Tera ae a Riai n Oota Iai Kaain te Nakoanibonga n Tatabemaniia
Katabuam n te Nakoanibonga ae te Aaron bon aan buokakiia natin te Atua ni karekea mwaakan ana kamaiu Kristo.
Taari, bon te tibwanga n raoni ngkami n te maungatabu ae kakaongora aei. Ngke I riki bwa te moan Beretitenti, I kukurei ni butimwaaia ara moan kurubu ni mitinare aika boou. Tabeman mai irouia ara mitinare aika a mwaatai a katauraoi ibukin te maroro ae uarereke ma ngaiia. I nooria bwa a barongai aia kaintekateka ataei n te mronron ae iteranaki.
“Bukin tera kam kabonganai aia kaintekateka ataei aika uarereke?” I titiraki.
Taraan ae a maamaa n taetae, mitinare, a taku, Ibukiia mitinare aika boou.”
I kakoaua te kawai are ti taraia tabeman n ae kakaawaki iai mwiina n aia taratara bwa antai ngaiia ao te aekakira ae a na riki iai.1 Ara mitinare aika boou a tekateka iaon kaintekateka ni ikawai n te bong anne.
N tabetai, I maaku, ti anganiia ara ataeinimwaane man te Nakoanibonga ae te Aaron kaintekateka bwa a na tekateka iaona nakon riki ae ti na buokiia n nooria bwa e a tia te Atua n anganiia te katabeaki ae tabu ao te mwakuri ae kakaawaki ae a na karaoia.
E reireiniira Beretitenti Thomas S. Monson bwa ataeinimwaane a riai n oota “tera ae nanonaki … n riki bwa taan uouota ana nakoanibonga te Atua. A kainnanoa te kairaki n aia atatai n te tamnei ibukin tabun weteaia are a katabuaki iai.”2
N te bong aei, I tataro bwa te Tamnei ae Raoiroi e na kairiira n tatabemaniira ni kakorakora ara atatai ni mwaakan te Nakoanibonga ae te Aaron ae tabu ao ni kaungai nanora bwa ti na botumwaaka ni kabanei riki nanora iaon ara beku n te nakoanibonga. Au rongorongo bon ibukiia kaain te Nakoanibonga ae te Aaron, n raonaki ma naake kaain te Nakoanibonga ae te Merekitereka.
E reirei Unimwaane Dale G. Renlund bwa oin te kantaninga n te nakoanibonga bon katauraoaia natin te Atua ni karekea mwaakan ana mwakuri ni kamaiu Iesu Kristo.3 Ni karekea mwaakan ana mwakuri ni kamaiu Kristo inanon maiura, ti riai n rairi nanora man ara bure, ni karaoi ao ni kawakin berita aika tabu rinanon otenanti, ao ni karekea te Tamnei ae Raoiroi.4 Tiaki aikai reirei aika ti karaoi n tii te taina, riki, a kaai ni mwakuri, ni kakorakoraia ao ni katei aroia i bon imarenaia n reitanako te rikirake n “nakomai nakon Kristo, ma ni kakororaoaki irouna.”5
Ngaia are, tera taben te Nakoanibonga ae te Aaron n aei? E kanga ni buokiira ni karekea mwaakan ana mwakuri ni kamaiu Kristo? I kakoaua te kaeka a kona ni kuneaki n taian kiing ake a tauaki mwiia n te Nakoanibonga ae te Aaron—kiing ibukin aia ibuobuoki anera ao katauraoan te euangkerio.6
Aia Mwakuri n Ibuobuoki Anera
Ti na moanna man aia mwakuri n ibuobuoki anera. Imwaain ae a karekea aia onimaki iroun Iesu Kristo natin te Atua, a riai ni kinaa ao n reireiaki Ana euangkerio. N aron ae e taku te Abotoro Bauro:
“A na iranna n onimakina Teuare a tuai n ongo taekana? ao a na iranna n ongo ngkana akea te tia taekinna?
“Ao a na iranna n taetaekinna ngkana aki kanakoaki? …
“Ma ngaia ae e reke te onimaki n te ongora, ao te ongora man rongorongoni Kristo.”7
Man moan waakin te tai, te Atua “e kanakoia anera bwa a na buokiia natia aomata, bwa a na kaota … rokon Kristo.”8 Anera bon aomata mai karawa ae a uouota ana rongorongo te Atua.”9 N te taetae n Ebera ao n Erene, mwakoron te taeka ae anera bon “te tia uarongorongo.”10
N aron naba kanakoaia anera aika taan uarongorongo aika kariaiakaki bwa a na taetaekina Ana taeka ao ni katea te onimaki, ngaira ake ti taua te nakoanibonga ae te Aaron ti a tia ni katabuaki n “anga reirei, ao ni kaoia ni kabane bwa a na nako nakon Kristo.”11 N taetaekina te euangkerio bon ana beku te nakoanibonga. Ao te mwaaka are e irekereke ma te beku aei tiaki tii ibukiia burabeti ke ibukiia mitinare. Bon ibukim!12
Ngaia are ti na kanga ni karekea te mwaaka aei? E kanga te riikan ae 12 ana ririki—ke mai buakora—ni uota te onimaki inanon Kristo nako nanoia natin te Atua? Ti waaki man kawakinan Ana taeka ngaia are e memena mwaakana ibuakora.13 E berita bwa ngkana ti karaoia, ti na karekea “mwaakan te Atua ibukin anaakin nanoia aomata.”14 Bon te tai n angareirei n te boowi inanon te kooram ke ni kawarii mweengaia kaain te aro. Taraan ae te bwai ae aki katauraoaki arona, n aron te maroro ma te rao ke kaain te utu. Inanon waaki aikai, ngkana ti tauraoi, ti kona n reireia te euangkerio n aron are a karaoia anera: man mwaakan te Tamnei ae Raoiroi.15
I ongora iroun Jacob n te tai ae nako, kaain te Nakoanibonga ae te Aaron i Papua New Guinea, e kakoaua mwaakan ana Boki Moomon ao arona ni buokia n totokoa te buakaka ao n iriira te Tamnei ae Raoiroi. Ana taeka e karikirakea au onimaki ao aia onimaki tabeman. E rikirake au onimaki ngkai I ongora irouia kaain te Nakoanibonga ae te Aaron n reirei ao ni kakoaua ma te karinerine n aia boowi n te kooram.
Ataeinimwaane, ngkami taan uarongorongo aika kariaiakaki. Rinanon ami taeka ao ami mwakuri, kam kona ni uota onimakinan Kristo nako nanoia natin te Atua.16 Ngkai e taku Beretitenti Russell M. Nelson, “Kam na riki bwa anera n ibuobuoki nakoia.”17
Te Katauraoi n te Euangkerio
Rikiraken te onimaki iroun Kristo e kairiiri n taainako nakon te nano ni kan bitaki ke n rairannano.18 Ngaia e bon riai bwa kiing ibukin aia ibuobuoki anera e raonaki ma te kiing ni katauraoan te euangkerio, “te euangkerio n rairannano ao ni bwabetitio, ao kamaunaan buure.”19
Ngkai ko kamatebwaia ami beku n te Nakoanibonga ae te Aaron, kam na noora te tua ae mataata ni kaoia tabeman bwa a na rairi nanoia ao ni karaoiroia riki.20 Tiaki nanon anne bwa ti na tei ni koonan te kawai n takaruaea, “Rairi nanomi!” N angin te tai, nanona bwa ti na rairi nanora, ti kabwarabure, ao ngkai ti buokiia tabeman, ti anga te kantaninga ao te rau are e uota te rairannano—ibukina bwa ti a tia n rinanona i bon iroura.
I a tia n raoniia kaain te Nakoanibonga ae te Aaron ngkai a kawariia kaain te kooram. I kakoaua bwa aia tararua e kamaraui naano ao ni buokiia tariia ma mwaneia n namakina ana tangira te Atua. I ongora n ana koaua temanna te ataeinimwaane nakoia rorona ni mwaakan te rairannano. N aron ae karaoia, a kamarauaki naano, a karaoaki taian motinnano, ao e namakinaki mwaakan ana kamaiu Kristo.
E reirei Beretitenti B. Hinckley: “Teuana te bwai bon te rairannano. Bon teuana naba ni karekea kamaunaan ara bure ke ni kabwaraaki ara bure. Te mwaaka ni kakoroa bukin aei e kuneaki n te Nakoanibonga ae te Aaron.”21 Te otenanti n te bwabetito ao te toa e kaota koauan ao bwaninin ara rairannano.22 E kamataata Beretitenti Dallin H. Oaks n te kawai aei: “Ti tuangaki bwa tina rairi nanora man ara bure ao n nakon te Uea ma nanora ae uruaki ao te tamnei ae raraoma ao ni kana te toa. … Ngkana ti kabooui ara berita n te bwabetito n te kawai aei, te Uea e kabooua mwiin kaitiakara n ara bwabetito.”23
Taari, bon te tibwanga ae tabu karaoan otenanti ake a na uota kamaunaan buure nakoia ake a rairi nanoia man aia bure rinanon mwaakan ana kamaiu te Tia Kamaiu.24
Ia tibwa kaongoaki rongorongon te ibonga, are e korakai n taetae ngke e kakabwaia te toa n te moantai. Ngkai e karaoia, e roko te tamnei ae mwaaka iaona ao kaain te taromauri. Imwiin te bootaki, e kaota ana koaua ae bebete ibukin mwaakan te Atua are e namakinna n tain te otenanti anne.
I Sydney, Aotiteria, aman kaain te kooram n ibonga a bwabetitoia kaain te utu ae Mbuelongo. Tinan temanna mai buakoia ibonga aikai e taekina korakoran mwiina ae riki nakon natina te mwaane. Ibonga aikai a moanna n oota n nanon “kariaiakaki mai roun Iesu Kristo.”25
Ngkai kam ataia, ibonga a kona ngkai n tararua ni karaoan bwabetito ni bonomwii inanon te tembora. Natiu te mwaane ae 17 ana ririki e bwabetitoaki n te tai ae nako ibukiia ara bakatibu tabeman. Ti kaai n namakina te kakaitau ae bati ibukin te Nakoianibonga ae te Aaron ao te tibwanga ni mwakuri ibukin kamaiuaia natin te Atua.
Ataeinimwaane, ngkai kam nanomatoa ni kabaeaki n ami beku n te nakoanibonga, kam reitaki ma te Atua inanon Ana mwakuri “ni karekea te aki mamate ao te maiu ae akea tokina ibukin te aomata.”26 Taneiai n aekakin aikai a na karikirakea nanom ao ni katauraoiko n reireia te rairannano ao ni bwabetitoia taan rairaki n aroia mitinare. A na katauraoiko naba ibukin mwakuri n ibuobuoki n abwakin maium te Nakoanibonga ae te Merekitereka.
Ioane te Tia Bwabetito, Ara Katoto
Kaain te Nakoanibonga ae te Aaron, iai tibwangara ao ara beku ae ti na karaoia n riki bwa taian toro ma Ioane te Tia Bwabetito. E kanakoaki Ioane bwa te tia uarongorongo ae e kariaiakaki ni kakoaua ibukin Kristo ao ni kaoia ni kabane bwa a na rairi nanoia ao ni bwabetitoaki—bon anne, e kabongana kiingin te Nakoanibonga ae te Aaron are ti maroroakinna. E taku Ioane, “I bon bwabetitoingkami ngai n te ran nakon rairan nanomi: ma Teuare e na roko imwiiu e korakora riki nako iu …: e na bwabetitoingkami n te Tamnei ae Raoirioi, ma te ai.”27
N aron te Nakoanibonga ae te Aaron, ma kiing ni buobuoki mairouia anera ao te euangkerio ni katauraoi, e katauraoi kawaia natin te Atua ni karekea, rinanon te Nakoanibonga ae te Merekitereka, ana bwaintituaraoi te Tamnei ae Raoiroi, te bwaintituaraoi ae korakora ae ti kona ni karekea n te maiu aei.28
Bon te katabeaki ae korakora ae e anga te Atua nakoia kaain te Nakoanibonga ae te Aaron!
Te Kakao ao te Berita
Kaaro ao taan kairiiri, kam kona n namakina kakaawakin ana reirei Beretitenti Monson ni buokiia ataeinimwaane n oota “tera ae nanonaki … n riki bwa taan uouota ana nakoanibonga te Atua”?29 N oota ao ni kakorakora te Nakoanibonga ae te Aaron e na katauraoiia n riki bwa kaain te nakoaibonga aika a kakaonimaki, mitinare aika a kaonaki n te mwaaka, ao bumwaane ao kaaro aika raoiroi. Rinanon aia mwakuri n ibuobuoki, aki tii oota ma a na namakina koauan mwaakan te nakoanibonga, te mwaaka ni mwakuri n aran Kristo ibukin kamaiuakiia natin te Atua.
Ataeinimwaane, iai ana mwakuri te Atua ae kam na karaoia ibukina.30 Katabuam n te Nakoanibonga ae te Aaron bon aan buokakiia natin te Atua ni karekea mwaakan ana mwakuri ni kamaiu Kristo. I berita bwa ngkai ko karaoi taian beku aika tabu aikai bwa aan maium, ko na namakina mwaakan te Atua n aron are ko tuai namakinna mai imwaaina. Ko na oota ni kinaakim bwa ngkoe natin te Atua, ko weteaki ma te nakoa ae tabu bwa ko na karaoa Ana mwakuri. Ao ko na buoka katauraoan te kawai ibukin okiia natina. Man koaua aikai I kakoaua n aran Iesu Kristo, amen.