Ewe Soufosun Kot
Emon soufos ese uta nukanapan ami me ewe Chon Amanau. Nge, a uta unukumi me itini ngeni kemi ewe an ngeni ewe Chon Amanau.
Ua pwan apasata ai kapasen etiwa ngeni Elter Gerrit Gong me Elter Ulisses Soares me ewe pwipwifengen minne ese wor tappin non ewe Mwichen ekkewe Engon me Ruemon.
Ren ach uttutun etiwa Preseten Russell M. Nelson pwe epwe noun ewe Samon we soufos me pwan i ewe Presetenin ewe Mwichefenin Jises Kraist ren Aramas mi Pin non Fansoun Soponon, kich kinikinin ew mwich mi pin mi epinipin me nang—mi pin pun met ekkewe ra fis ren ekkewe fitu awa a wesino mi fen kefinita me non nang seni mwen forutan ewe fonufan. Ewe Samon Jises Kraist, I ewe mi emweni An angang, ikenai, ren Preseten Eyring, mi pwarano ngeni kich Noun soufos, Noun chon emwen mi fen kepit mi pin, Noun kewe aramas pwon mi pin, mi mutata ngnenikich sipwe pwan afata ach tipeeu ngeni ach etiwa i me apwonueta an aurour.
Ngeni ekkewe minion chon ewe mwichefen rese nom ikei rech non ewe Conference Center, ua mochen pwe oupwe sinei pwe we Ngunun ewe Samon non ei neni fansoun ach etiwa Preseten Nelson mi wesen chok unun met ami mi aneanei—mi uren manamanen ngun. Nge ach mwich fan emwenien nang ese chok fis non ei Conference Center nge a fis won unusan fonufan—non imwan fan non Asia, Afrika, me pwan Enefenin Merika; non imw me non Nukanapan Merika me pwan Oeru Merika me Iurop; me non fouen ewe Pasifik me pwan ekkewe fonuen neset. Ei mwich mi nom ikkeweia won fonufan oua nom non, ikamwo oua tongeni chok rong me won noumi kana fon. Nouch pisop rese tongeni anneani pouch mi tieta, nge nang mi esinna, pun ach pwon mi pin a fis ren Kot, me ach fofor mi mak non ewe puken manau.
Ewe Samon A Finata Noun Soufos
Ei kefinin soufos a for seni pusin ewe Samon. Ese wor kampein, ese wor anini, ese wor taropwen kampein epwe pachefetan non neni, ese wor etinepat, epinukunukungaw, tinisuk, ika osukosuken mokutukut. Ngang uwa pwan afatano pwe ewe manamanen nang a nom rech non ewe rum asan ewe tempel nupwen am ouwa uta non kukumos ne ioteki Preseten Nelson me mefi ewe mumuta an Kot ngeni.
An Preseten Nelson kefinita pwe i epwe wiseni emon noun Kot soufos mi fen afat me nom. Kapasen ewe Samon ngeni Jeremiah mi pwan pworaus usun Preseten Nelson: “Ua fen finuketa me mwen ai ngonuk manauom o me mwen om uputiw ua fen seikuketa pwe kopwe emon soufos ngeni ekkewe muu.”1 Unungat ier chok me nom, Elter Nelson, 90 ierin, i efomonun non tetenin nomotaman, me ruemon nein ekkewe unumon Aposel mi tam wiser seni nge ir mi kukun seni non ierir. Ewe Samon, ewe mi nemeni manau me mano, mi fini Noun soufos. Preseten Nelson, non an 93 ierin, mi chok pechekun non inisin. Sia apinukunuk pwe i epwe nom rech chommong ier, nge iei sia chok pesepes ngeni an esap skii me won ekkewe chuk.
Nupwen ach sia etiwa ewe soufos pwe i ewe mi epinepin me ren ewe Samon, sia afata pwe sia chok pin ngeni Kot, Samach won Nang, me Noun we At mi pin. Me ren feiochun, umoumoch, me chenin ewe Chon Amanau, Jises Kraist, kich sia tufichin nonnom sefan rer.2
Pwata Sia Tapweno Mwirin ewe Soufos
Nge Jises a pwan aitikich ew ennet mi auchea usun ekkewe chon aninnis I mi tinato rech. “Ion mi etiwa kemi,” A apasa, “a pwan etiwa ei. Pwan ion mi etiwa ei, a pwan etiwa ewe emon a tinieito.”3
Wisan noun ewe Samon ewe soufos mi aucheanap pwe epwe aitikich usun ewe Chon Amanau me emwenikich ngeni I.
Mei wor chommong popun mi fatoch pwe sipwe tapweno mwirin Preseten Russell M. Nelson. Pwan mo ekkewe esap ir chon ach we mwichefen repwe fen era pwe i mi tipachem. I emon tokter nupwen a 22 ierin, emon sou reireiin ngasangas mi sufon, me emon mi itefouno ren angangoch ne forata ewe reirei ngasangas non insin emon.
Napengeni repwe pwan ennetata an mirit me pungoch: tiwe ier a kaeo usun manau me mano, i emon mi fangefangoch, mi tongei me aiti noun Kot ekkis meinisin won fonufan, me ewe feiochun emmirit pwe a wor 10 noun, 57 noun noun kewe, me 118 noun noun noun kewe (ei saingon nampa mi ekkesiwin fan chommong; emon noun noun noun at a keran chok uputiw non ewe chok Aunungat a no).
Ekkewe mi sinei i repwe apasata pwe Preseten Nelson mi kuna weires non manauan ren an nuku me tipepechekun. Nupwen noun we nengin 37 ierin a mano ren kanser , Emily, a ma seni punuan me nour kewe nimen semerit, ua pwisin rong an a apasa “Ngang seman, emon toktor, me emon Aposel noun ewe Samon Jises Kraist, nge ua chok tongeni porotiw me apasata, ’Esap netipei nge netipom epwe fis.’”4
Emon Chon mas won ewe Nenien mas
Ikamwo kich mi ingeiti ekkei nikinik mi murinno, pwata sia tapweno mwirin Preseten Nelson? Pwata sia tapweno mwirin ewe soufos? Pokiten ewe Samon Jises Kraist mi kokori i me finata pwe i Noun chon mas won ewe nenian mas.
Carcassonne mi ew tenenimw mi titino me amwarar non Frans mi nom ikkewe seni fansoun nom. Imwan mas mi tekia mi weneta seni ekkewe tit, minen nenian chon mas mi uta won ekkei imwan mas neran o nepwin, ra chok nenneno touau pwe repwe kuna chon u ngenir. Nupwen ewe chon mas a kuna pwe chon u ngenir ra feito, an esinesin a tumunu ekkewe aramasen Carcassonne seni ewe feingau rese mwo tongeni kuna.
Emon soufos i emon chon mas won ewe iwman mas, mi tumunukich seni efeignauan ngun sise tongeni kuna.
Ewe Samon a ereni Ezekiel. “Ua finukota pwe kopwe emon chon masen ewe muun Israel. Kopwe ne aronga ngenir ekkewe esinesin ua ngouk.”5
Fan chommong sia fos usun auchean ngenikich ach sipwe tapweno mwirin ewe soufos, nge oupwe ekkieki usun osan mi chou ewe Samon mi watiw won noun soufos: “Ika pwe ua era pwe emon aramas mi ngau epwe ne mano nge kose esinesin ngeni, ... iwe epwe ne mano non an tipis nge epwe ne tipisum an we mano.”6
Emon Pwisin Nouch Chon Pwarata mi Nap
Sia etiwaochu Preseten Nelson usun chok sipwene fen etiwaochu Peter ika Moses ika pwe sia nom non ar fansoun. Kot a ereni Moses, “Upwe anisuk o erenuk met kopwe apasa.”7 Sia ausening ngeni noun ewe Samon we soufos ren ewe nuku pwe an kapas mi feito seni awan ewe Samon.8
Ei nuku mi chuun? Apw, ese. Kich meinisin mi wor rech ewe pwaratan ngun usun ennetin ewe Niwinsefaniton ewe kapas allim an Jises Kraist. Ren pwisen netipach me finiach, sia eitieta pouch non ei sosoran, sia apsata netipach ren ach etwa noun ewe Samon we soufos ren ach tipepechekun, nuku, me iotek9 me pwe sipwe apwonueta an aurour. Mei wor ach feioch pun kich Aramas mi Pin non Fansoun Soponon pwe sipwe angei ach pwisin pwarata pwe an Preseten Nelson we koko a feito me ren Kot. Ikamwo punuwei we, Kathy, mi fen pwisin sinei Preseten Nelson ren ukukun inik ier me ese wor an tipemwaramwar usun wisan mi pin, mwirin an epinipin, a poputa ne anneani meinisn an kewe afanafan non mwichenapen mwichefen seni ekkewe 34 ier, me a iotek ren fatafatochun an pwarata usun wisan pwe emon soufos. Ua pwon ngonuk pwe ei napanon kapasen pwarata epwe eto reom ren om kopwe kuta non tipetekison me nimenimoch.
Pwata sia fokkun tipeew ngeni ach sipwe apwonueta mongungun nouch soufos? Ngeni ekkewe mi tiniken ne kuta manau ese much, mongungun ewe soufos mi awora tumunun ngun non ei fansoun fitikoko.
Sia nom non ew fonufan mi achorongorong ren tepetepen fitikoko. Ewe internet, nouch fon, ach tepetepen pisekin katon kachito meinisin ra mochen sipwe chok etenekir me achimwa kich, ar amwasangasang ngeni kich, repwe pwan mochen sipwe moni ar kewe pisek me apuru nonnomur.
Ewe tepetep sokkun minen pworaus me ekiek mi achema ngenikich usun ekkewe aurouren pukefel pwe site “paeno me paeto,”10 o “mokutukut fetan ren asepwan,”11 me kuf ngeni ewe “afanfan mi nikotuputup” seni ekkewe mi fori “angangen nikotuputup.”12
Ach sipwe angkou ngunuch ngeni ewe Samon Jises Kraist mi nongonong won ach ausening ngeni ekkewe I mi tinato. Ach tapweno mwirin emon soufos non ew fonufanun fitikoko mi usun sia nom non echo kus mi kinamwe me pwichikar non ew ran mi patekich.
Sia nom non ew fonufanin ren popun, tipachem, kitir, anini, kaeo, me awewe. Ach sipwe eiseni, “Pwata?” mi och non chommong kinikinin manauach, mi etufichi ewe manamanen tupuach ne emweni chommong finiach kewe sia kuna iteitan ran.
Nge napangeni mongungun ewe Samon a war nge ese fiti penuan.13 Me nom akkomwan soun kaeo mi statini osukosukan nisou mwan won pupunu me nour kewe, ewe Samon a apasa, “Ousap nisou mwan.”14 Nap seni tipachemen aramas, sia aucheani nifangen ewe Ngun mi Fel.
Kosap Mairu
Mongungun ewe soufos, nupwen epwe porous kinamwe, napangeni fansoun epwe tingorei kich sipwe siwin, aier, me niwin ngeni ewe Samon. Nupwen mi namwot sipwe apungu manauach, sisapw amanga. Me ousap osukosuk nupwen mongungun ewe soufos mi esinesin usun osukosuk mi sokkono seni met mi itefouno ikkenai. Ekkewe kapasen amengaw seni ekkewe chon nukunukumang ra moneu iteitan fansoun ewe soufos epwe fos. Nupwen oupwe tipetekison ne apwonueta aurour seni noun ewe Samon we soufos, ua pwon pwe oupwe angei napenon feiochun tumun me kinamwe.
Ousap osukosuk ika pwe fan ekkoch ami ekiek ese akkomwan fiti kapasen noun ewe Samon we soufos kewe afanafan. Ekkei fansoun mi fich ngeni kaeo, tipetekison, me inet sipwe fotupukutiw me iotek. Sipwe fefeinno non nuku, nuku non Kot, me sinei pwe mwirin och fansoun sipapw angei fatafatoch non ngun me ren Samach won Nang. Emon soufos mi awewei usun ewe nifang mi napanap seni ewe Samon pwe “ewe mochenin ewe Nau epwe kuf ren mochenin ewe Sam.”15 Ach fangeno ach mochen ngeni mochenin Kot, ewer, esap fen fangeno nge epwe fen nepoputan ew win mi ningoch.
Ekkoch repwe fokkun achocho ne tichik ne atai kapasen ewe soufos, ra weires ne miriti menni mi mongungun soufos me menni mi chok an pwisin ekkiek.
Non 1982, ru ier me mwen a angei wisan we pwe epwe emon Meinap Unus, Brother Russell M. Nelson a apasa: “Ese mo fan ew upwe eis ngeniei, ’Inet ewe soufos a kapas ussun emon soufos me inet ese?’ Mefien netipei, ’Ifa usun ai upwe tongeni usun i?’” Me a pwan apachata, “Ai ekkiek pwe upwe kouno ne watiw esisinen kapas eis mwirin an ewe soufos porous nge upwe fen makkei esisinen kapas pochokun.”16 Iei usun emon souleng mi tipetekison mi etetenocu manauan. Iei, a 36 ier mwirin, i noun ewe Samon we soufos.
Anapano Om Nuku non ewe Chon Amanau
Non pwisin manauei, ua kuna pwe nupwen ua kaeo kapasan ewe soufosun Kot fiti iotek me tumunuochu, ren engino, awenewena nguni me netipei ren an afanafan mi pin, ai nuku non ewe Samon Jises Kraist mi napeno.17 Ika sia fini pwe sipwe nikitano an aurour ngeni kich me fini pwe sia konien sinei, ach nuku mi ngaueno me kunaien mesach esemuch mi fatangaueno. Ua pwon ngenikemi pwe nupwen oua nukuchar non ami tapweno mwirin ewe soufos, ami nuku non ewe Chon Amanau epwe napano.
Ewe Chon Amanau a apasa, “Ekkewe soufos meinisin … ra pwarata usui.”18
Emon soufos ese uta nukanapan ami me ewe Chon Amana. Nge, a uta unukumi me itini ngeni kemi ewe an ngeni ewe Chon Amanau. Wisan emon soufos mi napanap me ewe nifang mi napanap ngeni kich ina an kapasen pwarata mi fat, an sineiochu, pwe Jises i ewe Kraist. Usun Peter me nom, nouch soufos a apasata, “[I] ewe Kraist, Noun ewe Kot mi Manau.”19
Non ew ran mwach, ren ach nennengeni manauach akkomw, sipwe pwapwa pwe sia fetan won fonufan non atun emon soufos mi manau. Non ena ran, ua iotek pwe sipwe tongeni apasa:
Sia ausening ngeni i.
Sia nuku i.
Sia kaeo an kapas ren engino me nuku.
Sia iotek i.
Sia uta unukun.
Sia tipetekison ach sipwe tapweno mwirin i.
Sia tongei i.
Ua ngeni kemi ai kapasen pwarata pwe Jises i ewe Kraist, ach Chon Amanau me Chon Angasano, me Preseten Russell M. Nelson i Noun we soufos mi pin won fonufan. Non itan Jises Kraist, amen.