Medlip Yay e Medlip i Ragag

Oloboch e yug ma buch u lane yafas. Piano ni yibe fil rogon ni ngan salap riy e dabyog ni dabin fal’egin e oloboch nib pag i biyu’ yay—sana kub pag milyon yay. ra ngan fil reb e thin nib bi’ech, ma nge yan bee’ u fithik e tamra’ nibe oloboch ni bukun e biyu’—sana ku bukun e milyon. Mus ko gidii’ nib athlete nib cheag nag e darma tal i ngongliy e oloboch.

“N’en nike buch,” e kanoeg ni, “gathi dariy e mul riy, machane yibe mul ni dar mulan’uy riy.”¹

Tomuren nike fal’eg e bulb, me ga’ar Thomas Edison, “Danug oloboch ni 1,000 yay. Fare bulb e kan fal’eg ni bay 1,000 urngin yay.”² C. S. Lewis e weliy mornga’agen e oloboch ni “buguli pa’ay nibe yup ko kanawo’ nib mangil.”³ Gube athapeg, ni ra reb e oloboch ni gadaed be fal’egin me mang e gonop ni nge fil ban’en ngodaed, nibe cheleg e simen nge mang e tawo’ ni yibe yaen riy.

Mich rok Nephi nib gel e ayuweg nge i oloboch i oloboch nge taw ko ngiyal’ ni nge thapeg fapi plet nib brass. I gaman 10 yay ni gay rogon Moses nge taw ko ngiyal’ ni kari yag ni ngar fu’oged e gidii’ nu Israel yu Egypt.

Gadaed ra leam nag—fa’anra Nephi nge Moses ni yow l’agruw ni yow bay u pa’ Somoel, ma mongfan ni dani ayuweg row Somoel ngar cheag gow ko somm’on? Mongfan nike pag row—ma mongfan ni pag daed—ni ngad magawon gaed ma gadaed be oloboch ni gadaed be gay rogon ni ngad cheag gaed? U fithik urngin e fulweg ko binem e duwer, ba’aray in:

• Bin somm’on, manang Somoel ni “pinn’ey e ra pi’ e gonop ngodaed, ma ba fal’ ngodaed.”⁴

• Bin l’agruw, e nge pag daed ngad nanged e mo’oey riy, ya ngad falfalen’ gaed ko n’en nib mangil.⁵

• Bin dalip, e ngan micheg ni “fare mael e fan Somoel,”⁶ ma kemus ni dakean e garathia Rok e rayog ningan rrin’ e murwel Rok man boed Ir.⁷

• Bin aningeg, the ayuweg daed me yo’or e pangin daed ni boed Kristus ni dabyog ni ngan “thapeg” ma kemus ni daken e gafgow⁸ nge “fithik e magawon.”⁹

Ere, fithik e yafas ko simen nge kirkireb, ma gadaed gubin ni gadaed falfalen’ ko kanawo’ nibe mab.

U lane 1970, napan ni gub freshmen u BYU, mug un ko tabolngin ba course ni mornga’agen e physics nike fil Jae Ballif, ba professor nib cheag nag. Tomuren nike mu’ nag fare course, me pi’ e sikeng. Fa’anra feek bea’ e C ma ba adag ni nge fal’ e grade rok, ma ra pag Professor Ballif fare bitir ni nge feek ba sikeng ni ku mornga’agen ta’aban’en. Fa’anra ke feek e B ko bin l’agruw yay nike gay rogon ma ku dar fal’ u wan’, ma rayog ni nge feek fare sikeng ko dalip yay nge aningeg, nge boech nga m’on. Napan nikan pi’ kanawo’eg ni bukun yay, me ke ayuweg neg ni nggu cheag mug feek e A u clas.

Ir e ba professor nima ayuweg e bitir u clas rok ni ngan athamgil—ni ngan sap ko oloboch ni yibe fil ban’en riy, gathi ban’en nib kireb, ma dabin rus ko oloboch ma ngan fil ban’en riy.

Dawori n’uw napan ni gu non ko re mo’on ney nike yan 47 e duw napan ni gu feek e physics rok. Mug fith ngak ko monggan ni ma pag e bitir ni ngar fal’eged rogon e grade roraed ni demtrug ko urning yay. Ma fulweg rok e: “Gu ba adag ni nggu mang ko fare bitir.”

Napan ni gadaed falfalen’ ko urngin yay ni gadaed be athamgil napan e oloboch, fa tafney nike mul, ma gadaed be falfalen’ ko garathia rok Tathapeg nima ayuweg daed ngad gel gaed ko denen, fa pin’en ni gadad ba adag ni dani mangil.

Dariy bee’ ni bay rodaed ni boed Tathapeg. Ma pag daed ngad pired ni gadaed be feek e sikeng Rok. Ra ngan boed Ir ma ba bukun urngin yay ko rran rodaed ni gadaed be magawon ko tirodaed e kireb, ni boed e pin’en ni dabyog ni ngad paged, fil rogon e athamgil nge n’ag fan, dabkin malmal, ni yibe siyeg e denen ni susun e dabin rrin’, iraram in nikan noeg. Gidii’ e ma fal’eg e oloboch, uw urngin e oloboch ni ngad rrin’ed nge taw ko ngiyal’ ni kad mangil gaed? Bukun e biyu’? Sana bukun e milyon.

Iraram ni yimanang ni fare kanawo’ nib ki’iy nib achig radan e bay e sikeng riy ma loboch ni yibe nang nibe buch rodaed ni gubin e rran, ma ke pi’ fare Tathapeg pulwon ni nge pi’ ngodaed bukun yay ni ngad cheag gaed u fayleng. Sikeng nima pag nge buch ni boed ni ri dabyog ni ngan yan u fithik, machane darma digey daed ni dariy e athap.

Ra ngan tay e athap rodaed nib gel napan ni gadaed be yaen u fithik e sikeng, ma garathia rok Tathapeg e bay. Garathia Rok e “ba ayuw u tharmiy fa gelngiy, … gelngiy nima pag e ppin nge pumo’on ni ngad mel’eged e yafas nib manemus nge falfalen’ ko tomuren ni kar rrin’ed gelngin ni rayog rodaed. ¹⁰ Garathia rok ma bay owchen rodaed u lane yafas rodaed napan nibe ayuw, be ba’ud nag e tomal, be pi’ gelngiy, be thapegey, yaliyey, gol, ma “ayuweg e gidii’ rok,” demtrug rogon nibe mul nga wuru’ fare kanawo’ nib ki’iy mab achig radan.¹¹

Kalngan’uy e tawa’ath rok Got nima pag daed ni dabi mul e tafney rodaed napan ni gadaed be mul. Kalngan’uy e gathi be tomur ko tunom Rok ni gadaed ra mul. Kalngan’uy e tunom Rok, ni manang ni gadaed ra fal’egin e oloboch. Iraray e gospel ko kalngan’uy, ke yoeg President Russell M. Nelson ni ga’ar, ban’en ni gadaed ra fil u “lane yafas rodaed.”¹²

Lane biney e yafas ni yibe kalngan’uy, ma fare sacrament e wo’en Somoel ni ngan ning e ayuw Ngak ninge n’ag fadaed. Fa’anra gadaed ra feek nib kirbaen’ gumircha’ey mab munguy e ya’el, ma ra n’ag fan e kireb rodaed napan ni gadaed be athamgil u fithik e oloboch rodaed u lan fare kanawo’ ko m’ag. Urngin e denen rodaed, ma ba sug ko tu’ufeg ngodaed.¹³

Machane uw urngin yay ni nge n’ag fan e kireb rodaed? Uw napan e nibe kalngan’ rodaed? I fith Peter fare Tathapeg ni ga’ar, “Somol, uw urngin yay nrayag ni nge denen walageg nib togopluw ngog ma thingar gu n’ag fan u wun’ug? medlip yay?”¹⁴

Sana, i leam nag Peter ni meldip yay e ba numba nib ga’ ni ay gin paer ni yibe n’ag fan e kireb rok bee’ ni bukun yay ni susun e bay urngin yay. Man fulweg, ni yoeg fare Tathapeg ngak Peter ni dabi tha’eg—ni dabi dugliy urngin yay ni ngan n’ag fan e kireb rok bee’.

“Me fulweg Yesus ni ga’ar, danga’, gathi medlip yay, ya medlip yay e medlip i ragag.”¹⁵

Ere, dar museg Tathapeg urngin e 490. Binem e ta’aborogon ni yibe yoeg ni fare sacrament ni yibe feek e bay urngin yay ni 490, ma napan 491 yay, me ga’ar e tharmiy, “Siro’, machane dabki fal’ e card ko kalngan’uy rom—chiney nga m’on, e i go’gur rom.”

Ke murwel Somoel ko math’eg ni medlip i ragag yay nib fanathin ko fare Bayul Rok, tu’ufeg Rok nib gel, nge garathia Rok ni darma mus. “Arragon, ma oren yay ni gidiiʼ rog e yaed be kalngaenʼ ma gura nʼaegfan roraed e pi ngongol roraed nib togopluw ngog.”¹⁶

Gathi be yoeg ni fare sacrament e ke mang license ko denen. Iraram reb fan nike uneg Somoel e biney e thin u lane babyoren Moroni: “Machane oren yay ni yaed be kalngaenʼ mar gayed e manʼaegfan, u fithikʼ e yulʼyulʼ, min nʼaegfan roraed.”¹⁷

Fithik e yul’yul’ nibay e murwel riy nib riyul’ nge thil nib riyul’. “Thil” e bin thin ko pi Chep nib Thothup nima murwel ko thin ni kalngan’uy: “Tafney nibe thil nge gumircha’ey nima pi’ e pangiy nib bi’ech ngak Got, ngom, nge yafas.”¹⁸ Mitnem e thil e yimamangil riy. Ma arame, tirodaed ban’en nike mangil, e dabi paer nibe kireb nge kireb, machane be mangil iyan ni dabi mul an’uy riy.

Mornga’agen e thil, leam nag e biney e thin: “Pin’en ni darma thil e ma paer ni ta’aborogon.” Binem e thin nib riyul’ e gathi nge n’angginem ni boed ni danum nang ban’en machane ba gonop rok President Boyd K. Packer, ni ulul ni ga’ar, “Ma napan ni gadaed rat al ko thil—ma kad mus gaed.”¹⁹

Bachan ni dabun daed ni ngad mu’ gaed nge taw ko ngiyal’ ni kad boeded fare Tathapeg rodaed, ²⁰ba tu’uf ni ngad sak’iy ko gubin yay ni gadaed be mul, ni gadaed ba adag ni ngad gel gaed ni demtrug rogon e mo’owaer rodaed. Fithik e mo’owaer rodaed, me ga’ar ngodaed, “Ayuw rog ngom e kemus e ta’are n’en ni ir e thangi yag ngom: ya gelngig e rib gel ko ngiyal’ ni gab me’waer.”²¹

Kemus ni gadaed ra sap ngay ngad nanged fan e rayog ni ngad nanged rogdaed. Boed ni, rogon e ya’el rodaed e baga’ nib mathmath ma kemus ni napan ni gadaed be sap nga tomur ko n’en nike buch. Ba mangil ni ngu un sap nga tomur ngan poey e murwel rodaed me ayuweg daed ni ngan “piiʼed iyaen nga mʼon u fithikʼ e yulʼyulʼ romed ngakʼ Kristus, nib machalbog laniyaenʼmed ko athap.”²²

Gub falfalen’ ko gol, gapas, nge athamgil rok e Galabthir u Tharmiy nge Tathapeg, nibe pag daed ngad kalngan’ gaed ko wub rodaed ngad sulod nga Pow’chen Raed. U dakean fithngan Yesus Kristus, amen.