Blong Hem

Long histri naet ia, mi talem lav mo tangkyu blong mi long wanwan long yufala ol dia sista blong mi. Nomata long yia, ples, hadtaem, o situesen blong yumi, yumi kam tugeta long yuniti, long ful paoa, long stamba tingting, mo wetem testemoni se olgeta we oli lavem yumi, oli Papa long Heven, Sevya, Jisas Kraes; mo profet blong yumi we i stap laef, Presiden Russel M. Nelson.

Olsem wan yang kapol, bisop blong mitufala i askem mitufala blong go visit mo givhan long wan famli we oli nomo go long jos blong plante yia. Mitufala i akseptem wok ia mo go long hom blong olgeta sam dei afta. Kwiktaem nomo, i bin klia long mitufala se oli no wantem ol visita blong Jos.

Mekem se long nekis visit blong mitufala, mifala go wetem wan plet blong kuki, wetem strong tingting se joklet kuki ia bae i mekem olgeta i laekem mitufala. Be nogat. Kapol ia i toktok tru long skrin blong doa, tufala i mekem i klia moa se oli no wantem welkamem mitufala. Taem mitufala i stap gobak long haos, mitufala i bin gat tingting ia se sapos mifala i bin givim wan nara samting ating bae oli glad long mifala.

From we mitufala i no gat visen long saed blong spirit, i mekem ol nara visit oli kam had. Fasin blong sakemaot man i no mekem man i fil gud long hem. Taem i pas, mitufala i stap askem mitufalawan, ?“From wanem mitufala i stap mekem samting ia? ?Wanem nao i stamba tingting blong mitufala?

Elda Carl B. Cook i bin talem hemia: “Blong givim seves insaed long Jos… i wan jalenj sapos oli askem yumi blong mekem wan samting we i mekem yumi fraet, sapos yumi kam taed blong wok, o sapos oli singaotem yumi blong mekem wan samting we yumi no gat intres long hem.”¹ Mitufala i bin stap eksperiensem trutok long ol toktok blong Elda Cook taem mifala i disaed blong lukaot daereksen blong Wan Man wetem wan lukluk we i moa bigwan bitim hemia blong mifala.

Mekem se afta long plante prea wetem tru hat mo stadi, mitufala i kasem ansa long from wanem blong seves blong mitufala. Mitufala i bin gat wan jenis long save blong mitufala, wan bigfala jenis long hat, wan eksperiens long saed blong revelesen.² Taem mitufala i lukluk long ol skripja from daereksen, Lod i tijim yumi olsem wanem blong mekem ol wok blong givim seves long ol nara man i kam isi mo gat moa mining. Hemia skripja we i jenisim tugeta, hat mo lukluk blong mitufala: “Yufala i mas lavem Lod God wetem ful hat , wetem ful paoa blong tingting, ful maen mo ful paoa blong olgeta; mo long nem blong Jisas Kraes bae yufala i mas wok blong hem.”³ Nomata mitufala i save gud ves ia, i olsem we ves ia i stap toktok long mitufala long wan niu mo impoten wei.

Mitufala i luksave se mitufala i traehad wetem tru hat blong helpem famli ia mo helpem bisop, be mitufala i mas askem mitufalawan bakegen sapos mitufala i stap helpem famli ia from mitufala i lavem Lod, o no. King Benjamin i mekem i klia taem hem i se, “Luk, mi talem long yufala se from mi bin talem long yufala se mi bin spenem ol dei blong mi long wok blong yufala, mi no gat tingting blong tok flas, from mi bin mekem wok blong God nomo.”⁴

?So King Benjamin i stap givim seves long hu? Papa long Heven mo Sevya. Blong save hu mo from wanem yumi givim seves long ol narafala i helpem yumi andastanem se bigfala wok blong lav hem i blong givim evri samting long God.

Taem lukluk blong mifala i jenis, ol prea blong mifala tu i jenis. Mitufala i bin lukluk fored long ol visit wetem dia famli ia from lav blong mitufala long Lod.⁵ Mitufala i stap mekem blong Hem. Hem i mekem traehad ia i nomo wan hadwok. Afta plante manis blong stanap long fored blong haos, famli i stat blong letem mifala i go insaed. Be afta, mifala i bin gat prea tugeta oltaem mo stap storian tugeta abaot gospel. Wan frensip we i no save finis i bin stat. Mifala bin wosip mo lavem Hem taem mifala lavem ol pikinini blong Hem.

?Yu save tingabaot wan taem we yu helpem wan man long nid wetem tru hat blong yu mo filim se, ol wok blong yu, man i no luksave o no talem tangkyu from, o iven no wantem? ? Long taem ia, yu bin gat kwestin long weta seves ia i impoten o nogat? Sapos yes, bae ol toktok blong King Benjamin i tekem ples blong tu tingting ia mo iven harem nogud blong yu: “Yufala i stap mekem wok blong God blong yufala nomo.”⁶

Blong no bildimap kros, yu save bildim gudfala rilesensip wetem Papa blong yumi long Heven tru long seves. Lav blong yumi mo fasin blong yumi blong givim evri samting long Hem i tekemaot lukluk ia, se man i no luksave wok blong yumi mo glad from, mo i letem lav blong Hem i ron i kam mo go tru long yumi.

Samtaem yumi stat blong from wan filing ia se hem i wan diuti o wan responsabiliti, be iven seves ia i save lidim yumi blong tekem wan samting insaed long yumi we i hae, we i lidim yumi blong wok long “wan fasin we i nambawan blong folem”⁷—Presiden Nelson i invaetem yumi long “wan niu mo tabu wei blong kea mo givhan long narafala.”⁸

Taem yu lukluk long evri samting we God i bin mekem blong yumi, seves blong yumi i kamaot long wan han blong tangkyu. Taem yumi nomo tingting se seves we yumi mekem bae i leftemap nem blong yumi, nao bae yumi luksave, se, stamba blong seves blong yumi, i blong putum God i kam faswan.⁹

Presiden M. Russel Balad i bin tijim, “Hem i taem nomo we yumi lavem God mo Kraes wetem olgeta hat, sol, maen blong yumi, we yumi save serem lav ia wetem ol neiba tru long fasin blong stap kaen mo givim seves.”¹⁰

Ol fasfala Ten Komanmen i talem bakegen tabu waes ia: “Mi mi Hae God, mi God blong yufala. … Bambae yufala i no mas mekem wosip long ol narafala god, yufala i mas mekem wosip long mi nomo.”¹¹ Ples we komanmen ia i stanap long hem i helpem yumi andastanem se sapos yumi putum Hem faswan long evri samting, bae ol narafala samting yumi save we ples blong putum—iven seves blong yumi long ol nara man. Taem yumi tekem impoten posisen ia long laef blong yumi folem joes blong wantem mekem, Hem i save blesem ol aksen blong yumi blong gud blong yumi mo gud blong ol narafala.

Lod i kaonsel se, “Lukluk long mi long evri tingting long yufala.”¹² Long evri wik yumi kavenan blong mekem hemia nao—“blong oltaem tingbaot hem.”¹³ ?Bae yumi save gat wan lukluk olsem hemia blong God long evri samting we yumi mekem? Ol mol wok blong yumi long wol ia, ?bae yumi save mekem i kam wan janis blong soem lav mo ful tingting we yumi gat long Hem? Mi biliv i save hapen.

Yumi save mekem evri smol wok long lis blong yumi i kam wan wei blong givim glori long Hem. ?Bae yumi save luk wanwan smol wok olsem wan ona mo janis blong givim seves long Hem, iven taem yumi stap long medel blong ol deitlaen, ol diuti, o ol doti daepa?

Olsem we Amon i talem: “Yes, mi save se mi mi nating; long saed blong paoa blong mi, mi mi slak; from hemia, bae mi no tokflas abaot miwan, be bae mi tokflas long saed blong God blong mi, from long paoa blong hem mi save mekem evri samting.”¹⁴

Taem seves blong God hem i kam stamba tingting long laef blong yumi, yumi mas lusum laef blong yumi from hem, mo long stret taem, yumi kasem laef bakegen.¹⁵

Sevya i tijim prinsipol ia i simpol mo i tok stret: “From hemia, letem laet blong yufala i saen olsem ia long fored blong ol pipol ia, blong oli save luk ol gudfala wok blong yufala mo leftemap nem blong Papa blong yufala we i stap long heven.”¹⁶

Bae mi serem wetem yufala sam waes toktok we i stap long wol blong wan haos blong ol pikinini we oli no gat papa mo mama, long Kalkuta, India: “Sapos yu gat kaen fasin, pipol bae i tok agensem yu se yu selfis, yu gat wan defren tingting. Be yu gohed blong soem kaen fasin. Samting we yu spendem yia blong bildimap, narawan bae i prapa spolem gud long nekis dei nomo. Gohed blong bildim. Gud samting we yu mekem tedei, pipol bae i fogetem tumoro. Gohed blong mekem gud nomo. Yu givim wol ia evri gud we yu gat, be yet long olgeta, i no inaf. Gohed blong givim wol ia evri gud we yu gat nomo. Long en wanem we i impoten, i bitwin yu mo God blong yu.”¹⁷

Ol sista. Hem i oltaem bitwin yumi mo Lod. ?Olsem we Presiden James E. Faust i talem: “?Wanem nao bigfala nid we i stap long wol?’ … ‘?Hemia i no bigfala nid blong wol ia, blong evri man, long evri dei blong oltaem gat wan rilesensip wetem Sevya?’ Blong gat wan kaen rilesensip olsem, i soem fasin blong God insaed long yumi mo i no gat samting i save mekem wan bigfala jenis long laef blong yumi taem yumi kam blong save mo andastanem tabu rilesensip wetem God.”¹⁸

Semmak olsem we Alma i talem long boe blong hem, “letem evri wok blong yu i blong Lod, mo eni ples we yu go, letem i hapen wetem Lod; yes, letem evri tingting blong yu i go long Lod; yes, letem ol filing blong hat blong yu i stap long Lod blong oltaem.”¹⁹

Mo Presiden Russel M. Nelson i talem semmak olsem tu long yumi se: “Taem yumi andastanem Atonmen we Hem i volontia blong mekem, eni filing we yumi gat, se yumi stap mekem wan sakrifaes, bae i lus mo filing blong tangkyu blong gat janis blong givim seves long Hem bae i tekova.”²⁰

Ol sista, mi testifae se taem Jisas Kraes, tru long paoa blong Atonmen blong Hem, i wok long yumi mo insaed long yumi, nao Hem i stat blong wok tru long yumi blong blesem ol narafala. Yumi givim seves long olgeta be yumi mekem from yumi lavem mo mekem wok blong Hem. Yumi kam ol man we skripja i tokbaot se: “Evri man [mo woman] i … lukaotem gud laef blong neba blong hem, mo [i] mekem evri samting wetem wan ae we i lukluk nomo long glori blong God.”²¹

Ating bisop blong mifala mi bin save se hemia i wan lesen we mi mo hasban blong mi i sapos blong lanem aot long ol fasfala traehad, we nomata oli no stret evriwan, be mifala i bin mekem wetem gud tingting, blong save givhan long ol boe mo gel we God i lavem. Mi serem witnes blong miwan long ol gudfala fasin mo lav we Hem i serem wetem yumi iven taem yumi traehad blong givim seves long Hem. Long tabu nem blong Jisas Kraes, amen.