Stap Lukaot Gud long Ol Sol
Yumi go luk ol narawan wetem lav, from se i wanem we Sevya i bin komandem yumi blong mekem.
Long wan storian wetem wan fren blong mi, hem i talem long mi se, taem hem i yangfala, i jes baptaes long Jos, hariap nomo, hem i filim se, long sam wei, hem i nomo pat blong wod blong hem. Ol misinari we oli tijim hem oli go nara ples, mo hem i filim se i no gat wan i kea. Hem i no gat fren long wod, nao i faenem ol olfala fren blong hem, i go wetem olgeta long sam aktiviti we i tekem hem longwe long Jos—kolosap bae i stat blong kamaot long grup. Wetem wota long ae blong hem, hem i tokbaot hamas hem i talem tangkyu tumas long wan memba blong wod we i stretem han blong givhan mo invaetem hem blong kambak long wan fasin we i gud. Afta sam manis, hem i kambak insaed long grup, i mekem hemwan i kam strong moa, wetem ol narawan. ?Bae yumi no glad long man blong lukaot long sipsip ia long Brasil we i go lukaotem yang man ia, Elda Carlos A. Godoy, we naoia i sidaon biaen long mi olsem wan memba blong Presidensi blong Olgeta Seventi?
?Yufala i no ting se i gud tumas blong luk hao ol smol traehad oli gat risal we i no save finis? Trutok i stap long hat blong ol givhan wok blong Jos. Papa long Heven i save yusum ol simpol evri dei traehad, mo tanem olgeta long wan merikel samting. Hem i sikis manis nao stat long taem we Presiden Russel M. Nelson i anaonsem se “Lod i stretem jenisim fulap samting long wei we yumi kea long wanwan long yumi,”1 i eksplenem se, “Bambae yumi yusum wan niu, mo moa tabu wei blong stap kea mo givhan long ol narawan. Bae yumi singaotem ol wok ia, i simpol, i “givhan.”2
Presiden Nelson i eksplenem tu se: “Wan hae mak long Jos ia we i tru mo i laef we i blong Lod, i we, oltaem hem i oganaes, i lidim wok blong givhan long wanwan pikinini blong God mo famli blong olgeta. From hem i Jos blong Hem, yumi, olsem ol wokman blong Hem, bae yumi givhan long wan ia, semmak olsem we hem i bin mekem. Bambae yumi givhan long nem blong Hem, wetem paoa mo atoriti blong Hem, mo wetem lav blong Hem we i kaen.”3
Stat long anaonsmen, !ansa blong yufala i bin gud tumas! Mifala i kasem ol ripot blong ol bigfala sakses blong stat yusum ol jenis ia long kolosap evri stek blong wol olsem we profet blong yumi we i laef i talem. Eksampol, oli givim wok long ol brata mo sista blong lukaot long ol famli, oli putum olgeta tutu—wetem ol yang man mo ol yang woman—oli oganaes, mo ol givhan intaviu oli stap tekples.
Mi no ting se, i jes hapen nomo se, sikis manis bifo long revelesen anaonsmen blong yestedei— “Wan niu balens bitwin gospel tijing insaed long hom mo insaed long Jos”4— oli bin givim revelesen anaonsmen long “wok blong givhan.” Stat long Jenuware i go, taem bae yumi katemaot wan aoa long jos wosip blong yumi; evri samting we yumi bin lanem long wok blong givhan bae i helpem yumi blong balensem bakegen emti spes ia long wan moa hae mo tabu sabat dei eksperiens insaed long hom wetem ol famli mo olgeta we yu lavem.
Wetem ol oganaesesen we oli stap, yumi save askem: ?Hao yumi save sapos yumi stap givhan long wei we Lod i wantem? ?Yumi stap helpem Gudfala Man blong Lukaot long Sipsip long wei we Hem i wantem?”
Long wan storian wetem Presiden Henry B. Eyring, Hem i presem Ol Sent blong stretem olgeta long ol impoten jenis ia, be tu, hem i talemaot tru hop blong hem se bae ol memba bae oli luksave se, givhan, i moa bitim blong jes “stap naes” long wan. Hemia i no blong talem se blong stap naes i no mekem gud wok, be olgeta we oli andastanem tru spirit biaen long givhan, oli luksave se i go i moa bitim blong stap naes. Taem oli mekem long wei blong Lod, givhan i save gat paoa we i go longwe blong mekem gud we i gogohed kasem ful taem we i no save finis, olsem wetem Elda Godoy.
“Sevya i bin soem, wetem eksampol, mining blong givhan taem Hem i bin givim seves, wetem lav … Hem i … tijim, mo bin prea from, i bin kamfotem mo blesem olgeta raon long Hem, i invaetem olgeta evriwan blong stap folem Hem. … Taem ol memba blong Jos oli stap givhan, [long wan hae mo moa tabu wei], oli prea blong lukaot blong givim seves olsem we bae Hem i mekem: … ‘blong lukaotem jos oltaem, mo stap wetem mo mekem olgeta oli kam strong moa’, ‘visitim haos blong wanwan memba,’ mo helpem wanwan blong kam wan tru disaepol blong Jisas Kraes.”5
Elda James E. Talmage i tijim se wan tru man blong lukaot long sipsip i save nem blong wanwan long ol sipsip ia, mo hemwan i gat tingting long olgeta.6
Wan longtaem fren blong mi i spendem laef blong hem long fam blong animol, i hadwok blong lukaotem ol buluk mo sipsip long Roki Maonten we i fulap long ston. Wan taem, hem i bin serem ol jalenj mo denja we i kam wetem wok blong lukaot long ol sipsip. Hem i tokbaot se long wan eli springtaem, taem sno long bigfala hil i melt finis, hem i putum wan famli grup blong samples 2,000 sipsip long ol bigfala hil blong samataem. Long ples, hem i lukaot long ol sipsip kasem let taem long Septemba, taem oli muvum olgeta i go long winta ples long wan draeples. Hem i stap tokbaot se i had blong lukaot long wan bigfala grup blong ol sipsip, i wok eli, i slip let naet—i wekap bifo san, mo i finis longtaem afta tudak i kam. Hem i no save mekem hemwan.
Ol narawan oli help lukaot long grup blong animol; i gat sam han we oli save lelebet oli helpem tu yang han we oli stap lan long waes blong ol olfala kompanion blong tufala. Hem i dipen tu long tufala olfala hos, tu yang hos we oli stap trenem, mo tufala dog blong sipsip, mo tu o tri pikinini blong dog. Ova long sama ia, fren blong mi mo ol sipsip blong hem i fesem ol win, mo ren, mo sik, mo kil, draetaem, mo eni nara had samting wan i save tingting long hem. Sam yia oli mas pulum wota ful sama blong mekem ol sipsip oli laef i stap. Afta, let long Septemba, taem winta i stap kam kolosap, oli tekem ol tekemaot ol sipsip long ol bigfala hil mo kaontem olgeta, plante taem, bae 200 i lus.
Grup blong 2000 sipsip ia we oli putum long ol bigfala hil long eli Spring, i kam daon long 1800. Plante long ol sipsip ia we oli lus, oli no lus from oli sik, o oli ded nomol nomo, be from ol animol we i kakae olgeta olsem ol laeon o dog blong maonten. Ol animol ia oli faenem ol sipsip we oli bin aot long sef grup, oli karemaot olgeta long proteksen blong man blong lukaot long olgeta. ?Bae yu tingting smol taem long wanem mi tokbaot, be long saed blong spirit? ?Huia i man blong lukaot long sipsip? ?Huia i grup blong sipsip? ?Olgeta ia we oli stap givhan, huia olgeta?
Lod Jisas Kraes, Hemwan i talem: “Mi nao, gudfala man ya blong lukaot long sipsip. … mi save ol sipsip blong mi. Mo mi glad nomo blong mi ded blong sevem ol sipsip blong mi.”7
Semmak, profet Nifae i tijim semmak se Jisas “bae i fidim ol sipsip blong hem, mo long hem bae oli faenem ples we i gat fulap gras blong kakae.”8 Mi faenem wan pis i stap taem mi save se “Hae God i stap lukaot gud long mi olsem we mi mi sipsip blong hem,”9 mo wanwan long yumi, Hem i save mo stap kea long yumi. Taem yumi fesem ol win mo ren long laef, sik, ol kil, mo draetaem, Lod—Man blong Lukaot long Sipsip—bae i givhan long yumi. Bambae Hem i mekem gud sol blong yumi.
Long sem wei ia we fren blong mi i lukaot long ol sipsip blong hem wetem help blong ol yang mo olfala han, hos mo dog, Lod tu, i nidim help long jalenj ia blong kea long ol sipsip insaed long grup blong Hem.
Olsem ol pikinini blong wan Papa long Heven we i gat lav, mo olsem wan sipsip blong grup blong Hem, yumi stap glad long ol blesing blong Jisas Kraes i givhan long wanwan long yumi. Long semtaem, yumi gat wan responsabiliti blong givhan long ol narawan raon long yumi olsem we yumi ol man blong lukaot long sipsip. Yumi folem ol toktok blong Lod blong “wok blong mi mo go aot long nem blong mi, mo … karem ol sipsip blong mi i kam tugeta.”10
?Huia i man blong lukaot long sipsip? Evri man, woman mo pikinini insaed long kingdom blong God i wan man blong lukaot long sipsip. I no nidim koling. Taem yumi kamaot long ol wota blong baptaes, yumi kasem wok ia blong mekem. Yumi go luk ol narawan wetem lav, from se i wanem we Sevya i bin komandem yumi blong mekem. Alma i talem bigwan: “Huia long yufala we i man blong lukaotem sipsip we i gat plante sipsip be i no lukaotem olgeta, blong ol wael dog oli no save go insaed mo kakae ol animol blong hem? ?Bae i no ronemaot olgeta?”11 Taem ol neiba blong yumi oli stap long trabol long laef o long spirit, yumi ron go helpem olgeta. Yumi karem ol hevi samting blong wanwan long yumi, blong mekem se oli nomo hevi. Yumi krae wetem olgeta we oli krae. Yumi leftemap tingting blong olgeta we oli nidim.12 Lod, wetem lav, i wet se bae yumi mekem hemia. Mo dei bae i kam taem we bae yumi nomo ansa from kea we yumi stap givim blong givhan long grup blong Hem.13
Fren we i stap lukaot long sipsip ia, i serem wan nara impoten pat blong kea long ol sipsip we oli stap. Hem i tokbaot sipsip ia we i go lus, mo i isi blong ol nara animol oli kakae olgeta. Kolosap 15 pesen totol taem blong hem mo tim blong hem, i blong faenem sipsip ia we i go lus. Moa kwik oli go faenem sipsip we i lus, bifo sipsip ia i go longwe tumas long grup, bae sipsip ia i no save kasem tumas kil. Blong go faenembak wan sipsip we i lus i nidim longfala tingting mo disiplin.
Sam yia i pas, mi faenem wan atikol long wan lokol niuspepa we i mekem mi wari nao, mi putum gud i stap. Pej long fored i talem: “Dog wetem Strong Tingting I No Wantem Lego Sipsip we I Lus.”14 Atikol ia i tokbaot wan smol namba blong ol sipsip we oli blong wan kampani i no longwe long propeti blong fren blong mi, we oli bin lego i stap biaen long samataem. Tu o tri manis afta, oli go lus, mo sno i holemtaet olgeta long bigfala hil. Taem oli lego ol sipsip ia biaen, dog i stap wetem olgeta, from i wok blong hem blong stap lukaotem mo protektem ol sipsip. !Hem i no wantem aot, i lukaot long olgeta nomo! Hem i gohed blong stap ia—i raonem ol sipsip we oli lus blong plante manis long kolkol mo sno, i protektem olgeta agensem ol wael dog, ol maontaen laeon, mo eni animol we i save spolem olgeta. Hem i stap longwe kasem taem hem i save lidim ol sipsip oli gobak long sefples wetem man we i lukaot long ol sipsip mo grup. Pikja we oli putum long pej long fored blong atikol ia, i letem wanwan i luk fasin blong hem tru long ae blong hem mo wei we hem i stanap.
Long Niu Testeman, yumi faenem wan parabol mo instraksen long Sevya we i givim moa tingting long saed blong ol responsabiliti blong yumi olsem ol man blong lukaot long sipsip, mo man givhan long ol sista mo brata we oli lus:
“?Hu long yufala we i gat handred sipsip blong hem mo wan long olgeta i lus, be hem i no tingbaot? Sapos wan long yufala i lusum sipsip blong hem olsem, bambae hem i mas livim ol naenti naen sipsip blong hem oli stap kakae long open ples, nao hem i mas go lukaot sipsip ya we i lus, gogo i faenem.?
“Mo taem hem i faenem sipsip ya, bambae hem i glad tumas, i mas leftemap sipsip ya blong karem long solda blong hem.
“Mo taem hem i kam hom, bambae hem i mas singaot ol fren blong hem wetem olgeta we oli stap raonabaot long hem, blong talem long olgeta se, ‘Yufala i kam joen wetem mi, yufala i glad wetem mi, from mi mi faenem sipsip ya blong mi we i lus.’”15
Taem yumi stap talem sot lesen we i stap long parabol, yumi faenem gudfala kaonsel ia:
-
Faswan, yumi mas faenem nem blong sipsip ia we i lus.
-
Sekenwan, yumi mas lukaotem olgeta gogo yumi faenem olgeta.
-
Nambatri, taem yumi faenem olgeta, maet bae yumi mas karem olgeta long solda blong yumi mo tekem olgeta i gobak hom.
-
Laswan, yumi raonem olgeta wetem ol fren taem oli kambak.
Ol brata mo sista, bigfala jalenj blong yumi, mo bigfala praes blong yumi bae i kam taem yumi givhan long sipsip we i lus. Ol memba blong Jos long Buk blong Momon oli bin “lukaotem ol pipol, mo oli fidim olgeta wetem ol samting long saed blong stret mo gud fasin.”16 Yumi save folem eksampol blong olgeta taem yumi stap rimemba se wok blong givhan, Spirit nao i stap lidim, i folem situesen, mo i folem ol nid blong wanwan memba. Hem i impoten tumas blong yumi stap lukaotem blong helpem wanwan man, woman, mo famli blong rere blong kasem ol nekis odinens, blong oli kipim ol kavenan [blong olgeta], mo blong oli kam blong dipen long olgetawan.”17
Evri sol i impoten long Papa blong yumi long Heven. Invitesen blong Hem blong givhan, i impoten tumas long Hem, from hem i wok mo glori blong Hem. Hem i wok blong taem we i no save finis ia nao. Wanwan long ol pikinini blong Hem i gat paoa we i bigwan tumas long ae blong Hem. Hem mi lavem yufala wetem wan lav we yufala i no save andastanem. Olsem dog blong lukaot long sipsip we i givim fultaem blong hem, Lod bae i stap long bigfala hil blong protektem yu long win, ren, sno mo plante moa.
Presiden Russel M. Nelson i tijim yumi long las konfrens: “Mesej blong yumi long wol, [mo mi ademap givhan grup blong yumi,] i simpol mo i ones: mifala i stap invaetem evriwan long ol pikinini blong God, long tugeta saed blong vel, blong kam long Sevya blong olgeta, blong kasem ol blesing blong tabu tempol, gat wan glad we i gogohed blong stap, mo kwalifae from laef we i no save finis.”18
Bae yumi leftemap ae blong yumi long visen blong profet ia, blong yumi save lukaot long ol sol mo tekem olgeta i go long tempol, mo long en, long Sevya blong yumi, Jisas Kraes. Hem i no askem yumi blong mekem ol merikel. Hem i askem nomo se yumi tekem ol brata mo sista blong yumi i go long Hem, from se Hem i gat paoa blong pemaot ol sol. Taem yumi mekem olsem, yumi save mo bae yumi mekem promes blong Hem i kamtru: “Nao taem man ya we i Nambawan Man blong Lukaot long Sipsip i kamtru, bambae hem i givim hae nem long yufala … [we bae] i no save lus samtaem blong ona long yufala.”19 Abaot hemia, mi testifae long hem—mo mi testifae abaot Jisas Kraes olsem Sevya mo Ridima blong yumi—long nem blong Jisas Kraes, amen.