Hanga kia Sīsū Kalaisi

ʻI he fononga ʻa Sīsū ʻi he hala ofi ki Kāpaneumé¹ kuo ʻātakaiʻi ia ʻe ha kakai tokolahí, naʻe kakapa atu ha fefine naʻe puke lahi ʻi ha taʻu ʻe 12, ʻo ala ki he kapa ʻo Hono kofú. Naʻe fakamoʻui ia ʻi he taimi pē ko iá.²

ʻOku pehē ʻe he folofolá, ko e taimi naʻe ʻafioʻi ai ʻe Sīsū kuo “ʻalu atu ʻiate ia ʻa e [mālohí],³ peá ne “tafoki ia ki he kakaí”⁴ pea “vakai foki … ke mamata kiate ia kuó ne fai ʻa e meʻa ní.”⁵ “Pea kuo ʻilo ʻe he fefiné ʻa ia kuo fai kiate iá,”⁶ naʻá ne “tō ki lalo ʻi hono ʻaó, ʻo ne tala kiate ia ʻa e moʻoni kotoa pē.”⁷

Pea pehē ʻe Sīsū kiate ia, “ʻOfefine, ke ke fiemālie: kuo fakamoʻui koe ʻe hoʻo tuí; ʻalu ʻo fiemālie.”⁸

Naʻe fakamoʻui ʻe Sīsū Kalaisi ʻa e fefiné. Naʻe fakamoʻui fakaesino ia, ka ʻi he tafoki ʻa Sīsū ke vakai atu kiate iá, naʻá ne fakahaaʻi ʻene tui kiate Iá peá Ne fakamoʻui hono lotó.⁹ Naʻá Ne folofola kiate ia ʻi he ʻofa, fakapapauʻi ange ʻEne talí, mo tāpuekina ia ʻaki ʻEne melinó.¹⁰

Ngaahi tokoua, ʻi heʻetau hoko ko e kau maʻu lakanga fakataulaʻeiki māʻoniʻoní, ʻoku tau kau ai ʻi he ngāue ʻo e fakamoʻuí. ʻI he taʻu kuo ʻosí, kuo hilifaki moʻoni ʻe he ʻEikí ʻa e tuʻunga fakatakimuʻa ʻo e ngāué ni ʻi he uma ʻo e kaumātuʻa ʻo ʻIsilelí.¹¹ Kuo tau maʻu ha fekau fakaofo mei he ʻEikí—pea ʻi heʻetau ngāue mo hotau kau fafiné, te tau tokoni ai ʻi ha founga māʻoniʻoni ange, ʻo fakavaveʻi ange ai hono tānaki ʻo ʻIsilelí ʻi he ongo tafaʻaki ʻo e veilí, fokotuʻu hotau ʻapí ko ha maluʻanga ʻo e tuí mo e ako ʻo e ongoongoleleí, mo teuteu ʻa māmani ki he Hāʻele ʻAnga Ua Mai ʻa Sīsū Kalaisí.¹²

Hangē ko ʻene hoko ʻi he meʻa kotoa pē, kuo fakahinohino mai ʻe he Fakamoʻuí ʻa e foungá: ʻoku fie maʻu ke tau hanga hake mo tauhi kia Sīsū Kalaisi ʻo hangē ko ʻEne hanga hake mo tauhi ki Heʻene Tamaí.¹³ Naʻe fakalea peheni ia ʻe he Fakamoʻuí ki he Palōfita ko Siosefá:

“Sio pē kiate au ʻi he fakakaukau kotoa pē; ʻoua ʻe tālaʻa, ʻoua ʻe manavahē.

“Vakai ki he ngaahi lavea ʻa ia naʻe hokaʻi ai ʻa hoku vakavaká, kae ʻumaʻā foki ʻa e ngaahi mataʻi faʻo ʻi hoku ongo nimá mo e vaʻé; tui faivelenga, tauhi ʻeku ngaahi fekaú, pea te mo maʻu ʻa e puleʻanga ʻo e langí.”¹⁴

Naʻe palōmesi ʻa Sīsū ki Heʻene Tamaí ʻi he maama fakalaumālié te Ne fakahoko e finangalo ʻo ʻEne Tamaí ʻo hoko ko hotau Fakamoʻuí mo e Huhuʻí. Ko e taimi naʻe fehuʻi ai ʻe Heʻene Tamaí, “Ko hai te u fekauʻí?”¹⁵ Naʻe tali ange ʻe Sīsū:

“Ko au ʻeni, fekauʻi au.”¹⁶

“ʻE Tamai, ke fai pē ho finangaló, pea ke ʻoʻou ʻa e lāngilangí ʻo taʻengata.”¹⁷

Naʻe moʻui ʻaki ʻe Sīsū e talaʻofa ko iá, ʻi he kotoa ʻo ʻEne moʻui fakamatelié. Naʻá Ne akoʻi e tokāteline ʻa ʻEne Tamaí mo fakahoko e ngāue ʻa ʻEne Tamaí ʻaki e mālohi mo e mafai ne ʻoange ʻe Heʻene Tamaí, ʻi he mālohi mo e loto fakatōkilalo, angavaivai, mo e ʻofa.¹⁸

Naʻe momoi ʻe Sīsū Hono finangaló ki Heʻene Tamaí. Naʻá ne pehē:

“ʻOku ou ʻofa ʻi he Tamaí.”¹⁹

“ʻOku ou fai maʻu ai pē ʻa e ngaahi meʻa ʻoku lelei ai iá.”²⁰

“Naʻe ʻikai te u ʻalu hifo mei he langí ke fai hoku loto ʻoʻokú, ka ko e finangalo ʻo ia naʻá ne fekauʻi aú.”²¹

Naʻe lotu ʻi Heʻene mamahi ʻi Ketisemaní, “ʻOua naʻa fai hoku lotó, ka ko e finangalo ʻoʻoú.”²²

Ko e taimi ʻoku ui ai ʻe he ʻEikí ʻa e kaumātuʻa ʻi ʻIsilelí ke nau “sio kiate au ʻi he fakakaukau kotoa pē” mo “vakai ki he ngaahi kafo” ʻi Hono sino toetuʻú, ko ha ui ia ke tafoki mei he faiangahalá mo māmani kae tafoki kiate Ia ʻo ʻofa mo talangofua kiate Ia. Ko ha ui ia ke akoʻi ʻEne tokāteliné mo fakahoko ʻEne ngāué ʻi Heʻene foungá. Ko ia, ko ha ui ia ke falala kakato kiate Ia, fakamoʻulaloaʻi hotau lotó pea momoi hotau lotó kiate Ia, pea tau hoko ʻo tatau mo Ia tuʻunga ʻi Hono mālohi huhuʻí.²³

Kāinga, kapau te tau hanga kia Sīsū Kalaisi, te Ne tāpuakiʻi kitautolu ke tau hoko ko ʻEnekaumātuʻa ʻi ʻIsilelí—ʻo loto fakatōkilalo, angamalū, ongongofua, mo fonu ʻi Heʻene ʻofá.²⁴ Pea te tau ʻomi ai e fiefia mo e ngaahi tāpuaki ʻo ʻEne ongoongoleleí mo Hono Siasí ki hotau fāmilí pea mo hotau ngaahi tokoua mo e tuofāfine ʻi he ongo tafaʻaki ʻo e veilí.

Kuo ui kitautolu ʻe Palesiteni Lāsolo M. Nalesoni ke tau hanga kia Sīsū Kalaisi ʻi he founga tofu pē ko ʻení: Kuo pau ke fakamaʻu ʻetau tokangá ʻi he Fakamoʻuí mo ʻEne ongoongoleleí. ʻOku mafatukituki fakaʻatamai ke hanga kiate Ia ʻi he fakakaukau kotoa pē. Ka ʻi heʻetau fai iá, ʻoku mole atu ʻetau veiveiuá mo e manavasiʻí.”²⁵

Ko e fakamaʻú ko ha foʻi lea maʻongoʻonga ia. ʻOku ʻuhinga ia ke fakamaʻu ke maʻu, ke tohoakiʻi pea puke kotoa ia.²⁶ ʻOku fakamaʻu ʻetau tokangá ʻia Sīsū Kalaisi mo ʻEne ongoongoleleí ʻi heʻetau moʻui ʻaki ʻetau ngaahi fuakavá.

Ko e taimi ʻoku tau moʻui ʻaki ai ʻetau ngaahi fuakavá, ʻoku nau tākiekina e meʻa kotoa pē ʻoku tau lea ʻaki mo fakahokó. ʻOku tau moʻui ʻi ha kuonga ʻo e fuakava²⁷ fonu ʻi he fanga kiʻi tōʻonga faingofua fakaʻaho ʻo e tuí ʻokú ne ʻai ke tukutaha ʻetau tokangá kia Sīsū Kalaisi: lotu fakamaatoato ʻi Hono huafá, keinanga ʻi Heʻene folofolá, tafoki kiate Ia ke fakatomalaʻi ʻetau ngaahi angahalá, tauhi ʻEne ngaahi fekaú, maʻu ʻa e sākalamēnití, pea tauhi Hono Sāpaté ke māʻoniʻoní, moihū ʻi Hono temipalé ʻi he tuʻo lahi taha te tau lavá, mo fakaʻaongaʻi Hono lakanga fakataulaʻeiki māʻoniʻoní ke tokoniʻi e fānau ʻa e ʻOtuá.

ʻOku hanga ʻe he ngaahi ngāue mateaki ko ʻeni ʻo e fuakavá ʻo fakaava hotau lotó mo e fakakaukaú ki he mālohi huhuʻi ʻo e Fakamoʻuí pea mo e ivi takiekina fakamāʻoniʻoniʻi ʻo e Laumālie Māʻoniʻoní. ʻOku liliu ʻe he Fakamoʻuí hotau angá ʻi he ʻotu lea ki he ʻotu lea, pea ʻoku tau ului lahi ange leva kiate Ia mo moʻui ʻetau ngaahi fuakavá ʻi hotau lotó.²⁸

ʻOku hoko leva e ngaahi palōmesi ʻoku tau fai ki heʻetau Tamai Hēvaní ko ha ngaahi tukupā mālohi moʻoni, mo ʻetau fakaʻānaua taupotu tahá. ʻOku fakafonu kitautolu ʻe he ngaahi talaʻofa ʻa e Tamai Hēvaní ʻaki ʻa e loto houngaʻia mo e fiefia.²⁹ ʻOku ʻikai leva toe hoko ʻetau ngaahi fuakavá ko ha ngaahi lao ʻoku tau muimui ki ai kae hoko ko ha ngaahi tefitoʻi moʻoni manakoa ʻoku nau ueʻi mo tataki kitautolu pea mo fakamaʻu ʻetau tokangá ʻia Sīsū Kalaisi.³⁰

Ko ha ngaahi ngāue ʻeni ʻo e mateaki pea ʻoku ʻatā ia ki he taha kotoa, ʻa e talavou mo e toulekeleka. Ko kimoutolu kau talavou ʻoku mou maʻu e Lakanga Taulaʻeiki Faka-ʻElone māʻoniʻoní, ʻoku kaunga kiate kimoutolu ʻa e meʻa kotoa pē kuó u lea ʻaki he pōní. ʻOku ou fakafetaʻi ki he ʻOtuá koeʻuhí ko kimoutolu. ʻOku mou fakahoko ha ngaahi ouau mo e ngaahi fuakava toputapu ke maʻu ʻe he Kāingalotu ʻe lauimiliona ʻo e Ngaahi ʻAho Kimui Ní ʻi he uike kotoa pē. Ko e taimi ʻoku mou teuteu, tāpuakiʻi, pe tufa ai e sākalamēnití; tokangaʻi; papitaiso ʻi he temipalé; fakaafeʻi ha kaungāmeʻa ki ha ʻekitivitī; pe fakahaofi ha mēmipa ʻi hoʻomou kōlomú, ko hoʻomou fakahoko ia e ngāue ʻo e fakamoʻuí. Te mou lava mo kimoutolu foki ʻo hanga kia Sīsū Kalaisi pea moʻui ʻaki hoʻomou ngaahi fuakavá ʻi he ʻaho kotoa pē. ʻOku ou palōmesi atu kapau te mou fai ia, te mou hoko ko e kau tamaioʻeiki falalaʻanga ʻa e ʻEikí he taimí ni, pea ʻi he ʻaho ka hoko maí, ko e kaumātuʻa mālohi ʻo ʻIsileli.

Ngaahi tokoua, ʻoku ou ʻiloʻi ʻe ala ongo fakalotosiʻi ʻa e ngaahi meʻá ni kotoa. Ka mou kātaki ʻo manatuʻi e ngaahi lea ko ʻeni ʻa e Fakamoʻuí: “ʻOku ʻikai te u toko taha pē, he ʻoku ʻiate au ʻa e Tamaí.”³¹ ʻOku pehē pē mo kitautolu. ʻOku ʻikai ke tau tuenoa. ʻOku ʻofa e ʻEiki ko Sīsū Kalaisí mo ʻetau Tamai Hēvaní ʻiate kitautolu, pea ʻoku tau kau mo Kinaua.³² Koeʻuhí naʻe hanga ʻa Sīsū Kalaisi ki Heʻene Tamaí mo fakahoko e feilaulau fakalelei maʻongoʻongá, ʻe lava mo kitautolu ʻo hanga kia Sīsū Kalaisi mo ʻilo pau te Ne tokoniʻi kitautolu.

ʻOku hala hatau taha ʻe haohaoa. Ko e taimi ʻe niʻihi ʻoku tau faingataʻaʻia. ʻOku tau hē pe lotofoʻi. ʻOku tau humu. Ka ʻo kapau te tau hanga kia Sīsū Kalaisi ʻi he loto fakatomala, te Ne fokotuʻu hake kitautolu, fakamaʻa kitautolu mei he angahalá, fakamolemoleʻi kitautolu, mo faitoʻo hotau lotó. ʻOku faʻa kātaki Ia mo angaʻofa; ʻoku ʻikai teitei ngata pe ʻosi ʻEne ʻofa huhuʻí.³³ Te Ne tokoni mai ke tau moʻui ʻaki ʻetau ngaahi fuakavá mo fakahoko totonu hotau fatongia ko e kaumātuʻa ʻi ʻIsilelí.

Pea ʻe tāpuekina kitautolu ʻe he Tamaí ʻaki e ngaahi meʻa kotoa ʻoku fie maʻu ke fakahoko ʻaki ʻEne ngaahi taumuʻá—“ʻa e ngaahi meʻa kotoa pē … ʻi he langí pea mo e māmaní fakatouʻosi, ko e moʻuí mo e māmá, ko e Laumālie mo e mālohi, ʻoku fekauʻi atu ʻi he finangalo ʻo e Tamaí ʻia Sīsū Kalaisi, ko hono ʻAló.”³⁴

Ko e taimi ʻoku tafe ai e maama mo e mālohi fakalangí ki heʻetau moʻuí, ʻoku hoko ha meʻa fakaofo ʻe tolu:

ʻUluakí, te tau lava ʻo mamata! ʻOku tau lava ʻi he fakahaá ke vakai ʻo hangē ko e vakai ʻa Sīsū ki he fefiné: ʻo mahulu atu ʻi hono fōtungá kae aʻu ki hono lotó.³⁵ Ko e taimi ʻoku tau vakai ai ʻo hangē ko Sīsuú, ʻokú ne tāpuakiʻi leva kitautolu ke tau ʻofa ʻiate kinautolu ʻoku tau tokoniʻí, ʻaki ʻEne ʻofá. ʻI Heʻene tokoní, ʻe ʻilo leva ʻe kinautolu ʻoku tau tokoniʻí ʻa e Fakamoʻuí mo ongoʻi ʻEne ʻofá.³⁶

Uá, ʻoku tau maʻu e mālohi ʻo e lakanga fakataulaʻeikí! ʻOku tau maʻu ʻa e mafai mo e mālohi ke ngāue ʻi he huafa ʻo Sīsū Kalaisí “ke tāpuakiʻi, fakahinohino, maluʻi, fakamālohia, pea mo fakamoʻui ha niʻihi kehe pea mo fakahoko ha ngaahi mana kiate kinautolu ʻoku [tau] ʻofa aí pea mo tauhi [ʻetau] nofomalí mo e malu hotau ngaahi fāmilí.”³⁷

Tolú, ʻoku tau feʻao mo Sīsū Kalaisi! Ko e potu te tau fononga aí, ʻoku fononga ai mo Ia. Ko e taimi ʻoku tau faiako aí, ʻokú Ne faiako. Ko e taimi ʻoku tau fakafiemālie aí, ʻokú Ne fakafiemālieʻi. Ko e taimi ʻoku tau faitāpuekina aí, ʻokú Ne fai tāpuekina.³⁸

Kāinga, ʻoku ʻikai ʻapē ke ʻi ai ha ʻuhinga ke tau fiefia ai? ʻOku ʻi ai! ʻOku tau maʻu e lakanga fakataulaʻeiki māʻoniʻoni ʻo e ʻOtuá. Ko e taimi ʻoku tau hanga ai kia Sīsū Kalaisi, moʻui ʻaki ʻetau ngaahi fuakavá, mo fakamaʻu ʻetau tokangá ʻiate Iá, te tau kau fakataha leva mo hotau kau fafiné ʻo tokoni ʻi ha founga māʻoniʻoni ange, tānaki fakataha ʻa ʻIsileli ʻi he ongo tafaʻaki ʻo e veilí, fakamālohia mo silaʻi hotau fāmilí, pea mo teuteu ʻa māmani ki he Hāʻele ʻAnga Ua Mai ʻa e ʻEiki ko Sīsū Kalaisí. ʻE hoko ia. Ko ʻeku fakamoʻoní ia.

Te u fakaʻosi, ʻaki ha fakaʻānaua mei hoku lotó, ke tau hanga kotoa, kia Sīsū Kalaisi ʻi he fakakaukau kotoa. ʻOua ʻe tālaʻa. ʻOua ʻe manavahē. ʻI he huafa ʻo Sīsū Kalaisí, ʻēmeni.