Ang Gahum sang Priesthood

Ang Melchizedek Priesthood amo ang balaan nga awtoridad nga gintugyan sang Dios sa tawo agud matuman ang Iya buluhaton “nga ipahanabo ang … wala’y katapusan nga kabuhi sang tawo” (Moises 1:39). Sang 1829, ginhatag ini kay Joseph Smith kag Oliver Cowdery sang mga Apostoles sang Manluluwas nga sanday Pedro, Santiago, kag Juan (tan-awa sa D&C 27:12). Sagrado ini kag mabaskog labaw pa sa aton ikasarang sa paglaragway.

Ang mga yabi sang priesthood amo ang mga gahum sa pagdumala sang paggamit sang awtoridad sang priesthood. Gani, sang ginhatag sang mga Apostoles ang Melchizedek Priesthood kay Joseph kag Oliver, ginhatag man nila ang mga yabi agud dumalahan ang paggamit sini (tan-awa sa D&C 27:12–13). Pero indi tanan nga mga yabi sang priesthood ang ginhatag sadto nga tion. Ang kabilugan sang mga yabi kag ihibalo nga kinahanglanon para sa sining “dispensasyon sang kabug-osan sang panahon” (D&C 128:18) ginhatag “linya sa linya” (bersikulo 21). Ang dugang nga mga yabi ginhatag sa Templo sang Kirtland pagligad sang pito ka tuig (tan-awa sa D&C 110:11–16). Ining mga yabi ginhatag agud dumalahan ang awtoridad sang priesthood sa dugang pa nga mga hilimuon nga ginahatag sa amo nga tion, pareho sang pagbunyag sang minatay.

Ang Melchizedek Priesthood indi isa ka estado ukon titulo. Isa ini ka balaan nga gahum nga ginsalig sa tawo agud gamiton sa buluhaton sang Dios para sa Iya mga anak. Dapat naton panumdumon pirme nga ang mga lalaki nga nagakapot sang priesthood indi “ang priesthood.” Indi husto nga tawgon “ang priesthood kag ang kababayin-an.” Dapat naton tawgon “ang mga nagakapot sang priesthood kag ang kababayin-an.”

Padaluman naton kon ano ang ginapaabot sang Ginuong Jesucristo sa mga nagakapot sang Iya priesthood—kon paano naton dalhon ang mga kalag sa Iya.

Si Pangulong Joseph F. Smith nagtudlo: “Matuod ang ginasiling nga ang Simbahan perpekto ang pagkapasad. Ang problema lamang amo nga ining mga organisasyon kulang pa ang ihibalo sa mga obligasyon nga ginapaabot sa ila. Kon lubos nila nga mahibal-an ang mga butang nga ginapaabot sa ila, tumanon nila ang ila mga katungdanan sing mas matutom, kag ang buluhaton sang Ginuo mangin mas mabaskog kag mas gamhanan kag mas may impluwensya sa kalibutan.”¹

Si Pangulong Smith nagpaandam man:

“Ang mga hinatag-sang-Dios nga mga titulo sang pagtahod … mahiangot sa pila ka palangakuan kag grupo sa Balaan nga Priesthood, indi dapat gamiton ukon kabigon nga mga titulo nga naghalin sa tawo; indi ini dekorasyon ukon tanda sang pagginahom, kundi tawag sa mapainubuson nga pagserbisyo sa buluhaton sang isa nga Manunudlo nga siling ginaalagaran naton. …

“… Nagapangabudlay kita para sa kaluwasan sang mga kalag, kag dapat mabatyagan naton nga amo ini ang pinakadako nga katungdanan nga ginsalig sa aton. Gani, dapat kita magbatyag nga handa kita magsakripisyo sang tanan, kon kinahanglan, para sa gugma sang Dios, sa kaluwasan sang tawo, kag sang kadalag-an sang ginharian sang Dios sa kalibutan.”²

Sa Simbahan sang Ginuo, ang mga palangakuan sa Melchizedek Priesthood may nagkalain-lain nga buluhaton. Ang Doktrina kag mga Kasugtanan nagatawag sa mga high priest bilang“mga pangulo ukon alagad sa nagkalain-lain nga stake nga nagalinapta sa gwa” (D&C 124:134). Nagatumod ini sa mga elder nga “mga ministro sa simbahan [sang Ginuo]” (D&C 124:137). Yari ang iban pa nga mga pinanudlo parte sining separado nga mga buluhaton.

Ang high priest nagapamuno kag nagahikot sa espirituhanon nga mga butang (tan-awa sa D&C 107:10, 12). Si Pangulong Joseph F. Smith natudlo man, “Mientras tanto nga gin-ordinan sia nga high priest, dapat [sia] makabatyag nga sia obligado … sa pagpakita sang halimbawa sa mga hamtong kag lamharon nga bagay sundon, kag iplastar ang iya kaugalingon sa posisyon nga mangin manunudlo sang pagkamatarong, indi lamang sa pulong kundi ilabi na gid sa buhat—nga nagahatag sa mga lamharon nga nagakapot sang priesthood sang benepisyo sang eksperiyensya sang mga hamtong, kag gani mangin sa iya kaugalingon isa ka gahum sa tunga sa komunidad nga iya ginapuy-an.”³

Parte sa mga katungdanan sang elder, si Elder Bruce R. McConkie sang Korum sang Napulo’g Duha ka mga Apostoles nagtudlo: “Ang elder isa ka ministro sang Ginuong Jesucristo. … Ginsugo sia nga magtindog sa lugar kag tal-os sang iya Manunudlo … sa pagpangalagad sa iya isigkatawo. Sia ang tiglawas sang Ginuo.”⁴

Si Elder McConkie nagsaway sang ideya nga ang nagakapot sang priesthood “isa lamang ka elder.” “Ang tagsa ka elder sa Simbahan nagakapot sang pareho nga priesthood sa Pangulo sang Simbahan … ,” siling niya. “Ano ang elder? Isa sia ka bakero, bakero nga nagaalagad sa panong sang Maayong Manugpahalab.”⁵

Sa sining importante nga katungdanan sang pagpangalagad sa panong sang Maayong Manugpahalab, wala sang kinalain sa tunga sang mga palangakuan sang high priest kag elder sa Melchizedek Priesthood. Sa halangdon nga seksyon 107 sang Doktrina kag mga Kasugtanan, ang Ginuo nagpahayag, “Ang mga high priest sa idalom sang Melchizedek Priesthood may kinamatarong nga maghikot sa ila kaugalingon nga palangakuan, sa idalom sang direksyon sang panguluhan, sa pagdumala sang espirituhanon nga mga butang, kag subong man sa palangakuan sang elder [ukon mga palangakuan sa Aaronic Priesthood]” (D&C 107:10; tan-awa man sa bersikulo 12).

Ang pinakaimportante nga prinsipyo para sa tanan nga nagakapot sang priesthood amo ang prinsipyo nga gintudlo sang propeta sa Libro ni Mormon nga si Jacob. Pagkatapos nga sia kag ang iya utod nga si Joseph ginkonsagrar nga mga pari kag manunudlo sang katawhan, nagsiling sia, “Kag amon ginpadako ang amon palangakuan sa Ginuo, nga nangako sa amon kaugalingon sang responsibilidad, nga nagasabat sang mga sala sang katawhan sa amon kaugalingon nga mga ulo kon wala namon sila pagtudloi sang pulong sang Dios sa bug-os nga kaukod” (Jacob 1:19).

Mga kauturan, ang aton mga responsibilidad bilang mga nagakapot sang priesthood seryoso nga butang. Ang iban nga mga organisasyon malipayon na sa kalibutanon nga talaksan sang binuhatan sa ila pagpamulong-pulong kag pagtuman sang iban pa nga katungdanan. Pero kita nga nagakapot sang priesthood sang Dios may balaan nga gahum nga nagadumala bisan pa sang pagsulod sa selestiyal nga ginharian sang Dios. May katuyuan kita kag responsibilidad nga gin-athag sa ginpahayag nga pauna sa Doktrina kag mga Kasugtanan. Ginapahayag naton sa kalibutan:

“Nga ang tagsa ka tawo sarang maghambal sa ngalan sang Dios nga Ginuo, nga amo ang Manluluwas sang kalibutan;

“Agud nga ang pagtuo magdugang sa duta;

“Agud nga ang akon wala’y katapusan nga kasugtanan mapahamtang;

“Agud nga ang kabug-osan sang akon ebanghelyo maproklamar sang mga mahuyang kag sang mga simple sa mga punta sang kalibutan” (D&C 1:20–23).

Agud matuman ang ining balaan nga sugo, kinahanglan kita mangin matutom sa “pagpadako” sang aton mga calling kag responsibilidad sa priesthood (tan-awa sa D&C 84:33). Si Pangulong Harold B. Lee nagpaathag sang kahulugan sang pagpadako sang priesthood: “Kon ang isa ka lalaki magakapot sang priesthood, sia mangin tiglawas sang Ginuo. Dapat niya kabigon ang iya calling nga daw yara sia sa buluhaton sang Ginuo. Amo ina ang kahulugan sang pagpadako sang priesthood.”⁶

Gani, mga kauturan, kon ang Ginuo Mismo ang magpangabay sa inyo nga buligan ang isa sa Iya mga anak—nga ginhimo na Niya sa Iya mga alagad—himuon ninyo bala? Kag kon himuon ninyo, maga-akto bala kamo bilang Iya nga tiglawas, “nga yara sa buluhaton sang Ginuo,” nga nagasalig sa iya ginpangako nga bulig?

Si Pangulong Lee may isa pa nga gintudlo parte sa pagpadako sang priesthood: “Kon kaptan mo ang isa ka lente sa ibabaw sang isa ka bagay ginapadako sini tulukon inang bagay sangsa kon tulukon mo lamang ini sang imo mata; amo ina ang lente. Karon, … kon ang bisan sin-o magpadako sang ila priesthood—buot silingon, padakuon ini sangsa ila pagdahom kag mas importante sangsa pagdahom sang bisan sin-o—amo ina ang paagi agud padakuon ninyo ang inyo priesthood.”⁷

Yari ang isa ka halimbawa sang isa ka nagakapot sang priesthood nga nagapadako sang iya priesthood. Nabatian ko ini halin kay Elder Jeffrey D. Erekson, ang akon kaupod sa isa ka komperensya sa stake sa Idaho. Bilang isa ka bataon pa nga kasado nga elder, pigado kaayo kag pamatyag niya daw indi makatapos sang katapusan nga tuig sa kolehiyo, si Jeffrey nagdesisyon nga mag-untat kag magbaton sang maayo nga trabaho. Pila ka adlaw ang nagligad nag-abot ang pangulo sang ila elders quorum sa iya balay. “Naintiendihan mo bala ang kaimportante sang mga yabi sang priesthood nga akon ginakaptan?” ginpamangkot sang pangulo sang elders quorum. Sang nagsabat si Jeffrey nga huo, ginhambalan sia sang pangulo nga pagkabati niya nga tuyo niya nga mag-untat sa pag-eskwela, gintublag sia sang Ginuo sa iya katulugon agud ipalab-ot kay Jeffrey ang ini nga mensahe: “Bilang imo pangulo sa elders quorum, ginalaygayan ko ikaw nga indi mag-untat sa pag-eskwela. Amo ina ang mensahe sa imo sang Ginuo.” Nagpadayon si Jeffrey sa pag-eskwela. Pila ka tuig ang nagligad nakita ko sia nga isa na ka madinalag-on nga negosyante kag nabatian sia nga nagasiling sa tagpalamati nga mga nagakapot sang priesthood, “Ang [laygay] nga ato ang naghimo sang kinalain sa akon kabuhi.”

Isa ka nagakapot sang priesthood ang nagpadako sang iya priesthood kag calling, kag amo yadto ang naghimo “sang kinalain” sa kabuhi sang isa pa ka anak sang Dios.

Tubtob karon, nagahambal ako pirme parte sa mga buluhaton sang priesthood sa Simbahan. Subong magahambal ako parte sa priesthood sa pamilya. Magasugod ako sa mga yabi. Ang prinsipyo nga ang awtoridad sang priesthood magamit lamang sa direksyon sang nagakapot sang mga yabi para sa sina nga buluhaton tig-una sa Simbahan pero wala nagasakop sang paggamit sang awtoridad sang priesthood sa pamilya.⁸ Ang isa ka amay nga nagakapot sang priesthood nagapamuno sa iya pamilya paagi sa awtoridad sang priesthood nga iya ginakaptan. Indi niya kinahanglan sang direksyon ukon pahanugot sang mga yabi sang priesthood para laygayan ang mga miyembro sang iya pamilya, magmiting sa panimalay, maghatag sang bendisyon sang priesthood sa iya asawa kag kabataan, ukon magpang-ayo sa mga miyembro sang pamilya ukon sa iban.

Litrato

Pamilya nga nagatuon sing ululupod

Kon padakuon sang mga amay ang ila priesthood sa ila mismo pamilya, mas pauswagon pa gid sini ang misyon sang Simbahan sangsa iban nga ila himuon. Ang mga amay nga nagakapot sang Melchizedek Priesthood dapat magtuman sang mga kasuguan agud maangkon nila ang gahum sang priesthood nga maghatag sang bendisyon sa mga miyembro sa ila pamilya. Ang mga amay dapat man magkultibar sang pagpalanggaanay sa pamilya agud maluyag sila magpangayo sang bendisyon gikan sa ila mga amay. Kag ang mga ginikanan dapat magpaisog sang mas madamo nga bendisyon sang priesthood sa pamilya.

Litrato

Bendisyon sang priesthood

Mga amay, maggiho bilang “alangay nga magkatuwang” sang inyo mga asawa, suno sa ginatudlo sa proklamasyon sa pamilya.⁹ Kag, mga amay, kon may pribelihiyo kamo nga gamiton ang gahum kag impluwensya sang inyo awtoridad sa priesthood, himoa ini “paagi sa pagganyat, pagpaumod, kalulo kag pagpailob, kag sa matuod nga gugma” (D&C 121:41). Inang mataas nga talaksan sang paggamit sang awtoridad sang priesthood pinakaimportante sa pamilya. Si Pangulong Harold B. Lee naghatag sining saad pagkatapos gid nga sia nangin Pangulo sang Simbahan: “Wala gid ang gahum sang priesthood, nga inyo ginakaptan, nangin mas makatilingala sangsa tion sang krisis sa inyo puluy-an, sa malubha nga masakit, ukon dako nga desisyon nga pagahimuon. … Upod sa gahum sang priesthood, nga amo ang gahum sang Makagagahum nga Dios, amo ang gahum sa paghikot sang mga milagro kon but-on sang Ginuo, pero agud magamit naton ang inang priesthood, dapat angayan kita sa paggamit sini. Ang kapaslawan sa paghangop sini nga prinsipyo amo ang kapaslawan sa pagbaton sang mga bugay sang pagkapot sinang halangdon nga priesthood.”¹⁰

Pinalangga kong mga kauturan, ang pagpadako sang balaan nga priesthood nga inyo ginakaptan importante sa buluhaton sang Ginuo sa inyo mga pamilya kag sa inyo mga calling sa Simbahan.

Nagasaksi ako sa Iya nga tag-iya sang priesthood. Paagi sa iya nagapasag-uli nga pag-antos kag sakripisyo kag pagkabanhaw, ang tanan nga tawo may kasiguruhan sang pagkaimortal kag sang oportunidad sa kabuhi nga wala’y katapusan. Ang tagsa sa aton dapat mangin matinuohon kag matutom sa paghimo sang aton bahin sa sining dako nga hilikuton sang Dios ang aton Wala’y Katapusan nga Amay, sa ngalan ni Jesucristo, amen.