Pwukoah en Peinakapw kan
Peinakapw koaros nan Mwomwohdisoht anahne ese ia uwen arail kesempwal, ahneki ansou mwahu en kin papah, oh pepehm me mie mehkot kesempwal me e kak toukihda ong doadoahk wet.
Pahr nekiero, nan tiepene en priesthood en kapokon lapo, Pisop Gérald Caussé padahkehng ohl akan en Mwomwohdisoht kawehwehda mwomwen Priesthood en Aaron oh Melkesidik kin doadoahkpene pwehn kapwaiada doadoahk en komour wet.1 Padahk wet wia kapai laud ohng mwahnakapw kan me kolokol manaman en Priesthood en Aaron ren kilang mwomwen manaman pwukat ah kin doadoahk nan wein Kohn nan sampah wet. Re kin ehupene kakehlaka kemwekid en nan Mwomwohdiso oh kalaudehla kadehde loal oh inou en nan mohngiong kan en neitail mwahnakapw kan ni arail kin kilang uwen kesempwal en arail pwukoah oh uwen doadoahk ah kesempwal.
Rahnwet I men kapatahieng ahi padahket ohng padahko ni ei pahn kosoia mwomwen peinakapw kan en Mwomwohdiso ah pil mie anahnepe oh kesempwalpen pweidahn doadoahk en Kauno nan peneinei kan oh Sapwellime Mwomwohdiso wet.
Rasehng Pisop Caussé, I keirda nan branch tikitik ehu en Mwomwohdiso ansou me I wia peinakapw men, oh I kin kalapw alehdi pwukoah kan me udahno en me laud arail pwukoah. Karasepe kiht koaros nan pwihn pwulopwul kalapw sawas kaunopada oh kaunda pein aht kemwekid kan oh kemwekid kesempwal kan. Se kin ntingiada aht sipai, kihpene pwihn en koul pwehn wia mehn kemweit ohng kemwekid kan en aht branch o, oh tohto me kin iang patehng kemwekid koaros me kin wiawi nan branch o. I wia pwukoahn kaweid koul nan branch o nan wihk koaros. Na song medewe uwen kasukuhl mwahu me kohieng aramas men me sounparte 16 kesihnen mwohn mwoahlo nan branch o Rahn Sarawi koaros oh kaukaweid irail en koul? I kak kehn anahnepei oh ese me mie kahrepei. Aramas kin kasik ien mih mwo, oh I perenki me mie katepei. Kasukuhl wo kakehlahda ahi kadehde en Sises Krais, oh e duwehtehte dahme e wiahng Bishop Caussé, e katengehdi ahi mour nan papahn rongamwahu.
Emenemen kitail anahne ese uwen ah mie anahnepatail. Mie mehkot kesempwal rehn emenemen aramas me e kak en sawaski oh en emenemen dahme re kin saminih loalle oh koaiek kan me kak sawas pwehn kamwakid doadoahk kesempwal wet. Neitail mwahnakapw kan mie arail pwukoah en manaman en Priesthood en Aaron me kawehwehdier nan Doctrine and Covenants me kalapw pwarada oh sansal. Mwein e pahn sohte nohn sansal ohng peinakapw kan en Mwomwohdiso wet, oh ong arail pahpa nohno, oh ong arail kaun kan me, sang ni arail pepdaislahro, peinakapw kan inoukidahr pwukoah kan ren “mauk rehn irail akan me kin mauk; ehi, oh koalolomwahu irail akan me anahne koalolomwahu, oh en wia nin duwen sounkadehde en Koht ni ahnsou koaros oh ni mehkoaros, oh ni wasa koaros me kumwail pahn mihe lau kumwail mehla.”2 Peinakapw kan ahniki ansou mwahu en kapwaiada arail pwukoah kan nan arail ward kan oh prans kan oh ansou me irail kin papah nan kaun en arail wasahn ehupene kan, kemwekid en pwihn pwulopwul kan, oh nan pwukoah teikan. Peinakapw koaros nan Mwomwohdiso wet anahne pehm kateparail, ahniki ansou mwahu en papah, oh pehm katepe laud me anahne sawaski nan doadoahk wet.
Kitail esehla sang nan Pwuken Kaweid nempe 2 (Handbook 2), me doadoahk en komouro nan atail ward kan iei “doadoahk en misineri rehn towe kan, epwelpen me ahpwte weliakapw, kakehlakahda towe kan me luwetalahr, tehnpas sarawi oh doadoahk en poadoapoad en peneinei, padahk en rongamwahu.”3 Doadoahk wet kin mih pahn kaweid en atail pisop loaloapwoat kan, me kolokol mweimwei en key en priesthood kan ohng arail ward. Sounpar kei lel met atail kaun kan kin kalapw idek, “Nan mehnia me I ahpwte kosiahka me neitail peinakapw kan sohte kak iang patehng?” Pasapengo iei me mie arail koahiek me re kak sawaski nan wasa kan koaros nan doadoahk wet.
Karasape, I ahpwte tuhweng diren peinakapw kei nan Las Vegas me kepwukoahki en papah nan tehnpas sarawi oh sounsawas ohng pelien poadoapoad en peneienei kan. Udahn irail lingankihda arail peren pwehki arail pahn kak padahki oh sewese tohn arail ward o ren diarada kadaudokerail kan. Katepen arail koahiek en doadoahngki computer, esehla mwomwen doadoahngki FamilySearch, oh kaperenpen ehukiheng mehteikan duwen rongamwahu wet. E sansal me mie arail kadehde oh wehwepen kesempwal en raprapahki ahd kan en peneinei me melahr akan pwe doadoahk kesempwal en tiahk sarawi kan en kak pweida nan tehnpas sarawi.
Sounpwong kei samwalahro, I ahniki ansou mwahu en song iren kapatapat iou rehn peinakapw sounpar 14 riemen. I alehdi tehn daropwe riau en koasoandihn mihting en ward ngehi kiheng Emma ehu teh oh ehu ong Maggie. I pekihda rehra ren wadekedi koasoandien mihtingo oh kilang ma mie mehkot me re kak sawaskihda. Emma kilangada me mie peneinei kapw iou me ahpwte kohdo nan ward o, oh e inda me e kak iang kohla sewese irail. E medewehda me e kak kempoakepahnki serihko oh kasalehieng irail wasa koaros iangahki imwen sukuhl kapwo. E kilangada me mie mwengehn soutik ohng arail ward o pahn wiawi oh e pehm me soahng tohto kei e kak wia pwehn kak sawas.
Maggie kilang me mie aramas mah kei nan ward o me anahne aramas en kin pwarek irail oh ehuieng irail. E inda me udahn e men pwarek oh sewese irail towe mwahu kan me mah. E pil pehm me e kak sawas padahkiheng towe kan en nan ward o mwomwen wiahda oh doadoahngki computer ape de cell. Sohte mehkot nan koasoandien mihting pwukat me peinakapw riemenet sohte kak wia!
Irail pwihn en mihting en nan ward kan, de me ahniki pwukoah nan ward, kin kilang peinakapw kan nin duwen arail wia katepe laud pwehn sewesehda soangen anahn tohto me mih nan atail ward kan? Udahno soahng tohto kei kin konehng emen en papah, ahpw kitail kalapw medewehte me aramas laud en nan wardo me kakehng. E duwehte neitail Priesthood en Aaron kan me alehdi pwukoah pwehn wia doadoahk rehn arail pahpah kan oh ekei ohl me kolokol mweimwei en Priesthood en Melikesidik, neitail peinakapw kan kak kepwukoahki ren wia sahpis oh sewesehda anahn kan en towe kan en ward iangahki arail nohno kan de ekei lih pirien karasaras mwahu kan. Irail kakehng, onopadahr, oh inengieng wia laudsang iangete sarawi Rahn Sarawi kan!
Ni atail kin koskosoia pwukoah kan me neitail peinakapw kan kin kasik irail en wia ehurahn, kitail mwein pahn anahne idek rehtail soangen kasukuhl dahnge me kitail kak kiheng irail met me pahn kak seweseirail ren kaunopada pwehn wia misineri kei, wehwehkihla rongamwahu wet, kaun en utuht en Mwomwohdiso, sounsawas nan tehnpas sarawi kan, lih pwopwoud kan, nohno kan, soun kaweid kan, oh kempoakepah kan. Re kak tepier wiwia pali lauden pwukoah pwukat. Me pwulopwul kan kin kalapw kepwukoahki ren sawas kihda padahk Rahn Sarawi nan arail class kan. Mahso me mah kan kelehpw me kin wia tiahk sarawi nan tehnpas sarawi. Rahn pwukat e mweimweiengehr peinakapw kan en wia tiahk sarawi kan sang ni arail kin iangih pwihn pwulopwul kan kohla wia pepdais ohng me melahr akan. Peinakapw me sounpar en Primary kan kakehr patehng mihting en Kaunopehng Priesthood oh Kohla nan Tehnpas Sarawi kan, me pahn kak seweseirail en wehwehki me e pil kesempwal arail pahn patehng kemwekid kesempwal me mih pahn kaweid en priesthood. Re pahn esehla me ohl akan lih akan, me pwulopwul kan, oh seri kan koaros kin alehdi kapaipen priesthood oh koaros kak alehdi pwukoah en wenlahte mwowe nan Sapwellimen kauno doadoahk.
Pisop kan, se wewehki me amwail pwukoah kan kin kalapw katoutou, ahpw ehu amwail pwukoah keieu kesempwal iei en kaunda pwihn en Priesthood en Aaron kan, me sansal nan Pwuken kaweid nempe 2 kawehwehdi me “pisop oh nah sounsawas kan en kaweid kaun en priesthood ohng kemwekid en Peinakapw kan. Mie sileparail oh kakehlaka emenemen peinakapw kan, kalapw doadoahkehng nohno pahpa oh kaun en Peinakapw kan nan koasoandi wet.” E pil sansal me, “Pisop oh nah sounsawas kan en kin kalapw patehng mihting kan, sahpis kan, oh kemwekid kan en Peinakapw kan.”4 Se kapingkiheng Pisop kan me ahniki ansou en pwarek en Peinakapw class kan oh kiheng irail ansou mwahu en wia arail pwukoah kan nan arail ward kan. Soangen kalahngan en Pisop kan me nantiheng ansou koaros kasalehieng peinakapw kan me irail katapanehng mihting en anahn en nan towe kan en nan ward! Ansou mwahu pwukat en papah wia tiahk kesempwal kei pwehn kapai irailda laud sang kemwekid kan me irail kin perenki wia.
Ong kumwail peinakapw akan en Mwomwohdiso wet, nan amwail mih nan sounpar en pwulopwul, kakete kediropw oh kalapw apwal. Se kilangadahr me pali tohto en kumwail kin kahpwalki amwail sohte ese ia uwen amwail katapan, amwail kin masak, pwunod laud, oh de pil soumwahu en toutou laud. Medewe mahs mehtei kan, mwohn medewe pein amwail kahpwal kan, mwein sohte pahn kamwahuiala kahpwal pwukat, ahpw sahpis kak kalapw kamarahda ahmw toutou kan oh wiahieng amwail kahpwal kan en sohla nohn apwal. Ehu wiepen kalaudehla pepehm enahmw katapan iei en kasalehda, sang ni ahmw pahn insenoh oh sewese mehteikan, me soahng tohto me kitail kak wia me katapan.5 I kangoangoahkin kumwail en kin kawada pehmwail kan ahnsoun anahnepen sawas akan oh lemehda sawas ansou me kumwail kin kilangada anahnepen sawas akan limwahmwail. Ni amwail pahn kapwaiada inou en pwukoah kan oh patehng kawada wein Koht, kapai kan pahn mweredieng nan amwail mour oh kumwail pahn diarada peren loal sang ni wia weliepen Krais.
Riei ohl oh lih ako, neitail peinakapw kan inenen katapan. Mie arail koahiek, ineng mwahu sohte imwi, kehlail, oh insenoh oh men sawas. Irail men sawas. Irail anahne ese me mie kateparail oh re kesempwal nan doadoahk en komour. Duwehte Priesthood en Aaron arail kaukaunopehng tiahk sarawi nan pwihn en mwahnakapw kan kohda nan Priesthood en Melkesidik, neitail penakapw kan kaukaunopehng en wiahla towe kan en koasoandi lap en lih akan nan sampah—Sounsawas en Lih kan. Patpene koaros, peinakapw oh mwahnakapw masamwahu, kehlail, oh loaloapwoat pwukat kaukaunopehng ren wia lih pwopwoud oh ohl pwopwoud kei, oh nohno oh pahpa kei me pahn kairda arail peneinei en warehng wein selestel en Koht.
I kadehdehki me doadoahk en Samatail Nanlengo iei en kiheng Sapwellime serihkan mour kokohlahte oh mour soutik.6 Neitail peinakapw kesempwal kan ahniki pwukoah kesempwal pwehn kasalehda sang arail sawas en iang kaimwsekala doadoahk kesempwal wet. Ni mwaren Sises Krais, amen.