehl nan peho, pwehl me e inenen pereniki, oh ahpw … ale tepin wahn tuhke, oh e kilangdieng kilelpen ah doadoahk pwukat, a e sohte kak kamehlele dahme e kilang.
“Eri [e] mwohndi pohn tepin wahn tuhke kan--- ohl menet me wa nah seri pahmen nimweo pwe ren seridi nan rahnte weneu; wiahda kohpwahn mehla, weirada sousou kan, oh sawaski ar likouhn mehla—ohl kapwuriamwei menet inenen pwerisek oh soupeikasal nan ahnsou kamedek wet—mwomwohd pohn tepin beet kan oh sengiseng duwehte kisin seri men.
“E ahpw uhda, limwiasang pilen mese kan, … sarada pahnlahng, oh patohwan: ‘Maing Sahm, kalahngan en komwi pwehki elder kan en aht ward.’”6
Iehi, kalahngan en Koht pwehki ohl en prihsduhd kan oh doadoahk en papah me re pahn papahki ni ar pahn sewese aramas akan oh peneinei kan oh ar pahn wia doadoahk en koasoanehdi Saion.
Presedensi Keieu, Pwihn en Wahnpoaron Ehk-Riemen, oh Presedensi en Isiakan koaros medemedewehki wekidekla pwukat erein ahnsou werei. Mwurin kapakap laud, onopiki mwahu iren pwuhk sarawi kan me pid pwihn en prihsduhd kan, oh kadehde me ihme kupwur en Kauno, kitail pahn wenlahte mwowe ni atail pahn ehupene ni pil ehu mwekid en kekeirdahn Kupwurpwurdo. Kaweid en Kauno sansalda, oh I pereniki ni ahi kadehdehda duwen Ih, Sapwellime prihsduhd, oh amwail kasarawihla kan nan prihsduhdo, ni mwaren Sises Krais, ahmen.