Oba Chimol Tekoi
Sel mo rullid el mo sebeched el muut el mo remei er a babeluades, eng kired el kausisbech, e kired el mo kaukledem.
A tara kot el klebokel el charm el ngara beluulechad a bangikoi. Sera ki bo er a Mexico el mo oldingel er a rechad er a blil a bechik er a temel a Kurismas, e ki mlo oldingel er a sers er a bangikoi, el million el bangikoi a ngarngii sel temel a kelekolt. Ng kmal mle ongasireng aikel klebokel el ues e rillemam el mo melbedebek el kirel okesiu er a kltalreng me a blekognesenges er a chedaol llach el Dios ocholt lokiu a blebelel.1
A bangikoi a mesisiich el meleboteb a beluu. Te ousbech er a teletelel a sils lolecholt er a rael el mo er a basio el leborngii. Bek el spring, e te suebek el telael el mile er a Mexico el mo er a Canada, e a bek el fall, e te kuk lmuut el mo er a osisiu el chereomel er a Mexico.2 Te uaisei er a bek el rak, el mekekokterir el mesebesek. Chelsel tial omerollir, e sel bol klebesei e te mo kldibel er a kerrekar, lomecheliu er tire r a kelekolt me a meklou el charm.3
A delbechel el bangikoi a dmak loureor el kirel a chimol moktek.4 Tiang diak el sal klebokel el teletael? A dersta el bangikoi er tial cheldebechel a tokubets e ngodech, e ng di tirka el kmal okedeldaol el charm a mla moterekokl er ngike Lomeob el meduch el omtebechel a klengar tir, subek er a kemanget lomerael, e omechell, e omerk er a klengar sel lorael el mo er a tara bung el mo er a tang, lomerk a ngisir. Meng uaisei, el dersta el bangikoi a kakerous, eng di te dmak el oureor el rulii a beluulechad meng mengal mo klebokel e bekerredechel el beluu.
Me kede uaia ikal bangikoi, el ngar tial omerael el muut el mo remei er a babeluades el mo obengterir a rechad er a blid er a Babeluades.5 Kede uai kal bangikoi, el mla ngmai a chedaol teletael el sobecheklid er tial klengar er a beluulechad, meng mo sebeched el mo nguu sel ngii a ultekellel a blebeled.”6 Kede uai tir, el sekum e kede oba kltalreng,7 e a Rubak a mo omecheliu er kid el uaia dechuu el malk sel longidb er a rengelekel er cheungel osebekel”8 e rullid el mo klebokel el cheldebechel loba chimol moktek.
Kemiu el ngalek el redil me a rsechal, rengeasek el dil me a rengeasek el sechal, rodos me a rodam, kid a dmak el ngar tial omerael. Sel mo rullid el mo sebeched el muut el mo remei er a babeluades, eng kried el kausisbech, e kired el mo kaukledem. A Rubak a mla dmu er kid el kmo ng kired el mo tang le lak bo detang eng diak dechedal.”9
A Jesus Kristo a kot el ngarbab lokesiu er a kaukledem lobengkel a Demal. Ng tang a moktek er tir, me a beltik el reng er tir, me a urerir el sel soal a Ngalek a ultuil er a soal a Chedam.”10
Kede mekerang e oltirakl er a cherrungel el okesiu er a Rubak el kaukledem ngii me a Demal e mo tang Lobengterir me a dirrek el dersta me a dersta er kid?
A ungil teletael a debetik er ngii er a chelsel a Rrellir 1:14. Ng dmu el kmo, “a rokui el sechal bol ngara kltalreng lokiu a nglunguuch me a ngesou, tir me a redil.”11
A kumdasou eng klou a belkul sel tekoi el “kltalreng” le ng tela el taem el debetik er ngii er a chelsel a hong er a Acts, el donguiu el kirel aikel luruul a roltirakl er a Jesus Kristo ruriul er a luut el ngmasech el mo er a babeluades ruriul er a okiis er a k odall, me a dirrek el klengeltengat el tir a ngilai el blak el reng er tir a uchul. Ng dirrek el klou a belkul el debetik er a osisiu el teletael er a delongelir tirkel kuk mlara beluu er a Merikel er sel taem el Rubak a mlo oldingel er tir. “A oba kltalreng” a belkul a kmo ng tabesul kengei, e kaukledem, el rokui.
A bebil er a tekoi el tirkel mle mui a klaumera er tir el Santo a mle kaukledem e meruul er a ikal eru el basio a chisel a klaumera er tir el kirel a Jesus Kristo, e dilak el mesuub a tekingel a Dios, e uleba beltikelreng e olngeseu er a ta me a tang.12
A roltirakl er a Rubak a mle ta moktek er tir, me a beltikelreng er tir, e dilak loureor. Te mle medengei el kmo te techang e ngera kirir el meruul, e miruul loba beltikelreng el mo er a Dios me a ta me a tang. Te mle tebechedel a cheldebechel el dmak el ureor.
A bebil er a klengeltengat lengilai e te mlo mui er a Chedaol Reng, e a ongasireng el tekoi a dilubech er a delongelir, e a Ikelesia a mlukeroul, e dimlak a klautok er a delongelir a rechad, me a Rubak a ulemekngeltengat er tir er a rokui el tekoi.13
Ng sebeched el kmo a uchul e te kmal mle ta rengrir a tir el kmal mle ungil medengelii a Dios. Tem la kmeed er Ngii, e mla sioning er a chedaol Urerel, me a ongasireng el tekoi el Ngii a riruul, me a Okiis er a kodall er Ngii. Te miles e rirutech a ultil a deel er a chimal me a ochil. Te mle mui el medengei el kmo Ngii a ngkaikid el Mesiah, el Osobelel a beluulechad, el lulemlaoch el kirel. Tem le medengei el kmo “Ngii a uchul a omekungil, budech, me a diak a ulebengelel ulekeroul.”14
Ng uaisei el locha dirkak desa Osobeled er a medad, eng di ng sebeched el mo medengei el kmo Ngii a ngar. Sel dorael mo kmeed er Ngii, me sel dosiik el mo nguu a sioning lokiu Chedaol Reng el kirel a chedaol Urerel, eng mo mui a klemedengei er kid ek kirel a moktek er kid; me a beltikelreng er a Dios a mo kiei er a chelsel a rengud;15 e mo blak a rengud el mo tang el chelchad er a chelsel a telungalek er kid, ward er kid, me a beluad; e mo sebeched longeseu er a ta me a tang loba “beches, e ungil teletael.”16
A ongasireng a duubech sel sekum a rengelekel a Dios a dmak loureor lultuil er a ulekrael er a Chedaol Reng e mo olgneseu er a rengesool.
Kede remenges a betok el cheldecheduch el kirel a beltikelreng el mocholt er a delongelir a rekautonari el chad sel dubech a kerior. Okesiul tiang, a beluu er a Houston er a lesiseb a ielb er ngii er tial mlomerek el rak, e a rechad a ulebes a chelbulir e mlo er a siik. A merredel er a chelechad er a re elders a ulengit a ngesou er a beluu, me a kmeed el okeuid me a kleuid el chert a mlodurokl el mong. A rechad er a siik a mirrael meliuekl er a beluu e ulelngakd er a retelungalek el mei er a tara ikelesia er kid, meng mlo sebechir el ngmai a ngesou. A rechad er a ikelesia me a rediak el chad er a ikelesia a dilak loureor loba chimol moktek.
Chelsel a beluu er a Santiago, e a merredel er a Relief Society a mle semeriar lolngeseu er a rechad el tir a mlei el mla er a Haiti. Ngokiu a cheldecheduch lobengterir a roungerachel loba priesthood, e ngii me a rebebil er a roungerachel a ulemdasou a bai mo olisechakl a tekoi er a Sebangiol el mo eer tirkal chad, el ngosuterir el mo telkib el sebechir el mengedecheduch er tial beches el belurir er chelechang. Bek el tutau er a Sabadong, e remisionari a mo kldibel lobengterir tirkal ngalek er a skuul. Sel kltalreng er a delongelir a kmal ungil okesiu er a rechad el kakerous a belurir eng di te dmak el mesiou loba chimol tekoi.
Chelsel a beluu er a Mexico, e a rebtok el chedal a ikeelsia a ngara omerael el melai a sikang el mo olngeseu er a rechad el mlara kerior er a teblo el meklou el desiu. Tem lei lolab a dongu, me a mesil, me a beltikelreng el mo er tirkal tonari er tir. Tirkal longeseu el chad er a bol kldibel er a tara ikelesia er kid el mengiil a tekoi, e a merredel er a beluu er a Ixhuatán a lilangel er tial klou lolchotel a “meral klikiid el beltikelreng er a Kristo.”17
A Rubak a omeskid a techall er chelechang el mo kebetech er a bek el buil er a ikel chelechad er a priesthood me a relief society, me luchul e deluut el mo mesisiich longeseu er a chelsel aikel ward me a branch er kid—el basio el kid el rokui a dmak loureor e diul usbechall.
A rebek el chad a di kakerous, eng di kede tal merael. A rael de ngarngii a diak el kirel a kmo ngera kede mla remuul malechub e kede mla er ker; ng bai kirel a kmo kede merael bedul ker e mo uangerang, loba kltalreng. Sel dedak el kakereker a uldasou lultuil er a ulekrael er a Chedaol Reng, e kede momedengei el kmo kede ngar ker, e kired el merael bedul ker. A Chedaol Reng a meskid a moktek el diak el sebechel a di osenged el mesang, le a “chedaol ocholt a berrokel er a delongeled,”18 e sel dultuil er tial chedaol ocholt, eng sebeched el muut el mes a betok.
Me sel dekaukledem e dedak el oureor, e a moktek er kid a kirel melutk el bedul a Rubak; e a blakelreng er kid a kirel lultuil er a beltkil a rengud el mo er a Dios me a rebebil;19e sel ngaruchei el klemeriar reng er kid a kirel mo blak a rengud loureor,”20 me luchul el sebeched el kudmeklii a rael el kirel a klebokel el luut er a Osobeled. A di tal rolel eng sebeched el kudmeklii tiang a di sel “bo dekaukledem.”
Me bo de uaia ikal bangikoi, el dmak el ngara tial omerolled el kaukledem e ta moktek er kid, el dersta er kid olngeseu er a ikel sebechel, e oureor el rulii tial beluulechad el kmal mo klebokel e bekerredechel—el dersta el dauch er a tal taem e ta rengud lolab a llechul a Dios.
A Rubak el Jesus Kristo a mla yaksok er kid el kmo sel bo dedak el kldibel el ngara Ngklel, e Ngii a mo ngara delongeled.21 A kuchais el kmo Ngii a ngar e Ngii a milkiis er a kodall er sel klebokel el tutau el uaia chelechal sils. Ngii a Merredel er a rokui el merredel, “el King er a re king, e Rubak er a rokui el rubak.”22
Bo detang lobengkel a Chedam me a Chimol Ngelekel, el Chedaol Reng omekrael er kid, a nglunguchek el ngara ngklel a Jesus Kristo, amen.