Netipen emon Soufos
Sia tongeni pwapwa pwe noun ewe Samon ewe soufos a nom non en me nenian me an ewe Samon we angang a wes non ewe napanap mi pin usun mine Ii a anapanapa.
Ua tingor non ai iotek pwe ewe Ngun mi Fel epwe nonom ren emon me emon kich ikenai non ei mwich mi unusen pin. Met kich meinisin sia pwarata a fokkun amwarar ren ewe 17 wen soufosun ei kinikinin fansounn afen ketiw are sia etiwa non mwich mi pin.
Nupwen ua tingor ren aninis ai upwe sinei ewe itenap mine ewe Samon a mochen upwe afanafan won ikenai, a mwitir ne tonong non ekieki eu ai fansoun aporous mi chok kukuto ren ewe minefon Aewin Presetensi. Non ei aporous, emon me nein ekkewe chon aninis a porous won usun chok ei ekiek: “Ua ennetin epinukunuk pwe sounening ei Mwichefen ra fokkun weweiti auchean met a fis ren ewe kokkon nouch we minefon soufos Preseten Russell M. Nelson, me auchean me pinin ewe mwich mi pin a fis non ewe mwichenapen chufengen,”A sopweno ne apasa, “Pwe a ukukun 10 ier, me ekkoch aramas, akaewin ekkewe serafon Mwichefen, rese chechemeni are sinei usun ei mwich ren ewe minafen soufos.”
Ei a uweato ai ekieki usun met mi fisi ngeni ei me mwan. Ewe akaewin soufos ua chechemeni Preseten David O. Mckay. A mano nupwen ua 14 ier. Ua chemeni ai mefi netipengaw nupwen ua fiti nemanon uwe me an inei we kechiw, me ewe netipengaw unusen ai we famini a mefi. Ua chemeni ai apasau ekkewe kapas me non awei non ai iotek, “Kose mochen kopwe efeiochu Preseten David O. Mckay”mwirin an ewe soufos we a mano, ngang mi chiwen pwan akapasa ekkei kapas. Ua ekieki ika netipei me ekieki mi chiwen mefi met ua mefi me mwan ren ewe preseten mwirin. Nge a wewe ngeni usun ekkewe sam me in mine ramen tongei emon me emon nour kewe semirit, ua mefi ena tong ren, kapas fengen, me pwarata usun ewe soufos Joseph Feilding Smith, ewe a wii Preseten Mckay, me pwan ekkewe soufos ra tapweto: Harold B. Lee, Spencer W. Kimball, Ezra Taft Benson, Howard W. Hunter, Gordon B. Hinckley, Thomas S. Monson, me ikenai Preseten Russell M. Nelson. Ua unusen etiwa emon me emon ekkei soufos ren ai eitieta pei—me non unusen netipei.
Nupwen an emon me emon atongeach nouch kewe soufos ra mano, mi pung ach sipwe mefi netipechou me turutiw. Nge ach netipengaw a kinamweno ren ewe pwapwa me epinukunuk pwe kich meinisin sia sinei usun ewe feioch a feito seni ewe Niwinsefanito: ren ewe koko me ketiwen emon soufos mi manau won ei fonufan.
Ren ena wewe, upwe afanafan usun ei angang mi pin afen fis non ekkewe 90 ran ano. Upwe aweweitiw non ruanu kinikin: ewin, manon nouch kewe soufos me emuchunon ewe Aewin Presetensi; oruan, ewe fansoun utiwitin forun sefanin ewe minefon Aewin Presetensi; aunungatin, ewe kokon ika kefinin minefon soufos; me Aruanun, ewe ketiwen are etipeeu won ekkewe minefon soufos me Aewin Presetensi non ei kinikinin chufengen.
Ewe Manon emon Soufos
Non January 2, 2018, atongeach we soufos Thomas S. Monson a mano. Mi chok nonom non netipach ese tongeni epwe moruk. Preseten Henry B. Eyring a afanafan ne manon Preseten Monson we a awewei usun memefin netipach: “Manauen Peseten Monson, a usun ewe Chon Amanau, amen chok pwapwaiti an epwe anisi ekkewe mi osupwang, ekkewe mi samau—me meinisin—non unusen fonufan.”1
Preseten Spencer W. Kimball a awewei:
“Nupwen efou fuu epwe tuputiw nukun oropeinen, efou epwe siwininong non nenian, iwe mano a awora manau.
“An ewe Samon we angang ese wor nesopun. Ina mwo ika emon ekkewe souemwen mi pochokun a mano, esapw mwo wor eu fansoun esapw wor souemwen non ewe Mwichefen, kinisou ngeni ewe umoumochun Kot ewe a ngeni kich an ei muu ese wor ne muchun. Usun met afen fis … me mwen ei kinikinin fansoun, aramas repwe engino ngeni manon ekkewe soufos, tonu chonun meser, me okunu netiper ngeni fansoun mwach.”2
Ewe Fansoun nefinen Manon me Forsefanin ewe Presetensi
Ewe fansoun nefinen ewe manon ekkewe soufos me forsefanin ewe Aewin Presetensi a awewe ngeni ew “nefinen manon me forsefanin ewe presetensi.” Non ei fansoun, ewe Mwichen Engon me Ruemon Aposel, fan emwenien ewe souemwenin ewe mwichen preseten, ra komoch ekkewe kii ar repwe emweni ekkewe souemwenin Mwichefen. Preseten Joseph F. Smith a aiti kich, “Iteitan mi chok wor ewe mokuren ewe Mwichefen, me ika ese wor ewe Presetensin ewe Mwichen ren ar ra mano ika met e fisingenir, iwe ewe pwan eu mokuren Mwichefen ekkewe Engon me Ruemon Aposel, tori an epwe woresefan ewe presetensi.”3
Akaewin manon me forsefanin presetensi a fis a poputa nupwen ne manon Preseten Monson we non ewe January 2, me a sopwono non 12 ran mwirin non Raninfel, January 14. Non ewe sosoren Raninfel, ewe Mwichen ekkewe Engon me Ruemon Aposel ra chufengen asen ewe ruum non Salt Lake Temple ren ar repwe fori ar echikefen me iotek, fan emwenien Preseten Russell M. Nelson, ewe watten ekkewe Aposel me Presetenin ewe Mwichen ekkewe Engon me Ruemon.
Kokkon emon Minefon Soufos
Non ei mwich mi pin me chem, a poputa ren tetenochun am we mwich non tong me umoumoch, pwii kewe ra foukukumosuno won am kewe sea ren tetenin emon me emon won 13 sea ra eitieta pour akom ar etiwa forutan ewe Aewin Presetensi me rapwan etiwa Preseten Russell Marion Nelson ngeni ewe Prestenin ewe Mwichefenin Jises Kraist ren Aramas mi Pin non Fansoun Sopwonon. Ei ketiw are etipeeu a fis ren Chufengenin ewe Mwichen ekkewe Engon me Ruemon Aposel non eu foukukumos me ra wata pour won mokuren Preseten Nelson me ra efeiochu me finata, pwe epwe wisen chon angang faniten ii ewe watten me neir Aposel.
Iwe Preseten Nelson a eita noun kewe chon aninis, Preseten Dallin Harris Oaks, Preseten Henry Bennion Eyring, ren Preseten Oaks ii ewe Presetenin ewe Mwichen Engon me Ruemon Aposel, me Preseten Melvin Russell Ballard ewe a chon nikinikitiw ren Presetenin ewe Mwichen Engon me Ruemon Aposel. Mwirin ar angangen etipeeu, emon me emon pwii kei ra ewis ngeni wiser kewe seni Preseten Nelson. Ei mettoch mi fis amen unusen pin, ren amemefin ewe Ngun mi Fel. Ua pwarata ngeni kemi ai kapasen pwarata pwe an ewe Samon we angang, ewe aua iotek fanitan, a pwapwano non pochokun non eu me eu ekkewe mettoch a fis non na ran.
Ren seikitan Preseten Nelson me ewe forsefanin ewe Aewin Presetensi, ewe fansoun nefinen manon soufos me forsefanin ewe Aewin Presetensi a much, me ewe minefon forutan ewe Aewin Presetensi ra poputa ar angang, mi amwarar, esapw mwo eu seken ar repwe asoso ne anganga ewe Muun Kot me won ei fonufan.
Mwich mi Pin
Ei sosoran, ei angang mi pin a wesino non kinamwen ewe mumutan kinikin me non ewe Doctrine and Covenants: Ren mettoch meinisin epwe fis non tetenochun, me seni ekkewe feiochun mumuta me non ewe mwichefen, ren iotekin nuku,4 me ekkewe unumon ra wisen Nemeni ewe Pris mi Nap, … a wor ren pochokun, nuku, me iotekin ewe mwichefen, a forata ewe mwichen Presetensin ewe Mwichefen.5
Elter David B. Haight a awewei usunn eu mwich a fis me mwen ach ei mwich ikenai:
“Sia chon pwarata ren ach fiti ei auchean mwich mi pin—eu mwich akon auchea ach sipwe fori angangen ekkewe mettochun nang. Usun non fansoun nomw, mi wor chommong fansoun echikefel me iotek an ekkewe Souneng non unusen fonufan pwe repwe angei watten feioch seni ewe Ngunun ewe Samon, iei usun met a pwaa … me non ei mwich non ei soran.
“Eu auchean mwich mi pin, usun itan we mi affatano, wewen mi pin, wenechar, me mosonosonun mwich nupwen ekkewe Souneng ra mwichefengen fan emwenien angangen ewe Aewin Presetensi.”6
Pwii me fefinei kana, sia tongeni pwapwa—me puchor ne apasa “Hosanna!”—pwe noun ewe Samon we chon angang, ewe soufosun Kot, ra nom me ewe Samon a kinisou pwe An we angang epwe for non ewe napanapan mine Ii a anapanapa.
Preseten Russell M. Nelson
Ei angangen efeioch mi pin a emwen ngeni ewe kokon soufos mi pin. Usun chok Preseten Monson emon ekkewe souemwen mi murino me won ei fonufan, usun pwan chok Preseten Nelson. Ewe a kefin me amoneta seni ewe Samon an epwe emweni kich non ei fansoun. Ei watten feioch iei ren nouch ei preseten achengicheng Preseten Russell M. Nelson nouch uwe soufos mi tong me wenechar—eweengon me efisuwen Presetenin ewe Mwichefen non ei saingon kinikinin fansoun.
Preseten Nelson emon mwan mi fokkun murino. Ua fokkun kinisou ren ewe fansoun ua tongeni angang non ewe Mwichen ekkewe Engon me Ruemon Aposel nupwen an a presetenin ewe mwich non ukukun ruu ier. Aua sai fetan me ua mwar ren an pochokun, usun emon epwe mokutukai pun epwe tori nerasin! Ren ukukun non manauan afen churi 133 fonu.
A anisi meinisin, mi kis o mi nap. Nikinikin pwe mi sisinei meinisin me a fokkun chechemeni iten emon me emon. Meinisin ion mi sisinei ii ra mefi pwe amen sanir. Me achok pwan usun kich meinisin—pokiten an we tong me aninis ngeni kich meinisin.
Ai akkaewin chiechi ngeni Preseten Nelson a fis non angangen non Mwichefen, ua fokkun sinei ochu usun manauan an Preseten Nelson angang me mwen an a koko ngeni emon Meinap Unus. Usun ami meinisin oua fen sinei, Preseten Nelson emon tokterin ngasangas me, me mwen an emon tokter, a emon me nein ekkewe akaewin aramas ra aueta ewe mwesinen ngasangas-omwun. Preseten a pwan angang won ewe timen research an epwe anisi ewe akaewin angangen sukkun-ngasangasen aramas, non 1951 ra fen piin foffori. Preseten Nelson a wisen fori ewe angangen reirei ngasangas won Preseten Spencer W. Kimball ese mwo tam me mwen an we epwene emon soufos.
Nupwen, Preseten a koko ngeni an epwe emon ekkewe Engon me Ruemon non 34 ier ano a wesino ne fori ew angang ewe angangen safei ren aninisin me siwinin ngasangas, a poputa ne angang usun emon Aposel ne afanafan fetan an epwe apochokuna me amonata netipen ese pwan nifinifin ren engon ngorou non unusen fonufan, ekkewe ra chimweta me chikar ren an kapas me fofforun tipachem, angang, me tong.
Eu netip usun Netipen Kraist
Nupwen ua kan ekieki eu manau usun Kraist sipwe kaeo iteiten ran, ua kuna Preseten Nelson. Use kukuna mwo emon epwe tekia non an angangoch me murino nap seni ii. Eu amwararen nesen ngeni ei a fokkun auchea ai upwe kaeo. Aewin pau epwe pwarata usun non netipen Kraist ren Preseten Nelson.
Non ekkewe chok wik ai we ua koko ngeni ewe Engon me Ruemon non ewe October 2015, ua tufichin angei eu akaewin sinei usun manauen Preseten Nelson me nukun an angang. Ua ketiw ai upwe fiti eu mwich ikewe ie ra asufonu I pwe emon akkom chon reirein ngasangas. Nupwen ua tonong non ewe rum, ua mairu ai we kuna ewe chochon aramas mi sinenap ra nom ar repwe asamwonu me esina ewe angang Preseten Nelson a fori non chommong ier me mwan nupwen an we emon tokter me chon reirei.
Ena kunionun chommong ekkewe soutipachem ra uta me pwarata ar menin me mwareiti ewe amwararen angang Preseten Nelson a fori non ewe fansoun a angang ngeni ewe nenien safei. Amen ameseik met emon me emon ra apasa me anapanapa usun an Preseten Nelson angangoch, akon fen wesen napono ai mwar nupwen ua poputa ne aporous ngeni emon ekkewe mwan ewe a momot unuki. Ese sisine ei, nge a sisinei Preseten Nelson, ewe Dr. Nelson, ewe a souemwenin ewe prokramen nenien reirei non ewe nenien sukunen safei non 1955.
Ei mwan emon noun Preseten Nelson chon sukun me nom. A chommong met ua chechemeni usun. Akaewin met akon ameseik an we anapanapa usun napanapen an Presten Nelson asukun, usun mine, a apasa, Preseten Nelson amen sinneno ren. A awewei ukukun an ewe asukun ren ewe reirei ngasangas a fis me non ewe rumen reirei. Ikewe, chon ewe neni ra kuna me ie me fori angangen reirei fan emwenien ewe chon emweni, me non ewe klasin lab. A apasa pwe kokotun ewe rumen reirei fan emwenien ekkewe ekkoch chon reirei ese pungupungoch, rese monefich, rechok echim, me pusin fori won ar. Ei mwan a awewei pwe amen weires, fan ekkoch amen fen pwan asau. Ren ei wewe, ekkewe chon reirei rapwan mefi pwe ar angang mi anuokus.
A pwan awewei ewe sokono mi kuna me non an Preseten Nelson we rumen reirei. Amen kinamwe, mosonoson, me murino. Eu neni ikewe ie a wor ian menin. Nge nengeni, kokotun ewe angangen reirei, Dr. Nelson a mochen epwe wor eu anukun foffor mi nap seni emon me emon noun kewe chon safei. Ei mwan a pwan sopweno ne awewei ukukun ewe engino me echipwerin angang mi tou me non an Dr. Nelson we rumen reirei.
Ei use mwo kan mairu ren. Iei met ua kuna me sinei, me unusen feioch seni me non ewe Mwichen ekkewe Engon me Ruemon Aposel. Ua mefi nge ua fen mefi me nomw, non eu nikinik, ren emon noun “kewe chon safei ra kaeo.”
Preseten Nelson ii a wor anen an epwe asukuna ekkoch me tingorun aninis non mettoch mi murino, menin, me chengen. Ii ewe sia nouni sassing ren ew netip mi usun netipen Kraist me an nenien apiru ngeni kich meinisin. Ren ii sia kaeo pwe non mettoch meinisin sia kuna manauach me non, met sia foffori me netipach a tongeni anongonong won ewe nongonongen ewe kapas allimen Jises Kraist.
Iei a nom rech ewe watten feioch ach sipwe etiwa nouch we soufos, Preseten Russell M. Nelson. Non unusen manauan, a pwarata usun auchean wisan kewe usun enom chon sukun, semenap, chon angang, ngeni punuwan we, tokter, souemwenin pristut, semen noun noun kewe, me Aposel. A aponueta ekkei wis iwe—nge a sopweno ne fori—ren netipen emon soufos.
Pwii me fefinei, met sia pwarata me fiti ikenai, eu auchean mwich mi pin, a uweato ai pwarata pwe Preseten Russell M. Nelson ii noun ewe Samon chon afanafan mi manau ngeni unusen aramas meinisin. Upwe pwan pacheta ai kapasen pwarata usun Kot ewe Sam, me Jises Kraist, me Wisan we nouch Chon Amanau me Chon Angasano. Non iten Jises Kraist, amen.