Dagiti Bileg ti Priesthood

Ti Melchizedek Priesthood ti nadiosan a turay nga indutok ti Dios a mangileppas iti aramidna“a mangipatungpal iti … agnanayon a biag ti tao” (Moises 1:39). Idi 1829, nai-confer daytoy kada Joseph Smith ken Oliver Cowdery dagiti Apostol ti Apo a da Pedro, Santiago, ken Juan (kitaen iti DkK 27:12). Sagrado ken nabileg daytoy iti labes iti bilegtayo tapno iladawan.

Dagiti tulbek ti priesthood ket bileg a mangiturong iti panangusar iti priesthood authority. Iti kasta, idi i-confer dagiti Apostol ti Melchizedek Priesthood kada Joseph ken Oliver, inikkanda pay ida kadagiti tulbek a mangiturong iti pannakaaramatna (kitaen iti DkK 27:12–13). Ngem di nai-confer amin a tulbek ti priesthood ‘ti dayta a panawen. Naited ti amin a tulbek ken pannakaammo a kasapulan itoy “dispensasion ti pannakatungpal dagiti panawen” (DkK 128:18) iti “tunggal binatog” (bersikulo 21). Naited dagiti nayon a tulbek iti Kirtland Temple kalpasan ti pito a tawen (kitaen iti DkK 110:11–16). Naited dagitoy a tulbek a mangiturong iti priesthood authority kas nayon nga aramiden a naited dayta a kanito, kas panagbuniag iti natay.

Ti Melchizedek Priesthood saan a kasasaad wenno marka. Daytoy ti nadiosan a bileg nga iggem iti panagtalek nga usaren para iiti pagimbagan iti aramid ti Dios para iti annakna. Nasken a laglagipentayo a dagiti lallaki nga addaan iti priesthood ket saan a “ti priesthood.” Saan nga umno nga ibasar iti “ti priesthood ken dagiti babbai.” Nasken nga ibasartayo iti “dagiti addaan iti priesthood ken dagiti babbai.”

Ita ibilangtayo no ania ti namnamaen ti Apo a Jesucristo manipud kadagiti addaan iti priesthood—a nasken a mangyegtayo iti kararua Kenkuana.

Insuro ni President Joseph F. Smith: “Pudno a nakuna a naan-anay a nabukel ti Simbaan. Ti laeng parikut ket saan a naan-anay nga ammo dagitoy nga organisasion dagiti obligasion a namnamaen kadakuada. No agbalinda a naan-anay a mariing kadagiti kasapulan a naaramid kadakuada, napudpudno a tungpalendanto dagiti pagrebbenganda, ket ti aramid ti Apo agbalinto a napigpigsa ken nabilbileg iti lubong.”¹

Imballaag pay ni President Smith:

“Dagiti inted ti Dios a titulo ti dayaw … a mainaig iti adu a saad ken urnos ti Nasantuan a Priesthood, ket di koma mausar wenno maibilang a titulo a pinataud ti tao; dida pangpapintas wenno pangipeksa iti mastership, no di panangdutok iti nanumo a serbisio iti aramid ti maysa a Maestro nga umako nga agserbi. …

“… Agbannogtayo para iti pannakaisalakan dagiti kararua, ket mariknatayo koma a daytoy ti kaindaklan a pagrebbengan a naitalek kadatayo. Ngarud, naayattayo koma a mangisakripisio iti amin a banag, no kasapulan, gapu iti ayat ti Dios, iti pannakaisalakan dagiti tao, ken ti panagballigi ken ti pagarian ti Dios iti rabaw ti daga.”²

Iti Simbaan ti Apo, dagiti takem ti Melchizedek Priesthood agduduma iti pagrebbenganda. Itudo ti Doktrina ken Katulagan kadagiti high priest kas “matudingan a presidente wenno katulongan iti nadumaduma nga stake a naiwaras iti ganggannaet” (DkK 124:134). Maitudo kadagiti elder kas “agpapaay a ministro iti simbaan [ti Apo]” (DkK 124:137). Dagitoy ti dadduma pay a pannursuro kadagitoy nagsisina a pagrebbengan.

Ti high priest ti mangimaton ken mangannong kadagiti naespirituan a banag (kitaen iti DkK 107:10, 12). Insuro ni President Joseph F. Smith, “No la ketdi naordenan a high priest, nasken a marikna[na] nga agrebbeng … a mangipakita iti pagwadan iti sango ti nataengan ken ubing a maikari a tuladen, ken ikabilna ti bagina iti saad nga agbalin a mannursuro ti kinalinteg, di laeng babaen ti pammilin no di ketdi nangnangruna pay a babaen ti pagwadan—a mangted iti ubbing iti pagimbagan ti padas ti edad, ket iti kasta agbalin a bileg iti tengnga ti purok a pagnaedanna.”³

Maipapan kadagiti rebbengen ti elder, insuro ni Elder Bruce R. McConkie ti Korum ti Sangapulo-ket-dua: “Ti Elder ket ministro ni Apo Jesucristo. … Naawagan a mangipatungpal iti obligasion ken mangibagi iti Apona … iti panagserbi iti padana a tattao. Isu ti mangibagi iti Apo.”⁴

Dinillaw ni Elder McConkie ti ideya a ti maysa ket “elder laeng.” “Tunggal elder iti Simbaan addaan iti adu a priesthood kapada ti Presidente ti Simbaan … ,” kinunana. “Ania ti elder? Isu ti pastor, pastor nga agserserbi iti pagapunan ti Naimbag a Pastor.”⁵

Iti daytoy napateg a pagrebbengan nga agserbi iti pagapunan ti Naimbag a Pastor, awan ti paggidiatan dagiti takem ti high priest ken elder iti Melchizedek Priesthood. Iti dakkel a benneg 107 ti Doktrina ken Katulagan, impakdaar ti Apo, “Adda karbengan dagiti high priest babaen ti urnos ti Melchizedek Priesthood a mangiturong iti pagsaadanda, babaen ti panangimaton ti panguluen, a mangannong kadagiti naespirituan a banag, ken kasta met iti pagakeman ti elder [wenno dagiti takem iti Aaronic Priesthood] (DkK 107:10; kitaen met iti bersikulo 12).

Ti kapatgan a prinsipio para iti amin a priesthood holder ket ti prinsipio nga insuro ti propeta iti Libro ni Mormon a ni Jacob. Kalpasan a nakonsagrar a priest ken mannursuro iti tattao isuna ken ti kabsatna a Joseph, impakdaarna: “Ket impategmi ti takemmi iti Apo, imbaklaymi dagiti pagrebbenganmi, sungbatanmi ti basbasol dagiti tao iti ulomi no dimi insuro kadakuada ti balikas ti Dios iti amin a kinaregta” (Jacob 1:19).

Kakabsat, serioso a banag ti pagrebbengantayo kas priesthood holder. Mabalin a mapnek ti dadduma nga organisasion iti nainlubongan a pagrukodan iti pannakaited ti mensaheda ken panangipatungpal iti dadduma pay pagrebbenganda. Datayo nga addaan iti priesthood ti Dios adda nadiosan a bilegtayo mangituray iti pagserkan iti celestial a pagarian ti Dios. Adda panggep ken pagrebbengantayo nga inlawlawag ti Apo iti naipalgak a pakauna iti Doktrina ken Katulagan. Ipakdaartayo koma iti lubong:

“Tapno mabalin ti tunggal tao ti agsao iti nagan ti Dios nga Apo, nga isu ti Mangisalakan iti lubong;

“Tapno agsaknap met ti pammati iti daga;

“Tapno maipasdek ti agnanayon a katulagak;

“Tapno ipakdaar dagiti nalupoy ken nanumo ti pakabuklan ti ebangheliok agingga kadagiti suli ti lubong” (DkK 1:20–23).

Tapno maipatungpal daytoy nadiosan a rebbengen, napudnotay’ koma a “mangpadakkel” iti calling ken pagrebbengantayo iti priesthood (kitaen iti DkK 84:33). Inlawlawag ni Elder Harold B. Lee ti kayat a sawen ti mangpadakkel iti priesthood: “No ti maysa ket agbalin a holder ti priesthood, agbalin a mangibagi iti Apo. Nasken a panunotenna ti callingna nga adda iti panangibaon ti Apo. Dayta ti kayat a sawen ti mangpadakkel iti priesthood.”⁶

Ngarud,kakabsat, no kiddawen ti Apo Mismo a tulonganyo ti maysa kadagiti annakna—nga inaramidnan babaen dagiti katulonganna—aramidenyo kadi? Ket no inaramidyo, agtignaykayo kadi a mangibagina, “iti panangibaon ti Apo,” nga agpannuray iti tulongna?

Adda sabali pay a pannursuro ni Elder Lee maipapan ti panangpadakkel iti priesthood: “No ipanmo ti magnifying glass iti rabaw ti maysa a banag aramidenna daytoy a dakdakkel ngem ti makita ti matam; dayta ti mangnifying glass. Ita, … no asino man a mangpadakkel iti priesthoodda—dayta ti, mangaramid a dakdakkel daytoy ngem iti immuna nga impagarupda a kastoy ken napatpateg ngem iti impagarup ti asino man—kasta ti panangpadakkelyo iti priesthoodyo.”⁷

Daytoy ti pagwadan ti priesthood holder a mangpadpadakkel iti pagrebbenganna iti priesthood. Nangngegak daytoy ken Jeffrey D. Erekson, ti kaduak iti stake conference iti Idaho. Kas ubing a naasawaan nga elder, napanglaw ken saan a nakalpas iti maudi a tawenna iti kolehio, inkeddeng ni Jeffrey ti agsardeng ket awatenna ti napintas a job offer. Kalpasan ti sumagmamano nga aldaw, napan ti elders quorum president iti balayna. “Maawatam kadi ti pateg dagiti tulbek ti priesthood nga iggemko?” dinamag ti presidente ti elders quorum. Idi wen ti sungbat ni Jeffrey, imbaga kenkuana ti presidente nga idi nadamagna ti panggepna nga agsardeng iti kolehio, kinuna ti Apo kenkuana iti rabii a di nakaturog nga itedna ken Jeffrey daytoy a mensahe: “Kas presidentem iti elders quorum, balakadanka a dika agsardeng iti kolehio. Mensahe dayta kenka a naggapu iti Apo.” Nagtalinaed ni Jeffrey iti eskuela. Kalpasan dagiti tawen nakitak isuna idi maysan isuna a naballigian a negosiante ket nangngegko nga imbagana kadagiti dumdumngeg a priesthood holder. “Dayta a [balakad] ti namagduma iti biagko.”

Pinadakkel ti priesthood holder ti priesthood ken callingna, ket dayta ti “namagduma” iti biag ti maysa pay nga anak ti Dios.

Agingga ita, agsarsaritaak maipanggep kadagiti pagrebbengan ti priesthood iti Simbaan. Ita isaritak maipanggep ti priesthood iti pamilia. Rugiak kadagiti tulbek. Ti prinsipio a maaramat laeng ti priesthood authority babaen ti panangiturong ti maysa nga agig-iggem kadagiti tulbek para iti dayta a pagrebbengan ket napateg iti Simbaan ngem saan a mayaplikar iti panangaramat iti priesthood authority iti pamilia.⁸ Idauluan ti ama nga addaan iti priesthood ti pamiliana babaen ti turay ti priesthood nga iggemna. Dinan kasapulan ti direksion wenno anamong dagiti tulbek ti priesthood a mangbalakad iti miembro ti pamiliana, mangangay iti miting ti pamilia, mangted bendision ti priesthood iti asawa ken annakna, wenno mangted bendision a pangagas kadagiti miembro ti pamilia wenno dadduma pay.

Ladawan

Pamilia nga aggigiddan nga agad-adal

No padakkelen dagiti amma ti priesthoodda iti bukodda a pamilia, makatulong daytoy a mangpadur-as iti mision ti Simbaan kas iti ania man a banag a maaramidda. Nasken dagiti amma a Melchizedek Priesthood hoder nga agtungpal iti bilin tapno maaddaanda iti bileg ti priesthood a mangbendision iti kapamiliada. Nasken pay dagiti amma a mangpadur-as iti naayat a relasion iti pamilia tapno tarigagayan dagiti annak ti agpabendision iti amada. Nasken a yallukoy dagiti nagannak ti adu pay a bendision ti priesthood iti pamilia.

Ladawan

Dagiti bendision ti priesthood

Amma, agrebbengkayo kas “agkadua nga agpada” iti assawayo, kas isuro ti waragawag ti kaamaan.⁹ Amma, no karbenganyo nga usaren ti bileg ken impluensia ti priesthood authorityyo, aramidenyo “babaen ti panangguyugoy, naunday a panagitured, kinaanus ken kinaemma, ken di aginkukuna nga ayat” (DkK 121:41). Dayta nangato a pagrukodan iti panangaramat iti priesthood authority ti kapatgan iti pamilia. Inted ni President Harold B. Lee daytoy a kari kalpasan laeng ti panagbalinna a Presidente ti Simbaan: “awan bileg ti priesthood, nga iggemyo, nga ad-adda pay a nakaskasdaaw no adda krisis iti balayyo, nakaro a sakit, wenno no nasken a mangngeddeng. … Linaon iti bileg ti priesthood, ti bileg ti Mannakabalin a Dios, ti bileg nga agaramid iti milagro no pagayatan ti Dios daytoy, ngem tapno mausartayo dayta a priesthood, nasken a maikaritayo nga aramaten daytoy. Ti saan a pannakaawat itoy a prinsipio ket saan nga umawat kadagiti bendision ti panangikut iti dayta naindaklan a priesthood.”¹⁰

Patpatgek a kakabsatko, ti panangpadakkel iti nasantuan a priesthood nga iggemyo ket napateg iti aramid ti Apo iti pamiliayo ken iti callingyo iti Simbaan.

Paneknekak Isuna nga akin-priesthood. Babaen ti pangsubbot a panagsagaba ken sakripisio ken panagungarna, naipanamnama iti amin a lallaki ken babbai ti imortalidad ken gundaway iti agnanayon a biag. Agbalintayo koma a napudno ken napasnek itoy naindaklan nga aramid ti Dios nga Agnanayon nga Amatayo, iti nagan ni Jesucristo, amen.