2010–2019
Li raam jun li profeet
Abril 2018


Li raam jun li profeet

Naru nasaho’ qach’ool xb’aan naq jun xprofeet li Qaawa’ na’ok sa’ xk’anjel ut yoo chi uxmank lix k’anjel li Qaawa’ jo’ chanru kixk’ojob’ chaq a’an.

Nintijok chi anchal inch’ool re xpatz’b’al naq li Santil Musiq’ej taawanq qik’in chiqajunjunqal sa’ li choxahil hoonal a’in. Li k’a’ru yooko chirilb’al sa’ komonil a’an k’a’jo’ xchaq’al ru: li xwuqlajuhil li profeet sa’ li k’ojlajik a’in ak xxaqab’aman sa’ ch’utlajik re tiik ruhil k’a’uxlej.

Naq yookin chixsik’b’al inb’eresihom re xnawb’al li k’a’ru naraj li Qaawa’ naq tin’aatinaq wi’ anajwan, xjultiko’ we jun li k’a’ru xinseraq’i toje’ rik’in li ak’ Xb’eenil Awa’b’ejil. Sa’ li seraq’ a’an, jun reheb’ laj tenq’ aj k’ehol na’leb’ xye li aatin a’in: “Wan sa’ li waam jun xchamal oyb’enihom naq li komon re li Iglees te’xtaw ru li xnimal ru li xk’ulman naq xb’oqe’ jun chik li ak’ profeet, li Awa’b’ej Russell M. Nelson, ut li naraj naxye ut lix santilal li ch’utlajik re tiik ruhil k’a’uxlej li taa’uxmanq sa’ li jolomil ch’utub’aj-ib’.” A’an xye ajwi’, “Ak xnume’ 10 chihab’ ut naab’aleb’, mas wi’chik eb’ li saaj re li Iglees, moko jultik ta reheb’ malaj moko rilomeb’ ta jun sutaq.”

Jalam-uuch
Li Awa’b’ej David O. McKay

A’in xinxk’e chi k’oxlak chirix li k’a’ru ak innumsihom. Li xb’eenil li profeet li najultiko’ we a’an li Awa’b’ej David O. McKay. Naq kikam ‘an, wan chaq we 14 chihab’. Jultik we li tz’eqok x’eek’aman rik’in lix kamik ut lix ya’al uhej sa’ ru lin na’, jo’ ajwi’ re chixjunil li qajunkab’al. Jultik we naq eb’ li aatin “B’aanu usilal, osob’tesi li Awa’b’ej David O. Mckay” yal na’el chaq sa’ xtz’uumal we sa’eb’ lin tij, ut naq, wi ink’a’ nink’e reetal, toj yooqin raj chixb’aanunkil a’an chirix lix kamik. Xinpatz’ wib’ ma naru naq li waam ut lin k’a’uxl te’xk’am raj ajwi’ li eek’ahom ut li xnawb’al chi tz’aqal chirixeb’ li profeet li te’chalq chirix a’an. A’b’an, jo’ naq eb’ li na’b’ej yuwa’b’ej neke’xra chi junjunqeb’ lix kok’al, xinwulak reek’ankil li rahok, li k’ulub’ej, ut lix nawom inch’ool chirix li Awa’b’ej Joseph Fielding Smith, li kichal chirix li Awa’b’ej McKay, ut chirix li junjunq chi profeet li kichal chirix a’an: laj Harold B. Lee, laj Spencer W. Kimball, laj Ezra Taft Benson, laj Howard W. Hunter, laj Gordon B. Hinckley, laj Thomas S. Monson ut, toj anajwan, li Awa’b’ej Russell M. Nelson. Chi anchal inch’ool, ninxaqab’eb’ li junjunq chi profeet rik’in li wuq’ ut li waam chi taqe’q.

Naq jun reheb’ li qararookil profeet nakam, ak re naq na’eek’aman li rahil ch’oolej ut jun li eek’ahom re tz’eqok. A’b’an li rahil ch’oolejil naq’unob’resiik xb’aan li sahil ch’oolej ut li oyb’enink naqak’ul naq naqil jun reheb’ li xnimal ru osob’tesink re lix k’ojob’ankil wi’chik li evangelio: lix b’oqb’al ut lix xaqab’ankil jun li ak’ yo’yookil profeet sa’ xb’een li ruchich’och’.

Xb’aan a’an, tin’aatinaq chirix li choxahil tusulal a’an, li taaqenb’il chalen chaq 90 kutan anajwan. Tinjachi ru sa’ kaahib’: xb’een, lix kamik li qaprofeet ut lix jachb’al rib’ li Xb’eenil Awa’b’ejil; xkab’, li hoonal nanume’ xk’uub’ankil wi’chik li Xb’eenil Awa’b’ejil; rox, lix b’oqb’al jun chik li ak’ profeet; ut xkaa, lix xaqab’ankil jun chik li ak’ profeet ut li Xb’eenil Awa’b’ejil sa’ li ch’utlajik re tiik ruhil k’a’uxlej.

Lix kamik jun li profeet

Jalam-uuch
Lix muqlajik li Awa’b’ej Thomas S. Monson’s
Jalam-uuch
Li Awa’b’ej Thomas S. Monson

Sa’ li wiib’ xb’e li po enero re 2018, li qararookil profeet, laj Thomas S. Monson xnume’ sa’ xjunpak’alil li tz’apleb’ t’ikr. A’an taawanq xna’aj junelik sa’ li qaam. Li Awa’b’ej Henry B. Eyring xye junjunq aatin naq xkam li Awa’b’ej Monson, li naxch’olob’ chi tz’aqal re ru li qeek’ahom: “Li reetalil lix yu’am, jo’ ajwi’ lix yu’am li Kolonel, a’anaq li rajom re xye’b’al li ruq’ reheb’ li neb’a’, reheb’ li yaj—reheb’ ut chixjunileb’ li kristiaan sa’ li ruchich’och’.”1

Li Awa’b’ej Spencer W. Kimball kixch’olob’:

“Jo’ ajwi’ naq jun li chahim nasach sa’ xmaril li choxa, jun chik nak’utun chaq, ut li kamk nareechani li yu’am.

“Lix k’anjel li Qaawa’ maak’a’ roso’jik. Us ta nakam junaq li nimla jolominel, maajun wa nakana junpaataq li Iglees chi maak’a’ xjayalil, b’antiox re lix chaab’il k’aak’alehom li Qaawa’ naq naxkanab’ lix awa’b’ejihom chi wank junelik. Jo’ ak nak’ulman chaq … junjunq sut sa’ li k’ojlajik a’in, jun li tenamit naxtz’ap jun li muqleb’aal chi ch’anch’o, neke’chaqik lix ya’aleb’ ru, ut nekeq’aj chaq li xnaq’eb’ ru sa’ li toj taachalq.”2

Li hoonal naq maak’a’ sa’ xk’anjel jun profeet

Li hoonal nanume’ naq nakam jun li profeet ut lix k’uub’ankil wi’chik li Xb’eenil Awa’b’ejil naxk’ab’a’in “Li hoonal naq maak’a’ sa’ xk’anjel jun li profeet.” Chiru li hoonal a’in, lix Molameb’ li Kab’laju, rub’el xb’eresihom li awa’b’ej re li molam, neke’xk’am li laaw re xk’uub’ankil ru lix jolomil li Iglees. Li Awa’b’ej Joseph F. Smith kixye: “Junelik wan junaq sa’ xjolomil li Iglees; ut wi li Awa’b’ejil re li Iglees nasach xb’aan li kamk malaj k’a’ruhaq chik, jo’kan ut neke’kana li Kab’laju chi Apostol jo’ xjolomil li Iglees toj reetal naq nak’uub’aman wi’chik li awa’b’ejil.”3

Jalam-uuch
Lix Molameb’ li Ka’blaju chi Apostol

Li hoonal naq maak’a’ sa’ xk’anjel li profeet xtikla naq xkam li Awa’b’ej Monson, sa’ li wiib’ xb’e li po enero, ut xraqe’ chirix kab’laju kutan sa’ domingo, li 14 xb’e li po enero re 2018. Li hilob’aal kutan a’an eq’la, lix Molameb’ li Kab’laju ke’xch’utub’ rib’ sa’ li Santil Ochoch re Lago Salado rik’in kuyuk sa’ ut tijok, rub’el xb’eresihom li Awa’b’ej Rusell M. Nelson, li jolomil aj Apostol ut Awa’b’ej re lix Molameb’ li Kab’laju.

Lix b’oqb’al jun ak’ profeet

Sa’ li loq’ ut jultikanb’il ch’utam a’an, rik’in xtaaqenkil lix tusulal ak’ k’ojob’anb’il sa’ junajil ut rik’in jun k’ulub’ejil, chunchuukeb’ chi tustu a’ yaal li tiixil sa’ oxlaju li chunleb’aal sa’ jun sirso, eb’ li apostol xe’xtaqsi li ruq’, xb’een re xxaqab’ankil xwankil lix k’uub’ankil ru li Xb’eenil Awa’b’ejil ut chirix a’an re xxaqab’ankil xwankil li Awa’b’ej Russell Marion Nelson jo’ Awa’b’ej re Lix Iglees li Jesukristo reheb’ laj Santil Paab’anel sa’ Roso’jikeb’ li Kutan. Chirix li xaqab’ank a’an, lix Molameb’ li Kab’laju xe’xch’utub’ rib’ sa’ jun sirso ut xe’xk’e li ruq’ sa’ xb’een lix jolom li Awa’b’ej Nelson re xk’ojob’ankil, b’aanunb’il xb’aan xkab’ li Apostol ak tiix chi us.

Chirix a’an, li Awa’b’ej Nelson xb’oqeb’ laj tenq’ re, li Awa’b’ej Dallin Harris Oaks, li Awa’b’ej Henry Bennion Eyring, rik’in li Awa’b’ej Oaks choq’ li Awa’b’ej re lix Molameb’ li Kab’laju chi Apostol ut li Awa’b’ej Melvin Russell Ballard choq’ li ruuchil li Awa’b’ej re lix Molameb’ li Kab’laju chi Apostol. Chirix lix xaqab’ankileb’, eb’ li winq a’in xe’k’ojob’aak sa’ xk’anjel li junjunq xb’aan li Awa’b’ej Nelson. A’an a’in jun li numsihom tz’aqal loq’, rik’in lix wanjik li Musiq’ej chi nim. Ninye lix nawom inch’ool tz’aqal eere naq li rajom li Qaawa’, li xootijok wi’ chi kaw, xk’utb’esiman chi nim xwankil sa’eb’ li k’anjel xb’aanuman sa’ li kutan a’an.

Jalam-uuch
Li Xb’eenil Awa’b’ejil

Rik’in lix k’ojob’ankil li Awa’b’ej Nelson ut lix k’uub’ankil wi’chik ru li Xb’eenil Awa’b’ejil, xraqe’ li hoonal naq maak’a’ sa’ xk’anjel li profeet ut, ut li Xb’eenil Awa’b’ejil toje’ k’uub’anb’il xtikib’ chi k’anjelak chi moko xnume’ ta raj jun k’asal sa’ lix jolomil lix awa’b’ejihom li Qaawa’ sa’ li ruchich’och’.

Li ch’utlajik re tiik ruhil k’a’uxlej

Sa’ li eq’la a’in natz’aqlo ru lix choxahil tustuukil ru jo’ chanru taqlanb’il sa’ li Tzol’leb’ ut Sumwank: “Xbʼaan naq chixjunil li kʼaʼaq re ru tento taabʼaanumanq chi tustu, ut chi kʼulubʼanbʼil saʼ komonil saʼ li iglees, rikʼin li tijok chi wank li paabʼaal,”4 ut “oxibʼ li Jolominel Taqenaqil aj Tij, sikʼbʼilebʼ chaq ru xbʼaan li komonil, … xaqabʼanbʼilebʼ xwankil xbʼaan lix kawilebʼ xchʼool, lix paabʼaalebʼ, ut lix tijebʼ li iglees, nekeʼwan choqʼ jun molam re li Awaʼbʼejil re li Iglees.”5

Li Elder David B. Haight kixch’olob’ k’a’ru ki’uxman sa’ li k’anjel junxil, a’an ajwi’ li k’anjel li xootz’aqon wi’ anajwan:

“Anajwan laa’o aj yehol nawom re ut aj tz’aqonel sa’ jun li k’anjel tz’aqal loq’: jun ch’utlajik re tiik ruhil k’a’uxlej re xb’aanununkil li choxahil k’anjel. Jo’ ki’uxman chaq sa’ najter q’e kutan, eb’ laj santil paab’anel sa’ chixjunil li ruchich’och’ neke’xkuy xsa’ ut neke’tijok re xk’ulb’al chi naab’al lix Musiq’ li Qaawa’, li na’eek’aman chi jwal kaw … sa’ li hoonal a’in.

“Jun li ch’utlajik re tiik ruhil k’a’uxlej, jo’ naxye lix k’ab’a’, a’an jun li hoonal loq’, jun li hoonal re tiik ruhil k’a’uxlej, ut jun li hoonal jwal oxloq’ b’ar wi’ eb’ laj santil paab’anel neke’xch’utub’ rib’ rub’el lix b’eresihom li Xb’eenil Awa’b’ejil.”6

Ex was wiitz’in, naru nasaho’ qach’ool—naru ajwi’ naqajap qe chixyeeb’al Hosana!— xb’aan naq jun aj k’amol raatin li Dios, jun xprofeet li Dios, na’ok sa’ xk’anjel ut naq li Qaawa’ sa sa’ xch’ool xb’aan naq yoo chi uxmank lix k’anjel jo’ chanru kixk’ojob’ chaq a’an.

Li Awa’b’ej Russell M. Nelson

Li choxahil tusulal a’in nokoxk’am rik’in jun chik li profeet sik’b’il ru xb’aan li choxa. Jo’ ajwi’ naq li Awa’b’ej Monson kiwan jo’ jun reheb’ li jwal ninqeb’ sa’ xb’een li ruchich’och’, jo’kan ajwi’ wan li Awa’b’ej Nelson. Li Qaawa’ kikawresink re ut kitzolok re tz’aqal qajolominkil sa’ li hoonal a’in sa’ resilal li ruchich’och’. A’an jun nimla osob’tesihom naq wan li Awa’b’ej Russell M. Nelson jo’ qaprofeet aj rahonel ut aj k’anjel—li xwuqlajuhil li Awa’b’ej re li Iglees sa’ li roso’jikil k’ojlajik a’in.

Jalam-uuch
Li Awa’b’ej Russell M. Nelson

Li Awa’b’ej Nelson a’an tz’aqal jun li winq k’a’jo’ xchaab’ilal. Osob’tesinb’ilin chi k’anjelak sa’ lix Molameb’ li Kab’laju chi Apostol rochb’een a’an jo’ lin awa’b’ej re li molam chiru wiib’ chihab’. Xin’ula’anink chaq rochb’een ut naxsachb’esi lin ch’ool lix metz’ew. Tento tatb’eeq chi kaw re naq tatruuq chixtaaqenkil! Sa’ lix yu’am, a’an rula’anihom 133 chi tenamit chiru li ruchich’och’.

Naxye’ li ruq’ re chixjunil, reheb’ li saj jo’ ajwi’ li tiix. Chanchan ta wi’ naq naxnaweb’ ru chixjunil ut wan xseeb’al re xjultikankileb’ li k’ab’a’ej. Chixjunileb’ li neke’nawok ru neke’xk’oxla naq a’an lix chaab’il amiiw. Ut jo’k’an ajwi’ rik’in li junjunq qe—xb’aan lix rahom ut lix k’a’uxl wan choq’ reheb’ chixjunil li kristiaan.

Lix nawb’al qu rik’in li Awa’b’ej Nelson, a’an sa’ li qak’anjel sa’ li Iglees, a’b’an ninwulak ajwi’ chixnawb’al ru sa’ lix trab’aaj xwan naq maji’ nab’oqe’ jo’ aj Jolominel aj B’eresinel. Jo’ naab’al eere laa’ex nekenaw, li Awa’b’ej Nelson a’an chaq jun aj nimla cho’onel re li aamej chalen chaq sa’ xtiklajik lix trab’aaj; a’an chaq jun reheb’ li xb’een ut aj yoob’anel re li ch’iich’ nak’ehok ruuchil li pospo’oy. A’an kik’anjelak sa’ junajil rik’in jun li ch’uut aj tz’ilol-ix li kitenq’an re li xb’eenil aamej cho’b’il chaq rik’in jun li ch’iich naxb’aanu ruuchil li aamej sa’ 1951. Li Awa’b’ej Nelson kixcho’ li raam li Awa’b’ej Spencer W. Kimball ka’ch’in ma nawulak chaq a’an choq’ li profeet.

Jalam-uuch
Li Awa’b’ej Nelson jo’ aj cho’onel

34 chihab’ chaq anajwan, naq li Awa’b’ej Nelson kib’oqe’ sa’ lix Molameb’ li Kab’laju, kiraqe’ lix trab’aaj re cho’ok aamej ut re xkawresinkil ut xk’irtesinkileb’ li aamej. A’ut a’an ki’ok chi k’anjelak sa’ lix b’oqb’al choq’ apostol re xkawresinkil ut xk’irtesinkileb’ li raam k’iila mil chi kristiaan li xe’waklesiik xch’ool rik’in li raatin, lix chaab’il na’leb’, lix k’anjel, ut lix rahom.

Jalam-uuch
Li Awa’b’ej Nelson jo’ jun apostol
Jalam-uuch
Li Awa’b’ej Nelson naxk’e xsahileb’ xch’ool li komon
Jalam-uuch
Li Awa’b’ej Nelson rik’in li rimam

Jun li aamej aj Kristiano

Naq nink’oxla jun li aamej tz’aqal aj Kristiano chi k’anjelak rajlal kutan, nawil li Awa’b’ej Nelson. Maajun innawom ru li naxk’ut ta raj a’an chi nim chi us chiru li naxk’ut a’an. Choq’ we, a’an jun li eetalil k’a’jo’ xnimal li wanjenaq inhoonal chirilb’al lix k’utb’al li raam tz’aqal aj Kristiano li Awa’b’ej Nelson.

B’ab’ay chik chirix naq xinb’oqe’ sa’ lix Molameb’ li Kab’laju, sa’ octubre re 2015, kiwan lin hoonal chirilb’al b’ayaq lix trab’aaj sa’ lix yu’am li Awa’b’ej Nelson. Kinb’oqe’ sa’ jun li ch’utam b’ar wi’ ki’oxloq’iman a’an jo’ jun aj pahol b’e re li cho’ok aamej. Naq kin’ok sa’ li na’ajej a’an, kisach inch’ool rilb’aleb’ xk’ihal laj trab’aaj wankeb’ xtzolb’al wankeb’ aran re roxloq’inkil ut xb’antioxinkil li k’anjel kixb’aanu li Awa’b’ej Nelson chiru naab’al chihab’ jo’ aj b’anonel ut aj cho’onel.

Chiru li q’ojyin, naab’al li wankeb’ xtzolb’al ke’tz’aqon ut ke’xk’ut li roxoloq’ xb’aan li k’a’ru kixk’e li Awa’b’ej Nelson sa’ lix trab’aaj re b’anok. Us ta jwal chaab’il li raatineb’ chixjunil li ke’aatinak sa’ li q’ojyin a’an ut ke’xch’olob’ rik’in oxloq’ lix k’a’ru kixb’aanu li Awa’b’ej Nelson, jwal kitoch’e’ inch’ool wi’chik jun li seraq’ik kinb’aanu rik’in jun li winq chunchu chink’atq sa’ li na’ajej a’an. A’an moko naxnaw ta anihin laa’in, a’b’an kixnaw ru li Awa’b’ej Nelson, sa’ li hoonal a’an laj B’anonel Nelson, naq wan chaq jo’ aj jolominel reheb’ li neke’tzolok li cho’ok sa’ jun li escuela re medicina sa’ 1955.

A’an kiwan chaq choq’ xtzolom li Awa’b’ej Nelson. Kixwotz wik’in naab’al li k’uulanb’il seraq’. Choq’ we, li jwal kiwulak chiwu a’an li kixye chirix chan ru nak’utuk li Awa’b’ej Nelson naq, jo’ kixye, kinawe’ ru chi us xb’aan a’an. A’an kixch’olob’ chiwu naq naab’al re lix tzolb’aleb’ laj tzolonel a’an kib’aanuman sa’ lix na’aj li cho’ok. Aran, eb’ laj tzolonel neke’ril ut neke’xb’aanu li cho’ok rub’el lix b’eresihom laj k’utunel chanchan ta wi’ naq a’an ta li tzoleb’aal. Kixseraq’i we naq rik’ineb’ jun siir chik laj cho’onel, li wank sa’ lix na’aj li cho’ok jwal poqlenb’il ru, wan li yalok-u, rik’in li ch’iilank ut ajwi’, li nimank-ib’. Li winq a’an kixch’olob’ naq a’an jun na’ajej jwal ch’a’aj wi’ wank ut, wan naq, maak’a’ li oxloq’ink. Jo’kan naq, wan naq eb’ laj tzolonel re cho’ok ke’reek’a naq maare te’xkanab’ li tzolok.

Chirix a’an, kixch’olob’ chiwu chan ru li wank sa’ lix na’aj li cho’ok b’ar wi’ nawan li Awa’b’ej Nelson. Aran wan li tuqtuukilal, ch’anch’o ut k’ulub’ej. Neke’oxloq’iik laj tzolonel re cho’ok. A’b’anan, chirix lix k’utb’al jun lix b’aanunkil li cho’ok laj B’anonel Nelson naroyb’eni xnimal xchaab’ilal xb’aanunkil xb’aaneb’ lix tzolom. Li winq a’an kixye we naq li tz’aqal jwal chaab’il cho’ok ut li jwal chaab’il aj cho’onel ke’el sa’ lix na’aj li Awa’b’ej Nelson re cho’ok.

A’an moko kixsachb’esi ta b’ayaq inch’ool. A’an li wilom chi nach’ ut li osob’tesinb’ilin xb’aan sa’ lix Molameb’ li Kab’laju. Naweek’a naq, chi jalan chik ru, laa’in jun reheb’ lix “tzolom toj yoo chi k’iik.”

Li Awa’b’ej Nelson wan jun lix yaalal jun ajwi’ ru re k’utuk ut q’usuk chi chaab’il, rik’in oxloq’ ut chi musiq’anb’il. A’an lix kristiaanil li aamej aj Kristiano ut jun li eetalil choq’ qe chiqajunilo. Rik’in a’an naqatzol naq a’ yaal chan ru wanqo, li qana’leb’ ut li qaam naru neke’wan chi tustu ru rik’ineb’ li na’leb’ re lix evangelio li Jesukristo.

Anajwan osob’tesinb’ilo chixxaqab’ xwankil li qaprofeet, li Awa’b’ej Russell M. Nelson. Chiru lix yu’am, a’an nak’anjelak sa’ chixjunil li k’anjel b’oqb’il wi’ jo’ aj tzolonel, yuwa’b’ej, aj k’utunel, b’eelomej, aj b’anonel, aj jolominel sa’ li tijonelil, yuwa’chinb’ej, ut apostol. Ak xtz’aqob’resi ru chixjunil a’in—ut toj yoo ajwi’ chixb’aanunkil—rik’in jun aamej re profeet.

Ex was wiitz’in, li wilom ut li xootz’aqon wi’ anajwan, jun ch’utlajik re tiik ruhil k’a’uxlej, naxch’olob’ xyaalal inch’olob’ahom laa’in naq li Awa’b’ej Russell M. Nelson a’an lix yo’yookil yaab’ xkux li Qaawa’ choq’ re chixjunil. Ninch’olob’ ajwi’ xyaalal li Dios li Yuwa’b’ej, li Jesukristo, ut lix k’anjel jo’ aj Kolol qe ut aj Tojol qix. Sa’ xk’ab’a’ li Jesukristo, amen.