Mus txog Xya Zaus Xya Caum

Peb txhua tus yeej yuav ua yuam kev hauv lub neej no. Yus yeej kawm tsis tau ntaus piano zoo yog tias yus tsis tau ua yuam kev ob peb txhiab zaus—tej zaum mus txog ib plhom zaus. Yog tias yus xav kawm ib yam lus tshiab, yus yuav tsum kov yeej kev txaj muag thaum yus ua yuam kev ob peb txhiab zaus—tej zaum mus txog ib plhom zaus. Cov neeg ua kis las txawj tshaj plaws los yeej tseem ua yuam kev tas mus li.

Neeg hais tias, “Kev vam meej tsis txhais hais tias yus tsis ua yuam kev, tiam sis yog qhov uas yus ua yuam kev tas mus li tiam sis tseem muaj kev cia siab.”¹

Thaum nws tsim qhov muag teeb, Thomas Edison hais tias, “Tsis yog hais tias kuv ua yuam kev 1,000 zaus. Lub teeb yog ib yam uas tau tsim tom qab sim 1,000 zaus xwb.”² Charles F. Kettering hais tias tej yam yus ua yuam kev yog “tej ncej ntawm txoj kev mus rau kev vam meej.”³ Cia siab hais tias, txhua zaus peb ua yuam kev ces peb kawm tau tswv yim, ua rau tej yam uas dawm ko taw hloov los ua cov pob zeb uas peb mus ko taw saud.

Nifais txoj kev ntseeg uas tsis ploj mus tau pab nws thaum nws ua yuam kev ob peb zaus mus txog thaum nws tau cov phiaj toog. Mauxes twb sim 10 zaus ua ntej nws twb khiav tawm teb chaws Iyiv nrog cov Neeg Ixayees.

Tej zaum peb xav paub—yog tias Nifais thiab Mauxes ua tus Tswv tej dej num, vim li cas tus Tswv tsis tau los pab nkawd kom ua tau thawj zaus uas nkawd sim ua? Vim li cas Nws cia nkawd—thiab vim li cas Nws cia peb—ua tsis yog thiab ua yuam kev thaum peb sim ua zoo? Muaj ob peb qhov uas teb tau lo lus nug ntawd, xws li:

• Qhov thib ib, tus Tswv paub tias “tej yam no yuav muab kev kawm rau [peb], thiab yuav zoo rau [peb].”⁴

• Qhov thib ob, cia peb “saj qhov iab, kom [peb] thiaj yuav paub saib qhov zoo rau nqi.”⁵

• Qhov thib peb, qhia tias “tus Tswv yuav tua yeej,”⁶ thiab tsuas yog muaj Nws txoj kev tshav ntuj peb thiaj ua tau Nws txoj hauj lwm thiab hloov los ua neeg zoo li Nws.⁷

• Qhov thib plaub, pab peb kawm kom muaj Khetos tej cwj pwm uas yuav kho tsis tau zoo tsuas yog dhau los ntawm “qhov fab ntxeev”⁸ thiab “nyob hauv lub cub tawg ntawm kev txom nyem.”⁹

Yog li ntawd, vim peb lub neej yeej muaj tej yam tsis zoo tag nrho thiab tej yam uas ua rau peb dawm ko taw, peb zoo siab vim peb rov qab sim ua dua los tau.

Xyoo 1970, thaum kuv kawm xyoo ib nyob rau ntawm BYU, kuv tso npe kawm ib hoob physics es tus qhia yog Jae Ballif, ib tug xib hwb zoo kawg. Tom qab nws qhia ib feem tas lawm, nws yuav muab kev xeem ntawv rau peb. Yog tias ib tug tub ntxhais kawm ntawv txais ib tug C, Xib Hwb Ballif yuav cia tus ntawd rov qab xeem ntawv uas txawv me ntsis ntawm kev xeev ntawv thaum xub thawj. Yog tus ntawd xeem ntawv zaum ob thiab txais ib tug B es nws tseem tsis txaus siab, ces nws xeem ntawv zaum peb, zaum plaub, mus li ntawd los tau. Vim nws cia kuv rov qab sim ua dua ntau zaus, nws tau pab kuv kawm tau thiab kuv txais ib tug A nyob hauv nws hoob kawm.

Nws yeej yog ib tug xib hwb uas muaj tswv yim thiab nws tshoov nws cov tub ntxhais kawm ntawv lub siab kom lawv yeej meem sim ua ntxiv—kom lawv xav tias qhov ua lawv ua yuam kev pab tau lawv kawm, es tsis yog kev raug txom nyem, thiab kom lawv tsis txhob ntshai thaum lawv ua yuam kev.

Tsis ntev tas los kuv hu xov tooj rau tus txiv neej no 47 xyoo tom qab kuv kawm nws hoob physics. Kuv nug nws seb vim li cas nws txaus siab cia cov tub ntxhais kawm ntawv rov qab xeem ntawv ntau zaus kom tau qhab nias zoo. Nws teb hais tias: “Kuv xav tuaj kuv cov tub ntxhais kawm ntawv tog.”

Txawm yog peb ris txiaj ntsim vim peb muaj cib fim rov qab sim ua dua ntxiv thaum peb xav yuam kev, peb yeej xav tsis thoob txog tus Cawm Seej txoj kev tshav ntuj thaum Nws cia peb rov qab sim ua dua kom kov yeej kev txhaum, uas yog qhov ua yuam kev hauv peb lub siab.

Tsis muaj leej twg uas tuaj peb tog npaum li tus Cawm Seej. Nyob hauv Nws hoob kawm Nws cia peb pheej rov qab xeev ntawv. Yog peb yuav hloov los ua neeg zoo li nws peb yuav tsum rov qab sim ua dua ntxiv ntau zaus suav tsis txheeb thaum peb niaj hnub sim kov yeej tus neeg ntawm sab cev nqaij daim tawv, xws li kev tswj kev noj mov, kev kawm ua siab ntev thiab zam txim, kov yeej kev ua tub nkeeg, thiab tsis txhob ua txhaum vim tsis ua dab tsi, tej no los kuv hais ib txhia xwb. Yog tias tib neeg yeej ib txwm ua txhaum, ces peb yuav tsum ua yuam kev pes tsawg zaus kom peb yuav hloov muaj cwj pwm zoo li Vajtswv? Ib txhia zaus los? Ntshe yog ib plhom zaus.

Vim tus Cawm Seej paub tias txoj kev ti thiab nqaim muaj tej kev sim siab thiab peb yuav ua yuam kev txhua hnub, Nws twb them tus nqi loj tshaj plaws kom cia peb muaj cib fim rov qab sim ua dua npaum li yuav tsum ua kom ua tau lub neej sim siab no. Kev tawm tsam uas Nws cia peb raug los ua rau peb xav tias peb yuav kov tsis yeej, tiam sis Nws yeej tsis tso peb tseg kom peb tsis muaj kev cia siab.

Xwv kom peb txoj kev cia siab muaj zog thaum peb raug tej kev sim siab ntawm lub neej no, tus Cawm Seej txoj kev tshav ntuj yeej muaj nyob kom pab peb. Nws txoj kev tshav ntuj yog “tus Tswv txoj kev pab los yog lub zog, … ib lub hwj chim uas cia txiv neej thiab poj niam txais tau txoj sia nyob mus ib txhis thiab kev tsa nto tom qab lawv tau sim ua kom tas zog.”¹⁰ Nws txoj kev tshav ntuj thiab Nws txoj kev hlub los nyob nrog peb tas peb lub neej no thaum Nws tshoov peb lub siab, ris peb lub nra, txhawb peb dag zog, tso peb dim, pov hwm peb, kho peb, thiab ua lwm yam kom “pab nws cov neeg,” tsis hais thaum lawv dawm ko taw taug txoj kev ti thiab nqaim.¹¹

Kev hloov siab lees txim yog Vajtswv lub txiaj ntsim uas cia peb thiab ua rau peb ua yuam kev tas mus li tiam sis tseem muaj kev cia siab. Kev hloov siab lees txim tsis yog Nws txoj hau kev yog tias peb ua yuam kev xwb. Kev hloov siab lees txim yeej yog Nws txoj hau kev, vim Nws paub tias peb yeej yuav ua yuam kev. Nov yog txoj moo zoo txog kev hloov siab lees txim, thiab zoo li Thawj Tswj Hwm Russell M. Nelson pom hais tias, “yog tej txheej txheem qhia ntawv uas yuav tas peb lub neej.”¹²

Nyob hauv tej txheej txheem qhia ntawv uas yog kev hloov siab lees txim, tus Tswv tau pom zoo rau lub cim nco txog kom peb yeej meem txais tau Nws txoj kev zam txim. Yog peb muaj lub siab mob thiab lub siab xav ua zoo, Nws zam txim pub rau peb txhua lub lim tiam thaum peb ua yuam kev tas mus li thaum peb taug txoj kev ti thiab nqaim. Vim “txawm yog lawv muaj kev txhaum los, kuv lub siab muaj kev khuv leej puv npo rau lawv.”¹³

Tiam sis Nws yuav zam txim pub rau peb pes tsawg zaus? Nws yuav ua siab ntev ntev li cas? Muaj ib zaug Petus los nug Yexus hais tias, “Tus Tswv, yog kuv ib tug kwv tij pheej ua txhaum rau kuv, kuv yuav zam txim rau nws pes tsawg zaus?Zam xya zaus los?”¹⁴

Tej zaum, Petus xav tias xya zaus yeej txaus kom qhia tias yus tsis tas zam txim ntau zaus tiam thiab yuav tsum tsis txhob muaj siab dawb siab zoo txog txhua yam. Tus Cawm Seej teb Petus tias nws yuav tsum tsis txhob suav—tsis muaj ib lub sij hawm uas yus tsis tas zam txim pub rau lwm tus.

“Yexus teb hais tias, Tsis yog xya zaus xwb, tiam sis yog xya zaus xya caum.”¹⁵

Tsis yog tus Cawm Seej qhia hais tias yus yuav tsum zam txim mus txog 490 zaus xwb. Qhov no yeej zoo li yus txais lub cim nco txog 490 zaus lawm, ces zaum thib 491, ib tug tim tswv los thiab hais tias, “Thov txim, tiam sis koj daim ntawv hloov siab lees txim twb tag sij hawm lawm—txij no mus ntshe koj ua koj xwb.”

Tus Tswv hais xya zaus xya caum kom ua piv txwv txog Nws txoj Kev Theej Txhoj uas nyob mus ib txhis, Nws txoj kev hlub uas tsis paub tag, thiab Nws txoj kev tshav ntuj uas kav ib txhis. “Muaj tseeb tiag, thiab txhua zaus uas kuv cov neeg yuav hloov siab lees txim kuv yuav zam txim rau lawv tej kev txhaum uas lawv ua txhaum rau kuv.”¹⁶

Qhov no tsis txhais hais tias lub cim nco txog tso cai rau yus ua txhaum. Yog vim li no tus Tswv thiaj li hais li no hauv phau Maulaunais: “Tiam sis lawv hloov siab lees txim thiab thov kev zam txim ntau npaum li cas, yog muaj siab ua tiag tiag, los twb tau zam txim rau lawv.”¹⁷

Muaj siab ua tiag tiag txhais hais tias lawv siv zog thiab xav hloov siab tiag tiag. “Hloov siab” yog lo lus tseem ceeb tshaj plaws uas Phau Qhia txog Vaj Lug Kub siv kom qhia ntsiab lus txog kev hloov siab lees txim: “Yog kev hloov siab uas ua rau yus xav zoo txog Vajtswv, yus tus kheej, thiab yus lub neej.”¹⁸Kev hloov siab li ntawd ua rau yus sab ntsuj plig loj hlob tuaj. Yog li ntawd peb txoj kev vam meej tsis yog qhov uas peb ua yuam kev tas mus li, tiam sis yog qhov uas peb kawm thaum peb yuam kev tas mus li es tseem muaj kev cia siab.

Hais txog kev hloov siab, cia li xav txog qhov no: “Tej yam uas hloov yeej tsis zoo ib yam txhua lub sij hawm.” Tsis yog kuv hais qhov tseeb no kom qhia nej tias kuv thuam nej txoj kev txawj ntse tiam sis yog lub tswv yim uas Thawj Tswj Hwm Boyd K. Packer hais, uas hais tias, “Ces thaum peb twb hloov tas lawm—peb ua tiav lawm xwb.”¹⁹

Vim peb tsis xav ua tiav lawm mus txog thaum peb hloov los ua neeg zoo li tus Cawm Seej,²⁰ peb yuav tsum sawv txhua zaus peb vau, nrog rau kev xav loj hlob thiab mus tom ntej txawm peb qaug zog los yog. Thaum peb qaug zog, Nws nplij peb lub siab hais tias, “Kuv pom zoo hlub koj ces txaus lawm. Kuv yuav pub kuv lub hwj chim rau tus uas qaug zog.”²¹

Tsuas yog peb siv kev thaij duab ib lub sij hawm dhau ib lub sij hawm peb thiaj yuav pom tau peb lub cev txoj kev loj hlob tuaj. Yog li ntawd, peb txoj kev loj hlob tuaj ntawm sab ntsuj plig yog ib yam uas yus pom tsis tau tsuas yog tom qab sij hawm dhau mus lawm. Yeej yog lub tswv yim zoo yog peb xav txog yav tas los kom pom tau peb tau vam meej npaum li cas thiab tshoov peb lub siab kom “txiv mus lawm tom hauv ntej nrog txoj kev ntseeg Khetos uas khov kho, muaj ib txoj kev cia siab uas ci kawg nkaus.”²²

Kuv yeej zoo siab mus ib txhis ua tsaug rau peb Niam thiab Txiv Nyob Saum Ntuj Ceeb Tsheej thiab tus Cawm Seej txoj kev ua siab zoo thiab ua siab ntev, cov uas cia peb rov qab sim ua dua thaum peb taug kev rov qab mus cuag Lawv. Los ntawm Yexus Khetos lub npe, amees.