Vajtswv tus Yaj Saub
Ib tug yaj saub yeej tsis tav nej kev rau tus Cawm Seej. Tiam sis, nws sawv ntawm nej ib sab thiab taw tes mus rau tus Cawm Seej.
Kuv kuj xav tos txais Txwj Laug Gerrit Gong thiab Txwj Laug Ulisses Soares rau cov kwv tij hauv Pawg Kaum Ob tug Thwj Tim.
Thaum peb tau txhawb nqa pom zoo rau Thawj Tswj Hwm Russell M. Nelson ua tus Tswv tus yaj saub thiab ua tus Thawj Tswj Hwm ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, peb twb koom nrog ib lub rooj sab laj dawb huv uas Vajtswv txib kom ua—yog ib yam dawb huv vim cov nyob saum ntuj twb tos ntsoov kom muaj tej uas tau tshwm sim ib teev tas los no txij thaum ntuj tsim teb raug los. Tus Tswv Yexus Khetos, uas coj Nws txoj hauj lwm, hnub no, dhau ntawm Thawj Tswj Hwm Eyring, tau muab Nws tus yaj saub, tus thawj coj uas Nws pom zoo, rau peb, Nws cov neeg khi lus, cia peb tab meeg txhua tus qhia tias peb yuav txaus siab txhawb nqa nws thiab ua raws li nws qhia.
Rau nej cov uas tsis nyog nrog peb nyob hauv lub Tsev rau Rooj Sab Laj, kuv xav kom nej paub tias tus Tswv tus Ntsuj Plig uas nyob hauv lub tsev no thaum peb tau txhawb nqa pom zoo rau Thawj Tswj Hwm Nelson yeej zoo ib yam li nej xav—Nws muaj zog ntawm sab ntsuj plig heev. Tiam sis peb txoj kev sib sau ua ke uas Vajtswv pom zoo tsis yog nyob hauv lub Tsev rau Rooj Sab Laj no xwb tiam sis nyob thoob plaws lub ntiaj teb: nyob hauv tej tsev teev ntuj hauv Asia, Africa, thiab Amelikas Qaum Teb; nyob hauv tej tsev hauv Amelikas Nruab Nrab thiab Qab Teb thiab Europe; nyob hauv tej qab tsag nyob hauv hiav txwv Pacific thiab tej pov txwv. Kev sib txoos no yeej nyob hauv tej qhov chaw ntawm lub ntiaj teb uas nej nyob, tsis hais nej tsuas mloog suab ntawm nej lub xov tooj smartphone xwb. Peb tsa tes los peb cov npisov tsis tau suav, tiam sis Vajtswv yeej tau pom, zoo li Nws pom peb tej kev khi lus, thiab tej yam peb ua los cov tim tswv sau rau hauv phau ntawv txheeb txoj sia.
Tus Tswv Xaiv Nws tus Yaj Saub
Tus Tswv Nws tus kheej yog tus uas xaiv ib tug yaj saub. Tsis muaj kev sib tw ua nom, tsis muaj kev sib cav, tsis muaj tom txwv kom tau, tsis muaj kev sib ceg, tsis sib ntseeg, tsis paub meej, los yog kev txhov siab. Kuv kuj ua tim khawv hais tias lub ntuj ceeb tsheej lub hwj chim tau nrog peb nyob thaum peb tau nyob ib puag ncig Thawj Tswj Hwm Nelson thiab tau hnov tus Tswv txoj kev pom zoo rau nws.
Vajtswv tau xaiv Thawj Tswj Hwm Nelson ua tus yaj saub puag thaum ub. Tus Tswv tej lus rau Yelemis los kuj hais txog Thawj Tswj Hwm Nelson: “Thaum koj tseem tsis tau xeeb rau hauv koj niam plab, kuv twb xaiv koj thiab thaum tsis tau yug koj, kuv twb tsa koj ua tug yaj saub rau txhua haiv neeg.”1 Peb xyoos tas los xwb, Thawj Tswj Hwm Nelson, uas muaj 90 xyoo, yog tus thib plaub, muaj ob tug ntawm peb tus Thwj Tim uas yog Thwj Tim ntev dua nws tiam sis lawv muaj hnub nyoog hluas dua nws. Tus Tswv, uas kav kev ciaj thiab kev tuag, yog tus uas xaiv Nws tus yaj saub. Thawj Tswj Hwm Nelson, uas muaj 93 xyoos, yeej noj qab nyob zoo. Peb cia siab hais tias nws yuav tau nrog peb nyob kaum xyoo tawm, tiam sis tam sim no peb tsuas xav kom nws tsis txhob mus caij ski pem roob xwb.
Txawm yog peb qhuas tus yaj saub uas yog tus uas tus Tswv tsa los, kuv xav qhia meej tias peb teev tiam Vajtswv, peb Leej Txiv Saum Ntuj Ceeb Tsheej thiab Nws Leej Tub xwb. Yog los ntawm peb tus Cawm Seej, Yexus Khetos, tej hauj lwm, txoj kev hlub tshua, thiab txoj kev tshav ntuj, peb thiaj yuav rov qab mus cuag Nkawd.2
Vim Li Cas Peb Coj Raws Li tus Yaj Saub
Tiam sis Yexus tau qhia ib qho tseeb tseem ceeb txog cov tub qhe uas Nws txib los rau peb. Nws hais tias, “Tus uas tos txais nej, twb yog nws tos txais kuv; thiab tus uas tos txais kuv, twb yog tus ntawd tos txais tus uas txib kuv los.”3
Ntiag tug hauj lwm tseem ceeb tshaj ntawm tus Tswv tus yaj saub yog kev qhia txog tus Cawm Seej thiab coj peb mus cuag Nws.
Muaj ntau yam vim tsim nyog coj raws li Russell M. Nelson. Cov uas tsis yog los ntawm peb txoj kev ntseeg kuj yuav hais tias nws txawj ntse kawg. Nws yog ib tug kws kho mob thaum nws muaj 22 xyoos, ib tug kws phais plawv uas muaj npe heev, thiab ib tug uas tau pab tsim tus txheej txheem phais plawv thaum ntshav lug lub plawv.
Neeg coob yuav qhuas nws laj lim tswv yim thiab txoj kev txawj txiav txim: nws muaj cuaj caum xyoo uas nws tau kawm txog lub neej no thiab txog kev tuag, nws tsis qia dub, nws hlub thiab qhia Vajtswv cov me nyuam nyob thoob plaws lub ntiaj teb, thiab nws muaj 10 tus me nyuam, 57 tus xeeb ntxwv, es nws cov xeeb ntxwv muaj 118 tus me nyuam (tus zauv kawg pheej hloov; (ib tug xeeb ntxwv tus tub twg yug los thaum hnub Wednesday tas los).
Cov uas paub nws zoo kuj yuav hais txog qhov uas Thawj Tswj Hwm Nelson tau raug tej teeb meem hauv lub neej no thiab tseem rau siab ntseeg thiab ua siab loj. Thaum nws tus ntxhais uas muaj 37 xyoo, Emily, raug mob cancer thiab tso lub ntiaj teb no tseg, tshuav nws tus txiv thiab tsib tug me nyuam uas hlub nws, es kuv hnov nws hais tias, “Kuv yog nws leej txiv, ib tug kws kho mob, thiab tus Tswv Yexus Khetos tus Thwj Tim, tiam sis kuv yuav tsum nyo hau … thiab lees hais tias, ‘tsis txhob ua raws li kuv lub siab nyiam, tiam sis ua raws li koj lub siab nyiam xwb.’”4
Ib tug Tub Zov Nyas Saum Pej Thuam
Txawm yog peb nyiam tag nrho tej cwj pwm zoo no, vim li cas peb coj raws li Thawj Tswj Hwm Nelson? Vim li cas peb coj raws li tus yaj saub? Yog vim tus Tswv Yexus Khetos tau hu nws thiab pom zoo rau nws ua tus zov nyas saum tus pej thuam.
Carcassonne yog ib lub nroog nyob hauv Fabkis Teb uas muaj phab ntsa ib puag ncig txij thaum ib txhiab xyoo tas los. Tej pej thuam siab nyob rau ntawm tej phab ntsa uas pov hwm lub nroog, es cov zov nyas sawv saum tej pej thuam ntawd niaj hnub niaj hmo, tsom ntsoov rau qhov deb seb tus yeeb ncuab puas los. Thaum tus zov nyas pom ib tug yeeb ncuab tuaj, nws tsa suab ceeb toom kom pov hwm cov neeg hauv Carcassonne thiaj li tsis raug xwm txheej ceev uas lawv pom tsis tau.
Ib tug yaj saub yog ib tug zov nyas saum tus pej thuam, uas pov hwm peb kom txhob raug tej xwm txheej ntawm sab ntsuj plig uas tej zaum peb tsis pom.
Tus Tswv hais rau Exekees hais tias, “Kuv muab koj tsa ua ib tug [zov nyas] saib cov Ixayees. Koj yuav coj kuv tej lus ceeb toom mus qhia rau lawv.”5
Peb hais lus ntau txog qhov uas peb yuav tsum coj raws li tus yaj saub, tiam sis cia li xav seb tus Tswv muab lub nra hnyav npaum li cas rau Nws tus yaj saub ris: “[Yog] koj tsis mus qhia kom nws tso kev txhaum tseg … , [thiab] tus ntawd … tuag rau nws txoj kev txhaum, ces kuv yuav muab nws lub txim rau koj ris.”6
Kev Txais Tim Khawv Ntxiv
Peb muab siab npuab Thawj Tswj Hwm Nelson ib yam li peb yuav muab siab npuab Mauxes yog peb ua neej nyob thaum ntawd. Vajtswv tau qhia Mauxes hais tias, “Kuv yuav pab koj hais thiab yuav qhia kom koj txawj hais.”7 Peb mloog tus Tswv tus yaj saub lus nrog kev ntseeg hais tias nws tej lus yog “los kiag ntawm [tus Tswv] lub qhov ncauj los.”8
Li no puas yog kev lam ntseeg xwb? Tsis yog. Peb txhua tus txais tau kev ua tim khawv ntawm sab ntsuj plig txog qhov uas Kev Muab Yexus Khetos Txoj Moo Zoo Txum Tim Rov Qab Los muaj tseeb. Los ntawm peb lub siab nyiam thiab ywj siab xaiv, peb tau tsa peb txhais tes tag kis no, tshaj tawm txog peb txoj kev xav txhawb nqa tus Tswv tus yaj saub nrog peb “txoj kev tso siab, kev ntseeg, thiab kev thov Vajtswv”9 thiab qhov uas peb ua raws li nws qhia. Peb uas yog Haiv Neeg Ntseeg hauv Hnub Nyoog Kawg muaj cib fim txais tau kev pom zoo hais tias Vajtswv yog tus uas tau hu Thawj Tswj Hwm Nelson. Txawm yog kuv tus poj niam, Kathy, tau paub Thawj Tswj Hwm Nelson tau yuav luag peb caug xyoo thiab tsis muaj lus nug txog qhov uas Vajtswv tau tso cai rau nws, tom qab tau muab nws tsa ua tus yaj saub, Kathy twb pib nyeem nws tej zaj lus uas hais txij thaum 34 xyoos los, thiab thov Vajtswv kom paub zoo dua ntxiv txog nws txoj hauj lwm ua tus yaj saub. Kuv cog lus rau nej tias nej yuav txais pov thawj zoo dua ntxiv li no thaum nej txo hwj chim thiab ua neeg tsim nyog nrhiav qhov ntawd.
Vim li cas peb txaus siab coj raws li peb tus yaj saub lub suab? Rau cov uas rau siab nrhiav txoj sia nyob mus ib txhis, tus yaj saub lub suab ua rau peb nyob nyab xeeb ntawm sab ntsuj plig nyob hauv ib lub caij nyoog uas ntxhov hnyo.
Peb nyob hauv ib lub ntiaj teb uas muaj lub suab coob tsis coob. Internet, peb cov xov tooj smartphone, peb tej lub TV uas tshaj tawm kev lom zem tag nrho tej no yeej xav kom peb tsom ntsoov thiab muaj hwj huam tswj hwm peb, xav kom peb yuav tej khoom thiab ua raws li tej yam uas tej no tshaj tawm.
Qhov uas muaj xov xwm thiab tib neeg tej kev xav tsis tu ncua ua rau peb nco txog tej uas vaj lug kub ceeb toom hais tias peb yuav raug “raws luag qab rau ub rau no”10 raug “cua ntsawj ntas mus ntas los,”11 mloog cov uas “txhob txwm dag kom sawv daws yuam kev,” thiab raug cov uas “nkaum tos dag ntxias.”12
Yog peb xav muab siab npuab tus Tswv Yexus Khetos peb yuav mloog cov uas Nws txib los lub suab. Qhov uas yus coj raws li tus yaj saub qhia nyob hauv lub ntiaj teb uas ntxhov hnyo yeej zoo li yus vov ib daim pam sov thaum txog hnub txias txias.
Peb nyob hauv ib lub ntiaj teb uas nyiam kev xav mus xav los, kev sib cav sib ceg, kev txawj ntse, thiab kev piav. Qhov uas peb nug “Vim li cas?” yeej yog ib qho zoo hais txog ntau yam ntawm peb lub neej, yog ib qho uas cia peb siv peb txoj kev txawj ntse coj peb kev thaum pev xaiv thiab txiav txim siab txhua hnub.
Tiam sis tus Tswv lub suab feem ntau tsis piav yog vim li cas.13 Ua ntej cov kws tshawb fawb tau kawm txog qhov uas kev deev luag poj luag txiv ua rau cov txij nkawm thiab cov me nyuam raug tsis zoo, tus Tswv tau hais tias, “Tsis txhob deev luag poj niam luag txiv.”14 Peb saib lub txiaj ntsim Vaj Ntsuj Plig Dawb Huv rau nqi tshaj kev txawj ntse.
Tsis Txhob Xav Tsis Thoob
Tus yaj saub lub suab, txawm yog nws ua siab dawb hais, los feem ntau yog ib lub suab uas hais kom peb hloov siab lees txim thiab rov qab mus cuag tus Tswv. Thaum twg peb yuav tsum kho peb tus kheej, xav kom peb tsis txhob tos. Thiab tsis txhob txhawj thaum tus yaj saub lub suab ceeb toom hais tej yam uas tsis yog raws li tib neeg nyiam niaj hnub no. Cov uas tsis ntseeg yeej hais lawv tej lus thuam tom qab kiag tus yaj saub pib hais lus. Thaum nej txo hwj chim ua raws li tus Tswv tus yaj saub tej lus ntuas, kuv cog lus rau nej tias nej yuav muaj kev nyab xeeb thiab kev kaj siab lug ntxiv.
Nej tsis tas xav tsis thoob yog tias thaum xub thawj nej tej kev xav tsis yog raws nraim li tus Tswv tus yaj saub tej lus qhia. Yog tej lub sij hawm uas peb yuav kawm, txo hwj chim, thaum peb txhos caug thov Vajtswv. Peb mus tom ntej nrog kev ntseeg, tso siab rau Vajtswv, vim peb paub hais tias yuav muaj ib lub sij hawm thaum peb Leej Txiv Saum Ntuj Ceeb Tsheej yuav qhia meej dua ntxiv. Ib tug yaj saub tau piav txog lub txiaj ntsim los ntawm tus Cawm Seej uas sib piv tsis tau yog “Leej Tub lub siab nyiam yuav ywj rau Leej Txiv lub siab nyiam.”15 Qhov usa peb muab peb lub siab nyiam ywj rau Vajtswv lub siab nyiam, muaj tseeb tiag, tsis yog kev ywj tiag tiag tiam sis yog qhov pib ntawm txoj kev kov yeej.
Ib txhia yuav sim xav mus xav los txog tus yaj saub tej lus, lawv xav paub tej yam twg nws hais li ib tug yaj saub thiab tej yam twg yog nws tus kheej tej kev xav xwb.
Thaum xyoo 1982, ob xyoos uas ntej Vajtswv hu nws ua ib tug Tuam Thawj Coj, Tij Laug Russell M. Nelson hais tias: “Kuv tsis nug kuv tus kheej hais tias, ‘Thaum twg tus yaj saub hais lus ua tus yaj saub thiab thaum twg nws tsis hais li ntawd?’ Kuv tsuas xav paub hais tias, ‘Kuv yuav ua li cas kom ua neeg zoo li nws?’” Nws hais ntxiv tias, “Kuv [laj lim tswv yim yog] kom txhob sau tus cim nug tom qab tus yaj saub tej lus thiab cia li sau tus cim nthe xwb.”16 Nov yog qhov uas ib tug txiv neej uas txo hwj chim thiab hnov tau sab ntsuj plig tau xaiv kom ua neej li no. Tam sim no, 36 xyoo tom qab ntawd, nws yog tus Tswv tus yaj saub.
Ua rau Nej txoj Kev Ntseeg tus Cawm Seej Loj Tuaj
Nyob hauv kuv lub neej, kuv tau kawm hais tias thaum kuv kawm txog Vajtswv tus yaj saub tej lus thiab ua tib zoo, thiab ua siab ntev, hloov kuv lub siab nyiam kom muaj raws li nws tej lus qhia zuj zus, ces kuv txoj kev ntseeg tus Tswv Yexus Khetos yeej loj tuaj.17 Yog peb xaiv tso nws tej lus ntuas tseg thiab xav tias peb paub zoo dua li nws, peb txoj kev ntseeg yuav tsis muaj zog thiab peb txoj kev txawj pom mus ib txhis los peb yuav tsis pom. Kuv cog lus rau nej tias yog nej rau siab coj raws li tus yaj saub, nej txoj kev ntseeg tus Cawm Seej yuav loj tuaj ntxiv.
Tus Cawm Seej hais tias, “Txhua tus yaj saub … tau ua tim khawv txog kuv.”18
Ib tug yaj saub yeej tsis tav nej kev rau tus Cawm Seej. Tiam sis, nws sawv ntawm nej ib sab thiab taw tes mus rau tus Cawm Seej. Ib tug yaj saub txoj kev lav ris tseem ceeb tshaj thiab lub txiaj ntsim zoo tshaj plaws rau peb yog nws zaj lus tim khawv tseeb, nws txoj kev paub tseeb, hais tias Yexus yog tus Khetos. Zoo li Petus puag thaum ub, peb tus yaj saub tshaj tawm tias, “[Nws] yog tus Khetos, uas yog Vajtswv tus uas muaj sia nyob tus Tub.”19
Yuav muaj ib hnub, thaum peb xav txog peb lub neej hauv lub ntiaj teb no, peb yuav zoo siab kawg uas peb tau nyob hauv lub ntiaj teb hauv ib lub caij uas muaj ib tug yaj saub. Txog hnub ntawd, kuv thov kom peb yuav muaj cai hais tias:
Peb tau mloog nws lus.
Peb ntseeg nws.
Peb tau ua siab ntev thiab muaj kev ntseeg kawm nws tej lus.
Peb tau thov Vajtswv pab nws.
Peb tau sawv nrog nws.
Peb tau txo hwj chim ua raws li nws hais.
Peb tau hlub nws.
Kuv ua tim khawv rau nej tias Yexus yog tus Khetos, peb tus Cawm Seej thiab tus Txhiv Dim, thiab Thawj Tswj Hwm Russell M. Nelson yog Nws tus yaj saub uas Nws tau tsa nyob rau hauv lub ntiaj teb. Los ntawm Yexus Khetos lub npe, amees.