Fare Quorum ko Elder

Somm’on, ngug weliy biyay, mang fapi n’en ni kan thiliyeg ko fapi ward nibay fapi ulung ko high priest nge elders quoroms? Ulan fapi ward, fapi member ko elders quorum nge high priests e ran buthuy nga t’abang ngar t’areb gaed e ulung ko Melchizedek Priesthood ni t’areb e presidency nibay riy. Biney e quorum, ra ga’ ni namba nge urngin, ma ran noeg fare “elders quorum” ngay. Ulung ko high priests e kan talag. Fapi elder quorum nib m’un urngin e elders nge elders ulan fapi ward nge fapi high priest ni chiney e darki pigpig gad ulan fare bisofric, ulan fare stake presidency, ulan fare high council, nge fa murwel ko fare patriarchs. Fare ulung ko fapi high priest ulan e stake e yaed e ngar manged fapi high priest nibe pigpig ulan fare stake presidency, ulan fare high council, nge fa murwel ko fare patriarchs.

Uw rogon fare presidency ko fare ulung ko elders ni ngan yarmiy? Fare stake presidency e bay i pi’ reb e tiyugang’ ko ulung ko fapi high priest nge elders quorum presidencies ma bay ni pi’ be’ nib thil ni nge mang fare elder quorum president nge counselor ulangin gubin fapi ward nge branch. Fare ulung ko fare elders quorum presidency ab mathuk e elders nge high priests ngay, ko pi duw roraed nib thilthil nge n’en ni yad ba salap riy, ni yad be pigpig u t’abang ni t’areb rogon ulan fare quorum presidency. Bay ni fare elder fa high priest e bay ni tay ni’ir fare quorum president fa counselor ulna fare presidency. Biney e gathi ngan “fek” e murwel ko elder quorums ko fapi high priests. Fapi elders nge high priests ab t’uf ni ngar murwel gaed u t’abang ulan fare quorum presidency nge pi pigpig nifen e quorum. Pi murwel ney ni kan thilyeg ab t’uf ni ngan rin’ ni kachiney.

Biney e n’en ni kan thilyeg rogon ko fare quorum e ra thilyeg fare priesthood office nibay ko member ko quorum? Dangay, biney e dabi talag reb e priesthood office fa reb e member ko qourum ni kab kafram. Ni woed rogon ni gam nang, reb e mo’on e rayog ni ngan ordain nag nib thithil e liw rok ko fare priesthood, ma darma chuw fan luf fare priesthood rok nap’an ni ran pi’ reb ngak nib be’ech. Fin smunmun ma reb e priesthood e rayog ni nge pigpig ko liw nib thilthil t’abiyay, woed fare high priest ni ra pigpig ni’ir fare patriarch fa bisof, ma woed ni dar ma yus nag boech fapi priesthood office rok ko ngiyal’ nem. Bisof nge Medlip i Ragag, e woed e biney, ni dar ma pigpig ulan fapi office nap’an ni ran pag rad ko fapi murwel rorad. Aragon, demtrug ko mang priesthood office nibay rok, nap’an nib mang ko fare member ko fare elders quorum, ra pigpig ni woed ni’ir reb fapi elders.

Boech e duw kafram, President Boyd K. Packer e par ngeyaliy “fare priesthood e bin th’abi ga’ ko urngin fapi office nibay. …Fare priesthood e dabiyag ni ngan fo’od nag u butt’. Reb fapi elders a bay fare gelngin e priesthood rorad ni woed reb fapi Apostles. (Muguy ko D&C 20:38.) Nap’an ni ran pi’ gelngin reb e mo’on ni [kan pi’ fare priesthood ngak], ma kan pi’ ngak ni ga’ngin. Machane, bay e office ulangin fapi priesthood—fo’od ko murwel nge gelngin. … Boech e ngiyal’ ma reb e office e ma yoeg ni bay reb nib “tolang” fa ba “sobutt’” ngareb e office. Demtrug ko ba tolang fa ba sobutt’, office ulan fare Melchizedek Priesthood e be yip fan e pigpig nib thilthil rogon.”⁴ Gube athapeg ni dab kud non gaed ni woed ni “kan mu’ nag reb” fare muwerl ko office kan yan nga reb ulan fare Melchizedek Priesthood.

Elders e ra ul’ul’ ngan ordain ni nge mang high priests nap’an nran pining rad ko fare stake presidency, high council, fa bisofric—fa boech ngiyal’ ni ke dugliy fare stake president u fithik e meybil nga thogthog nike tay. Nap’an nra m’ay fare pigpig rorad ulan fare stake president, high coucel, fa bisofric, fapi high priests e yad ra un ngak fapi elder quorum ulan fare ward.

Mini’ e ra rin’ fare murwel ko fare ulung ko elder quorum president? Fare stake president e ma dugliy fare Melchizedek Priesthood ulan fare stake. Arogon, fare elder quorum president e mil fan ngak fare stake president, ni’ir e ma pi’ e training nge wo’en ni kab ko fare stake presidency nge dakan fare high council. Fare bisof, ni’ir fare high priest ulan fare ward, e yad ma mada’ fapi elder quorum president nib bo’or yay. Fapi machib rok bisof e ra ayuweg kanawo’en ni ngan pigpig min ayuweg fapi member, ni yibe murwel u t’abang ulan fapi ward ni kan yarmiy rogon.⁵

Mang fan ni kan thilthilyeg rogon fare ulung ko Melchizedek Priesthood quorums? Fan ni bay t’areb e Melchizedek Priesthood quorum ulan fare ward e be yipfan ni nge rin’ urngin fapi murwel ni ngan thapeg, nib mu’un e murwel u tempel ngay nge murwel ko chongin e tabinaew ni ke yarmiy rogon fare ulung ko high priests. Biney e ra yag ni nge un gubin fapi member ko quorum nib thilthil yangranrad ngar guyed rogon ni yad ra ayuweg fapi gidii’ nib thilthil rogon e par rorad. Biney e ku rayag ni nge ayuweg fapi priesthood ni yad manang boech ban’en ni nge fil ngak boech i yad e tin ni yad manang, nib mu’un e elders ngay, member nib be’ech, fel’ yangren, nge pi cha’ ni yad be sul ko gosgos nifen e Galasia. Ri gub fal’falan’ ngay ko biney e murwel ni bayi rin’ fapi elders quorum nga m’on. Fapi luwaen’, tin ni manang rogon, urngin, nge gelngin ni ran peri’eg ulan a pi quorums e be yipfan e biney e rran nib be’ech nge biney e pigpig ni kan pi’ ngak fapi priesthood ulan fare Galasial.

Riliw’ e duw kafram ko general conference, Elder Vaughn J. Featherstone ko fare Medlip i Ragag e yoeg ban’en nib chuchgur rogon ko biney.

Nap’an e 1918 ma bay mo’on ni kanoeg i Brother George nima yung mit e maal nib thibthib lamen u Lehi, Utah. Re duw nem me yib e winter nib papay me el’el’ nag fapi maal rok ni ke yung. George nge reb i fek ni kanoeg Francis ngak, ran ker fapi maal ma rib sasaga’al mab momaw’. Ngiyal’ nem, ma bay m’ar ni kanoeg e influenza ngay ni m’ar e gidii’ riy nib alamrin. Ra m’ar ney e yim’ fak Goerge nib pagal riy ni kanoeg i Charles ngak nga ku dalip i fak Charles nib achichig—l’agruw i buliyol nge reb e pagal. Ulan nel’ e rran, ni kube kirban’ George Goates me yan nga Ogden, Utah ni dalip yay ni ngani fek fapi yam’ nga tabinaew ni nge k’eyag. Tomren e biney e n’en ni buch, George nge Francis ar af gow ko fare wagon rorow ngar sulew nga milay’.

“[U kanawo’] bo’or e wagon ni yow be thilyeg u kanawo’ nib sug e maal nib thibthib ni yibe fek ko fare factory rok fapi bugliyiror rorow. Nap’an yad ra thamur ma ra be’ ma be fingichiy row: ‘Mogethin, Uncle George,’ ‘Siro’ ngom, George,’ ‘Momaw’ e biney nike buch rom, George,’ ‘Bo’or e tafgar rom, George.’

“Bin tomur fare wagon … bay be’ ni kanoeg i Jasper Rolfe ngak. Me fingichiy row me ga’ar: ‘Iraray ni gubin, Uncle George.’

“[Brother Goates] e sap ngak Francis me ga’ar: ‘Gube athapeg ni iraram e tirodow.’

“Nap’an nra taw gow ko fare milay’, Francis e ‘og nga but ni nge bing fare garog ko maab ya nga yag ni nge fek [chitamangin] fare wagan ko fare fild. [George] e fek fare wagon ngalan fare yiror, me talag, … me sap ko farngi fild. … Ma dariy ta’areb fare maal nib thibthib u dakan fare milay’. Ma fani nangfan e n’en nibe fanathin nag Jasper Rolfe nap’an ni non ngak: ““Iraray ni gubin, Uncle George!’

“[George] me ‘og nga butt’ ulan fare wagon, me gogoy bu’uw fapi butt’, ni raba’adag, me … fek pangin reb fapi maal nib thibthib, me sap nga ya’an fare murwel mi tay ni rib momaw’, ma woed ni dani mich u wan’ riy.

“Me par [nga] butt’ nga dakan boech yuwan fapi maal—ra mo’on ney ni fek aningeg i fak nga tabinaew ni nge k’eyag ulan nel’ e rran; me fal’eg e kahol, me ker e low, me fal’eg e mad ko magawon—re mo’on ney ni dani m’ug u owchen e tin nibe buch rok, ma yog ngak be’ e n’en nibe rin’—e par nga butt’ nga dakan yuwan fapi maal me yor ni woed bitir ni yoeg.

“Me sak’iy ngalang, me chuweg e lu’ u owchan, … me sap nga tharmiy, me ga’ar: “Kamgar, Chitamag, ko fapi elders ko ward rog.’”⁶

Arogon, magar ngak Got ko fapi mo’on ko priesthood nga pi pigpig ni yad be tay nifan ngak e tabinaew e gidii’ nibe toy tofen u Zion.