Naoia Hem I Taem
Sapos i gat wan samting we yu nidim blong mekem, naoia i taem.
Samfala yia i pas, taem mi stap rere long wan bisnis trip, jes blong mi i stat soa. Wetem wari, waef blong mi i disaed blong folem mi. Long fas flaet blong mitufala, soa ia i kam moa strong we i mekem i had blong mi pulum win. Taem mifala kasem mitufala go stret long hospital, mo kasem sam tes. Afta jekap dokta i talemaot we i sef blong mi travel bakegen.
Mifala i gobak long eapot mo go long wan flaet blong kasem ples we mifala i wantem go long hem. Taem mifala i stat blong go daon, paelot i toktok long maek blong plen mo askem se bae mi go luk olgeta. Ea hostes i kam klosap mo talem se oli jes kasem wan imejensi kol, mo talem se wan ambulens i stap wet long eapot blong tekem mi i go long hospital.
Mifala i go long Bulgaria ia mo go kwik long lokol imejensi rum. Insaed i gat tu dokta we oli wari, we oli eksplenem se oli bin rong long sik blong mi, mo mi gat wan nogud sik long lang, o blad i strong long lang we i blokem rod blong blad i ron, mo oli mas tritim kwik. Ol dokta oli talemaot se i nogat plante sikman we oli laef afta long sik ia. Wetem save ia se mifala i stap longwe long hom mo no sua sapos mifala i rere from jenis ia long laef, ol dokta oli se sapos i gat sam samting yet blong mekem long laef, naoia hem i taem.
Mi tingbaot gud hao long smol taem ia, lukluk blong mi long evri samting i jenis wantaem. Wanem we i bin impoten long smol taem we i pas ia, naoia i nomo impoten. Ol tingting blong mi i jenis long ol gud samting blong laef i go long wan lukluk we i no save finis—tingting long famli, ol pikinini, waef blong mi, mo long en, mi jekem laef blong miwan.
?Hao nao mifala i bin stap mekem olsem wan famli o wanwan man? ?Mifala i stap laef gud folem ol kavenan we mifala i bin mekem mo olsem Lod i wantem, o mifala i jes letem ol samting blong wol i stopem mifala long wanem we i moa impoten?
Bae mi invaetem yufala blong tingting long wan impoten lesen we yufala i bin lanem long eksperiens ia: blong tekem step i gobak biaen, lego wol long fored, mo jekem laef blong yufala. O long toktok blong dokta, sapos i gat eni samting long laef blong yu we yu nidim blong mekem, naoia i taem.
Jekem Laef blong Yumi
Yumi laef long wan wol we i fulap long infomesen, we i gohed blong gro bigwan long ol samting blong wol we i mekem i moa had blong kamaot long ol noes blong laef ia mo lukluk long ol samting we i no save finis we i impoten. Long evri dei laef blong yumi, oltaem yumi fas long ol nius we i stap kamaot kwik tru ol niu teknoloji tedei blong pulum intres blong yumi.
Spos yumi nogat taem blong luklukbak, bae yumi no save luksave ol kwik jenis ia long ol laef blong yumi mo ol joes we yumi mekem. Yumi save luk laef blong yumi i fulap wetem ol smolsmol infomesen we yumi kasem tru intanet, ol vidio, mo ol topik we i pulum intres. Nomata se i intresting mo i entetenem yumi, plante long ol samting ia oli no help nating wetem progres blong yumi we i no save finis, be yet oli blokem tingting blong yumi long hao yumi eksperiensem laef blong yumi long wol.
Ol kaen samting blong wol ia i olsem ol samting we i stap long drim blong Lihae. Taem yumi stap progres folem rod blong kavenan wetem ol han blong yumi i hang strong nomo long aean rel, yumi harem mo luk olgeta we i “stap jikim ol man mo poenem ol fingga blong olgeta” long bigfala haos ia we i gat fulap spes (1 Nifae 8:27). Bae yumi no tingting blong mekem, be samtaem, yumi stop smol mo lukluk smol i go long wanem i stap hapen. Sam long yumi bae i lego aean rel mo muv i go klosap blong lukluk gud. Ol narawan bae oli foldaon gud i go, “from olgeta we oli stap jikim olgeta” (1 Nifae 8:28).
Sevya i talem long yumi blong “yufala i mas lukaot gud. Yufala i no mas westem taem blong yufala long fasin ya we yufala i … stap tingting tumas long laef blong wol ia.” (Luk 21:34 Ol revelesen blong tedei i stap rimaenem yumi se God i singaotem plante, be hamas nomo Hem i jusum. God i no jusum olgeta “hat blong olgeta i stap tumas long ol samting blong wol ia, mo oli wantem kasem ol ona blong man” (Doktrin mo Ol Kavenan 121:35; luk tu long ves 34). Blong jekem gud ol laef blong yumi i givim wan janis blong kamaot long wol ia, luk weaples yumi stanap long rod blong kavenan, mo, sapos i nid, mekem ol jenis blong mekemsua se yumi hang strong i stap mo yumi gohed blong lukluk fored nomo.
I no longtaem, long wan wol yut divosen, Presiden Russel M. Nelson i bin invaetem ol yut blong tekem wan step i gobak biaen, oli aot long wol, oli kamaot long sosol media tru long fasin blong livim kakae we oli no tajem eni sosol media blong seven dei. Mo las naet nomo, hem i mekem wan semmak invitesen i go long ol sista, insaed long sesen blong ol woman long konfrens. Afta hem i askem olgeta blong luk sapos i gat eni samting we oli filim i defren, long wanem oli tingting mo hao nao oli tingting. Afta hem i invaetem olgeta “blong jekem gud we jekem gud laef blong olgeta bakegen wetem Lod … blong mekemsua se ol leg blong olgeta i stap strong long rod blong kavenan.” Hem i leftemap tingting blong olgeta se sapos i gat sam samting long laef we oli nidim blong jenisim, “tedei, hem i stret taem blong jenis.”1
Blong jekem laef blong yumi we i nidim jenis, yumi save askem yumiwan wan aktiv kwestin: ?Hao nao yumi save go antap, i go bitim ol nogud samting blong wol ia mo stap strong wetem wan lukluk blong taem we i no save finis we i stap long fored blong yumi?
Long wan toktok blong konfrens long 2007 we topik hem i “Gud, Gud Moa, Gud gud moa,” Presiden Dallin H. Oaks i bin tijim hao blong putum fastaem ol top joes long medel blong plante samting we wol i askem yumi blong mekem. Hem i givim kaonsel se: “Yumi mas lego sam gud samting blong mekem se yumi jusum ol narawan we oli gud moa o beswan, from se oli developem fet long Lod Jisas Kraes, mo i mekem ol famli oli kam strong moa.”2
Bae mi givim sam tingting se, ol samting we oli gud gud moa long laef oli lukluk long Jisas Kraes mo oli andastanem ol trutok we i no save finis abaot huia yumi long rilesensip we yumi gat wetem Hem.
Lukaotem Trutok
Taem yumi lukaotem blong save Sevya, yumi no mas luk i bitim stamba trutok ia abaot huia yumi mo from wanem yumi stap ia. Amulek i rimaenem yumi se “laef ia hem i taem … blong mekem rere blong mitim God,” taem ia we “God i bin givim yumi blong mekem rere from taem we i no save finis” (Alma 34:32–33 Olsem wan toktok we i rimaenem yumi: “Yumi no ol man blong wol we yumi stap gat wan eksperiens long saed blong spirit. Yumi ol man long saed blong spirit wetem yumi gat wan eksperiens olsem ol man, insaed long wol ia.”3
Andastanem ol tabu aedentiti blong yumi i impoten long progres blong yumi we i no save finis mo i save mekem yumi fri aot long ol nogud samting blong laef ia. Sevya i bin tijim:
“Sipos yufala i obei long ol tok ya blong mi, yufala i prapa man blong mi;
“Nao bambae yufala i save trutok, mo trutok ia bambae i mekem yufala i fri man” (Jon 8:31–32
Presiden Joseph F. Smith i talem se: “Bigfala samting we wan man i save kasem long wol ia, hem i blong oli kam blong save gud tabu trutok, long wan stret mo gud fasin we i mekem se eni samting long wol bae i no save tanem olgeta aot long save ia we oli bin kasem.”4
Long wol ia tedei, ol toktok abaot trutok i kasem wan mak ia we i hae, wetem evriwan i se trutok hemia olsem wan topik we evriwan i save long hem. Yangfala boe ia Josef Smit i bin faenem se “tingting blong [hem] i wok bigwan mo maen i trabol” long laef ia “se i bin had … blong kam long wan en blong save huia i tru mo huia i rong” (Josef Smit—Histri 1:8). I bin long “medel blong ol raorao blong ol toktok mo ol tingting” we hem i bin lukaotem help long heven taem hem i bin lukaotem trutok (Josef Smit—Histri 1:10).
Long Epril konfrens, Presiden Nelson i bin tijim se: “Sapos yumi mas gat eni hop blong save sevsevem ol plante kaen voes ia mo ol tingting blong ol man we oli atakem trutok, nao yumi mas lan blong kasem revelesen.”5 Yumi mas lanem blong dipen long Spirit blong Trutok, we “ol man long wol ia oli no save tekem hem blong givhan long olgeta, from we oli no save luk hem, from we oli no gat rod blong save hem” (Jon 14:17).
Taem wol ia i muv kwik long ol samting we i no tru, yumi mas tingbaot ol toktok blong Jekob se “Spirit i talem trutok mo i no giaman. Taswe, hem i talemaot ol samting olsem we oli rili stap, mo ol samting olsem we bae oli rili stap; taswe, ol samting ia oli soemaot long mifala long wan klia fasin, blong sevem sol blong yumi” (Jekob 4:13).
Taem yumi stepbak, yumi aot long wol mo jekem laef blong yumi, naoia i taem blong tingting long ol jenis we yumi nidim blong mekem. Yumi save gat gudfala hop ia blong save se Eksampol blong yumi, Jisas Kraes, i lidim yumi bakegen wan moa taem; Bifo long ded mo Laef Bakegen long Ded blong Hem, taem Hem i bin stap wok blong helpem olgeta raon long Hem blong andastanem tabu rol blong Hem, Hem i rimaenem olgeta “se long mi, bae yufala i save gat pis. Long wol ia bambae yufala i harem nogud tumas. Be yufala i no fraet. Mi mi winim paoa blong olgeta samting blong wol ia finis” (Jon 16:33). Abaot Hem, mi witnes olsem, long nem blong Jisas Kraes, amen.