Ol Yang Woman Insaed long Wok
Evri yang woman insaed long Jos i mas filim se hem i impoten, i gat janis blong givim seves, mo i filim se hem i gat wan samting impoten blong mekem insaed long wok ia.
Wan yia i pas, long jeneral prishud sesen blong konfrens, Bisop Gérald Caussé i tokbaot ol man blong Jos ia, mo tokbaot hao ol man we oli kasem Aronik mo Melkesedek Prishud oli ol patna we oli no save seperetem blong mekem wok blong fasin blong sevem man i kamtru.1 Mesej ia i bin wan bigfala blesing blong helpem ol yang man we oli holem Aronik Prishud blong luk pat we oli gat blong bildimap kingdom blong God long wol ia. Kombaen seves blong olgeta i mekem Jos i kam strong moa mo i mekem man i jenisim laef mo i gat moa komitmen insaed long hat blong ol yang man taem oli luk hamas wok blong olgeta i impoten, mo oli luk wok ia i bigwan.
Tedei, mi wantem ademap toktok long mesej ia taem mi tokbaot ol yang woman blong Jos we oli nidim olgeta tu i semmak blong mekem wok blong Lod insaed long ol famli blong olgeta mo insaed long Jos blong Hem, i kamtru.
Olsem Bisop Caussé, mi bin laef long wan smol branj blong Jos taem mi yang woman, mo plante taem, oli askem mi blong mekem ol wok mo ol koling we, oltaem, oli givim long ol adalt. Eksampol, olgeta long mifala long yut program, plante taem, mifala nomo i girap mo help blong oganaesem mo ranem ol aktiviti, wetem ol spesel taem. Mifala i raetem ol drama, mekem grup blong singsing blong entetenem ol branj aktiviti, mo mifala i tekpat fulwan long ol evri miting. Oli singaotem mi branj miusik lida mo mi lidim singsing long sakramen miting evri wik. Hem i wan bigfala eksperiens blong wan 16 yia gel blong stanap long fored blong evriwan insaed long branj evri Sandei mo lidim olgeta blong singsing ol hym. Mi filim se oli nidim mi mo mi bin save se mi gat samting blong givim. Ol pipol oli bin dipen long mi blong stap ia, mo mi laekem blong oli save yusum mi. Eksperiens ia i bin helpem mi blong bildimap testemoni blong mi abaot Jisas Kraes, mo semmak olsem i hapen long Bisop Caussé, i putum rus blong laef blong mi insaed long seves blong gospel.
Wanwan memba i mas save hamas oli nidim olgeta. Wanwan i gat wan samting impoten blong givim mo i gat talen mo paoa we i blong hemwan, blong help blong muvum impoten wok ia i go fored. Ol yang man blong yumi long Aronik Prishud oli gat ol diuti olsem we i stap long Doktrin mo Ol Kavenan, we yumi save luk gud. I no klia tumas long ol yang woman blong Jos, long papa mo mama blong olgeta mo long lida blong olgeta, se stat long taem we oli baptaes, ol yang woman oli gat ol kavenan responsabiliti blong “krae wetem olgeta we oli krae, yes, mo leftemap tingting blong olgeta we oli nidim fasin blong leftemap tingting, mo blong stanap olsem ol witnes blong God evri taem mo long evri samting, mo long evri ples we yufala i save stap long hem, go kasem ded.”2 Ol yang woman oli gat janis blong mekem ol responsabiliti ia insaed long ol wod mo branj blong olgeta, mo taem oli mekem wok insaed long ol klas presidensi, ol yut kaonsel, mo long ol narafala koling. Evri yang woman insaed long Jos i mas filim se hem i impoten, i gat janis blong givim seves, mo i filim se hem i gat wan samting impoten blong mekem insaed long wok ia.
Long Handbook 2, yumi lanem se wok blong fasin blong sevem man insaed long ol wod blong yumi, i tekem “memba misinari wok, holemtaet ol konvet, karembak ol lesaktiv memba, tempol mo famli histri wok, mo tijim gospel.”3 Wok ia, ol fetful bisop blong yumi nao oli lidim ol wok ia, from oli holem ol prishud ki blong wod blong olgeta. Blong plante yia, niufala presidensi blong yumi i bin askem kwestin ia: “?Wijwan eria we mi tokbaot nao bae ol yang woman blong yumi oli nomas wok long hem?” Ansa i we, oli gat samting blong givim long evri eria blong wok ia.
Eksampol. I no longtaem mi pas, mi bin mitim samfala yang woman long Las Vegas eria, we oli bin singaotem olgeta olsem ol tempol mo famli histri konsalten blong wod. Fes blong tufala i bin saen wetem bigfala glad from se bae oli save tijim mo helpem ol memba blong wod blong faenem ol bubu blong olgeta. Oli gat ol gudfala kompiuta skil, oli bin lanem olsem wanem blong yusum FamilySearch, mo oli glad tumas blong save serem save ia wetem ol narawan. Hem i bin klia se oli bin gat ol testemoni mo oli bin haremsave hamas i impoten blong lukaotem nem blong ol bubu we oli ded blong mekem se, ol stamba odinens blong sevem man, oli save mekem long bihaf blong olgeta insaed long tempol.
Sam manis i pas finis, mi gat janis blong testem wan tingting wetem tufala yang woman blong 14 yia. Mi karem wan kopi blong ajenda blong wod kaonsel mo mi givim wan kopi long Emma mo Maggie. Mi askem tufala blong ridim ol ajenda ia mo luk sapos i gat eni aksen wok, we i blong wod kaonsel, we tufala i save givim seves long hem. Emma i luk se i gat wan niufala famli i stap muv i kam insaed long wod, mo hem i talem se hem i save helpem famli ia blong muv i kam mo tekemaot samting long katon. Hem i ting se hem i save go mekem fren wetem famli ia, mo soem ples long olgeta, raon long niufala skul blong olgeta. Hem i luk se i gat wan dina long wod we i stap kam, mo hem i filim se i gat ol defren wei we hem i save givim seves.
Maggie i bin luk se i gat plante olfala pipol insaed long wod we oli nidim blong oli visitim olgeta mo mekem fren wetem olgeta. Hem i talem se bae hem i lavem blong go visitim olgeta mo helpem olgeta gudfala olfala memba ia. Hem i filim tu se bae hem i save help blong tijim ol memba blong wod blong setemap mo yusum ol sosol media akaon. !I tru! !I no bin wan samting insaed long ol ajenda ia we tufala yang woman ia i no save help long hem!
?Olgeta ia we oli stap sidaon long ol wod kaonsel, o oli holem eni koling insaed long wod, oli luk o no, se ol yang woman oli ol gudfala risos blong help blong lukluk long ol nid insaed long ol wod blong yumi? Oltaem, i gat wan longfala lis blong ol situesen we i nidim wan blong givim seves, mo plante taem, yumi tingting nomo long ol adalt insaed long wod blong lukluk long ol nid ia. Semmak olsem we oli bin invaetem olgeta we oli kasem Aronik Prishud blong wok wetem papa blong olgeta mo ol nara man blong Melkesedek Prishud, ol yang woman blong yumi, yumi save singaotem olgeta blong givim seves mo givhan long ol nid blong ol memba blong wod wetem mama blong olgeta o ol nara sista we oli gat gud eksampol. !Oli save mekem samting, oli wantem tumas mo wet blong mekem plante moa bitim we blong stap go nomo long Jos long Sandei!
Taem yumi stap lukluk long ol rol we yumi luk se ol yang woman bae oli mekem long fiuja, yumi save askem yumiwan se wanem kaen eksperiens nao yumi save givim long olgeta naoia, we bae i helpem olgeta blong rere blong kam ol misinari, ol woman blong stadi gospel, ol lida long ol okseleri blong Jos, ol tempol wokman, ol waef, ol mama, ol woman blong lidim tingting, ol eksampol mo ol fren. Naoia i stap, oli save mekem plante wok. Plante taem oli askem ol yut blong tijim ol lesen long ol Sandei klas blong olgeta. I gat janis i stap blong ol yang woman blong yumi oli givim seves long tempol, we bifo, ol odinens wokman mo volontia oli bin stap mekem taem oli go wetem ol yut grup blong olgeta blong mekem baptaes blong ol dedman. Ol Praemeri gel blong yumi, naoia oli invaetem olgeta blong go long Tempol mo Prishud Priperesen miting, we i helpem olgeta blong andastanem se, olgeta tu, oli impoten wokman long wok ia we prishud i stap lidim. Oli stap lanem se ol man, ol woman, ol yut, mo ol pikinini, evriwan i kasem prishud blesing, mo evriwan i save gat wan wok blong muvum wok ia blong Lod.
Ol bisop, mifala i save se diuti blong yufala i hevi tumas, be, semmak olsem we wan long ol fas wok blong yufala i blong prisaed ova long kworom blong Aronik Prishud, Handbook 2 i eksplenem se “bisop mo ol kaonsela blong hem oli givim lidasip long oganaesesen blong Ol Yang Woman.Oli lukluk ova mo mekem wanwan yang woman i kam strong moa, oli wok kolosap wetem papa mo mama, mo ol lida blong Yang Woman long wok ia.” Buk i talem tu se: “Bisop mo ol kaonsela blong hem, oli tekpat oltaem long ol Yang Woman miting, seves mo aktiviti.”4 Mifala i talem tangkyu from ol bisop we oli tekem taem blong visitim Ol Yang Woman klas mo oli givim ol janis blong ol Yang Woman blong no stap nomo olsem ol woman blong waj long wok. !Tangkyu tumas blong meksua we ol yang woman blong yufala oli lukluk gud long ol nid blong ol memba blong wod! Ol janis ia blong givim seves long wan wei we i gat mining, i stap blesem olgeta moa bitim ol aktiviti we oli gat entetenmen nomo.
Long yufala, ol yang woman blong Jos, ol yangfala yia blong yufala i save bisi, mo i gat jalenj. Mifala i luk se plante long yufala i stap traehad wetem ol samting olsem blong tingdaon long yufalawan, wari, tingting i fasfas, mo maet sik blong maen. Blong tanem tingting i go aotsaed, be i no blong stap tingting long problem blong yufala nomo, bae i no save stretem evri samting, be seves i save mekem ol hevi trabol oli nomo hevi, mo i save mekem ol jalenj oli no had tumas. Wan long ol bes wei blong leftemap ol filing blong no tingdaon long yuwan i blong soem, tru long tingting mo seves long ol narawan, se yumi gat plante gud samting blong givim i go.5 Mi leftemap tingting blong yufala, ol yang woman, blong leftemap han blong yufala blong volontia mo mekem ol han ia oli wok taem yufala i luk nid raon long yufala. Taem yu stap mekem ol kavenan responsabiliti blong yu mo tekpat blong bildimap kingdom blong God, ol blesing bambae oli kam fulap long laef blong yu mo bambae yu faenem glad ia we i dip mo i stap longtaem blong stap olsem disaepol.
Ol brata mo sista. Ol yang woman blong yumi oli gudwan tumas. Oli gat talen, plante gud tingting, mo paoa long bodi, mo oli gat lav mo sore mo oli kea. Oli wantem blong givim seves. Oli nidim blong save se yumi luk se oli impoten insaed long wok blong fasin blong sevem man. Semmak olsem we ol yang man oli stap rere, insaed long Aronik Prishud, from wan bigfala moa seves taem oli muv i go long Melkesedek Prishud, semmak, ol yang woman blong yumi oli stap rere blong kam ol memba blong bigfala oganaesesen blong ol woman long wol ia—Rilif Sosaeti. Tugeta, ol naes, strong, fetful yang woman mo yang man ia oli stap rere blong kam ol waef mo hasban, mo ol mama mo papa, we bae oli lukaotem ol famli we oli naf blong kasem selestial kingdom blong God.
Mi testifae se wok blong Papa blong yumi long Heven i blong mekem ol pikinini blong Hem oli nomo save ded mo oli kasem laef we i no save finis.6 Ol gudfala yang woman oli gat wan impoten rol blong plei blong helpem bigfala wok ia i kamtru. Long nem blong Jisas Kraes, amen.