2010–2019
Qhov uas Txhua tus uas Tuav lub Pov Thawj Hwj Aloos Yuav Tsum To Taub
Plaub Hlis Ntuj Xyoo 2018

Qhov uas Txhua tus uas Tuav lub Pov Thawj Hwj Aloos Yuav Tsum To Taub

Los ntawm Douglas D. Holmes

Pab Cuam thib Ib hauv Koom Haum Tub Hluas Pawg Tuam Thawj Tswj Hwm

Nej yeej yuav tsum muaj lub Pov Thawj Hwj Aloos kom pab tau Vajtswv cov me nyuam txais tau Khetos lub hwj chim uas theej txhoj.

Cov kwv tij, kuv yeej zoo siab koom nrog nej nyob hauv lub rooj sab laj tseem ceeb no. Thaum kuv yog ib qhov chaw tshaj tawm txoj moo zoo tus thawj tswj hwm tshiab, kuv zoo siab thaum kuv yuav txais ib pawg tub txib tshiab. Cov tub txib uas twb nyob ntev lawm tau npaj muaj kev sib ntsib nrog cov tshiab. Kuv pom tias lawv twb tau kho cov me nyuam rooj zaum tso ua voj voog ib nrab.

“Vim li cas nej siv cov me nyuam rooj nev?” kuv nug.

Cov tub txib txaj muag me ntsis, hais tias, “Rau cov tub txib tshiab zaum.”

Kuv ntseeg tias qhov uas peb saib lwm tus muaj nqi li cas ces ua rau lawv saib lawv tus kheej rau nqi zoo ib yam li ntawd thiab hloov lawv txoj kev xav tias lawv yuav ua neeg zoo li cas.1 Hnub ntawd peb cov tub txib tshiab twb zaum saum rooj zaum loj.

Tej lub sij hawm, kuv ntshai hais tias, zoo li peb muab cov me nyuam rooj zaum peb cov tub hluas ntawm lub Pov Thawj Hwj Aloos zaum, es tsis pab lawv paub tias Vajtswv tau tso siab rau lawv pub lawv ua ib txoj hauj lwm tseem ceeb thiab dawb huv ua.

Thawj Tswj Hwm Thomas S. Monson ntuas peb tias cov tub hluas yuav to taub “lub ntsiab txog … kev ua cov uas tuav Vajtswv lub pov thawj hwj. Peb yuav tsum coj lawv kom lawv paub txog qhov dawb ceev ntawm lawv txoj hauj lwm uas Vajtswv tau tsa lawv ua.”2

Hnub no kuv thov kom tus Vaj Ntsuj Plig Dawb Huv yuav coj peb to taub ntxiv txog lub hwj chim thiab qhov dawb ceev ntawm lub Pov Thawj Hwj Aloos thiab tshoov peb lub siab kom rau siab tsom ntsoov rau peb tej dej num pov thawj hwj. Kuv zaj lus yog hais rau tag nrho cov uas tuav lub Pov Thawj Hwj Aloos, tsis hais cov uas kuj tuav lub Pov Thawj Hwj Mekixedes los yog.

Txwj Laug Dale G. Renlund qhia tias lub hom phiaj ntawm lub pov thawj hwj yog kom Vajtswv cov me nyuam txais tau Yexus Khetos lub hwj chim uas theej txhoj.3 Yog peb xav txais Khetos lub hwj chim theej txhoj hauv peb lub neej, peb yuav tsum muab siab rau ntseeg Nws, hloov siab lees txim rau peb tej kev txhaum, ua raws li tej kev khi lus dawb ceev dhau los ntawm kev ua kab ke, thiab txais tus Vaj Ntsuj Plig Dawb Huv.4 Tej no tsis yog tej ntsiab cai uas peb ua ib zaug xwb; tiam sis, tej no yeej koom ua ke, ib yam txhawb nqa ib yam nyob hauv tus txheej txheem uas pab peb kawm txhua lub sij hawm mus txog thaum peb “cia li los cuag Khetos, thiab cia li los ua neeg zoo tag nrho dhau los ntawm nws.”5

Yog li ntawd, vim li cas muaj lub Pov Thawj Hwj Aloos kom pab ua tej no? Lub Pov Thawj Hwj Aloos ua li cas pab peb txais tau Khetos lub hwj chim theej txhoj? Kuv ntseeg tias tej lus teb nyob ntawm cov yuam sij uas los ntawm lub Pov Thawj Hwj Aloos—cov yuam sij ntawm cov tim tswv txoj kev txhawb pab thiab ntawm txoj moo zoo uas npaj neeg lub siab.6

Cov Tim Tswv txoj Kev Txhawb Pab

Cia peb pib hais txog ib yam ntawm cov tim tswv txoj kev txhawb pab. Ua ntej Vajtswv cov me nyuam yuav muaj kev ntseeg Yexus Khetos, lawv yuav tsum paub txog Nws thiab kawm txog Nws txoj moo zoo. Zoo li tus Thwj Tim Povlauj hais tias:

Lawv yuav ua li cas ntseeg tus uas lawv tsis tau hnov dua? Yog tsis muaj neeg mus qhia txoj moo zoo rau lawv, lawv yuav ua li cas hnov?

“Yog tsis muaj neeg qhia nws zaj, lawv yuav ua li cas tau hnov? …

“Yog li ntawd, twb yog lawv hnov txoj moo zoo, lawv thiaj ntseeg, thiab txoj moo zoo uas lawv hnov ntawd yog [Vajtswv] txoj lus.”7

Txij thaum chiv keeb los, Vajtswv tau “xa cov tim tswv los txhawb pab noob neej, los ua tshwm sim txog Khetos txoj kev los.”8 Cov tim tswv yog cov neeg nyob saum ntuj ceeb tsheej uas qhia Vajtswv zaj xov.9 Nyob hauv lus Henplais thiab lus Kilis, lo lus tim tswv txhais tias “tub xa xov.”10

Zoo ib yam li cov tim tswv yog cov tub xa xov uas Vajtswv tso cai rau thiab xa mus tshaj tawm Nws txoj lus lawv thiaj li txhawb tib neeg txoj kev ntseeg, peb cov uas tuav lub Pov Thawj Hwj Aloos muaj cai mus “qhia, thiab caw tag nrho sawv daws kom los cuag Khetos.”11 Kev tshaj tawm txoj moo zoo yog ib txoj dej num pov thawj hwj. Thiab lub hwj chim uas muaj nrog rau txoj dej num no tsis yog rau cov yaj saub los sis cov tub txib xwb. Lub hwj chim no yeej yog rau nej siv!12

Yog li ntawd peb yuav ua li cas txais tau lub hwj chim no? Ib tug dikas uas muaj 12 xyoos—los sis peb ib tug twg—yuav ua li cas kom coj tau kev ntseeg Khetos rau Vajtswv cov me nyuam lub siab? Peb pib khaws Nws txoj lus cia kom peb thiaj muaj lub hwj chim nyob hauv peb.13 Nws tau cog lus tias yog peb ua li ntawd, peb thiaj yuav muaj “Vajtswv lub hwj chim los mus yaum neeg.”14 Tej zaum yog ib lub cib fim qhia hauv nej pawg txoj kev sib ntsib los sis thaum nej mus xyuas ib tug mej zeej. Tej zaum yog thaum nej ua ib yam zoo li nej sib tham nrog ib tug phooj ywg los sis ib tug hauv nej tsev neeg. Txawm nyob qhov twg los, yog peb twb npaj lawm, peb qhia tau txoj moo zoo ib yam li cov tim tswv qhia: los ntawm tus Vaj Ntsuj Plig Dawb Huv lub hwj chim.15

Daim Duab
Jacob thiab Tij Laug Holmes

Tsis ntev tas los kuv hnov Jacob, ib tug uas tuav lub Pov Thawj Hwj Aloos nyob hauv Papua New Guinea, ua tim khawv txog Phau Ntawv Maumoos thiab qhov uas phau ntawv tau pab nws tiv tau kev phem thiab ua raws li tus Ntsuj Plig. Nws tej lus tau txhawb kuv txoj kev ntseeg thiab lwm tus txoj kev ntseeg. Kuv txoj kev ntseeg kuj tau loj tuaj thaum kuv tau hnov cov uas tuav lub Pov Thawj Hwj Aloos qhia thiab ua tim khawv nyob hauv lawv tej pawg kev sib ntsib.

Cov tub hluas es, nej yog cov tub xa xov uas Vajtswv tau tso cai rau. Dhau los ntawm nej tej lus thiab tej yam nej ua, nej yuav ua rau Vajtswv cov me nyuam muaj kev ntseeg Khetos hauv lawv lub siab.16 Zoo li Thawj Tswj Hwm Russell M. Nelson hais tias, “Lawv yuav xav tias nej yog ib tug tim tswv uas los txhawb pab.”17

Txoj Moo Zoo uas Npaj Neeg lub Siab

Qhov uas tib neeg txoj kev ntseeg Khetos loj tuaj yeej ua rau lawv xav hloov los yog hloov siab lees txim.18 Yog li ntawd yeej tsim nyog xav tias tus yuam sij ntawm cov tim tswv txoj kev txhawb pab yuav koom nrog tus yuam sij ntawm txoj moo zoo uas npaj neeg lub siab, “uas yog txoj hmoo qhia kev hloov siab lees txim thiab kev cai raus dej, thiab txoj kev zam txim rau tej kev txhaum.”19

Thaum nej kawm txog nej tej dej num ntawm lub Pov Thawj Hwj Aloos, nej yuav paub meej tias Vajtswv txib nej caw lwm tus kom hloov siab lees txim thiab ua neeg zoo dua ntxiv.20 Qhov no tsis txhais hais tias peb sawv rau ntawm txoj kev sib tshuam qw hais tias, “Nej cia li hloov siab lees txim!” Feem ntau qhov no txhais hais tias peb hloov siab lees txim, peb zam txim, thiab thaum peb txhawb pab lwm tus, peb qhia txog kev cia siab thiab kev kaj siab lug uas los ntawm kev hloov siab lees txim—vim peb twb paub txog tej ntawd peb tus kheej.

Kuv tau nrog cov uas tuav lub Pov Thawj Hwj Aloos thaum lawv mus xyuas lwm tus hauv lawv tej pawg. Kuv tau pom lawv txoj kev saib xyuas ua rau lawv cov kwv tij lub siab mos muag thiab pab lawv hnov tau Vajtswv txoj kev hlub. Kuv hnov ib tug tub hluas ua tim khawv rau nws cov phooj ywg txog lub hwj chim ntawm kev hloov siab lees txim. Thaum nws ua li ntawd, ua rau tib neeg lub siab mos muag, lawv cog lus ua zoo, thiab lawv hnov Khetos lub hwj chim kho neeg lub siab.

Thawj Tswj Hwm Gordon B. Hinckley qhia hais tias: “Kev hloov siab lees txim yog ib yam tseem ceeb. Tiam sis yog ib yam ntxiv kom tshem peb tej kev txhaum. Lub hwj chim uas ua tau li no yog nyob hauv lub Pov Thawj Hwj Aloos.”21 Ob txoj kab ke uas yog kev cai raus dej thiab kev muab lub cim nco txog cia peb ua tim khawv thiab hloov siab lees txim tag nrho rau peb tej kev txhaum.22 Thawj Tswj Hwm Dallin H. Oaks tau piav txog qhov no zoo li no: “Tus Tswv txib peb hloov siab lees txim rau peb tej kev txhaum thiab los cuag tus Tswv nrog ib lub siab mob thiab lub siab xav ua zoo thaum txais lub cim nco txog. … Thaum peb rov qab ua peb tej kev khi lus ntawm peb txoj kev cai raus dej zoo li no, tus Tswv rov qab muab peb ntxuav huv zoo li thaum peb ua kev cai raus dej.”23

Cov kwv tij, yeej yog ib qho cib fim dawb ceev kom tswj hwm cov kab ke uas coj tus Cawm Seej lub hwj chim uas theej txhoj rau tib neeg uas hloov siab lees txim.24

Tsis ntev tas los muaj neeg qhia kuv txog ib tug pov thawj uas nyuaj rau nws hais lus es yog thawj thawj zaug uas nws foom koob hmoov rau lub cim nco txog. Thaum nws ua li ntawd, ua rau nws thiab pawg ntseeg hnov tau lub hwj huam uas muaj zog heev. Nyob hauv kev sib ntsib, nws tau ua tim khawv txog Vajtswv lub hwj chim uas nws hnov nyob hauv txoj kab ke ntawd.

Daim Duab
Pawg pov thawj nrog tsev neeg Mbuelongo

Nyob hauv Sydney, Australia, plaub tug hauv ib pawg pov thawj tau muab cov nyob hauv tsev neeg Mbuelongo ua kev cai raus dej. Tus niam tsev ntawm ib tug pov thawj no qhia rau kuv tias qhov no tau pab nws tus tub npaum li cas. Cov pov thawj no twb kawm hais tias qhov uas yus “tau txais txoj cai los ntawm Yexus Khetos” txhais li cas.25

Zoo li nej paub lawm, nim no cov pov thawj muaj cai muab neeg ua kev cai raus dej sawv cov neeg tuag cev nyob hauv lub tuam tsev. Tsis ntev tas los kuv tus tub uas muaj 17 xyoo tau muab kuv ua kev cai raus dej sawv peb cov yawg koob cev. Wb ob leeg twb ris Vajtswv txiaj rau lub Pov Thawj Hwj Aloos thiab lub cib fim uas peb tau pab Vajtswv cov me nyuam txais tau kev cawm seej.

Cov tub hluas, thaum nej rau siab ua nej tej dej num pov thawj hwj, nej koom nrog Vajtswv thiab Nws txoj hauj lwm “kom tib neeg tsis txawj tuag thiab tau txoj sia nyob mus ib txhis.”26 Tej yam zoo li no yuav ua rau nej xav ua ntxiv thiab npaj nej mus qhia kev hloov siab lees txim thiab muab neeg hloov siab los ntseeg ua kev cai raus dej thaum nej ua tub txib. Tej no kuj npaj nej kom pab lwm tus tas nej lub neej nyob hauv lub Pov Thawj Hwj Mekixedes.

Yauhas tus Muab Neeg Ua Kev Cai Raus Dej, tus uas Coj Yam Ntxwv rau Peb

Cov uas tuav lub Pov Thawj Hwj Aloos, peb muaj cib fim thiab tej dej num ua cov tub qhe nrog rau Yauhas tus uas Muab Neeg Ua Kev Cai Raus Dej. Vajtswv txib Yauhas ua ib tug tub xa xov uas muaj cai ua tim khawv txog Khetos thiab caw txhua leej txhua tus hloov siab lees txim thiab ua kev cai raus dej—los yog hais tias, nws tau siv cov yuam sij ntawm lub Pov Thawj Hwj Aloos uas nyuam qhuav hais txog. Yauhas hais tias, “Qhov uas kuv muab nej ua kev cai raus rau hauv dej, qhia hais tias nej twb tso nej tej kev txhaum tseg lawm, tiam sis tus uas yuav lawv kuv qab los, nws yuav muab nej raus los ntawm Vaj Ntsuj Plig tus Dawb Huv thiab ntawm hluav taws.”27

Yog li ntawd lub Pov Thawj Hwj Aloos, nrog cov yuam sij ntawm cov tim tswv txoj kev txhawb pab thiab txoj moo zoo uas npaj neeg lub siab, npaj txoj kev rau Vajtswv cov me nyuam txais, dhau ntawm lub Pov Thawj Hwj Mekixedes, lub txiaj ntsim Vaj Ntsuj Plig Dawb Huv, lub txiaj ntsim zoo tshaj plaws peb txais tau hauv lub neej no.28

Yeej yog kev lav ris zoo kawg nkaus uas Vajtswv tau muab rau cov uas tuav lub Pov Thawj Hwj Aloos!

Kev Caw thiab Kev Cog Lus

Cov txiv tsev thiab cov thawj coj pov thawj hwj, nej puas to taub tias Thawj Tswj Hwm Monson tej lus ntuas tseem ceeb npaum li cas kom pab cov tub hluas to taub tias “lub ntsiab txog … kev ua cov uas tuav Vajtswv lub pov thawj hwj”?29 Kev to taub thiab kev rau siab siv lub Pov Thawj Hwj Aloos yeej yuav npaj lawv hloov los ua cov uas tuav lub Pov Thawj Hwj Mekixedes rau siab ntseeg, cov tub txib uas muaj hwj chim puv npo, thiab cov txiv tsev ncaj ncees. Dhau los ntawm lawv txoj kev pab lwm tus, lawv yuav to taub thiab hnov tau qhov uas muaj lub hwj chim pov thawj hwj tiag tiag, lub hwj chim tuav Khetos lub npe ua tej yam kom cawm Vajtswv cov me nyuam dim.

Cov tub hluas, Vajtswv muaj ib txoj hauj lwm rau nej ua.30 Nej yeej yuav tsum muaj lub Pov Thawj Hwj Aloos kom pab tau Nws cov me nyuam txais tau Khetos lub hwj chim uas theej txhoj. Kuv cog lus rau nej tias thaum nej tso ntsoov rau tej dej num dawb ceev no, nej yuav hnov Vajtswv lub hwj chim ntau dua li yav tas los. Nej yuav to taub hais tias nej yog Vajtswv cov tub, uas Nws hu kom ua Nws txoj hauj lwm dawb huv. Thiab, zoo ib yam li Yauhas tus uas Muab Neeg Ua Kev Cai Raus Dej, nej yuav npaj txoj kev rau Nws Leej Tub txoj Kev Los. Kuv hais lus tim khawv txog tej yam tseeb no los ntawm tus Tswv Yexus Khetos lub npe, amees.

Lus Cim

  1. Tau muaj li no rau Mauxes. Tom qab nws ntsib Vajtswv li no, nws saib nws tus kheej txawv dua li qub—nws saib nws tus kheej zoo li nws yog Vajtswv tus tub. Qhov no pab nws tiv tau Dab Ntxwg Nyoog, uas hu nws ua “neeg leej tub” (saib Mauxes 1:1–20) Kuj saib Thomas S. Monson, “Saib Lwm Tus Raws li Qhov uas Lawv Rais Tau Los Ua Neeg Zoo Li Cas,” Liahona, Kaum Ib Hlis Ntuj 2012, 68–71; Dale G. Renlund, “Raws Li Vajtswv Saib,” Liahona, Kaum Ib Hlis Ntuj 2015, 93–94.

  2. Thomas S. Monson, kev sib ntsib rau cov thawj coj hauv lub tuam rooj sab laj, Peb Hlis Ntuj 2011.

  3. Saib Dale G. Renlund, “Lub Pov Thawj Hwj thiab tus Cawm Seej lub Hwj Chim Theej Txhoj,” Liahona, Kaum Ib Hlis Ntuj 2017, 64–67.

  4. Saib 2 Nifais 31–32; 3 Nifais 11:30–41; 27:13–21; Ethaws 4:18–19; Mauxes 6:52–68; 8:24.

  5. Maulaunais 10:32; kuj saib Qhia Kuv txoj Moo Zoo: Phau Ntawv Qhia cov Tub Txib (2004), 6.

  6. Saib Lus Qhuab Qhia thiab Kev Khi Lus 13:1; 84:26–27; 107:20.

  7. Loos 10:14–15, 17. Yauxej Xamiv tau qhia qhov tseeb no ib yam thiab: “Kev ntseeg los thaum yus hnov Vajtswv txoj lus, thaum hnov Vajtswv cov tub qhe hais lus tim khawv; zaj lus tim khawv ntawd yeej los ntawm tus Ntsuj Plig ntawm kev qhia tej uas yuav muaj los yav tom ntej thiab kev tshwm sim” (Teachings of Presidents of the Church: Joseph Smith [2007], 385).

  8. Maulaunais 7:22; saib Amas 12:28–30; 13:21–24; 32:22–23; 39:17–19; Hilamas 5:11; Maulaunais 7:21–25, 29–32; Lus Qhuab Qhia thiab Kev Khi Lus 20:35; 29:41–42; Mauxes 5:58; kuj saib Mathais 28:19; Loos 10:13–17.

  9. Saib George Q. Cannon, Gospel Truth, tus xaiv yog Jerreld L. Newquist (1987), 54.

  10. Saib James Strong, The New Strong’s Exhaustive Concordance of the Bible (1984), Hebrew and Chaldee dictionary section, 66, Greek dictionary section, 7.

  11. Lus Qhuab Qhia thiab Kev Khi Lus 20:59.

  12. Saib Henry B. Eyring, “Xwv Kom Nws Yuav Muaj Zog Thiab,” Liahona, Kaum Ib Hlis Ntuj 2016, 75–78; Amas 17:3; Hilamas 5:18; 6:4–5; Lus Qhuab Qhia thiab Kev Khi Lus 28:3.

  13. Saib 1 Yauhas 2:14; Amas 17:2; 26:13; 32:42. Fulfilling My Duty to God: For Aaronic Priesthood Holders yog ib qho cuab yeej uas muaj nqi kom pab ua li no.

  14. Lus Qhuab Qhia thiab Kev Khi Lus 11:21; kuj saib Lus Qhuab Qhia thiab Kev Khi Lus 84:85.

  15. Saib 2 Nifais 32:3; Lus Qhuab Qhia thiab Kev Khi Lus 42:14; 50:17–22.

  16. Saib Maulaunais 7:25.

  17. Russell M. Nelson, “Honoring the Priesthood,” Ensign, Tsib Hlis Ntuj 1993, 40; kuj saib Amas 27:4.

  18. Saib Amas 34:17; Hilamas 14:13.

  19. Lus Qhuab Qhia thiab Kev Khi Lus 84:27.

  20. Saib Lus Qhuab Qhia thiab Kev Khi Lus 20:46, 51–59, 73–79. Fulfilling My Duty to God: For Aaronic Priesthood Holders yog ib qho cuab yeej uas muaj nqi pab peb to taub peb tej dej num.

  21. Gordon B. Hinckley, “The Aaronic Priesthood—a Gift from God,” Ensign, Tsib Hlis Ntuj 1988, 46.

  22. Txwj Laug D. Todd Christofferson piav hais tias: “Kev cai raus dej yog qhov kawg nyob hauv tus txheej txheem hloov siab lees txim. Qhov uas yus tso kev txhaum tseg, nrog rau peb txoj kev khi lus tias peb yuav mloog lus, ua rau peb hloov siab lees txim tas; muaj tseeb tiag, yus txoj kev hloov siab lees txim tsis tiav mus txog thaum yus khi lus li ntawd tas” (“Building Faith in Christ,” Liahona, Cuaj Hlis Ntuj 2012, 14–15). Kuj saib D. Todd Christofferson, “Kev Hloov Siab Lees Txim Yog lub Txiaj Ntsim uas Los Saum Ntuj Los,” Liahona, Kaum Ib Hlis Ntuj 2011, 38–41; Yauxej Xamiv Kev Txhais Lus, Mathais 26:24 (nyob hauv Phau Vaj Lug Kub Npaiv Npaum cov ntawv ntxiv tom kawg).

    Txoj kab ke txais lub cim nco txog ua rau peb “muaj cib fim txhua lub lim tiam rov qab ua kev khi lus uas ua rau peb txais tau tus Cawm Seej txoj kev tshav ntuj uas theej txhoj uas ua rau peb sab ntsuj plig txais kev ntxuav huv ib yam li muaj thaum ua kev cai raus dej thiab txais kev pom zoo” (“Understanding Our Covenants with God,” Liahona, Xya Hli Ntuj 2012, 21). Kuj saib Dallin H. Oaks, “Always Have His Spirit,” Ensign, Kaum Ib Hlis Ntuj 1996, 59–61.

  23. Dallin H. Oaks, “The Aaronic Priesthood and the Sacrament,” Liahona, Ib Hlis Ntuj 1999, 44.

  24. Txwj Laug David A. Bednar piav hais tias: “Cov kab ke cawm seej thiab kev tsa nto uas ua nyob hauv tus Tswv lub Koom Txoos yeej tsis yog kab ke los sis tej lub cim xwb. Tiam sis, cov kab ke cawm seej yog tej txoj kev uas peb txais tau cov koob hmoov thiab lub hwj chim saum ntuj ceeb tsheej nyob rau hauv peb lub neej” (“Niaj Hnub Tau Ib txoj Kev Zam Nej tej Kev Txhaum,” Liahona, Tsib Hlis Ntuj 2016, 60).

  25. Lus Qhuab Qhia thiab Kev Khi Lus 20:73.

  26. Mauxes 1:39.

  27. Mathais 3:11.

  28. Ntau tus thawj coj ntawm lub Koom Txoos tau qhia tias tus Vaj Ntsuj Plig Dawb Huv yog lub txiaj ntsim zoo tshaj plaws hauv lub ntiaj teb no.

    Thawj Tswj Hwm Dallin H. Oaks hais tias, “Qhov uas peb muaj tus Vaj Ntsuj Plig Dawb Huv nrog nraim peb nyob yog qhov uas muaj nqi loj tshaj plaws nyob hauv lub ntiaj teb no” (“The Aaronic Priesthood and the Sacrament,” Liahona, Ib Hlis Ntuj 1999, 44).

    Txwj Laug Bruce R. McConkie qhia hais tias: “Hais txog kev xav txog kev nyob mus ib txhis, txoj sia nyob mus ib txhis yog Vajtswv lub txiaj ntsim zoo tshaj plaws. Tiam sis hais txog lub neej no xwb, lub txiaj ntsim Vaj Ntsuj Plig Dawb Huv yog lub txiaj ntsim zoo tshaj plaws uas ib tug neeg muaj hauv ntiaj teb” (“What Is Meant by ‘The Holy Spirit’?” Instructor, Ob Hlis Ntuj 1965, 57).

    Thawj Tswj Hwm Wilford Woodruff ua tim khawv tias: “Yog nej muaj tus Vaj Ntsuj Plig Dawb Huv nrog nej nyob—thiab tsim nyog uas txhua tus muaj—kuv hais rau nej tias tsis muaj ib lub txiaj ntsim zoo dua, tsis muaj ib txoj koob hmoov zoo dua, tsis muaj ib zaj lus tim khawv zoo dua uas tau muab rau ib tug neeg nyob hauv ntiaj teb no. Tej zaum nej muaj cov tim tswv txoj kev los pab nej; tej zaum nej pom ntau yam txuj ci tseem ceeb; tej zaum nej yuav pom ntau yam zoo hauv lub ntiaj teb; tiam sis kuv hais tias lub txiaj ntsim Vaj Ntsuj Plig Dawb Huv yog lub txiaj ntsim zoo tshaj plaws uas muab tau rau tib neeg” (Teachings of Presidents of the Church: Wilford Woodruff [2004], 49).

    Thiab Txwj Laug David A. Bednar qhia tias: “Vajtswv cov lus txib thiab lub Koom Txoos cov thawj coj cov lus ntuas uas peb coj tsom ntsoov rau txoj kev tau tus Ntsuj Plig nrog nraim peb nyob. Qhov tseem ceeb yog qhov uas txhua yam nyob hauv txoj moo zoo mas lub hom phiaj yog ua rau peb txais tau tus Vaj Ntsuj Plig Dawb Huv hauv peb lub neej” (“Receive the Holy Ghost,” Liahona, Kaum Ib Hlis Ntuj 2010, 97).

  29. Thomas S. Monson, kev sib ntsib rau cov thawj coj hauv lub tuam rooj sab laj, Peb Hlis Ntuj 2011.

  30. Saib Mauxes 1:6.