Mohngiong en Soukohp Men
Kitail kak peren pwehki sapwellimen Kauno soukohp miehier oh doadoahk en Kauno pahn wiawiher ni mwoahmw me E ketin koasonedier.
I kapakap ngidingidkiher me Ngehn Sarawi pahn ketin ieiang emenemen kital rahn wet nan doadoahk sarawi wet. Kitail kadehdehier doadoahk inenen kesempwal ehu ni en keehk-isimen en soukohp ah alehdi utuht nan kapokon sarawi wet.
Ni ei rapahki dahme Kauno pahn ketin kaweidkinie pwe ien ehukihda rahn wet, I patohwen tamanda koasoipene ehu me ngehi oh Presidensi Keieu apwtehn wiapene. Nan koaskoasoipeneo, emen sounsawas ko patohwenda mepwukat. “I koapworopworiki mehlel me tohn Mwomwohdiso kak wehwehki kesempwalen dahme wiawiher me pid malipilipdahn atail soukohp kapwo, Presiden Russell M. Nelson, oh kesempwalen oh sarawien kapokon wet me pahn wiawi nan kapokon lap.” E doula patohwen me, “E dauliher sounpar 10, oh dir me pwulepwul kan nan Mwomwohdisoht sohte tamataman de saikinte kilang kesepwildahn emen soukohp.
Met kahrehda ahi medewe dahme I kilangehr. Keieun soukohp me I tamataman iei Presiden David O. McKay. I sounpar 14 ni ansou me e kapelsalehdala, I tamataman uwen kalaloiden ah kapelsalehdalao oh pilen mesen ahi nohnou oh pahtou me kipehdi aht peneineio. I tamataman uwen mengei en ahi ndahla koasoi pwukat “Menlau kapaida Presiden David O. McKay, nan ahi kapakapko pwe ma I sohte taman me e kapelsalehdalahr I pil pahn kapwkapwurehiong . I sohte medewe me I pahn ahneki soangen madamadau ohte oh loaloale soukohp en mwuhr kan duwehte ih. Ahpw kerenieng duwehte nohno/pahpa kan me kin poakehng neirail serihkan, I pil diar ehu limpoak en ehuehng oh kadehdeki Joseph Fielding Smith me wiahla soukohp mwurin McKay oh emenemen sohkohp kan mwurira: Harold B. Lee, Spencer W. Kimball, Ezra Taft Benson, Howard W. Hunter, Gordon B. Hinckley, Thomas S. Monson, oh rahn wet President Russell M. Nelson. I utungada mehlel emenemen soukohp kan ni ahi kauwada pehika—oh ahi mohngiong unsek.
Ni en emenemen atail soukohp kempoake kan kin kapelsalehdala, kitail kin ahneki pahtou oh laloid. Ahpw atail pahtou kin marahrakihda koapworopwor oh popohl me kin miehda sang ni atail kin ale ehu kapai laud kan sang ni Kapwurpwurdohu, ni pilipildahn pil emen soukohp ieias pohn sampa.
Ihmekahrehda, I pahn koasoia duwen doadoahk sarawi me wiawiher nan irair en rahn 90 samwalahro. I pahn kawehwe mwekid wet nan ire pahieu; keieu, kapelsalehdalahn atail soukohp oh imwiseklahn Presidensi Keieu; keriau, ansou me kitail kin awiawi kokoudahn Presidensi Keieu kapw; kesilu, malipilipdahn soukohp kapw; oh kapahieu, utuht ong soukohp kapw oh Presidensi Keieu nan kapokon sarawi.
Kapelsalehdalahn Soukohp men
Ni Senweri 2, 2018, atail soukohp Thomas S. Monson kapelsalehdala. E pahn wie momour nan atail mohngiong kan. Presiden Henry B. Eyring kasalehda irehn eimwolu ni kapelsalehdalahn Presiden Monson oh kawehwehda ni mehlel atail pepehm kan: “Kadehde pen ah mour, duwehte en Sounkomouro, pahn wia pein eh tuhngoal madmadau ni eh kin sewese me semwehmwe, soumwahu—de pil aramas koaros—nan sampa.”1
Presiden Spencer W. Kimball kawehwe me:
“Ni en ehu usu kin kihrla pahn lahng, pil ehu kin pwarada, oh mehla kin kapwiledo mour.
“Doadoahk en Kauno sohte kin uhdi. Tetehn emen kaun kehlail kin kapelsalehdala, sohte pak ehu kin sohla sounkaweid en Mwomwodisoht, kalahngan ong Koht sapano me ketkihda sapwellime wehi en kin poatopoat oh sohte imwi. Iei ihme wiawihiero … mwohwe nan mwehiet, aramas akan kin sarepedi ehu sousou ni wahu, irisasang pilen meserail, oh sohpeila mwowe.”2
Ansoun Kaweid sang Wahnparon kan
Ansou me pato nan pwugen kapelsalehdalahn soukohp men oh koukoudahn Presidensi Keieu kin kahdaneki ansoun kaweid sang wahnparon kan. Nan irair en ansou o, Pwihn en Ehkriemeno, nin duwen kaweid en presiden en pwihno, kin ehupene doadoahngki kihkan pwehn kaweid Mwomwohdiso. Presiden Joseph F. Smith koasoia, “E kin mihmiehte kaun en Mwomwohdisoht ansou koaros, oh ma Presidensi en Mwomwohdiso kin sohla mie pwehki kapelsalehdala de sang kahrepe teikan, Wahnparon Ehkriemeno me kin moangehda Mwomwohdiso lao ehu presidensi pwurehng kokouda.”3
Ansoun kaweid sang Wahnparonko me keieu kerendo tepda ni kapelsalehdalahn Presiden Monson ni Senweri 2, oh imwsekila rahn 12 mwuri ni Rahnsarawi, Senweri 14. Ni menseng en Rahnsarawio, Pwihn en Ehkriemeno tuhpene nan pere ehu powe nan Tehnpas Sarawi en Salt Lake pwehn kaisihsol oh kapakap pahn kaweid en Presiden Russell M. Nelson, Wahnparon me keieu werei oh Presiden en Pwihn en Ehkriemeno.
Malipilipdahn Soukohp Kapw
Nan mihting sarawi oh kesempwal wet, Ohloko mwondi nan pwonopwon en sehr 13, nin duwen me kin wiewiawi ni minimin oh ehupen, kauwada pehrail kan pwehn utungada kokoudahn Presidensi Keieu oh uhd utungada Presiden Ruissell Marion Nelson en wia Presiden en Mwomwohdiso en Sises Krais en Souleng en Imwin Rahn-akan. Utuht wet wiawi mwohn en Pwihn en meh Ehkriemeno arail pokonpene nan pwonopwon ehu oh pwilikihdi pehrail kan pohn moangen Presiden Nelson pwehn kasarawiala oh kapaiada, ni en Wahnparon me keieu werei ah wia kapakap wet.
Presiden Nelson eri pilada sapwellime sounsawas kan, Presiden Dallin Harris Oaks, Presiden Henry Bennion Eyring oh Presiden Oaks me wia Presiden en Pwihn en Wanparon Ehkriemeno, oh Presiden Melvin Russell Ballard me wia Weliepen Presiden en Pwihn en Wahnparon Ehkriemeno. Mwurin usuhs en utuht eh wiawiher, Ohloko eri ale kapai ong arail pwukoahko sang Presiden Nelson. Met wia irair sarawi oh inenen kesempwal ehu, me Ngehno kipehdi. I ehukihong kumwail ahi kadehde mwuledek me kupwuren Kauno, me se kapakap ngidingidki, inenen utungada mehlel doadoahk oh mwekid kan en rahno.
Sang ni kasarawihlahn Presiden Nelson oh kokouda sapahl en Presidensi Keieu o, ansoun kaweid sang Wahnparonko imwisekla, oh Presidensi Keieu me apwtehn kokouda o ni mwoahmw lingan oh kaselel, tepda doadoahk oh sohte seken ehute me epwelpen wehin Kauno katoktokdi pohn sampa.
Kapokon Sarawi
Ni mensengo, mwekid sarawio pweidahr nin duwen kaweid en pwuhk sarawi me sansalehr nan Doctrine and Covenants. “Pwe mehkoaros uhdahn pahn wiawi nin duwe, oh sang ni ehupene en mwomwohdiso, sang ni kapakap en pwoson,”4 oh Ahi Prihs silimen me wie doadoahk, … kesepwildahr pwehki likilik, pwoson oh kapakap en mwomwohdiso, audehda pwihn en Presidensi en Mwomwohdiso.”5
Elder David B. Haight kawehwe ehu mwekid en mahs me pid dahme kitail wiahier rahn wet:
“Kitail wia soun kadehde kei ong oh iang towehda doadoahk ehu me keieu sarawi—kapokon sarawi ehu me mwekid ki doadoahk kan en nanleng. Me duwehte kawaho, mie kaisihsol oh kapakap me wiawisangehr Souleng kan nan sampa pwe Ngehn en Kauno en kak kipeiraildi, me inenen sansanl mwahu … nan doadoahko ni menseng wet.
“Kapokon sarawi ehu, nin duwen edeho, kasalehda sarawi, mehlel, oh mwekid wahu ehu ni en Souleng kan arail pokon pene pahn kaweid en Presidensi Keieu.”6
Riei ohl oh lih akan, kitail kak perenda—de werkihla “Hosanna!”—pwe weliepen Kauno, emen Soukohp en Koht, miehier oh Kauno ketin keremwel pwe Sapwellime doadoahko wiawiher nin duwen koasondi sarawi me E ketin ketkidahr.
Presiden Russell M. Nelson
Wiepen doadoahk en kasarawi wet kahluwahdo pilemen soukohp me malipilipda sarawi. Ni en Presiden Monson eh wia emen towe keieu kaselel pohn sampa, Presiden Nelson pil pahn duwehte. Ohlo onopadahr mehlel oh alehier kaweid sang Kauno pwehn kaweid kitail nan ansou wet. Kapai mwuledek ehu met en Presiden Russell M. Nelson eh wialahr atail soukohp kehmpoake oh pwerisek—ke ehk-isimen en Presiden en Mwomwohdisoht nan irair en keimwseklahn mwehi wet.
Presiden Nelson wia ohl kaselel men. I anehkiher ansou mwahu en iang ih papah nan Pwihn en Ehkriemeno ni eh wia presiden en pwihno daulier sounpar riau. Se seiloak penehier oh I kepingahla uwen eh roson. Aramas anahne seimek pwehn kak patpatehng ih. E seiloaklahngehr wehi 133 nan ah mour.
E kin patehng koaros me pwulepwul oh me mah. E mwoamwen ese aramas koaros oh kin kak tamataman ederail kan. Koaros me ese ih kin pepehm me e kin pwungkin irail. Oh ih duwe met ong emenemen kitail—pwehki e poakehng oh nsenohki mehlel aramas koaros.
Me I esehkihla Presiden Nelson wiawihte nan doadoahk sarawi kan. Ahpw I pil ese duwen pwukoa doadoahk me Presiden Nelson ahneki mwohn eh malipilipda en wiahla emen Kaun Lapalap. Ni en me tohto kumwail ese, Presiden Nelson wia emen semen en koadohki mohngiong me ndand nan sampa oh, ni eh tapiada ah pwukoahu, e wia emen me tepin doadoahngki mesihn me kin kamwakid mohngiong oh ngolngol. E iang pwihn en roprop ehu me elehda tepin koadohk en mohngiong en aramas momour men me kahdanki open-heart operation nan 1951. Presiden Nelson koadoahki mohngiong en Presiden Spencer W. Kimball mwohnte en Presiden Kimball eh wiahla atail soukohp.
Oh en Presiden Nelson eh malipilip ong Ehkriemeno sounpar 34 samwalahro me katokehdi pwukoa semen kesempwal ehu nan palien wini me kin kakehlakahda, kamwahula mohngiong kan oh tapiada pwukoa en Wahnparon me uhd kin kakehlakahla oh kamwahula mohngiong en kid en aramas kei me pwekpwekdahr oh kehlailda sang ni eh koasoi oh papah marain oh limpoak.
Ehu Mohngiong Duwehte Krais
Ni ei kin medewe ehu mohngion me duwehte mohngiong en Krais nan mwekmwekid en rahn akan, I kin kilang Presiden Nelson. I saikinte tuhwong aramas emen me kasalehda soahng wet me laudsang ih. E wiahier iren kasukuhl mwahu ehu ong ie ni ei kin mwasmwasahn ohl menet eh kin kasalehda mohngiong en Krais.
Mwurinte ei malipilipehng Ehkriemeno nan Oaktohpe 2015, I ahneki ansou mwahu en kadehde mwahu pwukoa semen kesempwal me Presiden Nelson ahneki mahso, I lukehng en iang ehu doadoahk wasa me ohlo alehdi kisakis en pweida nan koadohk en mohngiong. Ni ahi pidelongala wasao, I pwuriamweikihla ahi kilang diren semen kei me pokonpenehr pwehn wauneki oh pohnese doadoahk me Presiden Nelson wiadahr sounpar kei mwowe ansou me e wia toahkte en pwal men.
Ni soutiko, semen tohto me kesihnenda oh kasalehda arail wahu oh kepinga doadoahk kaselel me Presiden Nelson wiadahr nan ah pwukoa doadoahk nan pali en wini. Uwen lingan en emenemen arail kasansalda me kawehwe songosongen pweida kan me Presiden Nelson wiadahr, I pil dahkihla koasoi me ohl mwomwohd limwahio nda. E sohte ese ihs ngehi ahpw e ese Presiden Nelson, ansou me Dr. Nelson kakaun prokrahm en koadoahki nan mwaramwar en aramas nan ehu sukuhl en palien wini nan 1955.
Ohlo wia nein Presiden Nelson tohn sukuhl en mahs. E katamanda ire tohto. Me keieu kapwuriamwei iei ah kawehwe mwoamwen en Presiden Nelson ah sounpadahk, ohlo nda, ihme Presiden Nelson nohn adamwahuki. Ohlo kawehweh me pali laud en ah kasukuhl en koadoahki mohngiong wiawi nan wasahn koadoahki aramas. Wasao, tohn sukuhl kan kin kilang oh koadoahki aramas pahn kaweid en sounpadahk, nin duwen wasahn kasukuhl en doadoahk. Ohlo koasoia me en ekei sounpadahngko arail kasukuhl wasao kin liseliping, mwoamwen akedei, katoutou oh pil kin aklapalap. Ohlo kawehwe me wasao wia wasa apwal, ekei ansou kasaroh. Kahrehda tohn sukuhlko kin medemedewe me arail kasukuhl sohte pahn pweida.
Ih eri kawehweh dahme kin wiawi wasao ansou me Presiden Nelson kin wia ah kasukuhl. Wasao kin meleilei, soan oh waun. Wahu laud kin wiawiheng tohn sukuhl kan. Ahpw, mwurin ehu wiepen koadoahk kin kawehwehier, Dr. Nelson kin kasik me tohn sukuhl kan pahn wia uwen arail kak koaros. Ohlo pil kawehwe uwen totohn toahktehn koadoahk mohngiong keieu kaselel kan me alehdi arail kasukuhl sang Dr. Nelson nan ah perehn koadoahko.
Mewet sohte kapwuriamwei ih ie. Met iei dahme I pehmehr, pil kilangehr, oh alehki kapai mwuledek sang nan Pwihn en Ehkriemeno. I pepehm me likamwete, ngehi emen nah “tohn sukuhl ko.”
Presiden Nelson ahneki ehu wiepen kasukuhl kaselel oh kin kapwungala sapwung ni mwoamw mwahu, waun oh kaperen. Iei ih me kin kasalehda mohngiong me duwehte Krais oh ehu karasaras ong kitail koaros. Pwehki ih, kitail ese me nan mwekid koaros me kitail kin loieng, atail wiewia oh mohngiong kak idawehn koasondi kan en rongamwahu en Sises Krais.
Met kitail ahneki kapai laud ehu ni atail utungada soukohp, Presiden Russell M. Nelson. Erein ah momour e kadaialahr ah pwukoa tohto kan me iangahki tohn sukuhl, pahpa, sounpadahk, ohl pwopwoud, toahkte, kaun en prihsduhd, pahpakahlap, oh Wahnparon. E kapwaiadahr pwukoa pwukat sang mahs—oh wiewiahte—ki mohngiong en soukohp men.
Riei ohl oh lih akan, dahme kitail kadehdeier oh iang towehda rahnwet, ehu kapokon sarawi, elehieng ien kadehde me Presiden Russell M. Nelson wia sapwellimen Kauno meninkedehr ong aramas koaros. I pil kapatahieng ahi kadehdeki Koht Sahm, Sises Krais oh Sapwellime pwukoa en Sounkomour oh Soundor. Ni mwaren Sises Krais, amen.