O Le Perofeta a le Atua
E le tu se perofeta i le va o oe ma le Faaola. Ae, e tu o ia i ou talaane ma faasino atu le ala i le Faaola.
Ou te faaopoopo atu la’u faafeiloaiga ia Elder Gerrit Gong ma Elder Ulisses Soares i le usoga e le mafaatusalia o le Korama a le Toasefululua.
I le lagolagoina ai o Peresitene Russell M. Nelson o le perofeta a le Alii ma o le Peresitene o Le Ekalesia a Iesu Keriso o le Au Paia o Aso e Gata Ai, sa avea ai i tatou ma se vaega o se faapotopotoga paia na faasilasilaina mai le lagi—e paia ona o mea na tutupu i le itula ua mavae atu na faamoemoeina i le lagi talu mai le taimi ae lei i ai le lalolagi. O le Alii o Iesu Keriso, o lē o loo taitaia Lana galuega, na tuuina maia, e auala mai ia Peresitene Eyring i le asō, Lana perofeta, Lana taitai faauuina, ia i tatou, o Lona nuu o le feagaiga, ma faatagaina i tatou e faailoa atu faalauaitele lo tatou naunautaiga e lagolago o ia ma mulimuli i ana fautuaga.
I na fia miliona o tagata o le Ekalesia o e e le o i ai faatasi ma i tatou i le Maota Autu mo Konafesi, ou te manao ia tou silafia e faapea, o le Agaga o le Alii i lenei fale i le taimi na lagolagoina ai Peresitene Nelson o le [Agaga] tonu lava lea e pei ona outou faamoemoeina—e faatumulia i le mana faaleagaga. O la tatou faapotopotoga e taitaia mai le lagi ua le na o lenei Maota Autu o le Konafesi ua i ai ae i le lalolagi atoa—i faletatalo i Asia, Aferika, ma Amerika i Matu; i aiga i Amerika Tutotonu ma Saute faapea Europa; i fale atolau i le Pasefika ma motu o le sami. O lenei faapotopotoga o loo i ai i soo se vaega o le lalolagi atonu o e i ai, e tusa lava pe o lou fesootaiga e na o le leo o lau telefonipoto. O o tatou lima na siitia sa le’i faitauina e o tatou epikopo, ae mautinoa lava na faamauina i le lagi, e fai ma a tatou feagaiga i le Atua, ma o a tatou faatinoga e tusifaamaumauina i le tusi o le ola.
E Filifili e le Alii Lana Perofeta
O le filifiliga o se perofeta e faia e le Alii Lava Ia. E leai ni faiga faatosinaga, leai se fefinauaiga leoleoā, leai se faufau i le tofiga, leai se feteena’iga, masalosaloga, fenumia’iga, po o se vāvāō. Ou te faamautu atu foi sa i ai le mana o le lagi faatasi ma i matou i le potu aluga o le malumalu a o matou siomiaina ma le agaga tatalo ia Peresitene Nelson ma lagona le faamaoniga lemafaafitia a le Alii i ona luga.
O le filifiliga o Peresitene Nelson e auauna atu o le perofeta a le Atua sa faia i se taimi ua leva lava. O le fetalaiga a le Alii ia Ieremia e faatatau foi ia Peresitene Nelson: “Na au iloa oe a o lei faia oe e au i le manava; na au faapaiaina oe a o lei fanau mai oe, na au tofia oe e fai ma perofeta i nuu.”1 I le tolu tausaga talu ai, i le 90 tausaga o Elder Nelson, sa lona fa o ia i le tulaga sinia, faatasi ma le toalua o Aposetolo sinia e toatolu sa laiti ifo ia te ia. O le Alii, o lē puleaina le ola ma le oti, na te filifilia Lana perofeta. O Peresitene Nelson, i le 93 o ona tausaga, e ofoofogia lona soifua maloloina. Tatou te faamoemoe o le a tatou faatasi ma ia mo le isi sefulu pe luasefulu tausaga, ae mo le taimi nei o loo matou taumafai e tauanau o ia e aua le toe alu i mauga faasee.
E ui ua tatou lagolagoina le perofeta o le ua faauuina e le Alii, ae ia manino ua na o le Atua tatou te tapuai i ai, lo tatou Tama Faalelagi, ma Lona Alo paia. E ala i le agalelei, le alofa mutimutivale, ma le alofa tunoa o lo tatou Faaola, o Iesu Keriso, e mafai ai i se aso ona tatou toe ulufale atu i lo Laua afioaga.2
Aisea ua Tatou Mulimuli ai i le Perofeta
Ae ui i lea, na aoao mai e Iesu se upumoni taua e uiga i auauna ua Ia auina mai ia i tatou. Na Ia fetalai, “O le talia outou, ua talia e ia o a’u; o le talia foi a’u, ua talia e ia o le na auina mai a’u.”3
O le matafaioi aupito sili ona taua a le perofeta a le Alii o le aoaoina lea o i tatou e uiga i le Faaola ma taitai atu i tatou ia te Ia.
E tele lava mafuaaga tatau e mulimuli ai ia Peresitene Russell M. Nelson. E oo lava ia i latou e le auai i la tatou tapuaiga e ta’ua o ia o se tagata atamai. Sa avea o ia ma fomai i le 22 o ona tausaga, o se fomai tipitipi o le fatu faaaloalogiaina, ma o se paionia lauiloa i le atinaega o le taotoga o le fatu.
O isi o le a faamamaluina atamai ma le faautautaga tatau: e ivasefulu tausaga o le aoaoina e uiga i le ola ma le oti, soifua ai ma le le manatu faapito, alofa ma aoao atu ia fanau a le Atua i soo se tulimanu o le kelope, ma aafiaga faatagata matua o le i ai o fanau e toa 10, fanau a fanau e 57, ma fanau a fanau a fanau e 118 (o lenei fuainumera faaiu e suisui soo; o le atalii o se tasi o fanau o fanau a fanau sa fanau i le Aso Lulu na te’a nei).
O i latou e iloaina lelei o ia e talanoa e uiga ia Peresitene Nelson na te faafetaia’ia faafitauli o le olaga i le faatuatua ma le lototele. Ina ua maliu lona afafine 37 tausaga le matua, o Emily, i le kanesa, ma tuua ai se tane alofa ma se fanau laiti e toalima, sa ou faalogo o ia saunoa, “O a’u o lona tama, o se fomai, ma se Aposetolo a le Alii o Iesu Keriso, ae e ao ona punou lo’u ulu ma faamamaluina, ‘E le faia lo’u loto a o lou finagalo.’”4
Tagatavaai i le Olo
E ui lava tatou te faamemelo i uiga tamalii uma nei, aisea tatou te mulimuli ai ia Peresitene Nelson? Aisea tatou te mulimuli i le perofeta? Aua ua valaauina o ia e le Alii o Iesu Keriso ma tofia o ia o Lona tagatavaai i le olo.
O Karekasone (Carcassonne) o se aai maoae ua faapāina i Farani lea na faatu talu mai lava le vaeluaga o taimi. O olo maualuluga na manu a’e mai ona aupa na puipuia, na atiaeina mo tagata vaai na tutu i luga o na olo i le ao ma le po, ma faatumauina le taulai atu o lo latou gauaiga i mea mamao mo le fili. A vaai atu le tagatavaai ua latalata mai se fili, o lona leo o le lapataiga e puipuia le nuu o Karekasone mai le lamatiaga o le a tupu sa le o mafai ona latou vaaia.
O se perofeta o se tagatavaai i luga o le olo, na te puipuia i tatou mai lamatiaga faaleagaga e le o mafai ona tatou vaaia.
Sa fetalai atu le Alii ia Esekielu, “O oe foi le atalii o le tagata, ua ou tofia oe e fai ma tagata vaai i le aiga o Isaraelu; o le mea lea ia e faalogo mai ai i le upu [mai] lo’u gutu, ma e apoapoai atu ia te i latou mai ia te au.”5
E tele ina tatou talanoa i le manaomia ona tatou mulimuli i le perofeta, ae mafaufau i le avega mamafa ua tuu e le Alii i luga o Lana perofeta: “Afai e te le tautala atu e apoapoai atu ai i le ua amio leaga, ia liliu ese i lona ala; [ae] oti lena tagata amio leaga i lana amio leaga; … o lona toto ou te tauiatua lea ia te oe.”6
O Se Molimau Patino Sili Atu
Tatou te taliaina Peresitene Nelson e pei tatou te taliaina Peteru po o Mose pe ana faapea sa tatou ola i o laua aso. Sa fetalai atu le Atua ia Mose, “O a’u foi ou te faatasi ma lou gutu, ou te aoao atu foi ia te oe i upu e te tautala atu ai.”7 Tatou te faalogo i le siufofoga o le perofeta a le Alii faatasi ma le faatuatua e faapea o ana upu e “mai [le fofoga o le Alii] lava [ia].”8
Pe o se faatuatua tauaso ea lenei? Leai, leai lava. Ua tofu i tatou ma se molimau faaleagaga i le moni o le Toefuataiga o le talalelei a Iesu Keriso. E ala i o tatou lava loto ma filifiliga, na sii a’e ai o tatou lima i lenei taeao, ma tautino atu lo tatou manao e lagolago le perofeta a le Alii i lo tatou “talitonuga, faatuatua, ma tatalo”9 ma ia mulimuli i lana fautuaga. Ua tatou maua le avanoa o ni Au Paia o Aso e Gata Ai e maua ai se molimau patino o le valaauga o Peresitene Nelson e mai le Atua. E ui ua leva ona iloa patino e lo’u toalua, o Kathy, ia Peresitene Nelson mo le latalata i le tolu sefulu tausaga ma e leai sona fesiligiaina o lona tiute paia, ae i lona vaetofiaina, sa amata ai ona ia faitauina lauga o le 34 tausaga talu ai, ma tatalo mo se faamautinoaga loloto o lana matafaioi faaperofeta. Ou te folafola atu ia te outou o lenei molimau sili atu o le a oo mai pe a e saili i ai ma le lotomaualalo ma le agavaa.
Aisea ua tatou matua naunau ai e mulimuli i le siufofoga o lo tatou perofeta? Mo i latou o loo sailia ma le filiga le ola e faavavau, o le siufofoga o le perofeta e aumaia le saogalemu faaleagaga i taimi sili ona faigata.
O loo tatou ola i se paneta ua matua malomaloā lava i le faitau miliona o leo. O le initoneti, o a tatou telefonipoto, o a tatou pusa ua tutumu o faafiafiaga ua aioi mai mo le tatou gauai atu ma lafoina mai a latou faatosinaga i o tatou luga, ma le faamoemoe o le a tatou faatauina a latou oloa ma faaaoga o latou tulaga faatonuina.
E foliga mai o le le muta o le maua pea o faamatalaga ma manatu ua faamanatu mai ai ia i tatou lapataiga faatusi paia o le “felafoaiina … ma feaveaiina,”10 “sousou i le matagi,”11 ma faatoilaloina e “togafiti leaga” a i latou o ē “ua saunia e faasese ai.”12
O le taulaina o o tatou agaga i le Alii o Iesu Keriso e manaomia ai le faalogo atu ia i latou Na te auina mai. O le mulimuli i le perofeta i se lalolagi o le vavao e pei o le pulupulu i se palanikeke mafanafana ma toafimalie i se aso matua malulu lava.
Ua tatou ola i se lalolagi o mafuaaga, felafolafoaiga, finauga, faamasinoga, ma faamalamalamaga. O le fesili, “Aisea?” e lelei i le tele na’ua o vaega o o tatou olaga, lea e faatagaina le mana o lo tatou atamai e taialaina le anoanoai o le mau filifiliga ma faaiuga tatou te feagai ai i aso taitasi.
Peitai o le siufofoga o le Alii e masani ona oo mai e aunoa ma se faamatalaga.13 Ao lei taitai ona suesueina e le au atamamai le aafiaga o le le faamaoni i le faatuatuaina o taitoalua ma fanau, na tautino mai e le Alii, “Aua e te mulilua.”14 I tala atu o le faalagolago i le atamai lava ia, tatou te faapelepele i le meaalofa o le Agaga Paia.
Aua Ne’i Ofo
O le siufofoga o le perofeta, ao talanoa mai ma le agalelei, o le a matele ina avea o se siufofoga e aioi mai ia i tatou ina ia suia, ia salamo, ma toe foi mai i le Alii. A manaomia se faasa’oga, aua ne’i tatou faatuai. Ma aua ne’i popole pe a feteenai le siufofoga o le perofeta ma manatu lauiloa o nei aso. O taimi uma lava e maea ai ona saunoa le perofeta e amata ai foi ona vevela faitioga a le au le talitonu i le feitai.A e lotomaualalo i le mulimulitaia o fautuaga a le perofeta a le Alii, ou te folafola atu ia te outou se faamanuiaga faaopoopo o le saogalemu ma le filemu.
Aua ne’i faate’ia oe pe a i ai se taimi e le muai ogatusa ai ou lava manatu patino ma aoaoga a le perofeta a le Alii. O taimi nei o le aoaoina, o le lotomaualalo, pe a tatou o i o tatou tulivae i le tatalo. Tatou te savavali i luma i le faatuatua, faalagolago i le Atua, iloaina o le a i ai le taimi o le a tatou maua ai le manino atili faaleagaga mai lo tatou Tama Faalelagi. Sa faamatalaina e le tasi perofeta le meaalofa lemafaatusalia o le Faaola o le “tofatumoanaina [o] le loto o le Alo i le finagalo o le Tamā.”15 O le lafoai atu o o tatou loto i le finagalo o le Atua, o le mea moni, e le o le lafoai ua toilalo ae o le amataga lea o se manumalo mamalu.
O le a taumafai nisi e soona vailiili upu a le perofeta, ma tauivi e fuafua po o le a lona siufofoga faaperofeta ae po o a ona manatu faaletagata lava ia.
I le 1982, lua tausaga a o lei valaauina e avea ma se Pulega Aoao, sa saunoa ai Uso Russell M. Nelson: “Ou te lei fesiligia lava a’u po o le a le taimi e saunoa ai le perofeta o se perofeta ae po o le a foi le taimi na te le saunoa ai [o se perofeta]?’ O lo’u lava ia naunautaiga, ‘E mafai faapefea ona avea atili a’u e pei o ia?’” Sa ia faaopoopo mai, “O la’u [filosofia o le] taofi lea o le tuuina o faailoga fesili i tua o malelega a le perofeta ae tuu i ai faailoga ofo.”16 O le auala lea na filifili se tamalii lotomaualalo ma faaleagaga e faatulaga ai lona soifuaga. I lenei taimi, i le 36 tausaga mulimuli ane, o ia o le perofeta a le Alii.
Faateleina o Lou Faatuatua i le Faaola
I lo’u olaga patino, ua ou iloa ai a ou suesueina ma le agaga tatalo ia upu a le perofeta a le Atua ma faaogatusaina faaleagaga, ma le faaeteete, ma le onosai lo’u loto i ana aoaoga musuia, e faateleina lava i taimi uma lo’u faatuatua i le Alii o Iesu Keriso.17 Afai tatou te filifili e faataatia ese ana fautuaga ma manatu e sili atu lo tatou iloa, o le a pagatia lo tatou faatuatua ma puaoa ai la tatou vaaiga e faavavau. Ou te folafola atu ia te outou a outou tumau mausali i le mulimuli i le perofeta, o le a faateleina lo outou faatuatua i le Faaola.
Na fetalai mai le Faaola, “O perofeta uma … na molimau uma ia te au.”18
E le tu se perofeta i le va o oe ma le Faaola. Ae, e tu o ia i ou talaane ma faasino atu le ala i le Faaola. O se tiutetauave aupito silisili ma se meaalofa sili ona faapelepele a se perofeta ia i tatou o lana molimau mautinoa, lona iloa mautinoa, o Iesu o le Keriso. E pei o Peteru o anamua, ua tautino mai lo tatou perofeta, “[O Ia] o le Keriso, le Alo o le Atua soifua.”19
I se aso o lumanai, o le toe tepa i tua i lo tatou olaga faitino, o le a tatou olioli ona sa tatou savavali i le lalolagi i le taimi o se perofeta soifua. I lena aso, ou te tatalo o le a mafai ona tatou faapea atu:
Na matou faalogo ia te ia.
Na matou talitonu ia te ia.
Na matou suesueina ana upu ma le onosai ma le faatuatua.
Na matou tatalo mo ia.
Na matou tutu faatasi ma ia.
Na lava lo matou lotomaualalo e mulimuli ai ia te ia.
Na matou alolofa ia te ia.
Ou te tuuina atu lau molimau paia o Iesu o le Keriso, o lo tatou Togiola ma le Faaola, ma o Peresitene Russell M. Nelson o Lana perofeta faauuina i luga o le fogaeleele. I le suafa, o Iesu Keriso, amene.