Na Parofita ni Kalou
E sega ni tu ena keda tadrua kei na iVakabula e dua na parofita. Ia, e tu e yasada o koya ka dusia na sala vua na iVakabula.
Au via vakuria na noqu veikidavaki vei Elder Gerrit Gong kei Elder Ulisses Soares ki na mataveitacini sega ni vakatauvatani rawa ni Kuoramu ni Apositolo Le Tinikarua.
Ena veitokoni vei Peresitedi Russell M. Nelson me parofita ni Turaga ka Peresitedi ni Lotu i Jisu Karisito ni Yalododonu Edaidai, eda a vakaitavi ena dua na lewa vakalou ni soqoni vakalotu tabu—e vakalotu tabu baleta na veika e yaco ena auwa sa qai sivi oqo e namaki tu mai lomalagi tekivu mai na gauna eda tiko kina ena bula taumada. Na Turaga o Jisu Karisito, o Koya ka dusimaka tiko na Nona cakacaka e delai vuravura, ena siga nikua, e vakaraitaka mai vei Peresitedi Eyring, na Nona parofita, Nona iliuliu lumuti, Nona tamata ni veiyalayalati, ka vakatarai keda meda vakaraitaka na noda duavata kina meda tokoni koya ka muria na nona ivakasala.
Kivei ira na milioni ni lewenilotu era sega ni tiko kei keda ena loma ni Vale ni Koniferedi, au vinakata mo ni kila na Yalo ni Turaga ena loma ni vale oqo ena gauna e tokoni tiko kina o Peresitedi Nelson e vaka saraga a namaki—vakasinaiti ena kaukauwa vakayalo. Na noda soqoni vakalotu, dusimaki mai lagi e sega ni yaco wale tikoga ena Vale ni Koniferedi oqo, ia, e yaco tiko e vuravura taucoko—ena veivalenilotu mai Esia, Aferika, kei na Vualiku kei Amerika; ena loma ni vale ena Loma kei naCeva kei Amerika kei Iurope; ena veivanua vagalala ena ruku ni valelaca mai na Pasifika kei na veiyanuyanu ni wasawasa. Na soqoni vakalotu tabu oqo ena yasai vuravura cava ga o tiko kina, kevaka sara madaga e semati iko mai na vakarorogo tiko ena nomu talevoni vuku veikauyaki. E sega ni wilika na noda bisopi na noda laveliga, ia era a toqai dina sara mai lomalagi, me vaka ni da veiyalayalati kei na Kalou, ka sa volaitukutukutaki na veika eda vakayacora ena ivola ni bula.
E Digitaki ira na Nona Parofita na Turaga
Na digitaki ni dua na parofita e vakayacora saraga na Turaga vakataki Koya. E sega ni dua nai lawalawa e tuvatuva ka, sega ni dua na veiba, sega ni dua na soli vukivuki me rawati kina na itutu, sega na veileti, se veilecayaki, se mamawe. Au, vakadeitaka talega, ni a tiko kei keimami na kaukauwa vakalomalagi ena rumu ecake ni valetabu ena gauna keitou wavoliti Peresitedi Nelson kina ka vakila na veivakadonui sega ni lecavi rawa ni Turaga vua.
Na veidigitaki me na veiqaravi vaka parofita ni Kalou o Peresitedi Nelson e a vakayacori ena dua na gauna makawa sara. Na itukutuku ni Turaga vei Jeremaia e yaco talega vakakina vei Peresitedi Nelson: “Niu a bera ni buli iko ena kete kau sa kilai iko; ia ni ko a bera ni sucu mai kau sa vakatabui iko mo nodra parofita na veimatanitu.”1 Tolu na yabaki sa oti, ni yabaki 90, o Elder Nelson, ka ikava ni veiqaravi balavu duadua vakaiapositolo, ni rau gone vua na iApositolo e rua mai na tolu eratou liu tiko vua. Na Turaga, o Koya ka lewa na bula kei na mate, e digitaka na Nona parofita. E bulabula vinaka sara tu ga o Peresitedi Nelson, ka sa yabaki 93 oqo. Keimami sa vakanuinui ni na rawa ni tiko kei keda me tini se ruasagavulu vakacaca na yabaki mai oqo, ia, ena gauna oqo keimami sa saga tiko madaga me kerei koya me sa rauta na vakasisi ena veidelana ni vakasisi mai Utah.
E dina ga nida rokova na parofita ni Turaga ni sa Nona lumuti, ia me matata vei keda ni da sokalou duadua ga vua na Kalou, na Tamada Vakalomalagi, kei na Luvena.Ena vuku ni nona caka vinaka, loloma veivueti, kei na loloma soliwale ni Vakabula, o Jisu Karisito, ena rawa kina vei keda meda curu tale ka bula ena Nona iserau.2
Na Cava Eda Vakamuria Kina na Parofita
Ia, e vakatavulica talega o Jisu e dua na dina bibi me baleta na Nona italai e dau tala mai o Koya. “O koya sa vakacegui kemudou sa vakacegui au,” e kaya o Koya, “ia ko koya sa vakacegui au, sa vakacegui koya sa talai au mai.”3
Nai lesilesi bibi duadua ni parofita ni Turaga sai koya me vakavulica ka vakadinadinataka nai Vakabula ka liutaki keda lesu tale Vua.
E vuqa tu na inaki kilai meda vakamuri Peresitedi Russell M. Nelson kina. O ira madaga era sega ni lotu vata kei keda, era na vakatokai koya me tamata vakasakiti dina. E vuniwai ni valenibula ni se qai yabaki 22, e dua na dauveisele kila ni uto, ka kilai levu ena nona vakaitavi ena tauyavutaki na veisele ni uto.
Eso tale era na duavata na nona vuku kei na lewa matau: ni ciwasagavulu tu na yabaki ni vulica tiko me baleta na bula kei mate, ka bulataka na bula sega ni nanumi koya, ka lomani ira ka vakavulici ira tu na luve ni Kalou ena veitutu vava kei vuravura, kei na kila ni veisusu kina 10 na luvena, 57 na makubuna, kei na 118 na makubuna vakarua (nai otioti ni wiliwili e toso cake tikoga; e sucu e dua na makubuna vakarua ka tagane ena Vukelulu sa qai oti oqo).
O ira na kilai koya vinaka era kaya ni sa sotava talega mai na dredre ni bula o Peresitedi Nelson ena vakabauta kei na yaloqaqa. Ena gauna e yali kina na bula nei luvena yalewa yabaki 37, o Emily, ka biu tu mai na watina lomani kei na luvena lalai e lima, au rogoca ni tukuna o koya, “au tamana, vuniwai, ka iApositolo ni Turaga o Jisu Karisito, ia e dodonu vei au me’u cuvara na uluqu … ka vakaraitaka, ‘Me yaco ga na nomuni ni lewa.’”4
Na iVakatawa e Dela ni Vale Cecere
E dina sara nida rokova na itovo vakaturaga eso oqo, ia, na cava sara mada eda vakamuri Peresitedi Nelson? Na cava eda vakamuria kina na parofita? Baleta ni sa kacivi koya na Turaga o Jisu Karisito ka lesi koya me Nona ivakatawa ena vale cecere.
O Carcassonne e dua na tauni vakasakiti mai Varanise ka wavokita tu na lalaga simede ka duri tu mai na gauna ni veivaluvaluti mai Iurope. E vakaduri na veivale cecere mai na lalaga era taqomaki tu, ka tara me baleti ira na ivakatawa era duri tu ena veivale cecere ena siga kei na bogi, ni ra vakaraica yani vakatabakidua ki na veivanua era lako mai kina na meca.Ena gauna e raica kina na ivakatawa ni ra sa toso tiko mai na meca, e taqomaki ira na tamata mai Carcassonne na domo ni veivakaroti nei vakatawa mai na veika vakarerevaki era sega ni raica rawa.
Na parofita e dua na ivakatawa ena vale cecere, ka taqomaki keda tiko mai na veika vakarerevaki vakayalo eda sega ni raica rawa tiko.
Sa kaya na Turaga vei Isikeli, “Ia ko iko na luve ni tamata, kau sa lesi iko mo nodra ivakatawa na mataqali i Isireli; o koya oqo mo rogoca kina na vosa sa tau mai na gusuqu ka mo vakasalataki ira [mai vei] au.”5
Eda dau kaya na noda gagadre meda vakamuria na parofita, ia vakasamataka mada na bibi ni colacola edau vakotora na Turaga vei ira na Nona parofita: “Kevaka ko sa sega ni vosa vua na tamata ca mo vakasalataki koya … , [ka] me lesu tani mai na nona itovo ca, sa na mate ga na tamata ca … ena nona ivalavala ca; … na nona mate kau na taroga vei iko.”6
Na Noqu iVakadinadina
Eda ciqomi Peresitedi Nelson me vakaga na noda na ciqomi Pita se o Mosese kevaka eda a bula tu ena nona gauna. E tukuna na Kalou vei Mosese, “Ia oqo, mo lako, kau na tiko kei na gusumu, ka vakavulici iko ena ka mo kaya.”7 Eda rogoca na parofita ni Turaga ena vakabauta ni nona vosa sai “mai na gusu ni [Turaga].”8
E vakatokai beka oqo me vakabauta tawakila? Sega, e sega sara. Eda sa ciqoma kece nai vakadinadina vakayalo ni dina ni Veivakalesui mai ni kosipeli i Jisu Karisito. Ena noda lewa kei na digidigi, eda laveta na ligada na mataka nikua, ni vakaraitaka tiko na noda gagadre meda tokona na parofita ni Turaga mai na “nod[a] veivakabauti, nod[a] yalodina, kei na nod[a] masumasu”9 ka qai vakamuria na nona ivakasala. Me vaka nida Yalododonu Edaidai e rawa nida ciqoma na ivakadinadina yadua ni sa kacivi mai vua na Kalou o Peresitedi Nelson. E dina ga ni kilai Peresitedi Nelson, na watiqu, o Kathy mai na sivia e tolu sagavulu na yabaki, ka sega ni loma tarotarotaka na nona ilesilesi vakalou, ena nona tabaki ka vakatikori, ka sa tekivu me wilika kece tale o koya na nona vosa mai na koniferedi raraba ni 34 na yabaki sa sivi, ka qai masuta e dua na veivakadeitaki titobu me baleta na nona itavi vakaparofita. Au yalataka vei kemuni nai vakadinadina cecere oqo ena yaco mai ni o vakasaqara ena yalomalumalumu kei na bula kilikili.
Na cava eda sa rui lomasoli kina meda vakamuria na domo ni noda parofita? Vei ira era vakasaqara matua tiko na bula tawamudu, na domo ni parofita e kauta mai na veitaqomaki vakayalo ena gauna drakidrakita oqo.
Eda bula tiko ena dua na vuravura ka vakasinaiti tu ena domo ni kaikaila ni milioni vakamilioni. Na initaneti, na noda talevoni vuku, na veigacagaca vakalivaliva ni veivakamarautaki era cuqena kece mai meda maleleta yani kei na nodra veivakayarayarataki kivei keda, ka nuitaka tu nida na via volia na nodra ivoli ka vakamuria na nodra ivakatagedegede.
Na itukutuku kei na veivakasama sega ni oti rawa e vakananuma vei keda nai vakaro vakaivolanikalou me baleta na “veitosoyaki ka veikauyaki,”10 “sa cagina ena cagi ka veitubuyaki,”11 ka muria tu na “lawaki ca ni tamata,” ka rawai tu mai vei ira na “dauveivaqaseni sa nakiti kina na veivakacalai.”12
Na noda vakelea na yaloda vua na Turaga o Jisu Karisito e gadrevi kina meda vakarorogo vei ira era sa tala mai o Koya. Na noda vakamuria na parofita ena vuravura vakasausa oqo e vaka na logaloga vinaka ni noda ologi tu ena tutuvi katakata ena dua na siga batabata.
Eda bula tiko ena dua na vuravura ni vakainaki, veisaqasaqa, veiba, vakamacala kilai, kei na veimataqali ivakamacala. Na noda vakataroga, “Baleta na cava?” e ka vinaka ena vuqa na veigacagaca ni noda bula, ka vakatara na kaukauwa ni noda vakasama me dusimaki na veimataqali digidigi kei na vakatulewa eda sotava tiko ena veisiga.
Ia, na domo ni Turaga e dau rogo mai, ka sega na kena ivakamacala.13 Ni se bera sara ni ra vakamacalataka na kena dau vakavuku na irevurevu e vakayacora na voroki ni lawa ni tiko savasava ena veivakabauti nei watina kei ira na luvena, e vakarota na Turaga “Mo kakua ni ia na veibutakoci.”14 E sega walega ni da vakamareqeta na kila-ka vakavuli, eda vakamareqeta vakalevu cake na isolisoli ni Yalo Tabu.
Kakua ni Kidroa
Na domo ni parofita, e dau vakawasoma ena kerei keda meda veisau ka veivutuni, ka lesu vua na Turaga, e dina ni dau tau ena yalovinaka. Ni gadrevi na veivakadodonutaki, meda kakua ni vakabera. Kakua ni kidacala kevaka e sega ni sala vata na domo ni veivakaroti na parofita na veinanuma kilai levu ni noda gauna. Na nodra veivakacacani na tawavakabauta esa dau tu wavoliti keda tu ena gauna sara madaga sa tekivu vosa kina na parofita. Ni o sa yalomalumalumu ena nomu muria na veivakasalataki kei nai vakavuvuli ni parofita ni Turaga, au yalataka vei iko ni na tomani mai na veivakalougatataki ni veitaqomaki kei na vakacegu.
Me kakua ni veivakidacalataki kevaka e sega ni dau duavata kei na ivakavuvuli ni parofita ni Turaga eso na nomu rai o iko vakataki iko. Oqo era gauna ni vuli, kei na yalomalumalumu, ena gauna eda tekiduru kina ena masu. Eda toso tiko ki liu ena vakabauta, ka nuitaka tiko na Kalou, ka kila ni na yaco mai na gauna meda ciqoma kina na veika e vakamatatataki mai vua na Tamada Vakalomalagi. E vakamacalataka e dua na parofita nai solisoli sega ni vakatauvatani rawa kei na isolisoli ni Vakabula “talairawarawa me mate ni sa duavata ga na loma i Tamana kei na Luvena.”15 Na noda soli keda ki na loma ni Kalou, sai koya, nai tekitekivu ni dua nai tekitekivu vou ka lagilagi ena qaqa.
Ena so na tamata era na via vidavida vakamatailalai na vosa ni parofita, ka sagasaga dredre me raica se cava na domo vakaparofita kei na cava e nona vakasama ga o koya.
Ena 1982, ni vo e rua na yabaki me kacivi vaka Vakaitutu Raraba, e kaya o Brother Russell M. Nelson: “Au sega vakadua ni dau tarogi au, ‘Ena gauna cava e vosa kina vaka e dua na parofita kei na gauna cava e sega ni vosa kina vaka e dua na parofita?’ E dau noqu gagadre tu ga, ‘Me’u kila ena rawa vakacava me’u vakataki koya?” E vakuria o koya, “E [noqu itovo ni bula] me’u kua ni vakataroga na veitukutuku kece e kaya na parofita ka ciqoma ena marau.”16 Oqo na ivakarau e digitaka e dua na turaga yalomalumalumu ka vakayalo ka vakamuria ena nona bula. Ni sa oti oqo, e 36 na yabaki, esa parofita ni Turaga o koya.
Vakatorocaketaki na Nomu Vakabauta na Turaga
Ena noqu bula, au sa kunea ena gauna au vulica ena masumasu na vosa ni parofita ni Kalou ka vakayacora vakayadudua, ka qai vakadodonutaka na lomaqu kei na nona ivakavuvuli veivakauqeti, e dau vakalevutaki cake na noqu vakabauta na Turaga o Jisu Karisito.17 Kevaka eda digia meda vakatikitikitaka na nona ivakasala ka nanuma ni da kila vinaka cake, ena malumalumu na noda vakabauta ka buwawa na noda raica na veika tawamudu. Au yalataka ni o yalodina tikoga ena nomu saga tiko mo vakamuria na parofita, ena vakalevutaki cake na nomu vakabauta nai Vakabula.
E tukuna nai Vakabula, “Ko ira kecega na parofita … ,era sa vosa, era vakadinadinataki au.”18
E sega ni tu ena keda tadrua kei na iVakabula e dua na parofita. Ia, e tu e yasada o koya ka dusia na sala vua na iVakabula. Na nona isolisoli cecere duadua e dua na parofita vei keda sai koya na nona ivakadinadina dei, kei na kila deivaki, ni sai Jisu na Karisito. Me vakataki Pita ena gauna makawa, e vakadeitaka na noda parofita, Sa ivakadinadina kina ni ko Jisu na Karisito, na Luvena na Kalou sa bula tiko”19
Ena dua na siga, ni da raica lesu na noda gauna ena bula oqo, eda na marautaka nida a bula voli e vuravura na gauna ni parofita bula. Ena siga oya, sa noqu masu ni na rawa nida kaya:
Eda a vakarorogo Vua.
Eda a vakabauti koya.
Eda vulica na nona vosa ena yalovosota kei na vakabauta.
Eda masulaki koya.
Ka da tokoni koya.
E a yalomalumalumu ka vakamuri koya.
Eda a lomani koya.
Au sa vakadinadinataka taucoko ni sa Karisito o Jisu, na noda Dauveivueti ka iVakabula, ka sa Nona parofita lumuti ena vuravura oqo o Peresitedi Russell M. Nelson. Ena yaca i Jisu Karisito, emeni.