Ania ti Nasken a Maawatan ti Tunggal Aaronic Priesthood Holder
Ti ordinasionyo iti Aaronic Priesthood ti kangrunaan iti panangtulong iti annak ti Dios nga umawat iti pangsubbot a bileg ni Cristo.
Kakabsat, pribilehio a makaduakayo itoy napnuan pakasaritaan a komperensia. Idi baroak a mission president, naggagarak nga umawat iti umuna a grupo dagiti baro a missionario. Sumagmamano kadagiti ad-adda nga eksperiensado a misionario ti agsagsagana para iti ababa a miting kadakuada. Nadlawko a nangurnosda kadagiti tugaw dagiti ubbing iti semisirkulo.
“Ania dagiti babassit a tugaw?” dinamagko.
Dagiti misionario, siuulimek a nagkuna, “Para kadagiti baro a misionario.”
Patiek ti panangkitatayo iti dadduma ket magted iti impact iti panagawatda no asinoda ken ania ti pagbalinanda.1 Nagtugaw dagiti baro a misionariomi iti tugaw dagiti nataengan dayta nga aldaw.
No dadduma, amkek, nga ikkantayo dagiti babbaritotayo iti Aaronic Prieshhood iti tugaw dagiti ubbing, imbes a tulongan ida a mangkita nga inikkan ida ti Dios iti sagrado a talek ken napateg nga aramiden.
Binalakadannatayo ni President Thomas S. Monson a nasken a maawatan dagiti babbarito “ti kaipapanan ti … addaan iti priesthood ti Dios. Nasken a matarabayda iti naespirituan a pannakaammo iti kinasagrado ti naordenan a callingda.”2
Ita, sapay koma ta tarabayennatayo ti Espiritu Santo iti dakdakkel a pannakaawat iti bileg ken kinasagrado ti Aaronic Priesthood ket paregtaennatayo nga agpokus iti napaspasnek kadagiti pagrebbengantayo iti priesthood. Para iti amin nga Aaronic Priesthood holder ti mesahek, agraman dagiti addaan pay iti Melchizedek Priesthood.
Insuro ni Elder Dale G. Renlund a panggep ti priesthood a mangted iti annak ti Dios iti access iti pangsubbot a bileg ni Jesucristo.3 Tapno maawat ti pangsubbot a bileg ni Cristo iti biagtayo, nasken a mamatitayo Kenkuana, agbabawi iti basbasoltayo, agaramid ken agtungpal iti sagrado a katulagan babaen dagiti ordinansa, ken awaten ti Espiritu Santo.4 Saan a prinsipio dagitoy nga aramidentayo iti maminsan laeng; ketdi, agtitinnulongda, agpipinnapigsa ken agpipinnadur-as iti agtultuloy a proseso ti panagrang-ay nga “umay ken Cristo, ket agbalin a naan-anay kenkuana.”5
Ngarud, ania ti akem ti Aaronic Priesthood iti daytoy? Kasano a matulongannatayo a maka-access iti pangsubbot a bileg ni Cristo? Patiek nga agpannuray ti sungbat iti tulbek nga iggem ti Aaronic Priesthood — ti tulbek iti panagserserbi dagiti anghel ken ti pangisagana nga ebanghelio.6
Ti Panagserbi dagiti Anghel
Rugiantayo iti maysa nga aspekto ti panagserbi dagiti anghel. Sakbay nga adda pammati ken Jesucristo dagiti annak ti Dios, nasken nga ammuenda maipapan Kenkuana ken masuruan iti ebangheliona. Kas kinuna ni Apostol Pablo:
“Kasano a mamatida kenkuana a dida pay nangngegan? ken kasano a dumngegda nga awan mangasaba?
Kasano a mangasabada, malaksid no maibaonda? …
“Ngarud umay ti pammati babaen ti idedengngeg, ken panagdengngeg iti balikas ti Dios.”7
Manipud iti punganay ti panawen, ti Dios “nangibaon kadagiti anghel nga agserbi iti annak ti tao, a mangipakita … iti yaay ni Cristo.”8 Dagiti anghel ti nailangitan a nabiag a mangted mensahe ti Dios.9 Iti Hebreo ken Griego, ti ramut a balikas ti angel ket “mensahero.”10
Iti isu met la a wagas pinusgan ti Dios dagiti anghel a mangipakdaar iti saona ken mangpapigsa iti pammati, naordenantayo nga addaan iti Aaronic Priesthood a “mangisuro, ken mangawis iti amin nga umay ken Cristo.”11 Mangasaba iti ebanghelio ti rebbengen ti priesthood. Ket ti bileg a mainaig itoy a rebbengen ket saan a para kadagiti propeta laeng wenno kadagiti misionario. Para kadakayo daytoy!12
Kasano nga alaentayo daytoy a bileg? Kasano a mangyeg ti agtawen 12 a deacon—wenno asino man—iti pammati ken Cristo iti puspuso ti annak ti Dios? Rugiantayo iti panangipateg iti saona tapno adda iti unegtayo ti bilegna.13 Inkarina a no aramidentayo, maaddaantayonto iti “bileg ti Dios a mangallukoy kadagiti tao.”14 Mabalin a gundaway a mangisuro iti miting ti korum wenno mangsarungkar iti balay ti miembro. Mabalin a banag a di pormal, kas iti pannakisarita iti gayyem wenno kapamilia. Ania man kadagitoy a setting, no nakasaganatayo, maisurotayo ti ebanghelio kas dagiti anghel: babaen ti bileg ti Espiritu Santo.15
Itay nabiit nangngegko ni Jacob, Aaronic Priesthood holder iti Papua New Guinea, a nagpaneknek iti bileg ti Libro ni Mormon ken no kasano a nakatulong kenkuana a nangsupring iti dakes ken sumurot iti Espiritu. Dagiti saona ti nangpapigsa iti pammatik ken ti pammati ti dadduma. Dimmakkel met ti pammatik idi mangngegak dagiti Aaronic Priesthood holder a mangisuro ken agpaneknek a siraraem iti mitingda ti korum.
Babbarito, napusgankayo a mensahero. Babaen dagiti balikas ken tignayyo, mayegyo ti pammati ken Cristo iti puspuso dagiti annak ti Dios.16 Kas kuna ni President Russell M. Nelson, “Agbalinkayto nga agserserbi nga anghel kadakuada.”17
Ti Pangisagana nga Ebanghelio
Ti napapigsa a pammati ken Cristo kanayon a mangiturong iti tarigagay nga agbalbaliw wenno agbabawi.17 Ngarud nainkalintegan a ti tulbek ti panagserserbi dagiti anghel karagpin ti tulbek ti pangisagana nga ebanghelio, “ti ebanghelio ti panagbabawi ken panagbuniag, ken ti pannakaugas dagiti basol.”19
No adalenyo dagiti pagrebbenganyo iti Aaronic Priesthood, makitayo ti nalawag a bilin a mangawis iti dadduma nga agbabawi ken sumayaat.20 Di kayat a sawen dayta nga agtakdertayo iti suli ti kalsada a mangipukkaw iti, “Agbabawikayo!” Masansan, kayatna a sawen nga agbabawitayo, mamakawantayo, ken no agserbitayo iti dadduma, idiayatayo ti namnama ken talna a yeg ti panagbabawi—gapu ta napadasantayo mismo.
Kinaduak dagiti Aaronic Priesthood holder idi sarungkaranda dagiti padada a miembro ti korum. Nasaksiak ti pammategda a nangpalukneng iti puspuso ken nangiparikna iti kakabsatda iti ayat ti Dios. Nangngegko ti barito a nagpaneknek iti kaduana maipapan ti bileg ti panagbabawi. Idi inaramidna, napalukneng ti puspuso, naaramid ti panagkumit, ken narikna ti pangagas a bileg ni Cristo.
Insuro ni President Gordon B. Hinckley: “Daytoy ti banag a pagbabawyan. Sabali daytoy iti pannakapakawan dagiti basoltayo. Ti bileg a mangipatungpal itoy ket masarakan iti Aaronic Priesthood.”21 Dagiti ordinansa ti Aaronic Priesthood iti panagbuniag ken ti sakrament ket mangsaksi ken mangkumpleto iti panagbabawitayo para iti pannakaugas dagiti basol.22 Inlawlawag ni President Dallin H. Oaks iti kastoy: “Nabilintayo nga agbabawi iti basbasoltayo ken umay iti Apo nga addaan nasneban a puso ken napnuan babawi nga espiritu ken makiranud iti sakramento. … No pabaruentayo dagiti katulagantayo iti panagbuniag iti kastoy a wagas, pabaruen ti Apo ti pangpadalus nga epekto ti panagbuniag.”23
Kakabsat, sagrado a pribilehio ti mangannong iti ordinansa a mangyeg iti pannakaugas dagiti basol iti agbabbabawi a puso babaen ti pangsubbot a bileg ti Mangisalakan.24
Itay nabiit naisarita kaniak maipapan ti maysa a priest, a nagkarigatan a mangipeksa iti bagina a mangbendision iti sakrament iti umuna a gundaway. Idi inaramidna, nabileg nga espiritu ti immay kenkuana ken ti kongregasion. Idi agangay iti miting, imburayna ti simple ngem nalawag a pammaneknek ti bileg ti Dios a nariknana kabayatan dayta ordinansa.
Iti Sydney Australia, uppat a miembro ti priests quorum ti nangbuniag kadagiti miembro ti pamilia a Mbuelongo. Insarita kaniak ti ina ti maysa kadagitoy a priest no kasano a sibibileg a nangaring iti anakna daytoy a padas. Naawatan dagitoy a priest no ania ti kayat a sawen ti maaddaan iti “pannakabalin ni Jesucristo.”25
Kas ammoyo, makaimaton itan dagiti priest iti panangannong iti proxy baptism iti templo. Itay nabiit binuniagannak ti barok nga agtawen iti 17 para iti dadduma nga ancestormi. Nalaus unay ti panagyamanmi iti Aaronic Priesthood ken ti pribilehio nga agakem para iti pannakaisalakan dagiti annak ti Dios.
Babbarito, no sipapasnekkayo a mangaramid iti rebbengenyo iti priesthood, makiramankayo iti Dios iti aramidna a “mangipatungpal iti saan nga ipapatay ken agnanayon a biag ti tao.”26 Dagiti kastoy a padas ti mangnayon iti tarigagayyo ken mangisagana kadakayo a mangisuro iti panagbabawi ken mangbuniag kadagiti convert kas misionario. Isaganadakayo pay para iti manayon a serbisio iti Melchizedek Priesthood.
Juan Bautista, ti Pagwadantayo
Dagiti Aaronic Priesthood holder, gundaway ken rebbengentayo nga agbalin a pada a katulongan ken Juan Bautista. Naibaon ni Juan kas napusgan a mensahero nga agpaneknek ken Cristo ken mangawis iti amin nga agbabawi ken agpabuniag—dayta ti, usarenna dagiti tulbek ti Aaronic Priesthood nga inlawlawagmi. Kinuna ni Juan, “Buniaganka iti danum iti panagbabawi: ngem isu nga umay kaniak nabilbilegto ngem siak … : buniagannakanto iti Espiritu Santo, ken iti apuy.”27
Ngarud, ti Aaronic Priesthood, addaan iti tulbek dagiti agserserbi nga anghel ken ti pangisagana nga ebanghelio, mangisagana iti dalan nga awaten dagiti annak ti Dios, babaen ti Melchizedek Priesthood, ti sagut ti Espiritu Santo, ti kaindaklanan a sagut a maawattayo itoy a biag.28
Anian a dakkel a pangrebbengan nga inted ti Dios kadagiti Aaronic Priesthood holder!
Maysa nga Awis ken Kari
Dagiti nagannak ken priesthood leader, mariknayo kadi ti pateg ti balakad ni President Monson a mangtulong kadagiti babbarito nga umawat “no ania ti kaipapanan … ti addaan iti priesthood ti Dios”?29 Ti pannakaawat ken panangpadakkel iti Aaronic Priesthood ti kasayaatan a panangisagana kadakuada nga agbalin a napudno a Melchizedek Priesthood holder, napnuan-bileg a misionario, ken nalinteg nga assawa ken amma. Babaen ti serbisioda, di laeng a maawatan ken mariknadanto pay ti kinapudno ti bileg ti priesthood, ti bileg nga agtignay iti nagan ni Cristo para iti pannakaisalakan dagiti annak ti Dios.
Babbarito, adda paaramid ti Apo kadakayo.30 Ti ordinasionyo iti Aaronic Priesthood ti kangrunaan iti panangtulong kadagiti annak ti Dios nga umawat iti pangsubbot a bileg ni Cristo. Ikarik a no ipangrunayo iti biagyo dagitoy sagrado a pagrebbengan, mariknayonto ti bileg ti Dios a diyo pay pulos narikna idi. Maawatanyonto iti kinasiasinoyo kas annak ti Dios, naawagan iti nasantuan a takem [calling] a mangaramid iti aramidna. Ket, kas ken Juan Bautista, tumulongkanto a mangisagana iti dalan iti yaay ti Anakna. Paneknekak dagitoy a kinapudno iti nagan ni Jesucristo, amen.