Cov Ntxhais Hluas hauv tej Hauj Lwm
Txhua tus ntxhais hluas hauv lub Koom Txoos yuav tsum paub tias lawv muaj nuj nqis, yeej muaj cib fim los pab lwm tus, thiab tsim nyog los pab ua txoj hauj lwm no.
Ib xyoo dhau los no, nyob rau hauv lub tuam rooj sab laj rau cov pov thawj hwj, Npisov Gérald Caussé tau hais rau cov txiv neej hauv lub Koom Txoos uas tuav lub Pov Thawj Hwj Aloos thiab Mekixedes hais tias yuav tsum muaj ob lub pov thawj hwj no ua ke es thiaj li yuav ua tau txoj hauj lwm ntawm txoj kev cawm seej.1 Cov lus no yog ib qho koob hmoov zoo heev los pab cov tub hluas ntawm lub Pov Thawj Hwj Aloos to taub lawv txoj hauj lwm uas los pab txhim tsa Vajtswv lub nceeg vaj hauv lub ntiaj teb no. Lawv txoj kev sib pab ntxiv dag zog rau lub Koom Txoos thiab ua rau cov tub hluas muaj siab ntseeg thiab rau siab pab thaum lawv pom hais tias txoj hauj lwm no tseem ceeb npaum li cas.
Hnub no kuv xav hais ntxiv rau cov lus no, kuv xav hais txog cov ntxhais hluas hauv lub Koom Txoos, hais tias lawv yeej muaj txoj hauj lwm tseem ceeb uas yuav los ua rau hauv tus Tswv lub Koom Txoos thiab.
Zoo ib yam li Npisov Caussé, thaum kuv tseem hluas kuv kuj nyob rau hauv ib ceg ntseeg me me, ces feem ntau kuv yeej tau los ua tej hauj lwm uas tsim nyog yuav tsum muab rau cov neeg laus ua. Xws li hais tias, peb cov hluas yeej tau los pab thiab khiav tej dej num rau tej kev sib koom ua si thiab tej koob tsheej tshwj xeeb. Peb ntaus tswv yim rau tej yeeb yam, nrhiav cov neeg los hu nkauj rau tej kev ua si hauv ceg ntseeg, thiab peb yeej mus koom txhua lub rooj sab laj li. Kuv raug hu los uas tus coj nkauj hauv ceg ntseeg thiab coj nkauj thaum peb hu nkauj noj lub cim nco txog txhua lub lim tiam. Yog ib txoj hauj lwm zoo heev rau kuv, uas kuv muaj 16 xyoo xwb es kuv coj sawv dawv hu nkauj hauv ceg ntseeg txhua hnub Sunday. Ua rau kuv xav tias lawv toob kas kuv thiab kuv paub tias muaj ib qho uas kuv ua tau. Sawv daws yeej xav kom kuv tuaj ua txoj hauj lwm, thiab kuv yeej zoo siab tias kuv muaj hauj lwm ua. Txoj hauj lwm ntawd pab kuv muaj zaj lus tim khawv txog Yexus Khetos, thiab ib yam li Npisov Caussé, qhov no ua rau kuv txoj kev ntseeg ntawm txoj moo zoo nruaj nrees.
Txhua tus mej zeej yuav tsum paub hais tias nws yeej muaj hauj lwm ua. Txhua tus neeg nyias yeej muaj nyias ib txog kev txawj ntse yuav los pab ua txoj hauj lwm tseem ceeb no mus lawm tom ntej. Cov tub hluas muaj lub pov thawj hwj Aloos uas yeej qhia meej nyob hauv phau Lus Qhuab Qhia thiab Kev Khi Lus hais tias yuav tsum ua txoj hauj lwm li cas thiab qhov no sawv daws pom tau. Cov ntxhais hluas hauv lub Koom Txoos tej hauj lwm tej zaum lawv niam thiab txiv, thiab lawv cov thawj coj yuav tsis tshua pom tau, txij li thaum lawv ua kev cai raus dej, cov ntxhais hluas yeej khi lus tseg tias lawv yuav “nyuaj siab nrog cov uas nyuaj siab; muaj tseeb tiag, thiab nplij cov uas xav tau kev nplij siab, thiab ua tim khawv txog Vajtswv txhua lub sij hawm thiab ua tim khawv txog txhua yam, thiab ua tim khawv nyob hauv txhua qhov chaw uas [lawv] nyob, kom txog hnub tuag.”2 Cov ntxhais hluas muaj cib fim los ua tej hauj lwm no thaum lawv ua hauj lwm hauv pawg thawj tswj hwm, koom haum rau cov hluas, thiab lawv tej hauj lwm uas raug hu los ua. Txhua tus ntxhais hluas hauv lub Koom Txoos yuav tsum paub tias lawv muaj nuj nqis, yeej muaj cib fim los pab lwm tus, thiab tsim nyog los pab ua txoj hauj lwm no.
Nyob hauv Handbook 2, peb kawm hais tias txoj hauj lwm cawm seej hauv peb tej pawg ntseeg suav “kev ua tub txib rau cov mej zeej, kev pab cov neeg hloov siab los ntseeg, kev pab cov uas tsis tshua muaj siab ntseeg, ua hauj lwm hauv lub tuam tsev thiab nrhiav tsev neeg caj ceg, thiab qhia txoj moo zoo.”3 Txoj hauj lwm no yog cov npisov uas muaj siab ntseeg, thiab tuav cov yuam sij rau lawv pawg ntseeg txib kom ua ntag. Peb pawg tswj hwm pheej nug tau ntau xyoo los lawm hais tias, “Muaj tej yam dab tsi uas peb cov ntxhais hluas yuav tsum tsis txhob ua?” Yuav teb hais tias yeej muaj dab tsi rau lawv ua ntawm txhuaqhov hauv txoj hauj lwm no.
Xws li hais tias, tsis ntev tas los no, kuv tau ntsib ib co ntxhais hluas nyob hauv Las Vegas uas raug hu los ua cov pab qhia txog lub tuam tsev thiab tsev neeg caj ceg hauv lawv pawg ntseeg. Lawv zoo siab hais tias lawv yuav tau los pab thiab qhia cov neeg hauv lawv pawg ntseeg nrhiav lawv tej poj koob yawm txwv no. Lawv txawj siv lub computer, lawv tau kawm kom paub siv FamilySearch, thiab zoo siab heev yuav qhia tej yam uas lawv paub no rau lwm tus. Yeej paub zoo hais tias lawv muaj lus tim khawv thiab to taub zoo hais tias tseem ceeb heev uas yuav tsum nrhiav cov poj koob yawm txwv uas tau tag sim neej lawm tej npe kom thiaj li ua tau tej kab ke hauv lub tuam tsev rau lawv.
Ob peb hlis tas los no, kuv muaj lub cib fim los sim ib lub tswv yim ntawm ob tug ntxhais hluas muaj 14 xyoo. Kuv muab ob daim ntawv coj qhia pawg ntseeg pawg sab laj rau Emma thiab Maggie. Kuv hais kom nkawd nyeem daim ntawv coj qhia pawg ntseeg pawg sab laj no seb puas muaj tej yam dab tsi uas nkawd yuav pab ua tau. Emma pom tau hais tias muaj ib tse neeg yuav tsiv los nyob hauv nws pawg ntseeg, ces nws hais tias nws mam li pab lawv nqa khoom thiab thau cov khoom.Nws xav tias nws mam li ntaus phooj ywg rau cov me nyuam hauv tsev neeg no thiab coj lawv mus xyuas lawv lub tsev kawm ntawv tshiab. Nws pom tau hais tias pawg ntseeg yuav noj ib pluag hmov ua ke ces nws hais tias muaj ntau yam uas nws yuav pab tau.
Maggie pom tau hais tias muaj ob peb tug neeg laus hauv pawg ntseeg uas xav kom muaj neeg mus xyuas thiab ntaus phooj ywg rau lawv. Nws hais tias nws zoo siab yuav mus xyuas thiab pab cov neeg laus no. Nws xav hais tias nws mam li pab qhia cov mej zeej hauv pawg ntseeg teeb thiab siv lawv cov tshuab saib xov xwm social media. Yeej tsis muaj dab tsi hauv daim ntawv coj qhia no uas ob tug ntxhais hluas no yuav pab tsis tau li!
Nej cov uas nyob hauv pawg ntseeg pawg sab laj, los sis muaj hwj lwm ua hauv pawg ntseeg, puas paub hais tias cov ntxhais hluas yeej txawj pab ua tau ntau yam hauv peb pawg ntseeg? Yeej muaj ntau yam hauj lwm uas sawv daws yuav tsum sib pab ua, thiab feem ntau peb tsuas xav hais tias muab rau cov neeg laus uas xwb. Zoo li cov uas tuav lub pov thawj hwj Aloos uas yeej ua hauj lwm nrog nraim lawv txiv thiab lwm tus txiv neej uas tuav lub pov thawj hwj Mekixedes, yeej hu tau peb cov ntxhais hluas los pab ua hauj lwm thiab pab txhawb nqa cov mej zeej hauv pawg ntseeg nrog nraim lawv niam thiab lwm cov viv ncaus thiab. Lawv yeej txawj, kam, thiab zoo siab hlo los ua ntau yam tshaj qhov uas niaj hnub mus rau lub koom txoos rau hnub Sunday xwb!
Thaum peb xav txog tej hauj lwm uas peb cov ntxhais hluas yuav ua rau yav tom ntej, peb yuav tsum nug peb tus kheej hais tias, peb xav kom lawv kawm tau dab tsi tam sim no es thiaj li yuav pab lawv npaj mus ua tub txib, paub ntau yam txog txoj moo zoo, ua thawj coj hauv lub Koom Txoos, ua hauj lwm hauv tuam tsev, ua ib tug poj niam, ua ib tug niam tsev thiab ib tug phooj ywg. Lawv pib ua tej hauj lwm no tam sim no los yeej tau. Cov hluas twb yeej pab qhia tej hoob kawm rau hnub Sunday lawm. Tam sim no twb muaj cib fim rau peb cov ntxhais hluas mus saib xyuas thiab ua tej kab ke uas yav nram ntej yog cov neeg laus ua xwb thaum lawv nrog lawv cov hluas mus tom lub tuam tsev thiab ua kev cai raus dej rau cov neeg uas tau tag sim neej lawm. Tam sim no twb caw peb cov me nyuam ntxhais me mus koom tej kev sab laj uas npaj rau lub Tuam Tsev thiab lub Pov Thawj Hwj, qhov no yuav pab lawv to taub hais tias lawv yuav los ua txoj hauj lwm tseem ceeb no uas yog cov tuav lub pov thawj hwj hais kom ua. Lawv to taub hais tias poj niam, txiv neej, cov hluas, cov me nyuam yaus sawv daws yeej txais koob hmoov ntawm lub pov thawj hwj thiab yuav los ua txoj hauj lwm uas cov tuav lub poj thawj hwj qhia kom ua mus lawm yav tom ntej.
Cov Npisov, peb yeej paub hais tias nej tej hauj lwm feem ntau yeej ntau kawg li, tab sis ib yam li nej ib txoj hauj lwm tseem ceeb tshaj plaws yog los saib xyuas pawg Pov Thawj Hwj Aloos, hais li no hauv phau ntawvHandbook 2 hais tias “tus npisov thiab nws ob tug pab cuam yuav yog lub pov thawj hwj thawj coj uas los saib xyuas lub Koom Haum Ntxhais Hluas. Lawv saib xyuas thiab ntxiv dag zog rau cov ntxhais hluas, nrog niam txiv thiab cov Ntxhais Hluas cov thawj coj sib pab ua txoj hauj lwm no.” Hais ntxiv tias, “Tus npisov thiab nws ob tug pab cuam mus koom cov Ntxhais Hluas tej kev sab laj, kev ua hauj lwm pab, thiab kev ua si.”4 Peb ua tsaug rau cov npisov uas mus koom cov Ntxhais Hluas tej hoob kawm thiab muab hauj lwm rau cov ntxhais hluas ua es tsis txhob cia lawv ntsia xwb. Ua tsaug uas nej qhia rau cov ntxhais hluas paub tias lawv tsim nyog los pab cov mej zeej hauv pawg ntseeg! Tej cib fim los ua hauj lwm pab no yuav foom koob hmoov rau lawv ntau tshaj qhov ua lawv ua tej kev lom zem xwb.
Hais rau nej, cov ntxhais hluas hauv lub Koom Txoos, yeej paub hais tias nej cov hluas yeej muaj ntau yam ua thiab feem ntau muaj tej yam uas nyuab heev rau nej. Peb yeej pom tau hais tias muaj nej coob tug nyuaj siab vim nej xav tias nej tsis muaj nuj nqis, muaj kev ntxhov siav ntau, thiab nyuaj siab heev. Qhov uas tsis txhob xav txog yus tej teeb meem xwb, tej zaum yuav daws tsis tau tag nrho tej kev nyuaj siab no, tab sis kev ua hauj lwm pab lwm tus yuav ua rau nej lub nra sib me ntsis thiab ua rau nej tej kev nyuaj siab kaj me ntsis. Ib qho uas zoo heev kom yus thiaj li pom tau tias yus muaj nuj nqis, yog thaum yus txhawj txog thiab pab lwm tus, kom peb thiaj li pom tau hais tias peb muaj hauj lwm tseem ceeb ua.5 Kuv yaum kom nej ib tsoom ntxhais hluas cev tes mus pab lwm tus neeg thiab raus tes ua hauj lwm thaum nej pom tias tib neeg ib ncig ntawm nej xav tau kev pab. Thaum nej ua tej hauj lwm uas nej khi lus tseg tias nej yuav ua thiab koom tes los txhim tsa Vajtswv lub nceeg vaj, ces yuav muaj koob hmoov los rau hauv nej lub neej thiab nej yuav pom tau txoj kev zoo siab ntawm kev ua ib tug thwj tim.
Cov nus thiab cov viv ncaus, peb cov ntxhais hluas zoo kawg nkaus li. Lawv txawj ntse, zoo siab, muaj zog, thiab hlub tshua thiab txawj xav. Lawv xav ua hauj lwm pab. Lawv xav paub hais tias lawv muaj nuj nqis thiab lawv tseem ceeb rau txoj hauj lwm ntawm txoj kev cawm seej. Ib yam lilub Pov Thawj Hwj Aloos yuav npaj cov tub hluas los mus txais lub Pov Thawj Hwj Mekixedes, peb cov ntxhais hluas tab tom npaj los mus rau hauv lub lub koom haum tseem ceeb tshaj plaws hauv ntiaj teb no—lub Koom Haum Niam Tsev. Cov tub hluas thiab ntxhais hluas uas zoo heev, muaj kev ntseeg, thiab muaj zog heev no tab tom npaj los ua niam tsev thiab txiv tsev thiab uas niam ua txiv uas yuav los tu tub ki kom tsim nyog rau Vajtswv lub nceeg vaj xilethi-aus.
Kuv ua tim khawv hais tias peb Leej Txiv Saum Ntuj Ceeb Tsheej txoj hauj lwm yog los muab txoj kev tsis txawj tuag thiab txoj sia nyob mus ib txhis rau Nws cov me nyuam.6 Peb cov ntxhais hluas muaj ib txoj hauj lwm tseem ceeb uas yuav los pab ua kom tau txoj hauj lwm loj heev no. Los ntawm Yexus Khetos lub npe, amees.