តួនាទីព្រះគម្ពីរមរមនក្នុងការផ្លាស់ប្រែចិត្តជឿ
យើងកំពុងប្រមូលផ្ដុំពួកអ៊ីស្រាអែលលើកចុងក្រោយ ហើយកំពុងតែធ្វើដូច្នោះដោយមានព្រះគម្ពីរមរមន ជាឧបករណ៍ដ៏មានអានុភាពបំផុតក្នុងការផ្លាស់ប្រែចិត្តជឿ ។
សព្វថ្ងៃនេះ មនុស្សជាច្រើនងឿងឆ្ងល់អំពីភាពពិតរបស់ព្រះ និងទំនាក់ទំនងរបស់យើងនឹងទ្រង់ ។ មនុស្សជាច្រើនពុំបានដឹង ឬដឹងបន្ដិចបន្ដួចអំពីផែនការនៃសុភមង្គលដ៏មហិមារបស់ទ្រង់ ។ ជាង ៣០ ឆ្នាំកន្លងទៅ ប្រធានអ៊ែសរ៉ា ថាហ្វប៊ែនសឹន បានសង្កេតឃើញថា « ពិភពលោកសព្វថ្ងៃនេះ… ភាគច្រើនបដិសេធភាពជាព្រះរបស់ព្រះអង្គសង្គ្រោះ ។ ពួកគេសង្ស័យពីការប្រសូតដោយអព្ភូតហេតុទ្រង់ ព្រះជន្មដ៏ល្អឥតខ្ចោះ និងភាពពិតនៃការមានព្រះជន្មរស់ឡើងវិញដ៏រុងរឿងរបស់ទ្រង់ » ។១
នៅជំនាន់របស់យើង ចម្ងល់នេះពុំគ្រាន់តែផ្ដោតលើព្រះអង្គសង្គ្រោះប៉ុណ្ណោះទេ ប៉ុន្តែថែមទាំងលើសាសនាចក្ររបស់ទ្រង់ផងដែរ គឺ —សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ—ដែលទ្រង់បានស្ដារឡើងវិញតាមរយៈព្យាការី យ៉ូសែប ស៊្មីធ ។ ជាញឹកញាប់ ចម្ងល់ទាំងនេះផ្ដោតទៅលើប្រវត្តិសាស្ត្រ ការបង្រៀន ឬការអនុវត្តក្នុងសាសនាចក្ររបស់ព្រះអង្គសង្គ្រោះ ។
ព្រះគម្ពីរមរមនជួយយើងឲ្យចម្រើនទីបន្ទាល់
ចេញពីសៀវភៅ ប្រកាសដំណឹងល្អរបស់យើង យើងអានថា « សូមចងចាំថា ការយល់ដឹងរបស់យើង [ អំពីព្រះវរបិតាសួគ៌ និងផែនការនៃសុភមង្គលរបស់ទ្រង់ ] កើតចេញមកពីពួកព្យាការីសម័យទំនើប—យ៉ូសែប ស៊្មីធ និងពួកអ្នកស្នងតំណែងរបស់លោក—ទទួលបានវិវរណៈដោយផ្ទាល់មកពីព្រះ ។ ហេតុដូច្នោះហើយ សំណួរដំបូងដែលនរណាម្នាក់គួរឆ្លើយថា តើយ៉ូសែប ស្ម៊ីធ ជាព្យាការីឬអត់ទេ នោះគាត់អាចឆ្លើយសំណួរនេះ ដោយការអាន និងការអធិស្ឋានអំពីព្រះគម្ពីរមរមន » ។២
ទីបន្ទាល់របស់ខ្ញុំអំពីការហៅបម្រើពីព្រះរបស់ព្យាការី យ៉ូសែប ស៊្មីធ ត្រូវបានពង្រឹងតាមរយៈការសិក្សាព្រះគម្ពីរមរមន ៖ សក្ខីយបទមួយទៀតអំពីព្រះយេស៊ូវគ្រីស្ទ ប្រកបដោយការអធិស្ឋាន ។ ខ្ញុំបានធ្វើតាមការអញ្ជើញរបស់មរ៉ូណៃឲ្យ « សូមសួរដល់ព្រះជាព្រះវរបិតាដ៏គង់នៅអស់កល្បជានិច្ច ដោយនូវព្រះនាមនៃព្រះគ្រីស្ទ » ដើម្បីដឹងអំពីសេចក្ដីពិតពេញលេញនៃព្រះគម្ពីរមរមន ។៣ ខ្ញុំថ្លែងជាសាក្សីថា ខ្ញុំដឹងថាវាជាការពិត ។ ចំណេះដឹងនោះកើតមានចំពោះខ្ញុំ ដូចជាវាមានចំពោះបងប្អូន « ដោយព្រះចេស្ដានៃព្រះវិញ្ញាណបរិសុទ្ធ » ។៤
បុព្វកថានៃព្រះគម្ពីរមរមនបានចែងថា ៖ « អស់អ្នកណាដែលបានទទួលទីបន្ទាល់ដ៏ប្រសើរ [ អំពីព្រះគម្ពីរមរមន ] ពីព្រះវិញ្ញាណបរិសុទ្ធ ក៏នឹងបានដឹងដោយសារព្រះចេស្ដាដដែលថា ព្រះយេស៊ូវគ្រីស្ទគឺជាព្រះអង្គសង្គ្រោះនៃពិភពលោក ថា យ៉ូសែប ស៊្មីធ គឺជាអ្នកទទួលវិវរណៈ និងជាព្យាការីរបស់ទ្រង់ នៅជាន់ចុងក្រោយបង្អស់ ហើយថាសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយគឺជានគរនៃព្រះអម្ចាស់ ដែលបានស្ដារឡើងវិញម្ដងទៀតនៅលើផែនដី ដើម្បីរៀបចំសម្រាប់ការយាងមកជាលើកទីពីរនៃព្រះមែស៊ី » ។៥
ក្នុងនាមជាអ្នកផ្សព្វផ្សាយសាសនាវ័យក្មេងនៅប្រទេសឈីលី ខ្ញុំបានរៀនមេរៀនមួយដែលផ្លាស់ប្តូរជីវិតអំពីអំណាចនៃការផ្លាស់ប្រែចិត្តជឿនៃព្រះគម្ពីរមរមន ។ ហ្គុនសាឡេស—បានបម្រើនៅក្នុងតំណែងខ្ពស់មួយក្នុងព្រះវិហាររបស់គាត់អស់ជាច្រើនឆ្នាំ ។ គាត់ទទួលការបំពាក់បំប៉នអំពីសាសនាយ៉ាងច្រើន ថែមទាំងមានបរិញ្ញាបត្រខាងសាសនាវិទ្យាផងដែរ ។ គាត់មានមោទនភាពចំពោះជំនាញព្រះគម្ពីរប៊ីបរបស់គាត់ ។ វាច្បាស់ចំពោះយើងថា គាត់គឺជាអ្នកប្រាជ្ញខាងសាសនាម្នាក់ ។
គាត់បានដឹងច្រើនអំពីអ្នកផ្សព្វផ្សាយសាសនានៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ នៅពេលពួកគេដើរបង្រៀនក្នុងទីក្រុងកំណើតរបស់លោកគឺទីក្រុងលីម៉ា ប្រទេសប៉េរូ ។ គាត់តែងតែចង់ជួបពួកគេដើម្បីគាត់អាចបង្រៀនពួកគេពីព្រះគម្ពីរប៊ីប ។
ថ្ងៃមួយ វាស្ទើរតែជាអំណោយមកពីស្ថានសួគ៌ដូចគាត់បានគិត មានអ្នកផ្សព្វផ្សាយសាសនាពីរនាក់បានហៅគាត់នៅតាមផ្លូវ ហើយសួរគាត់ បើសិនជាពួកគេអាចទៅផ្ទះគាត់ ហើយចែកចាយបទគម្ពីរជាមួយគាត់បានឬទេ ។ សុបិនគាត់បានក្លាយជាការពិតហើយ ! ការអធិស្ឋានរបស់គាត់បានទទួលចម្លើយ ។ ទីបំផុត គាត់អាចនាំយុវជនដែលវង្វេងផ្លូវទាំងនេះមកផ្លូវត្រឹមត្រូវវិញ ។ គាត់បានប្រាប់ពួកគេថា គាត់រីករាយនឹងឲ្យពួកគេមកផ្ទះគាត់ដើម្បីពិភាក្សាអំពីបទគម្ពីរ ។
គាត់រង់ចាំការណាត់ជួបយ៉ាងអន្ទះសា ។ គាត់ត្រៀមគម្ពីរប៊ីបជាស្រេចដើម្បីប្រើទៅបង្ហាញពីជំនឿរបស់ពួកគេថាខុស ។ គាត់មានទំនុកចិត្តថា ព្រះគម្ពីរប៊ីបនឹងបង្ហាញពីកំហុសនៃផ្លូវរបស់ពួកគេយ៉ាងច្បាស់ ។ យប់ណាត់ជួបបានមកដល់ ហើយអ្នកផ្សព្វផ្សាយសាសនាគោះទ្វារផ្ទះគាត់ ។ គាត់រំភើប ។ ពេលរបស់គាត់បានមកដល់ហើយ ។
គាត់បានបើកទ្វារ ហើយបានអញ្ជើញអ្នកផ្សព្វផ្សាយសាសនាចូលក្នុងផ្ទះ ។ អ្នកផ្សព្វផ្សាយម្នាក់ហុចសៀវភៅពណ៌ខៀវមួយក្បាលដល់គាត់ ហើយថ្លែងទីបន្ទាល់ដោយអស់ពីចិត្តថា គាត់បានដឹងថា សៀវភៅនេះមាននូវព្រះបន្ទូលរបស់ព្រះ ។ អ្នកផ្សព្វផ្សាយសាសនាទីពីរ បានបន្ថែមទីបន្ទាល់ដ៏មានអានុភាពអំពីសៀវភៅនេះ ដោយថ្លែងទីបន្ទាល់ថា វាត្រូវបានបកប្រែដោយព្យាការីសម័យទំនើបរបស់ព្រះ ដែលមានឈ្មោះថា យ៉ូសែប ស៊្មីធ ហើយថាសៀវភៅនេះបង្រៀនអំពីព្រះគ្រីស្ទ ។ រួចអ្នកផ្សព្វផ្សាយសាសនាបានសុំលាទៅវិញ ។
ហ្គុនសាឡេសខកចិត្តជាខ្លាំង ។ ប៉ុន្តែគាត់បានបើកសៀវភៅនោះឡើង ហើយគាត់បានចាប់ផ្ដើមបើកមើលពីដើមដល់ចប់ ។ គាត់បានអានទំព័រដំបូង ។ គាត់អានមួយទំព័រហើយមួយទំព័រទៀត ពុំឈប់សោះ រហូតដល់រសៀលថ្ងៃស្អែក ។ គាត់បានអានគម្ពីរនោះពីដើមដល់ចប់ ហើយបានដឹងថាវាគឺជាការពិត ។ គាត់បានដឹងនូវអ្វីដែលគាត់ត្រូវធ្វើ ។ គាត់បានទូរសព្ទទៅអ្នកផ្សព្វផ្សាយសាសនា បានទទួលមេរៀន ហើយបានបោះបង់ជីវិតដែលគាត់ធ្លាប់ស្គាល់ដើម្បីក្លាយជាសមាជិកមួយរូបនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។
បុរសដ៏ល្អរូបនោះគឺជាគ្រូបង្រៀន អិម ធី ស៊ី របស់ខ្ញុំ ក្នុងទីក្រុង ប្រូវ៉ូ រដ្ឋ យូថាហ៍ ។ ដំណើររឿងការប្រែចិត្តជឿរបស់បងប្រុស ហ្គុនសាឡេស និងអំណាចនៃព្រះគម្ពីរមរមន បានផ្ដល់ចំណាប់អារម្មណ៍ដ៏ខ្លាំងមួយមកលើខ្ញុំ ។
នៅពេលខ្ញុំទៅដល់ប្រទេសឈីលី ប្រធានបេសកកម្មរបស់ខ្ញុំគឺប្រធាន រ៉យដិន ជេ ហ្គលេត បានអញ្ជើញពួកយើងឲ្យអានទីបន្ទាល់របស់ព្យាការី យ៉ូសែប ស៊្មីធ ដែលបានកត់ត្រានៅក្នុង យ៉ូសែប ស៊្មីធ—ប្រវត្តិ រាល់សប្ដាហ៍ ។ គាត់បានបង្រៀនយើងថា ទីបន្ទាល់អំពីការនិមិត្តដំបូង នឹងមានទំនាក់ទំនងដោយផ្ទាល់ទៅនឹងទីបន្ទាល់ផ្ទាល់ខ្លួនរបស់យើងអំពីដំណឹងល្អ និងព្រះគម្ពីរមរមន ។
ខ្ញុំបានទទួលយកការអញ្ជើញរបស់គាត់ដោយហ្មត់ចត់ ។ ខ្ញុំបានអានដំណើររឿងអំពីការនិមិត្តដំបូង ខ្ញុំបានអានព្រះគម្ពីរមរមន ។ ខ្ញុំបានអធិស្ឋានដូចបានដឹកនាំដោយមរ៉ូណៃ ហើយបានទូលសូម « ព្រះជាព្រះវរបិតាដ៏គង់នៅអស់កល្បជានិច្ច ដោយនូវព្រះនាមនៃព្រះគ្រីស្ទ » ៦ ប្រសិនបើព្រះគម្ពីរមរមនពិតឬទេ ។ ដូចជាព្យាការី យ៉ូសែប ស្ម៊ីធ បានមានប្រសាសន៍ ខ្ញុំសូមធ្វើជាសាក្សីថា ខ្ញុំដឹងថាព្រះគម្ពីរមរមនគឺជា « គម្ពីរដ៏ត្រឹមត្រូវបំផុតជាងគម្ពីរនានាទាំងអស់នៅលើផែនដីនេះ ហើយជាមូលដា្ឋននៃសាសនារបស់យើង ហើយបុគ្គលម្នាក់ៗ [ នឹង ] ចូលទៅជិតព្រះបាន ដោយសារធ្វើតាមសិក្ខាបទទាំងឡាយនៃគម្ពីរនេះជាជាងគម្ពីរដទៃទាំងអស់ » ។៧ ព្យាការី យ៉ូសែប ក៏បានប្រកាសថា ៖ « បើដកព្រះគម្ពីរមរមន និងវិវរណៈចេញ តើសាសនារបស់យើងនៅកន្លែងណា ? គឺយើងគ្មានអ្វីទាល់តែសោះ » ។៨
ការប្រែចិត្តជឿផ្ទាល់ខ្លួន
កាលណាយើងកាន់តែយល់ដឹងអំពីខ្លួនយើង និងគោលបំណងនៃព្រះគម្ពីរមរមន នោះការផ្លាស់ប្រែចិត្តជឿរបស់យើងកាន់តែស៊ីជម្រៅ និងកាន់តែជឿជាក់ ។ ការតាំងចិត្តរបស់យើងត្រូវបានពង្រឹងដើម្បីរក្សាសេចក្ដីសញ្ញាដែលយើងបានចុះជាមួយនឹងព្រះ ។
គោលបំណងសំខាន់នៃព្រះគម្ពីរមរមន គឺដើម្បីប្រមូលផ្ដុំពួកអ៊ីស្រាអែលដែលខ្ចាត់ព្រាត់ ។ ការប្រមូលផ្ដុំនេះផ្ដល់ឱកាសដល់បុត្រាបុត្រីទាំងអស់របស់ព្រះ ឲ្យចូលទៅលើផ្លូវនៃសេចក្ដីសញ្ញា ហើយតាមរយៈការគោរពតាមសេចក្ដីសញ្ញាទាំងនោះ នោះយើងត្រឡប់ទៅកាន់ទីវត្តមានរបស់ព្រះវរបិតាវិញ ។ នៅពេលយើងបង្រៀនអំពីការប្រែចិត្ត ហើយជ្រមុជទឹកអ្នកផ្លាស់ប្រែចិត្តជឿ នោះយើងប្រមូលផ្ដុំពួកអ៊ីស្រាអែលដែលខ្ចាត់ព្រាត់ ។
ព្រះគម្ពីរមរមនមានសេចក្ដីយោងចំនួន ១០៨ អំពីវង្សអ៊ីស្រាអែល ។ នៅដើមព្រះគម្ពីរមរមន នីហ្វៃបានបង្រៀនថា « ដ្បិតភាពពោរពេញនៃចេតនារបស់ខ្ញុំគឺដើម្បីឲ្យខ្ញុំអាចបញ្ចុះបញ្ចូលមនុស្សឲ្យមករកព្រះនៃអ័ប្រាហាំ និងព្រះនៃអ៊ីសាក និងព្រះនៃយ៉ាកុប ហើយបានសង្គ្រោះ » ។៩ ព្រះនៃអ័ប្រាហាំ អ៊ីសាក និង យ៉ាកុប គឺជាព្រះយេស៊ូវគ្រីស្ទ ជាព្រះនៃព្រះគម្ពីរសញ្ញាចាស់ ។ យើងត្រូវបានសង្គ្រោះ នៅពេលយើងមករកព្រះគ្រីស្ទ តាមរយៈការរស់នៅតាមដំណឹងល្អរបស់ទ្រង់ ។
ក្រោយមក នីហ្វៃបានសរសេរថា ៖
« មែនហើយ គឺឪពុកខ្ញុំបាននិយាយជាច្រើនអំពី ពួកសាសន៍ដទៃ និងអំពីវង្សអ៊ីស្រាអែលផងថា ពួកគេនឹងត្រូវប្រៀបធៀបដូចជាដើមអូលីវ ដែលមែកទាំងឡាយនឹងត្រូវកាត់ចេញ ហើយត្រូវខ្ចាត់ខ្ចាយពាសពេញនៅលើផ្ទៃផែនដី ។…
ហើយបន្ទាប់ពីវង្សអ៊ីស្រាអែលត្រូវខ្ចាត់ខ្ចាយទៅហើយ នោះពួកគេនឹងបានប្រមូលរួមគ្នាជាថ្មី ឬសរុបសេចក្ដីថា បន្ទាប់ពីពួកសាសន៍ដទៃ បានទទួលនូវភាពពោរពេញនៃដំណឹងល្អហើយ នោះមែកកំណើតទាំងឡាយនៃដើមអូលីវ ឬក៏សំណល់ទាំងឡាយនៃរង្សអ៊ីស្រាអែល នឹងបានបំបៅជាប់នឹងដើមវិញ ឬនឹងបានការចេះដឹងអំពីព្រះមែស៊ីដ៏ពិត គឺជាព្រះអម្ចាស់របស់ពួកគេ និងព្រះដ៏ប្រោសលោះរបស់ពួកគេ » ។១០
ដូចគ្នានេះដែរ នៅចុងបញ្ចប់នៃព្រះគម្ពីរមរមន ព្យាការីមរ៉ូណៃរំឭកយើងអំពីសេចក្ដីសញ្ញារបស់យើង ដោយថ្លែងថា « ដើម្បីកុំឲ្យអ្នកត្រូវលាយឡំ ឱរង្សអ៊ីស្រាអែលអើយ ដើម្បីឲ្យសេចក្ដីសញ្ញានៃព្រះវរបិតាដ៏នៅអស់កល្បជានិច្ច ដែលបានធ្វើដល់អ្នកអាចបានបំពេញ » ។១១
សេចក្ដីសញ្ញានៃព្រះវរបិតាដ៏អស់កល្បជានិច្ច
តើមរ៉ូណៃចង់សំដៅ « សេចក្ដីសញ្ញានៃព្រះវរបិតាដ៏អស់កល្បជានិច្ច » លើអ្វី ? យើងអាននៅក្នុងគម្ពីរអ័ប្រាហាំ ៖
« ព្រះនាមយើងគឺព្រះយេហូវ៉ា ហើយយើងដឹងពីដើមដំបូងមកចុងបំផុត ហេតុដូច្នេះហើយ ព្រះហស្ដយើងនឹងនៅលើអ្នក ។
ហើយយើងនឹងបង្កើតសាសន៍មួយយ៉ាងធំពីអ្នក ហើយយើងនឹងប្រទានពរដល់អ្នកហួសកម្រិត ហើយធ្វើឲ្យឈ្មោះអ្នកបានធំក្នុងចំណោមអស់ទាំងសាសន៍ ហើយអ្នកនឹងទៅជាពរដល់ពូជអ្នកជាបន្ដបន្ទាប់ទៅ ដើម្បីឲ្យពួកគេបានកាន់ការងារបម្រើ និងបព្វជិតភាពនេះដល់អស់ទាំងសាសន៍ ដោយដៃរបស់ពួកគេ » ។១២
ប្រធាន រ័សុល អិម ណិលសុន បានបង្រៀននៅក្នុងការចាក់ផ្សាយទូទាំងពិភពលោកថ្មីៗមួយថា « នេះគឺជាថ្ងៃចុងក្រោយ ហើយព្រះអម្ចាស់កំពុងតែពន្លឿនកិច្ចការរបស់ទ្រង់ ។ ការប្រមូលផ្ដុំនោះគឺជាកិច្ចការដ៏សំខាន់បំផុតនៅលើផែនដីសព្វថ្ងៃនេះ ។ ពុំមានអ្វីផ្សេងទៀតអាចធំសម្បើមជាង មានសារៈសំខាន់ជាង និងមានឬទ្ធិជាងកិច្ចការនេះនោះទេ ។ ហើយបើបងប្អូនជ្រើសរើស បើបងប្អូនចង់ធ្វើ បងប្អូនអាចធ្វើជាចំណែកដ៏សំខាន់ក្នុងកិច្ចការនេះ ។ បងប្អូនអាចមានចំណែកដ៏ធំនៅក្នុងកិច្ចការដ៏ធំ ដ៏មហិមា ដ៏មហស្ចារ្យ !
នៅពេលយើងនិយាយអំពីការប្រមូលផ្ដុំ យើងនិយាយសាមញ្ញអំពីសេចក្ដីពិតជាមូលដ្ឋានគ្រឹះនេះ ៖ គ្រប់បុត្រាបុត្រីរបស់ព្រះវរបិតាសួគ៌យើង នៅទាំងសងខាងនៃវាំងនន ស័ក្ដិសមនឹងស្ដាប់ឮសារលិខិតនៃដំណឹងល្អដែលបានស្ដារឡើងវិញរបស់ព្រះយេស៊ូវគ្រីស្ទ ។ ពួកគេសម្រេចចិត្តដោយខ្លួនឯង បើពួកគេចង់ដឹងបន្ថែម » ។១៣
នោះគឺជាអ្វីដែលយើងកំពុងធ្វើក្នុងនាមជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ៖ យើងកំពុងព្យាយាមជួយនាំមកនូវការយល់ដឹង—និងការផ្លាស់ប្រែចិត្តជឿ—លើដំណឹងល្អនៃព្រះយេស៊ូវគ្រីស្ទដល់ពិភពលោក ។ ពួកយើងគឺជា « អ្នកប្រមូលផ្ដុំនៅថ្ងៃចុងក្រោយ » ។១៤ បេសកកម្មរបស់យើងគឺច្បាស់លាស់ ។ បងប្អូនប្រុសស្រី ចូរឲ្យយើងត្រូវបានគេស្គាល់ថា ជាអ្នកដែលទទួលយកការសន្យារបស់មរ៉ូណៃដាក់ក្នុងចិត្ត បានអធិស្ឋាន ហើយបានទទួលចម្លើយមួយដើម្បីដឹងថា ព្រះគម្ពីរមរមនគឺពិត បន្ទាប់មកចែកចាយចំណេះដឹងនោះជាមួយអ្នកដទៃតាម ពាក្យសម្ដី ហើយសំខាន់បំផុតនោះ គឺតាមទង្វើ ។
តួនាទីព្រះគម្ពីរមរមនក្នុងការផ្លាស់ប្រែចិត្តជឿ
ព្រះគម្ពីរមរមនមានភាពពេញលេញនៃដំណឹងល្អរបស់ព្រះយេស៊ូវគ្រីស្ទ ។១៥ វាដឹកនាំយើងទៅរកសេចក្ដីសញ្ញារបស់ព្រះវរបិតា ហើយបើយើងរក្សាសេចក្ដីសញ្ញា នោះវានឹងធានាឲ្យយើងបានអំណោយដ៏មហិមាបំផុតរបស់ទ្រង់—គឺជីវិតដ៏នៅអស់កល្បជានិច្ច ។១៦ ព្រះគម្ពីរមរមនគឺជាមូលដ្ឋាននាំទៅរកការផ្លាស់ប្រែចិត្តជឿរបស់បុត្រាបុត្រីនៃព្រះវរបិតាសួគ៌ទាំងអស់ ។
ការដកស្រង់ម្ដងទៀតមកពីប្រធានណិលសុន ៖ « នៅពេលបងប្អូន…អានព្រះគម្ពីរមរមនប្រចាំថ្ងៃ បងប្អូននឹងរៀនគោលលទ្ធិនៃការប្រមូលផ្ដុំ សេចក្ដីពិតអំពីព្រះយេស៊ូវគ្រីស្ទ ដង្វាយធួនរបស់ទ្រង់ និងភាពពេញលេញនៃដំណឹងល្អរបស់ទ្រង់ ដែលរកពុំមាននៅក្នុងព្រះគម្ពីរបរិសុទ្ធឡើយ ។ ព្រះគម្ពីរមរមនគឺជាចំណុចសំខាន់ដើម្បីប្រមូលផ្ដុំវង្សអ៊ីស្រាអែល ។ តាមពិត បើគ្មានព្រះគម្ពីរមរមនទេ នោះការប្រមូលផ្ដុំនៃវង្សអ៊ីស្រាអែលដែលបានសន្យាទុកក៏មិនកើតមានឡើងដែរ » ។១៧
ខ្ញុំសូមបញ្ចប់ដោយព្រះបន្ទូលរបស់ព្រះអង្គសង្គ្រោះ នៅពេលទ្រង់បានបង្រៀនដល់ពួកសាសន៍នីហ្វៃអំពីពរជ័យដែលបានសន្យា ៖ « អ្នករាល់គ្នាគឺជាកូនចៅនៃពួកព្យាការី ហើយអ្នករាល់គ្នាគឺជាវង្សអ៊ីស្រាអែល ហើយអ្នករាល់គ្នានៅក្នុងសេចក្ដីសញ្ញា ដែលព្រះវរបិតាទ្រង់បានធ្វើជាមួយនឹងពួកអយ្យកោអ្នក ដោយព្រះបន្ទូលរបស់ព្រះអង្គសង្គ្រោះ ទៅលោកអ័ប្រាហាំថា ៖ ដោយសារពូជអ្នក នោះគ្រប់ទាំងពូជមនុស្សនៅលើផែនដីនឹងបានពរ » ។១៨
ខ្ញុំសូមថ្លែងទីបន្ទាល់ថា យើងគឺជាបុត្រាបុត្រីរបស់ព្រះ ជាពូជរបស់អ័ប្រាហាំ ជាវង្សអ៊ីស្រាអែល ។ យើងកំពុងប្រមូលផ្ដុំអ៊ីស្រាអែលលើកចុងក្រោយ ហើយកំពុងធ្វើដូច្នោះដោយព្រះគម្ពីរមរមន—ជាគម្ពីរមួយ ដែលរួមផ្គុំនឹងព្រះវិញ្ញាណនៃព្រះអម្ចាស់ គឺជាឧបករណ៍ដ៏មានអានុភាពបំផុតក្នុងការផ្លាស់ប្រែចិត្តជឿ ។ យើងត្រូវបានដឹកនាំដោយព្យាការីនៃព្រះ គឺប្រធាន រ័សុល អិម ណិលសុន ដែលកំពុងដឹកនាំការប្រមូលផ្ដុំនៃវង្សអ៊ីស្រាអែលនៅជំនាន់របស់យើង ។ ព្រះគម្ពីរមរមនគឺពិត ។ វាបានផ្លាស់ប្ដូរជីវិតរបស់ខ្ញុំ ។ ខ្ញុំសូមសន្យានឹងបងប្អូន ដូចជាមរ៉ូណៃ និងពួកព្យាការីជាច្រើនថា វាអាចផ្លាស់ប្ដូរជីវិតបងប្អូនបាន ។១៩ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។