Ewe Pochokunen ewe Pristut
Naponon angangen ewe pristut mi pin a nonom reom a fokkun auchea me non an ewe Samon we angang non om famini me non wisom me non Mwichefen.
Pwi achengicheng, sia rongorong ekkewe porousen pwarata seni Preseten Russell M. Nelson. Sia rongorong ekkewe auchean awewe seni Elter Christofferson me Rasband me Preseten Eyring. Unusen ekkei afanafan nepwinei, naponon seni Preseten Nelson, a apachata ekkoch mettoch mi unusen auchea usun met ami, noun ewe Samon kewe souemwen me ekkewe pristut, ikkei ekkewe sokkun angangen wisom kopwe fori. Ne aninis, upwe aiti ngonuk ekkoch nongonongen ewe kapas allim anongonong won ewe pristut ka komoch.
I. Ewe Pristut
Ewe Pristut seni Melchizedek iei ewe mumuta seni Kot an epwe aponueta are awesi An angang an epwe esenipato ewe manau ese much ngeni aramas meinisin (Moses 1:39). Non 1829, ewe fansoun Joseph Smith me Oliver Cowdery ra angei ewe pristut seni noun ewe Samon kewe Aposel Peter, James, me John (nengeniD&C 27:12). A fokkun pin me pochokun nap seni ach tufichin awewei.
Ekkewe kien ewe pristut ra fokkun pochokun fan emwenin angangen me mumutan ewe pristut. Usun chok, nupwen ekkewe Aposel ra ngeni Joseph me Oliver ewe Pristut seni Melchizedek, rapwan ngenir ekkewe kii ren sokkun ar repwe aea (nengeni D&C 27:12–13). Nge esapw meinisin ekkewe kii ra ngenir non chok na fansoun. Ekkoch ekkewe kii me tipachem a fich ren ei kinikinin fansoun mi unusoch (D&C 128:18) ra kawor ekis me ekis (uwekisin 21). Mwirin fisu ier ekkewe ekkoch kii ra katou me non ewe Tempel Kirtland (nengeni D&C 110:11–16). Ekkei kii ra katou faniten ewe mumutan pristut fan asengesin ei angang a kefinita, ren ewe paptais fan iten ekkewe mi mano.
Ewe Pristut seni Melchizedek esapw eu it are eu kapas. Pwe eu pochokun mi pin a wor non nukunuk ren angangen ekkewe efeioch an Kot angang ngeni Noun aramas. Sipwe fokkun chechemeni pwe ekkewe mwan ra komoch ei pristut esapw ir “ewe pristut.” Ese fokkun och ar repwe awewe ngeni “ewe pristut me ekkewe fefin.” Sipwe awewe ngeni “ekkewe ra komoch ewe pristut me ekkewe fefin.”
II. Eu Mwichen Aninis
Iei sipwe ekieki met ewe Samon Jises Kraist a mochen ren ekkewe ra komoch An we pristut an epwe ifa usun ach sipwe uweiato ren Ii ekkewe ngun.
Preseten Josseph F. Smith a apasa: “Pwe a fen afat pwe ei Mwichefen mi for non unusoch. Eu chok mettoch mi chiwen osukosuka ei mwich ese wor tumunochun me ekiekochun auchean ekkewe wis ren emon me emon. Nupwen repwe fokkun aponueta met mi auchea ngenir, iwe epwe unusoch wiser kewe ren nukuchar, me ewe angang an ewe Samon epwe fokkun pochokun me manaman me chouno non unusen fonufan.”1
Preseten Smith a pwan apasa:
“Ekkewe iten wis mi pin minne Kot a ngeni kich … fiti fengen me ekkewe ekkoch kinikin non me kokotun ewe Pristut mi Pin, sise tongeni aea are awewe ngeni ekkewe it mi kawor seni aramas; esapw minen ening me esapw minen eingeing, pwe eu mettoch sipwe fori ren angangen tipetekison non ewe angang mine an ewe Masta ewe sia mochen sipwe angang ngeni. …
“… Sia angang faniten manauen ekkewe ngun, me sipwe mefi me ekieki pwe iei eu angang amen fokkun murino ngeni kich. Nengeni, sipwe fokkun mwasangasang ne fangeta mettoch meinisin, ika mi tufich, ren ewe tongen Kot, ewe manau ese much ngeni aramas, me ewe angangen ewe muun Kot won fonufan.”2
III. Ekkewe Kinikinin ewe Pristut.
Non an ewe Samon we Mwichefen, ekkewe kinikin non ewe Pristut seni Melchizedek mi sokono wiser ika ar angang. Ewe Doctrine and Covenant a awewe ngeni Pris mi Nap ewe a preseten ika chon nemeni unusen ekkewe steik (D&C 124:134). A awewei pwe ekkewe elters ra wisen chon angang non an ewe Samon we mwichefen (D&C 124:137)). Ikkei ekkoch nesen won ei kinikinin angang.
Emon pris mi nap a nemenem me angang non pekin ngun (nengeni D&C 107:10, 12). Pwan, usun Preseten Joseph F. Smith a apasa, “nupwen emon afen kefin ngeni pris mi nap, [ii] a fokkun auchea an epwe mefi pwe ii a kefinita … pwe epwe emon chon nenien apiru ngeni ekkewe mwan me anuon pwe mi nimenimoch, me epwe ekieki pwe epwe emon sense non nukuchar, esapw ren chok asukun pwe naponon eu nenien apiru mi murino—epwe pwarano ngeni ekkewe anuon ra komoch ewe pristut pwe repwe kuna ukukun met a fori, me winiti chon pochokun ikewe ie a nonom ie.”3
Non wisen emon elter, Elter Bruce R. McConkie seni ewe Mwichen Engon me Ruemon Aposel a apasa: “Emon Elter chon afanafan fan iten ewe Samon Jises Kraist. … A anuku ngeni an epwe awesi wisan we me pwarata noun we Masta … non an afanafan ngeni ekkewe aramas. Ii noun ewe Samon chon angang.”4
Elter McConkie a apasa pwe ese och ewe ekiek pwe emon ekkkewe pristut ii “emon chok elter.” “Meinisin elter non ewe Mwichefen a wor rer ewe pristut usun chok ewe Presetenin ewe Mwichefen … ,” a apasa. Met emon elter? Emon chon masen siip, ewe a tumunu ekkewe siip ikewe a wor ian siip emon noun ewe Chon Masen Siip mi Murino.”5
Non ei auchean angang ne afanafan nein ekkei siip ren ewe Chon Masen Siip mi Murino, ese wor sokofesen nefinen ekkewe kinikin me pris mi nap me elter non ewe Pristut seni Melchizedek. Non ewe sopun 107 me non ewe Doctrine and Covenant, ewe Samon a apasa, Pris mi Nap fan nemenien ewe Pristut seni Melchizedek mi wor ar repwe wisen chon nemeni wiser kewe, fan emwenien ewe presetensi, ren angangen pekin ngun, me pwan non ewe kinikinin elter ika eu me eu nein ekkewe kinikin me non ewe Pristut seni Aaron (D&C 107:10; pwan nengeni uwekisin12).
Ewe akouchean nongonong ngeni meinisin ekkewe chon komoch ewe pristut ewe nongonong sia kaeo seni ewe soufos Jacob non ewe Puken Mormon. Mwirin Jacob me pwin we Joseph ra efeioch ngeni pris me sensen ekkewe aramas, a apasa: “Iwe am aua apwonueta wiisem ngeni ewe Samon, aua wata wom ewe wiis, aua ponueni tipisin ekkewe aramas won pwisin mokurem ika am ause aitir ewe kapasen Kot fiti unusen achocho” (Jacob 1:19).
Pwii Achengicheng, wisach chon komoch ewe pristut a fokkun auchea seni meinisin. Ekkoch mwichefen ra tongeni pwapwa ren angangen fonufan non ar afanafan me foforun ar angang. Nge kich ekkewe sia komoch ewe pristut an Kot mi wor rech ewe manaman minne a nemeni ewe asamen ewe muun celestial ika muun akar. Mi wor rech popun me wisach ewe Samon afen awewetiw me pwarata nepoputan ewe Doctrine and Covenants. Sipwe pwarata ngeni fonufan:
Pwe meinisin aramas repwe kapas non iten ewe Kot ewe Samon, me ewe Chon Amanauen ei fonufan;
Pwe sipwe awatteno an aramas nuku;
Pwe An we pwon ese much epwe kauta;
Ewe unusochun An we kapas allim epwe chou seni ekkewe mi apwangapwang me mecheres non unusen fonufan (D&C 1:20–23).
Ren ach sipwe aponueta ei wis, sipwe fokkun nukuchar me “anapano” wisach non pristut me wisach kewe (nengeni D&C 84:33). Elter Harold B. Lee a awewetiw met wewen naponon ewe pristut: “Nupwen emon epwe komoch ewe pristut, a pwan winiti emon noun ewe Samon chon angang. Epwe fokkun ekieki usun wisan pwe ii emon chon angang fan iten ewe Samon. Ina met wewen an epwe napono ika ponueta ewe pristut.”6
Iwe ami, pwii achengicheng, ika ewe Samon a pwisin tingoreok won inisin om kopwe anisi emon Noun kewe at me nengin—usun met mi fori ngeni Noun kewe chon angang—kopwe fori? Me ika ke fori, kopwe fori usun en emon Noun chon angang, “non an ewe Samon angang” anongonong won An kewe aninis mi pwon?
Preseten Lee mi pwan wor eu an asukun usun naponon me ponuetan ewe pristut: “Nupwen kopwe komoch eu kinas mi wateno mettoch non ngeni och mettoch a tongeni anapano ena mettoch nap seni om kopwe kuna; ina ewe kinas mi watte mettoch non. Iei … ika emon a anapano an we pristut—ina, epwe watteno nap seni met a ekieki me mwan me auchean met emon a ekieki me mwan—ina anen om kopwe anapano om we pristut.”7
Iei eu awewe ren emon pristut a anapano wisan ren pristut. Ua rong seni Elter Jeffrey D. Erekson, chiechiei me non ewe mwichen steik non Idaho. Emon anuon a keran chok pupunu, a ekieki pwe ese chiwen tufichin an epwe awesano an uwe saingonon ierin sukun non college, Jeffrey a finata pwe epwene tou seni an we sukun me fiti ewe angang mi suk. Mwirin fitu ran noun we presetenin pristut a wareiti non imwan we. Iwe ewe preseten a eisini “En mi weweiti usun auchean ei kii a nonom rei?” Nupwen Jeffrey a apasa ewer, ewe preseten a apasa ngeni ii nupwen ua rong wewen om ka tou seni sukun, ewe Samon a apasa ngeni ei non ai anut pwe upwe ereni Jeffrey ei porous: “Pwe ngang noum presetenin ewe mwichen elter, upwe pesei ngonuk pwe kosapw tou seni sukun. Ina ena porous ngonuk seni ewe Samon.” Jeffrey a sopweno an sukun. Mwirin fitu ier ua churi nupwen a emon sou pisnis mi murino me rongorong an apasa ngeni eu mwichen pristut, “Pwe ewe [kapasen pesepes] a fokkun ekesiwini manauan.”
Emon a komoch ewe pristut a anapano an pristut me wisan, a forata “watten sokonon” non manauen emon noun Kot semirit.
IV. Pristut non Famini
Tori iei, ua chok kakapas usun popun me auchean ewe pristut me non ewe Mwichefen. Iei upwene kapas usun auchean pristut non famini. Upwe poputa won ekkewe ki. Ewe nongonong ren ewe manaman me pochokun ren ewe pristut a chok tongeni fis fan emwenien ewe emon mine a komoch ekkewe kien ekkewe angang me non Mwichefen nge ese pwan tongeni an epwe pwan usun ewe manamanen pristut me non famini.8 Emon semenap mine a komoch ewe pristut a wisen nemeni an we famini seni manamanen ewe pristut mi nonom ren. A pwan namot an epwe angei an mumuta ren kien ewe pristut an epwe kapasen pesepes ngeni chon an we famini, fori mwichen famini, efeiochu punuan me noun, ika efeiochu ngeni chon an we famini are ekkoch ewe efeiochun echikara.
Ika semenap ra anapano ar kewe pristut me non ar kewe famini, a fokkun anisi fefeitan ewe angangen mwichefen ren ukukun met ar tongeni. Semenap ekkewe oua komoch ewe Pristut seni Melchizedek repwe aneasosichi ekkewe annuk pwe epwe wor rer ewe pochokun me manamanen ewe pristut ar repwe efeiochu chochon ar kewe famini. Semenap repwe pwan anapano ar tong non ar kewe famini pwe chon ar kewe famini repwe mochen tingor ngenir ren efeioch. Semenap me inenap repwe anapano ar angangen efeiochun pristut me non ar kewe famini.
Semenap, wiser epwe “taitap” ngeni punuer kewe, usun met ewe famini taropwen esinesin ngeni fonufan a aiti ngeni kich.9 Me, semenap, nupwen a wor fansoun om kopwe fori ewe angangen mumutan pristut, kopwe fori ren angang murino, engino, kirekiroch, me tipetekison, me tong ennet (D&C 121:41). Ina ewe amen auchea ren ewe angangen pristut a auchea me non ewe famini. Preseten Harold B. Lee a watiw ei pwon mwirin chok an we kefinita pwe epwe emon presetenin ei Mwichefen: “Ese wor fansoun nupwen ewe manamanen pristut, ka komoch, akon wesen murino nap seni nupwen a wor eu osukosuk non imwom, eu watten semwen, ika ekkoch sokkun mettoch ka finata. … A ponueta ren pochokunen ewe pristut, ewe pochokun an ewe Kot mi Tekia, ewe a pochokun ne fori manaman non an ewe Samon angang, nge anen ach sipwe aea ena pristut, sipwe nimenimoch ach sipwe anganga. Ika pwe sise weweiti ei nongonong iwe sise pwan tongeni angei ekkewe feioch ren ekkewe ra komoch ei murinon pristut.”10
Pwii Achengicheng, naponon angangen ewe pristut mi pin a nonom reom a fokkun auchea me non an ewe Samon we angang me non om famini me non wisom me non Mwichefen.
Ua pwarata usun Ii ewe mine an ewe pristut. Seni An we achasefan fangono manauan me riafou me manau sefan, meinisin mwan me fefin ra tongeni manausefan me ani ewe manau ese much. Kich meinisin sipwe nuku me nikitu ne fori wisach non ei angang an Kot ewe Sam mi Napanap, non iten Jises Kraist, amen.