Ia I Ai le Malamalama!

Of the Quorum of the Twelve Apostles


Quentin L. Cook
I lo tatou lalolagi ua matua faateleina le amioletonu, ua tatau ai lava i tulaga faatauaina e faavae i le talitonuga faalelotu ona avea o se vaega o le talanoaga faalauaitele.
 

Sa faamanatuina lo’u aso fanau i le masina na te’a nei. Sa aumai e lo’u toalua o Mary se meaalofa, o se CD e i ai ni pese o le faamoemoe ma le faatuatua sa usuina e se tamaitai pese lauiloa o Peretania e igoa ia Vera Lynn, o lē sa faalototeleina lana au faalogologo i le taimi o le pogisa i le Taua Lona Lua a le Lalolagi.

E i ai se mafuaaga na aumai ai e lo’u toalua ia te au lenei meaalofa. O le tu’ipomuina o Lonetona ia Setema 1940, na amata i le aso i luma mai o le aso na ou fanau mai ai. 1 Sa faalogologo lo’u tina i le leitio i lona potu i le falema’i, i le tala o le osofaiga o Lonetona, ma sa tonu ai ia te ia e faaigoa a’u i le igoa o le alii sa faasalalau i le leitio o lona igoa muamua o Quentin.

O le tamaitai pese, o Vera Lynn, ua 93 nei ona tausaga. O le tausaga na te’a nei na toe faasalalau mai ai nisi o ana pese i le taimi o taua, ma sa vave le faasologa ma pito ai i luga o le siata o musika i Peretania. O outou na ua fai si matutua tele, o le a manatuaina nisi o pese e pei o le “The White Cliffs of Dover.”

O le isi pese na faaigoa o le “When the Lights Go on Again All over the World” na matua ootia ai lava lo’u loto. Na aumaia e le pese ni manatu se lua i lo’u mafaufau: muamua, o upu faaperofeta a se tamalii Peretania, “Ua pepe moli i Europa atoa. O le a tatou le toe vaaia lava o tutuina i o tatou taimi”; 2 ma le lona lua, o osofaiga na tu’ipomuina ai aai uma o Peretania e pei o Lonetona. Ina ia matua faigata i osofaiga a le au tu’ipomu ona maua se mea e taulai i ai, o lea na faapogisa ai loa. Sa tape moli ma ufiufi faamalama.

Na atagia mai i le pese se faamoemoe mautinoa o le a toefuatai mai le saolotoga ma le malamalama. Mo i tatou e malamalama i le matafaioi a le Faaola ma le Malamalama o Keriso 3 i le feteenaiga faifai pea i le va o le lelei ma le leaga, e manino lava le talafaatusa i le va o lena taua ma le feteenaiga mo le lelei i le taimi nei. O le malamalama o Keriso “e mafai ai [e tagata uma] ona iloa le lelei mai le leaga.” 4

E lei i ai lava se taimi ua faigofie ai ona maua ma faatumauina le saolotoga ma le malamalama. Talu mai le taua i le lagi, ua faaaogaina ai e ‘au a ē amioleaga auala uma e mafai ina ia faatama’ia ai le saolotoga ma aveeseina ai le malamalama. E lei i ai se isi taimi na malosi tele ai le osofa’ia o mataupu faavae o le amiomama ma le saolotoga o tapuaiga faalelotu.

I le avea ai ma Au Paia o Aso e Gata Ai, e tatau lava ona tatou faia le mea sili e faasaoina ai le malamalama ma puipuia ai o tatou aiga ma nuu mai lenei osofaiga o le amiomama ma le saolotoga o tapuaiga faalelotu.

Puipuia o le Aiga

Ua i ai nei se tulaga matautia i le aiga o le osofaiga malosi lea a ‘au amioleaga lea ua foliga ua taufai sau i itu uma. E ui o la tatou uluai taumafaiga o le sailia lea o le malamalama ma le upumoni, ae o le a tatou atamamai pe afai e puipuia mai o tatou aiga i pomu faatauma’oi lea e faaumatia ai le atiina ae faaleagaga ma le tuputupu a’e. O ponokalafi, i se tulaga faapitoa, o se auupega o le faatafunaga tele o le amiomama. Ua ta’imua lona aafiaga i le faatama’iaina o tulaga faatauaina o le amiomama. O nisi polokalama o televise ma saite o le initoneti ua tutusa lelei lava le matautia. O nei malosiaga leaga ua aveesea ai mai le lalolagi le malamalama ma le faamoemoe. Ua saoasaoa le faaitiitia o le amiomama. 5 Afai tatou te le taofia mea leaga mai o tatou maota ma laoa ma olaga, aua ne’i outou ofo pe afai e nutililii i le pasae mai o le faatafunaga o le amiomama le filemu, lea e taui a’i le ola amiotonu. O lo tatou tiutetauave o le i ai lea i le lalolagi, ae le o ni ō le lalolagi.

E le gata i lea, e tatau ona faateleina lo tatou usiusitai ma le faamaoni i la tatou tapuaiga i o tatou aiga. O afiafi faaleaiga i vaiaso taitasi, o tatalo faaleaiga ma le suesuega o tusitusiga paia i aso taitasi e taua ia. E tatau ona tatou aumaia i totonu o o tatou maota ma laoa ia ala o faasalalauga e mama, matagofie, pe ta’uleleia ma viia.” 6 Afai tatou te faia o tatou maota ma laoa o ni nofoaga e paia e malutia ai i tatou mai mea leaga, o le a faapea ona puipuia i tatou mai taunuuga lē manaomia na muai ta’uina mai e tusitusiga paia.

Puipuia o Nuu

E le gata i le puipuia o o tatou lava aiga, ae e tatau foi ona avea i tatou ma puna o le malamalama e puipuia ai o tatou nuu. Na fetalai mai le Faaola, “Ia faapea ona pupula atu lo outou malamalama i luma o tagata, ina ia latou iloa la outou amiolelei, latou te vivii atu ai i lo outou Tama o i le lagi.” 7

Ua faamatalaina o tatou aso “o se taimi o le mau ma o se vaitau o le masalosalo.” 8 Ua le gata ina fesiligia le talitonuga faavae i le mana ma le pule a le Atua, ae ua faamamasagiaina. E mafai la faapefea i nei tulaga ona tatou faalauiloaina tulaga faatauaina i se auala o le a mafai ai e le au lē talitonu ma le au lē manatu mamafa ona lagolagoina, ma fesoasoani ai e faaitiitia le faateleina o le pauu ifo i amioga soona fai ma le amioleaga?

O lenei fesili e matuai taua lava. Mafaufau i le perofeta o Mamona ma lona mafatia ina ua ia fai atu, “Na mafai faapefea ona outou teena Iesu, o Le na tu ma ona aao o faaloaloa mai e talia outou!” 9 Na tauamiotonuina le mafatia o Mamona ma na tuua ai lona atalii o Moronae, e tusi le tala faanoanoa o le faafanoga o [lona] nuu.” 10

O lo’u lava aafiaga patino o le ola ai ma fegalegaleai ma tagata i vaega eseese o le lalolagi, ua mafua ai ona ia te au le faamoemoe mautinoa. Ou te talitonu o le a faasaoina le malamalama ma le upumoni i o tatou taimi. I malo uma lava, e i ai se aofaiga tele o ē tapuai i le Atua ma iloa latou te tali atu i le Atua mo a latou amioga. E i ai nisi o ē usitai faamaoni e talitonu, ua faateleina moni lava le faatuatuaga faalelotu. 11 I le avea ai ma taitai o le Ekalesia, ua matou feiloai ma taitai o isi faatuatuaga ma ua iloa ai, o loo i ai se faavae masani lelei i luga atu o eseesega o mataupu faalelotu, e fusia faatasi ai i tatou i o tatou faanaunauga mo se lalolagi e sili atu.

Ua matou iloa ai foi o le toatele lava o tagata o loo latou faaaloalogia pea tulaga faatauaina mamalu o le amiomama. Peitai, aua nei sese ai: o loo i ai foi tagata o loo naunau e faataumaoia le faatuatua ma teena soo se uunaiga faalelotu i le lalolagi. O isi tagata leaga latou te faaaogaina, faataigamalieina, ma faataumaoiina le lalolagi i fualaau oona, ponokalafi, feusuaiga faatautala, fefaatauaiga o tagata soifua, gaoi, ma faiga faapisinisi lē faamaoni.Ua matua tele naua le malosi ma uunaiga a nei tagata tusa lava pe matuai toaitiiti i latou.

Na i ai pea lava se taua faifai pea i le va o tagata o le faatuatua ma i latou ua tuuesea mea tau lotu ma le Atua mai le olaga faitele. 12 E toatele ta’ita’i faitofa i le taimi nei, ua latou teena se manatu o le lalolagi i le amiomama e faavae i tulaga faatauaina faa-Iutaia i le Feagaiga Tuai/faa-Kerisiano i le Feagaiga Fou. I la latou silasila, e leai se faatulagaga maioio o le amiomama. 13 Latou te talitonu e le tatau ona filita’aina ni sini o le amiomama. 14

Ae, o le toatele lava o tagata e naunau ina ia lelei ma faamamaluina. O le malamalama o Keriso, lea e ese mai i le Agaga Paia, e ta’uina atu i o latou mafaufau fai ifo. Ua tatou iloa mai tusitusiga paia o le Malamalama o Keriso o “le agaga [lea na te tuuina atu] le malamalama i tagata taitoatasi e oo mai i le lalolagi.” 15 Ua tuuina mai lenei malamalama “mo le manuia o le lalolagi atoa.” 16 Ua aoao mai e Peresitene Boyd K. Packer o se “punavai lenei o musumusuga lea ua tofusia ai i tatou taitoatasi ma isi tagata uma o le fanauga a tagata.” 17 O le mafuaaga lea e toatele ai o le a taliaina tulaga faatauaina o le amiomama tusa lava pe faavae i talitonuga maumaututu faalelotu, lea latou te le lagolagoina. E pei ona tatou faitau ai i le Mosaea i le Tusi a Mamona, “e le se mea e masani ai ona filifilia e le nuu uma o le mea ua le tonu; a o se mea e masani ona manao i ai le vaega itiiti o le nuu, o le mea lē tonu lea.” Ona lapatai mai lea o Mosaea “afai e oo mai le aso e filifilia ai e le nuu uma le amioletonu, o le aso lena e oo mai ai faamasinoga a le Atua ia te outou.” 18

I lo tatou lalolagi ua matua faateleina le amioletonu, ua tatau ai lava i tulaga faatauaina e faavae i le talitonuga faalelotu ona avea o se vaega o le talanoaga faalauaitele. O tulaga tauleleia e faavae i se manatu faalelotu, e tatau ona tuu atu i ai avanoa tutusa mo felafolafoaiga lautele. I lalo o tulafono faavae a le tele o atunuu, atonu e le filitaaina se manatu faalelotu, ae e le tatau foi ona le amanaiaina. 19

O le faatuatuaga faalelotu o se punavai o le malamalama, iloa, ma le poto ma e manuia ai le lalolagi i se ala maoae pe a gauai i latou e talitonu i amioga mama ona ua latou iloa latou te tali atu i le Atua. 20

E lua mataupu faavae faalelotu o le a faapupula ai le itu lea.

O Le Amio Faamaoni e Faaosofia i le Tali atu i le Atua

Fai mai le mataupu faavae o le faatuatua e sefulutolu, “Matou te talitonu ia faamaoni.” O le faamaoni o se mataupu faavae i le talitonuga faalelotu ma o se tasi o tulafono faavae a le Atua.

I le tele o tausaga ua mavae a’o ou faigaluega i le tulafono i Kalefonia, sa sau sa’u uo e le auai i lo tatou faatuatuaga ma o se tagata sa matou tautuaina, e vaai au ma se naunautaiga tele ma faaali mai ia te au se tusi na ia mauaina mai se tasi o epikopo o le Au Paia o Aso e Gata Ai o se uarota tuaoi. Sa tusi mai le epikopo e faapea, o se tagata o lana aulotu, o se tagata sa faigaluega i la’u tagata lea ou te fesoasoani i ai, sa na ia aveina ni oloa mai le falefaigaluega o lē o loo ma talanoa nei, ma sa ia toesea faapea o ni mea ua le toe aoga. Ae ina ua ia tautino atu e avea ma se tagata o le Au Paia o Aso e Gata Ai ma ua taumafai e mulimuli ia Iesu Keriso, sa iloa ai e lenei tagata faigaluega o le mea sa ia faia o se lē faamaoni. Sa aumaia faatasi ma le tusi se aofaiga o le tupe e toe totogi ai e lē gata o le tau o oloa na ia aveina, ae faapea ma se tupe faasili. Sa matua faagaeetia lava le tagata lea na ou tautuaina, ona o le fesoasoani a le Ekalesia e ala i ona taitai i lenei tagata i ana taumafaiga e toe faalelei ma le Atua.

Mafaufau i le malamalama ma le upumoni o i ai i le tulaga faatauaina o le faamaoni i le lalolagi faa-Iutaia/Kerisiano. Mafaufau i le aafiaga o tagata pe a na lē kopi le autalavou i le a’oga, pe a na faamaoni le au matutua i falefaigaluega ma pe a na fai e faamaoni i a latou tautoga o faaipoipoga. Mo i tatou, o le manatu faavae o le faamaoni lava ia, e faavae i le soifuaga ma aoaoga a le Faaola. O le faamaoni o se uiga faaleatua taua lea i le tele o isi faatuatuaga i talatusi faasolopito. Fai mai le tusisolo, o Robert Burns, “O se tagata faamaoni, o le galuega aupito tamalii lea a le Atua.” 21 Toetoe o soo se mea lava, e lagona e tagata faatuatua latou te tali atu i le Atua ona o lo latou faamaoni. O le mafuaaga lena na salamo ai le tagata lea mai Kalefonia mai lana faatinoga lē faamaoni sa fai.

I se lauga o se faauuga i le tausaga na te’a nei, na faasoa mai ai e Clayton Christensen, o se polofesa mai Harvard ma o se taitai foi faale-Ekalesia, se tala moni o sana paaga faalegaluega mai se isi atunuu, sa a’otauina i tulaga faatemokarasi. Sa ofo lenei uo i le matua taua o tapuaiga faalelotu i le faatemokarasi. Sa ia ta’ua patino e faapea, i atunuu e aoao ai tagatanuu a’o laiti ia lagona latou te tali atu i le Atua mo le faamaoni ma le amiosa’o, o le a latou tausisia tulafono ma faiga e faalauiloa ai manatu faatemokarasi e ui lava ina lē faamalosia. I atunuu e le moni ai lenei mea, e le mafai ona lava ni leoleo e faamalosia amioga faamaoni. 22

E manino lava o tulaga faatauaina o le tauleleia e tusa ai ma le faamaoni, e mafai ona taua lana matafaioi e faia i le faavaeina o le malamalama ma le upumoni ma le faaleleia o tagata, ma e tatau ona faatauaina e i latou e leai se faatuatua.

Taulimaina o Fanau Uma a le Atua o ni Uso ma Tuafafine

O se faataitaiga lona lua o le auala e avea ai le faatuatuaga faalelotu ma manuia o nuu ma aumaia ai le malamalama i le lalolagi, o le matafaioi lea a le tapuaiga faalelotu i le taulimaina o fanau uma a le Atua o ni uso ma ni tuafafine.

E toatele faalapotopotoga e faavae i le faatuatua i seneturi e lua talu ai, ua taulamua i le aapa atu ma laveai mai i latou na feagai ma tulaga e ogaoga le leaga aua sa latou talitonu na faia tagata uma i le faatusa o le Atua. 23 O William Wilberforce, o se tagata iloga o Peretania Tele, o se faataitaiga lelei tele lea. 24 “O Grace Ofoofogia”, le viiga ootia, ma le tifaga faagaeetia o le igoa lava lena, e pu’e mai ai le lagona i le popofou o le 1800, ma faamatala ai le tala o lana taumafaiga lototoa. O taumafaiga faifai pea a Wilberforce, o nisi ia o laasaga muamua i le tuuitiitia o lenei faiga mataga, pulefaamalosi, matautia, ma le piopio. I le avea ai o se vaega o lena taumafaiga, sa agai atu ai o ia faatasi ma isi taitai, e toe faatulaga le tulaga tauleleia lautele. Sa talitonu o ia o a’oga ma le malo e tatau lava ona faavae i tulaga tauleleia. 25 “O lana… vaaiga mamao i le faatamaoaigaina i tulaga tauleleia ma le faaleagaga o le mea lea sa ia soifua ai, pe o le puipuia o le faavae o le faaipoipoga, osofaia o faiga o fefaatauaiga o pologa po o le matua puipuia malosi o le aso Sapati.” 26 Faatasi ai ma le malosi tele, sa ia fesoasoani ai e faapotopoto ia taitai mo le tauleleia ma agafesootai o le atunuu i se tauiviga a le atunuu atoa e faasagatau atu ai i amio mataga. 27

I le popofou o le talafaasolopito o la tatou Ekalesia, o le toatele lava o o tatou tagata sa tetee i le nofopologa. 28 O se mafuaaga taua lenei, faatasi ai ma o tatou talitonuga faalelotu, o le matamataita ma le matautia o le au faatupu faalavelave sa latou aafia ai, lea na iu ai i le poloaiga na tuuina atu e Kovana Boggs i Misuri ina ia fasiotia. 29 I le 1833 na maua ai e Iosefa Samita se faaaliga sa faapea mai, “E le tatau i soo se tagata ona nofo pologa i se tasi tagata.” 30 O la tatou tautinoga i le saolotoga o tapuaiga ma le taulimaina o tagata uma o ni atalii ma ni afafine o le Atua, e totonugalemu i la tatou aoaoga faavae.

O ni faataitaiga nei se lua o mataupu faavae e faavae i tulaga faatauaina, e matua faamanuiaina ai tagata. E tele lava isi faataitaiga. E tatau ona tatou taufai galulue i tatou lava ma lagolagoina tagata tauleleia ma le amiosa’o e fesoasoani e toe atiina ae tulaga faatauaina o le amiomama o le a faamanuiaina ai le nuu atoa.

Se’i ou faamanino atu, e manaomia ona lagona leo uma e tagata lautele. Pe faalelotu pe faalelalolagi ia leo, e le tatau ona gugu. E le gata i lea, e le tatau ona tatou manatu faapea talu ai o nisi o o tatou manatu e afua mai i mataupu faavae faalelotu, ona otometi ai lea ona taliaina pe faatulaga muamua. Peitai, o loo manino foi o na manatu ma tulaga faatauaina e alagatatau ona toe iloiloina lo latou taua.

O le faavae moni o la tatou aoaoga faavae e mafai ona avea ma se tagavai o le malamalama i le lalolagi ma e mafai ona avea ma se ‘au soofaatasi mo le ola mama ma le faatuatua ia Iesu Keriso. E tatau ona tatou puipuia o tatou aiga ma ia taulamua faatasi ma tagata uma o faamoemoega lelei i le faia o mea uma e mafai ona tatou faia e faasaoina le malamalama, faamoemoe, ma le ola mama i o tatou nuu.

Afai tatou te ola ma folafola atu nei mataupu faavae, o le a tatou mulimuli ia Iesu Keriso o ia o le malamalama moni o le lalolagi. E mafai ona avea i tatou ma se ‘au mo le amiotonu i sauniuniga mo le Afio Mai Faalua o lo tatou Alii ma le Faaola, o Iesu Keriso. Ua tatou nofo faatalitali atu mo lena aso matagofie pe a “pepese loto ua saoloto pe a toe susulu le malamalama i le lalolagi atoa.” 31 I le suafa paia o Iesu Keriso, amene.

Show References

  1.  

    1. Tagai Richard Hough and Denis Richards, The Battle of Britain: The Greatest Air Battle of World War II (1989), 264.

  2.  

    2. Attributed to Sir Edward Grey. See “When the Lights Go On Again (All over the World),” wikipedia.org.

  3.  

    3. Tagai Mataupu Faavae ma Feagaiga 88:11–13. O le Malamalama o Keriso o le “malamalama lea o loo i mea uma, e faaola i mea uma, o le tulafono lea e pulea mea uma” (fuaiupu 13). Mo se malamalamaaga maua’i i le Malamalama o Keriso, ma le eseesega i le va o le Malamalama o Keriso ma le Agaga Paia, tagai Boyd K. Packer, “O Le Malamalama o Keriso,” Liahona, Apr. 2005, 8–14.

  4.  

    4.  Moronae 7:19

  5.  

    5. Tagai Jacques Barzun, From Dawn to Decadence: 500 Years of Western Cultural Life (2000), 798.

  6.  

    6.  Mataupu Faavae o le Faatuatua 1:13

  7.  

    7.  Mataio 5:16

  8.  

    8. Roger B. Porter, “Seek Ye First the Kingdom of God” (talk given at Cambridge University Ward, Cambridge Massachusetts Stake, Sept. 13, 2009).

  9.  

    9.  Mamona 6:17.

  10.  

    10.  Mamona 8:3.

  11.  

    11. Tagai John Micklethwait and Adrian Wooldridge, God Is Back: How the Global Revival of Faith Is Changing the World (2009).

  12.  

    12. Tagai Diana Butler Bass, “Peace, Love and Understanding” (review of God Is Back, by John Micklethwait and Adrian Wooldridge), Washington Post National Weekly Edition, Jul. 27–Aug. 2, 2009, 39.

  13.  

    13. Tagai David D. Kirkpatrick, “The Right Hand of the Fathers,” New York Times Magazine, Dec. 20, 2009, 27.

  14.  

    14. Tagai Kirkpatrick, “The Right Hand of the Fathers,” 27. Robert P. George teaches that either we have moral reason and free choice or we have amorality and determinism.

  15.  

    15.  Mataupu Faavae ma Feagaiga 84:46.

  16.  

    16.  Mataupu Faavae ma Feagaiga 84:48.

  17.  

    17. Boyd K. Packer, Liahona, Ape. 2005, 8.

  18.  

    18.  Mosaea 29:26–27.

  19.  

    19. Tagai Margaret Somerville, “Should Religion Influence Policy?” www.themarknews.com/articles/1535-should-religion-influence-policy.

  20.  

    20. Tagai Zhao Xiao, “Market Economies with Churches and Market Economies without Churches,” 2002, www.danwei.org/business/churches_and_the_market_econom.php. This Chinese government economist argues that a moral underpinning is necessary to prevent people from lying and injuring others.

  21.  

    21. “The Cotter’s Saturday Night,” in Poems by Robert Burns (1811), 191

  22.  

    22. Tagai Clayton M. Christensen, “The Importance of Asking the Right Questions” (commencement speech, Southern New Hampshire University, Manchester, N.H., May 16, 2009).

  23.  

    23. Tagai Kenese 1: 26.

  24.  

    24. Tagai William Hague, William Wilberforce: The Life of the Great Anti-Slave Trade Campaigner (2007), 352–56.

  25.  

    25. Tagai Hague, William Wilberforce, 104–5.

  26.  

    26. Hague, William Wilberforce, 513.

  27.  

    27. Tagai Hague, William Wilberforce, 107–8.

  28.  

    28. Tagai James B. Allen and Glen M. Leonard, The Story of the Latter-day Saints, 2nd ed. (1992), 93, 120, 202.

  29.  

    29. Tagai Leonard J. Arrington and Davis Bitton, The Mormon Experience: A History of the Latter-day Saints, 2nd ed. (1992), 48–51; see also Clyde A. Milner and others, The Oxford History of the American West (1994), 362: “Proslavery settlers and politicians persecuted them mercilessly.”

  30.  

    30.  Mataupu Faavae ma Feagaiga 101:79.

  31.  

    31. Laina faaiu o le pese, “When the Lights Go On Again All Over the World.”