Re Ngeasek el Redil el Ngara Ureor
Bek el mekerei el redil er a ikelesia a kirir el omelchesuar el kmong klou a ultutelir, techall el mo mesiou, e omelechesiu el kmo ng klou a sebechir el kudmokl er tial ureor.
A rak ra mla memong, ra chelsel a ongdibel ra cherrengelel a re priesthood, ea Bisob Gérald Caussé a milngedecheduch ra resechal ra Ikelesia el mesaod el kirel a kmo tirkel olab a deruchall ra Aaronic Priesthood ma Melchizedek Priesthood a diak el lobii e blechoel dmak el kutmokl a ngerchelel a ureor ra diak a ulebengelel klengar.1 Se el cheldecheduch a tara kmal klou el klengeltengat el olengeseu ra rengeasek el sechal ra Aaronic Priesthood el mes a urerir el loruul el kirel a omdois ra rengedel a Dios er tial beluulechad. Aike el uldak el urerir a smisichii a Ikelesia ma dirrek el mengetikaik ra dmolech el bult ma blakelreng ra rengrir a rengeasek el sechal me te mesa el klou el belkul aike el loruul ma dirrek el tia el ureor.
Chelechang eng soak tia el cheldechedechak a bo el ulebengelel se el cheldecheduch er chelecha el bo kusaod el kirel a kmo ng mekera ea rengeasek el redil ra Ikelesia le dirrek el ulsbechall e klou a ultutelir ra ketmeklel a urerel a Rubak me a telungalek er tir me a Ikelesia er Ngii.
Di uaia Bisob Caussé, ak kiliei ra kekerei el rechelel a Ikelesia ra temel a ta ra kmal ungil taem rak ngeasek, e te dirrek el mle blechoel el olengit er ngak mak kutmokl aike el ngerchelek ma dirrek el tekoi ra omesiou ra Ikelesia el sebechel mekedmokl ra remeklou. Tara okesiu, kemam el ngara prokuram er a rengeasek a blechoel el olngeseu el melib e orrurt a klokool ma dirrek er a ikel tokubets el sils. Aki milluches a tekoi ra katsudo, mechelii a cheldebechel ra omengitakl el mengitakl ra temel a ongdibel ra Ikelesia, e dirrek el blechoel el ngara rokui el telengtengil a tekoi ra Ikelesia. Ak dirrek el mlokedong el mo ometebechel ra omengitakl ra Ikelesia ra temel a miting ra sakrament ra bek el sandei. Sebechem el metebengar el kmo ng uangera el klou lungil el omeruul el kirel a teruich ma elollem a rekil el dechor ra mederir a rokui el rechad ra Ikelesia ra bek el Sandei el mengitikaik er tir el mengitakl a chelitakl ra Ikelesia? Ak kulmechesiu er ngak el mle usbechall e ngar er ngii ak rirellii. A rechad a uluusbech er ngak el ngarsei, e dirrek el soak el ngar ngii a usbechellek. Sel omeruul a ngilsukak el meleketek ra klaumerang er ngak ra Jesus Kristo, e dirrek el di uaia le rirellii el mora Bisop Caussé, ng mlo otil a klengar er ngak ra ebangkelio ra omesiou.
Rebek el chad ra ikelesia a kirir el medengei el kmo te kmal usbechall. A ta el chad a ngarngii klou a ututelel el cherrengelir ma dirrek el kakerous el duch ma sebechir el remuul el ngii a sebechel ngosouir tial ureor meng di melemolem. A rengeasek el sechal er kid a olab a ngerachel ra Aaronic Priesthood el ngarngii a omesodel ra Doctrine and Covenants el ngii a blechoel el chemolt e bleketakl. Ng locha diak el sa el bleketakl el mora rengeasek el redil ra Ikelesia, rechad ra blirir, me a dirrek el mengeteklir el kirel, a taem ra le metecholb, a rengeasek el dil a ngarngii a telbiil el ngerchelir el mo “ngara klengitelreng lobengterir tirkel ngara klengitelreng; uaisei, e dirrek el mengelim er tirke el chelmongel, e dirrek el mo dechor el sioning ra Dios ra bek el taem me a dirrek ra rokui el tekoi, ra rokui el basio el tir a ngar er ngii, el dirrek el mo lmuut ra kodall.”2 Rengeasek el redil a ngarngii a techellir el mo kudmokl aika el ngerachel se el sekum te mesiou ra omerredel ra klas er tir, council er a rengeasek, ngar er ngii a techellir el mesiou, e dirrek el melechesuar el kmo ngar er ngii a moktek er tir el ngii a usbechall el kirel tia el ureor
Ngara Handbook 2, e kede subii el kmo a ureor er a mo suobel ra chelsel a ward el de ngarngii a uldimukl er ngii a “chedal a ikelesia el misionari, orreked er a re ulebult, oluut er tirke el diak el blechoel mera ikelesia el rechad ra ikelesia, templo ma urerel a reksi ra telungalek, me osisecheklel a ebangkelio.”3 Tia el ureor ra ward a ngara cheungel a derderel a mui ra klaumerang el bisob er kid el tir a olab a kisel a priesthood ra ikel ward el lengarngii. Betok el rak el me er chelechang el presidency er kid a blechoel el oker “Ngera ra ika el bingel adiak el bo el uldimukl er ngii a re ngeasek el dil?” A nger a uase te ngarngii a loruul ra rokui el bingel tial ureor.
Tara okesiu, ak dirk milsterir a rebebil ra rengeasek el dil ra basio el ngara Las Vegas el dirk mlokedong el mo mesiou el oungerachel el kirel a templo ra ward ma dirrek el reski ra telungalek. Te mle ulecholt ra klemeriar reng el kirel a techellir el olsisechakl e olengeseu ra rechad ra ward er tir el osiik ra re beldekir. Te mle meduch a computer el kmal ulsbechall, e mla mo meduch el ousbech ra FamilySearch, e kmal mle semeriar lolecholt a lodengei lobengterir a rebebil. Ng mle bleketakl el kmo ng mlar ngii a olechotel a klaumerang ma dirrek el klemedengei er tir el kirel a kmo ngera meng klou a ultutelel el dosiik a ngklir a mla mad el rebeldeked me seikid el klou a ututelel chedaol ruoll ra mo suobel a mo sebechel mekedmokl el kirir ra templo.
Mekesai el buil ra mla memong, e ng mlo ngar ngii a techellek el mo skeng er tia el uldaso el mora re terung el teruich ma eua rekrir el ngeasek el dil. Ak ulab a teblo el babier el kirel a ketmekill el tekoi er a ward council. A kullengit er tir me bo longuiu e omes aikel kldmekill ra ward el sebechir el kudmokl. A Emma a ulemes el kmo ng mlarngii a beches el telungalek el dirk mle soiseb ra ward, e ngii a dilu el kmo ng sebechel el mo olengeseu er tir el mo imuul ra beches el blirir e dirrek el oltobed a kloklir le te dirk mlara tara basio el mei. Ng dirrek el ulemdasu el kmo ng sebechel el mo sechelirir a rengelekir e dirrek el mo olecholt el tir el meliuekl ra beches el skulir. Ng dirrek el ulemes el kmo ng mlar ngii a merael el mei el blengur ra ward e ngii a ulemes a betok el kakerous el teletael el ngii a sebechel lodars a ngelsuil.
A Maggie a ulemes el kmo ng mlar ngii a rebebil ra remechuodel el rechad ra ward el ousbech a odingel ma sechelei. Ng dilu el kmo ng soal mo oldingel e mo sebechel lolengeseu er tirka el kmal tokubets el remechuodel. Ng ulmelechesiu el kmo ng sebechel lolengeseu lolsisechakl ra rechad ra ward el kmo ng mekera a loruul e lousbech a tekoi ra media. Ng kmal dimlak a tal ngera el ngii a mle beldukl el ruoll el dimlak el sebechir tirka el teru el ngeasek el dimlak el sebechir lolngeseu el kirel!
Tirke el olab a deruchall ra chelechad ra ward, ma lechub eng ngidi el okedong ra ward, ng sebechir el mesa el kmo a rengeasek el dil a tara kmal klou a ultutelir e usbechall el mo omtech aike el ngii a kedmekill ra chelsel a ward? Ng blechoel ngarngii a kemanget el beldeklel a teletael el ngii a uldimukl er ngii a tang el mo mesiou, e kid a blechoel el omdasu el kmo ng di kirir a remeklou el chad ra ward el mo kudmokl. El uaisei el tirke el tir a olab a Aaronic Priesthood a mla mongit el mo mesiou lobengterir a re demerir ma dirrek el sechal ra Melchizedek Priesthood, a rengeasek el dil a dirrek el sebechir el mokedong el mo mesiou ra re ousbech a ngesou ra ward lobengterir a re derrir ma lechub a re bebil er a rodos. Tir a sebechir, e blak a rengrir, e sorir el meruul a betok el tekoi el diak el di se el bera ikelesia sel le Sandei!
Se el domes a ngerachel el ngii a rengeasek el dil a mo ngerchelir el kudmokl ra ngar medad el taem, e kede locha mo melebedebek el kmo ngera el omeruul a sebeched el mestrir er chelechang el mo ngosuterir mengedmokl er tir el kirel a mo misionari, skuul, me a dirrek el mengeteklel a deruchall ra chelsel a Ikelesia, oureor ra templo, redil bechiil, chedil, sensei, e dirrek el sechelei. Te omuchel er chelechang el melai a ikaikid el ngerachel. A rengeasek a blechoel el olengit er tir el olsisechakl a suobel se el Sandei ra klas er tir. A techall a ngar er ngii er chelechang el mora rengeasek el dil el mo mesiou el ngii a milkedmokl el okiu a rechad el oureor el mengedmokl a chedaol ruoll ma lechub e ng tirke el di tir el sorir lolengeseu lolab a temir se el sekum ete mora templo lobengterir a cheldebechel ra rengeasek el mo meruul a techolb el chelid el mora ra re mla mad. A rengalek el redil ra Primary a mla mo siotai er tir el mo ngara miting ra Priesthood ma dirrek el Templo, el ngii a olengeseu ra klaumedengei er tir el kmo te dirrek el kmal klou a ulsbechellir el kirel a bleketakl el ureor ra priesthood. Te mo subii el kmo a rsechal, redil, rengeasek, ma rengalk el rokui a sebechir el ngmai a klengeltengat ra priesthood e dirrek el sebechir el rokui el ngmai a ngerachel el ngii a olengeseu ra bleketakl el ureor el melelmolm er a urelel a Rubak
Bisob, aki medengei el kmo a ureriu a blechoel el oberaod, e ngdi a tara kmal ngar er bab el klou a belkul a bdelul a cheldebechel ra Aaronic Priesthood, el ngii a beldukl, Handbook 2 a smodii el kmo, “a bisob, ma re counselor a olterekokl a dereder el mora cheldebechel ra Rengeasek el Dil. Te dirrek el mengkar e melisiich ra derta el ngeasek el dil, loureor lobengterir a rechedam ma rechedil ma dirrek el tirke el oungerachel ra Rengeasek el Dil er tial el ureor.” Ng dirrek el beldukl, “A Bisob ma recounselor er ngii a dirrek el mo oumesinged el mo ngara miting ra Rengeasek el Dil, omesiou ma dirrek el klokolir.”4 Aki mereng a sulir tirke el bisob el chemoit a temir el oldingel a klas ra Rengeasek el Dil e dirrek el mesterir a techall ra ward er tir mete lmuut el mo meklou a ngerchelir ra tia el ureor. Ko mesulang el kerkikl el uchul ma rengeasek el dil a meklou a ultutelir lolengeseu ra rechad ra ward ra ikel el ousbech! Aika el techall el mo mesiou ra klou ututelel el omeruul a mo mesterir a klou el klengeltengat el muut el klou ra ike el omeruul el di kirel a ongelaod.
Mo er kemiu, el ngeasek el dil ra Ikelesia, aika el temiu el om ngeasek a sebechel el mo meriked e blechoel el meringel. Aki mla metebengar el kmo ng betok er kemiu a chuarm el kirel a belkmiu el chad, klou el beraod ra chelngemiu, ma dirrek el ringelel ra uldasu. Omult a uldesuem el mo tuobed, ra ombai kiei ra ringel, a locha diak el bo el sumechokl a rokui el ringel, e ng di a omesiou a sebechel el olengeseu el remuul a ringel el chelngelem el mo mekebekakl e remuul a chelngelem el mo diak el sa el meringel. A tara kmal ungil rolel el om kilungii a klaumerang er kau el kirem a se el mocholt, el okiu a omelbedebek ma omesiou el mora rebebil, el kmo ngarngii a klou el belkud el dolengeseu.5 Ak oldubech er kemiu el ngeasek el redil el mo odars a chimomiu el mo ngmai a temiu se el omes a kirel mekedmokl em ngai aikal chim el mo oureor sel omues a sebechem lolengeseu el kirel. Se el kedmokl a chedaol ngercheliu e oureor el meleketek ra rengedel a Dios, a klengeltengat a mo omaoch el mora chelsel a klengar er kau e kau a mo medengelii a dmolech e diak a ulebengelel el deureng se el moltirakl.
Rodam ma rodos, a rengeasek el dil er kid a kot el ungil. Te ngarngii a duch er tir, diak a ulebengelel el klemeriar el reng er tir, klisichel a bedengir, e dirrek el klechubechub ma ulkerreu er tir. Te sorir el ngara omesiou. Te kirir el mo medengei el kmo ng klou a ultutelir e dirrek el usbechall el kirel a ureor ra mo suobel. El di uaia Aaronic Priesthood el mengedmokl el kirel a klou el ngesou el rengeasek el sechal a mo melemiakl el mora Melchizedek Priesthood, a rengeasek el dil er kid a mo mengedmokl er tir el mo chedal a kot el klou e mesisiich el cheldebechel ra redil ra beluulechad—Cheldebechel ra Rolngeseu. Uldak el rokui, tirka el klebokel, mesisiich, e mesisiich a klaumerang er tir el redil ma rsechal a mengedmokl er tir el mo bechiil el sechal ma redil, rechedil ma rechedam el tir a mo omekeroul a telungalek el klikiid ra Rengedel a Celestial ra Dios.
Ak sioning el kmo a urerel a Chedam ra Babeluades a mesterir a rengelekel a klisiich meng diak el mad ma dirrek el diak a ulebengelel el klengar.6 Betik ra rengud el rengeasek el redil a ngarngii a klou a ultutelel el urerir el olengeseu el mo kutmeklii tia el klou el ureor. Ngara ngklel a Jesus Kristo, amen.