Ol Fas Toktok

Ol dia brata mo sista blong mi. Mifala i bin wet blong kam tugeta wetem yufala bakegen long Oktoba jeneral konfrens ia blong Jos. Welkam i go long wanwan long yufala wetem ful hat blong mifala. Mifala i talem tangkyu tumas from ol prea blong sapot blong yufala. Mifala i filim paoa blong ol prea ia. Tangkyu!

Mifala i talem tangkyu from ol bigfala traehad blong yufala blong mekem folem ol kaonsel we mifala i givim long Jeneral Konfrens sikis manis i pas. Ol stek presidensi, raon long wol, oli bin lukaotem revelesen we i nid blong oganaesem bakegen ol kworom blong ol elda. Ol man blong ol kworom ia, wetem ol strong Rilif Sosaeti sista, oli bin wok wetem strong tingting blong givhan long ol brata mo sista blong yumi long wan moa hae mo tabu wei. Mifala i kasem insperesen tru long gud fasin mo bigfala traehad blong yufala blong tekem lav blong Sevya i go long ol famli, ol neiba, mo ol fren, mo blong givhan long olgeta olsem we bae Hem i mekem.

Stat long Epril konfrens, Sista Nelson mo mi i bin mit wetem ol memba long ol fo bigfala graon mo long ol aelan blong solwota. Stat long Jerusalem i go kasem Harare, stat long Winipeg i go kasem Bangkok, mifala i gat filim bigfala fet blong yufala mo paoa blong ol testemoni blong yufala.

Mifala i glad tumas wetem namba blong ol yut we oli joenem yut ami blong Lod blong help blong karem tugeta Isrel we i seraot olbaot.¹ !Mifala i talem tangkyu! Mo taem yufala i stap gohed blong folem ol invitesen blong mi we mi givim long wol yut divosen, yufala i stap putum wan standet blong mifala evriwan i folem. !Mo yufala ol yut i mekem samting i defren!

Long ol yia we i jes pas, mifala long ol prisaeding kaonsel blong Jos, mifala i tingting fulap wetem bigfala kwestin ia: ?Olsem wanem yumi save tekem gospel we i simpol mo klin, mo ol odinens we oli wok blong taem we i no save finis, i go long evriwan long ol pikinini blong God?

Olsem ol Lata-dei Sent, yumi kam blong stap tingting se “jos” i wan samting we i hapen insaed long mitinghaos blong yumi, wetem sapot blong wanem i stap hapen insaed long hom. Yumi nidim blong stretem kaen fasin ia. Hem i taem blong i gat wan Jos we senta blong hem i stap long hom, mo sapot i kam long wanem i tekem ples insaed long ol branj, wod, mo stek bilding blong yumi.

Taem Jos i stap gohed blong gro bigwan raon long wol, plante memba oli stap long ol ples we i no gat japel—mo maet bae i no gat long ol fiuja taem we i stap kam. Mi tingbaot wan famli, we, from kaen situesen olsem, i mas mit insaed long hom blong olgeta. Mi askem mama sapos hem i laekem blong go long jos insaed long haos blong hem nomo. Hem i ansa: “!Mi laekem! Naoia, hasban blong mi i yusum moa klin lanwis long hom, from hem i save se bae hem i blesem sakramen long ples ia evri Sandei.”

Stamba tingting blong Jos we i bin stap longtaem finis i kam, i blong helpem evri memba blong kam antap long fet blong olgeta long Lod Jisas Kraes, mo long Atonmen blong Hem; blong helpem olgeta blong mekem mo kipim ol kavenan we oli mekem wetem God, mo blong mekem ol famli oli kam strong moa, mo silim olgeta. Wol blong yumi tedei, i defdefren evriwan, mo hemia i no isi. Enemi i stap gat moa faet agensem fet, mo agensem yumi, mo agensem ol famli blong yumi long wan spid we i go antap moa. Blong save laef long saed blong spirit, yumi nidim teknik blong agensem hemia, mo ol gudfala plan. Folem hemia, naoia, mifala i wantem stretem sam oganaesesen blong mekem ol memba mo ol famli blong yumi oli kam strong moa.

Blong plante yia, ol lida blong Jos oli bin wok long wan kurikulom we i mekem ol man, woman mo famli oli kam strong moa tru long hom senta mo Jos sapot plan blong lanem doktrin, mekem fet i kam strong moa, mo mekem wanwan i gat moa wosip fasin. Ol traehad blong mifala long ol las yia ia blong kipim Sabat—blong mekem i wan glad mo wan saen blong yumiwan i go long God we i soem lav blong yumi long Hem—bae i kam antap moa bakegen wetem ol samting we bae mifala i stretem, we bae mifala i anaonsem.

Long moning ia, mifala i stap anaonsem wan niu balens mo wan niu wei blong joenem gospel tijing insaed long hom, mo insaed long Jos. Wanwan long yumi i responsibol blong wanwan i gro long saed blong spirit. Mo ol skripja oli talemaot klia se ol papa mo mama, oli gat fas responsabiliti blong tijim doktrin long ol pikinini blong olgeta.² Hem i responsabiliti blong Jos blong helpem wanwan memba long tabu gol ia blong leftemap save blong hem abaot gospel.

Elda Quentin L. Cook, naoia, bambae i eksplenem ol impoten samting ia we i jenis. Evri memba blong Kaonsel blong Fas Presidensi mo Kworom blong Olgeta Twelef Aposol oli joen wan blong sapotem mesej ia. Mifala i luksave insperesen we i kam long Lod we i lidim ol divelopmen blong ol plan mo wok we Elda Cook bae i presentem.

Ol dia brata mo sista. !Mi save se God i stap laef! !Jisas Hem i Kraes! Hemia i Jos blong Hem, we Hem i lidim tru long profesi mo revelesen we Hem i givim long ol wokman blong Hem. Mi testifae long hemia, long nem blong Jisas Kraes, amen.