Trutok mo Plan
Taem yumi lukaotem trutok abaot relijin, yumi mas yusum ol wei long saed blong spirit blong lukaotem hemia.
Revelesen blong tedei, i talem mining blong trutok olsem, “save long ol samting olsem we oli stap, mo olsem we oli bin stap, mo olsem we bambae oli kam blong stap” (Doktrin mo Ol Kavenan 93:24 Hemia i wan stret toktok we i talem mining blong plan blong fasin blong sevem man mo Famli Ofisol Toktok I Go long Wol.
Yumi laef long wan taem we i gat plante infomesen we oli givgivimaot. Be i no evri infomesen ia we i tru. Yumi nid blong yumi mas lukaotgud taem yumi stap lukaotem trutok mo jusum ol ples we yumi go lukaotem infomesen ia. Yumi no mas tekem se fasin blong kam popula o gat atoriti, ol wan stret ples blong karem trutok. Yumi mas lukaot blong dipen long infomesen, o advaes blong eni kaen entetenmen sta, bigfala spotman mo woman, o sam ples we yumi no save long intanet. Sapos wan i spesel long wan eria, bae yumi no save tekem se Hem i spesel long trutok long eni nara eria.
Yumi mas lukaotgud long tingting biaen long man we i givim infomesen. Taswe ol skripja oli givim woning long yumi agensem fasin blong giaman pris (luk long 2 Nifae 26:29). Sapos oli no talem weaples wan samting i kamaot long hem, maet i no tru.
Ol desisen blong yumiwan, oli mas stanap long infomesen we i kamaot long ol ples o man we oli kwalifae long topik ia mo oli no gat sam selfis tingting.
1.
Taem yumi lukaotem trutok abaot relijin, yumi mas yusum ol wei long saed blong spirit blong lukaotem hemia: prea, witnes blong Tabu Spirit, mo stadi long ol skripja mo ol toktok blong ol profet blong tedei. Oltaem, mi harem nogud taem mi harem wan i ripotem se hem i lusum bilif blong relijin blong hem from ol tijing blong wol ia. Olgeta we, long wan taem, oli gat visen long saed blong spirit, oli save safa taem oli mekem olgetawan oli blaen long saed blong spirit. Olsem we Presiden Henry B. Eyring i talem: “Problem blong olgeta i no stap long wanem we oli ting we oli stap luk; i stap long wanem we oli no stap luk yet.”1
Ol rod blong saens oli lidim yumi long wanem yumi singaotem trutok blong saens. Be “trutok blong saens” i no fulwan blong laef. Olgeta we oli no stap lanem samting tru long “stadi o tru long fet,” (Doktrin mo Ol Kavenan 88:118) oli stopem andastaning blong olgeta abaot trutok long wanem oli save jekem tru long saens. Hemia i putum sam giaman limit long rod blong olgeta blong lukaotem trutok.
Presiden James E. Faust i talem: “Olgeta we oli bin baptaes, oli putum sol blong olgeta long denja taem oli no lukaot gud mo lukaot blong lanem nomo ol samting blong wol ia. Yumi biliv se Jos blong Jisas Kraes blong Ol Lata-dei Sent i gat ful gospel blong Kraes, we gospel ia i stamba blong trutok mo laet we i no save finis.”2
Yumi faenem glad we i tru mo i stap taem yumi kam blong save mo stap mekem folem trutok abaot huia yumi, mining blong laef long wol, mo weaples yumi stap go long hem taem bae yumi ded. Ol trutok ia, yumi no save lanem long ol wei blong saens o blong wol .
II.
Naoia, bae mi tokbaot ol trutok blong gospel we oli impoten tumas long doktrin blong Jos blong Jisas Kraes blong Ol Lata dei Sent. Plis tingting gud long ol trutok ia: Oli eksplenem plante samting abaot doktrin mo praktis blong yumi, maet sam samting we yumi no andastanem gud yet.
I gat wan God, we i Papa we i gat lav, i Papa blong ol spirit blong evriwan we i bin laef bifo, o we bambae i laef yet.
Man o woman, i blong taem we i no save finis. Bifo yumi bon long wol ia, yumi evriwan i bin laef olsem ol man, o ol woman spirit, long ples we God i stap long hem.
Yumi jes harem Tabenakol Kwaea long Tempol Skwea i singsing: “Bae Mi Folem Plan Blong God.”3 Hemia nao plan we God i stanemap blong mekem se evri spirit pikinini blong Hem oli save progres blong taem we i no save finis. Plan ia i impoten long wanwan long yumi.
Folem plan ia, God i krietem wol ia olsem wan ples we ol spirit pikinini blong Hem oli save bon i kam long hem blong oli kasem wan bodi blong mit mo bun, mo blong gat janis blong progres long taem we i no save finis taem oli mekem ol stret mo gud joes.
Blong i gat mining, ol joes long wol ia bae oli stap bitwin ol paoa blong gud mo nogud. I mas gat agens, mo from hemia, wan enemi, we oli sakemaot hem from hem i agens be oli letem hem blong i temtem ol pikinini blong God blong oli mekem samting we i agensem plan blong God.
Stamba tingting blong plan blong God, i blong givim long ol pikinini blong Hem, janis blong jusum laef we i no save finis. Hemia i save hapen nomo tru long eksperiens long laef ia, mo afta long ded, taem yumi gro insaed long spirit wol.
Long rod blong laef long wol ia, bae yumi kam doti wetem sin taem yumi stap folem ol ivel temtesen blong enemi, mo bambae yumi ded. Yumi akseptem ol jalenj ia mo dipen long plan ia se bae God i givim wan Sevya, Stret Pikinini Ia Nomo blong Hem, we bae i sevem yumi tru long wan laef bakegen long ded blong evriwan, blong yumi kasem laef wetem wan bodi afta long ded. Sevya bae i givim wan atonmen blong pem praes blong evriwan blong oli kam klin aot long sin folem ol kondisen we Hem i putum. Ol kondisen ia, oli fet long Kraes, fasin blong sakem sin, baptaes, presen we i Tabu Spirit, mo ol nara odinens we prishud atoriti i mekem.
Bigfala plan blong stap glad we i kam long God, i givim wan stret balens bitwin jastis we i no save finis mo sore, we yumi save kasem tru long Atonmen blong Jisas Kraes. Hem i letem yumi jenis i kam ol niufala pipol tru long Kraes.
Wan God we i gat lav i kamkamaot long wanwan long yumi. Yumi save se tru long lav blong Hem, mo from Atonmen blong Wan Stret Pikinini Ia Nomo blong Hem bae “i sevem evri [kaen] man, taem oli stap obei long ol loa mo olgeta odinens blong Gospel.” (Ol Toktok blong Bilif 1:3oli ademap italik).
Jos blong Jisas Kraes blong Ol Lata-dei Sent, oli savegud hem olsem wan famli Jos. Be wanem man i no andastanem gud, i we famli ia i moa bitim famli rilesensip blong wol ia. Ol rilesensip we oli no save finis oli stamba blong bilif blong yumi. “Famli, God nao i odenem.”4 Anda long bigfala plan blong Krieta, misin blong gospel we i kambak, blong Hem, i blong helpem ol pikinini blong God blong kam olsem wan god long selestial kingdom, we wan i save kasem nomo tru long mared we i no save finis, bitwin wan man mo wan woman (luk long Doktrin mo Ol Kavenan 131:1–3 Mifala i talem se i tru we, ol tijing blong Lod oli we, “blong stap olsem man o woman, hem i wan stamba samting we i save talem stret huia nao yumi … long laef bifo, laef l[naoia], mo laef [afta], mo we “mared bitwin man mo woman hem i stamba blong plan blong Hem.”5
Laswan. Lav blong God i bigwan tumas, mekem se, Hem i putum wan fiuja blong glori blong evri pikinini blong Hem, be i no long ol boe blong tudak. “Evriwan long ol pikinini blong Hem” i tekem tu olgeta we oli ded finis. Yumi stap mekem ol odinens long bihaf blong olgeta long ol tempol blong yumi. Stamba tingting blong Jos blong Jisas Kraes, i blong mekem ol pikinini blong Hem oli kwalifae from digri blong glori we i hae olgeta, we i blong kam olsem wan god, o kasem laef we i no save finis. OIgeta we oli no wantem, o oli no kwalifae from, Hem i givim ol nara glori, nomata oli ol kingdom blong glori we oli moa daon.
Eniwan we i andastanem olgeta trutok we oli no save finis, oli save andastanem from wanem, yumi, ol memba blong Jos blong Jisas Kraes blong Ol Lata dei Sent, yumi tingting long wei we yumi stap tingting long hem naoia.
III.
Bae mi tokbaot olsem wanem blong praktisim ol trutok ia we oli no save finis, we oli save andastanem nomo wetem tingting long plan blong God.
Faswan, yumi ona long fridom blong joes blong wanwan man o woman. Plante oli save gud long bigfala wok blong Jos we i kambak blong promotem fridom blong relijin long Yunaeted Stet mo raon long wol. Ol wok ia, oli no promotem intres blong yumi nomo, be tu, folem plan blong Hem, oli blong helpem evri pikinini blong God blong oli stap glad long fridom blong olgeta blong mekem joes.
Nambatu, yumi wan misinari pipol. Samtaem, oli askem yumi from wanem yumi stap sendem ol misinari i go long plante kantri, iven long ol Kristin populesen. Yumi kasem sem kwestin se from wanem yumi givim plante milian vatu long yumaniterian help, i go long olgeta we oli no memba blong Jos blong yumi, mo from wanem yumi no putum mane ia long misinari wok blong yumi. Yumi mekem hemia from se yumi luksave evriwan long wol olsem ol pikinini blong God—ol brata mo sista blong yumi—mo yumi wantem serem wanem we yumi gat we i plante wetem evriwan.
Nambatri, laef i tabu long yumi. Komitmen blong yumi folem plan blong God, i askem yumi blong agensem fasin blong kilim bebi insaed long bel blong mama mo fasin blong dokta i help blong karemaot laef.
Nambafo, sam pipol, tingting blong ol i trabol from ples we Jos i stanap long hem long saed blong mared mo pikinini. Save blong yumi, long plan we God i soemaot blong fasin blong sevem man i askem yumi blong agensem plante sosol paoa mo loa blong jenisim tradisonol mared, mo mekem ol jenis ia we i mekem man i konfius, o i jenisim olgeta olsem man o woman, mo mekem se i no gat samting defren bitwin man mo woman. Yumi save se ol rilesensip, ol aedentiti, mo ol rol blong man mo woman, oli impoten blong mekem bigfala plan ia blong God i hapen.
Nambafaef, yumi tu, yumi gat wan spesel lukluk long ol pikinini. Yumi luk se blong karem pikinini i kam long wol mo lukaotem olgeta i pat blong plan blong God, mo i wan diuti blong glad mo i tabu long olgeta we oli tekpat long hem. Long lukluk blong yumi, ol bigfala rij samting long wol ia mo long heven, oli ol pikinini blong yumi, mo famli laen blong yumi. From hemia, yumi mas tijim mo faet from ol prinsipol mo praktis we oli givim ol bes situesen blong divelopmen mo hapines blong ol pikinini—evri pikinini.
Laswan, yumi ol pikinini we wan Papa long Heven i lavem yumi, we i tijim yumi se blong stap olsem man mo woman, mared bitwin man mo woman, mo blong bonem ol pikinini mo lukaotem olgeta, evriwan oli wan mas long bigfala plan ia blong stap glad. Ples we yumi stanap long hem long ol stamba prinsipol ia, i mekem se i gat agens insaed long Jos. Mifala i luk se bae yumi no save ronwe long hemia. Agens i pat blong plan, mo bigfala strong wok blong agens blong Setan, hem i lukluk long wanem i impoten long plan blong God. Hem i wantem blong prapa spolem wok blong God. Ol fas wok blong hem i blong spolem nem blong Sevya mo tabu atoriti blong Hem blong karemaot ol risal blong Atonmen blong Jisas Kraes, blong slakem tingting blong man i sakem sin, blong mekem giaman kopi blong revelesen, mo blong talem se man bae i no ansa long aksen. Hem i wantem tu blong man i konfius se hem i man o woman, blong tantanem mared, mo blong katemaot tingting blong gat pikinini— (speseli ol papa mo mama we bae oli lukaotem ol pikinini wetem trutok.)
4.
Wok blong Lod i blong go fored nomata agens we i oganaes mo i gohed we yumi stap fesem taem yumi stap traem blong laef folem ol tijing blong Jos blong Jisas Kraes. Long olgeta we oli foldaon long agens ia, mi givim olgeta tingting ia:
Tingbaot prinsipol blong sakem sin we i save kam tru long paoa blong Atonmen blong Jisas Kraes. Olsem we Elda Neal A. Maxwell i talem strong: “yufala i no stap long medel blong olgeta we oli traem blong jenisim Jos, be i no blong oli jenisim olgeta.”6
Olsem we Elda Jeffrey R. Holland i askem strong long yumi:
“Hang strong long wanem yu save finis, kasem taem sam moa save i kam. …
“… Long Jos ia, wanem we yumi save bae oltaem i winim wanem we yumi no save.” 7
Praktisim fet long Lod Jisas Kraes, we i fas prinsipol blong gospel.
Laswan, askem help. Ol lida blong Jos blong yumi oli lavem yufala, mo stap askem Spirit blong lidim olgeta blong helpem yufala. Mifala i givim plante risos olsem we bae yu save faenem long LDS.org mo i gat ol nara sapot blong stadi long gospel insaed long hom. Naoia, yumi gat tu ol givhan brata mo sista we oli singaotem olgeta blong givim help.
Papa blong yumi long Heven we i gat lav i wantem yumi blong gat glad we i stamba tingting blong kriesen blong yumi. Glad fiuja ia, hem i laef we i no save finis, we yumi save kasem taem yumi gohed blong folem wanem profet Presiden Russel M. Nelson i singaotem “rod blong kavenan.” Hemia wanem hem i talem long fas mesej blong hem olsem Presiden blong Jos: “Stap long rod blong kavenan.” Komitmen blong yu blong folem Sevya taem yu mekem ol kavenan wetem Hem, mo afta, blong gohed blong holem ol kavenan ia, bambae i openem doa long evri blesing long saed blong spirit, mo blong kasem spesel janis ia we i stap long ol man, woman, mo pikinini long evri ples.”8
Mi testifae wetem tabu fasin, se olgeta samting we mi talem, oli tru, mo oli kam posibol tru long ol tijing mo Atonmen blong Jisas Kraes, we i mekem evri samting ia i posibol anda long bigfala plan blong God, Papa blong yumi we I No Save Finis. Long nem blong Jisas Kraes, amen.