Cakava na Ka Dodonu ena Gauna Donu, Kua ni Lokuyara

José L. Alonso

Ena Vitusagavulu


José L. Alonso
A solia vei keda … na iVakabula e dua na ivakaraitaki cecere me baleta na noda sega ni wawa ena kena soli na veivuke vei ira sa yali vei ira na yalo ni mamarau kei na reki.

Ena noda gauna e levu na tamata era bula tu ena loma ni rarawa kei na veilecayaki levu. Era sega ni kunea tiko na isau ni nodra taro ka ra sega ni sotava rawa na nodra gagadre. Eso sa yali vei ira na yalo ni mamarau kei na reki. Era sa tukuna na parofita ni marau dina e kune ga ena noda muria na ivakaraitaki kei na ivakavuvuli i Karisito. O koya na noda iVakabula, o Koya na noda ivakavuvuli, ka sai koya na ivakaraitaki uasivi.

Na Nona, e bula ni veiqaravi. Ni da qarava tiko na wekada, eda sa qaravi ira tiko era vakaleqai tu. Ni da vakayacora tiko vakakina eda rawa ni kunea na iwali ni noda dredre. Ni da vakatotomuria na iVakabula, eda vakaraitaka tiko kina na noda loloma vei Tamada Vakalomalagi kei na Luvena, o Jisu Karisito, ka da na yaco me vakataki Rau vakalevu cake.

A vosa na Tui o Penijamini me baleta na yaga ni veiqaravi, ka kaya ni “[da] sa qaravi Koya tiko na no[da] Kalou, ena no[da] qaravi ira tiko na weka[da].”1 E dui tu vei keda kece na madigi me da veiqaravi ka vakaraitaka na loloma.

Sa kerei keda o Peresitedi Thomas S. Monson me da lako “ki na veivueti” ka qaravi ira na tani. E kaya kina: “Eda na kila kina ni o ira eda qaravi ira tiko, ka ra sa vakila mai na noda cakacaka na tatara ni ligana na iVakavuvuli, era na sega ni vakamacalataka rawa na veisau sa yaco mai ena nodra bula. E tu na gagadre ni veiqaravi ena yalodina, na lako ena yalomalumalumu, ka bula vakalevu cake me vaka na iVakabula. Ni ra sa ciqoma na matadra vakayalo ka raica vakalailai na yalayala eso ni veigauna tawamudu, era vakavoqataka na nona vosa na tamata mataboko ka vakalesuya vua o Jisu na rai ni matana ka a kaya, ‘E dua na ka kau sa kila, niu a mataboko e liu, au sa qai rai rawa.’”2

Ena veisiga yadua e dau yaco mai na madigi me da veivuke ka veiqaravi—me caka na ka dodonu, ena gauna donu, kua ni lokuyara.Vakasamataki ira e vuqa na tamata ka ra a sotava na dredre ena nodra vaqara cakacaka se era tauvimate tu, se o ira era galili, se era nanuma ni sa yali na nodra ka kecega. Na veivuke cava o rawa ni cakava? Raitayaloyalotaka mada e dua na wekamu, ena tau bi ni uca sa ca tu nona motoka, ka qiriti iko mo vukei koya. Na cava na ka e dodonu mo cakava vua? Na gauna cava e dodonu mo cakava kina?

Au nanuma ena dua na gauna keitou lako kina vakamatavuvale ki na Siti o Mexico me voli eso na nodrau isulu na luvei keirau. Erau se gonelalai sara kina. E se qai yabaki rua toka ga na luvei keirau tagane qase, ka yabaki dua o koya na gone. A osodrigi na veigaunisala ena tamata. Ni keitou volivoli ka tuberi rau tiko na gone ena ligadrau, keitou a tu vakadua me keitou sarava e dua na ka, keirau sega ni kila ni sa yali na luvei keirau qase cake! Keirau sega ni kila se caka vakacava, ia sa sega ni tiko vata kei keitou. E sega tale na lokuyara na neirau cici yani ka vaqarai koya. Keirau vaqaqara ka kacivi koya, keirau vakila na vutugu ni yalo, ni keirau nanuma ni na yali vakadua mai vei keirau. Keirau vakatakekere vei Tamada Vakalomalagi ena neirau vakasama me vukei keirau me keirau raici koya.

Oti vakalailai keirau sa kunei koya. E sarava tu ena vakawelewele eso na iyaya ni vakatatalo ena dua na katubaleka ni sitoa. Keirau mokoti koya ka reguci koya, ka keirau yalataka ni keirau na dau vakaraici rau vagumatua na luvei keirau me keirau kakua tale ni vakayalia e dua vei rau ena dua na gauna. Keirau vulica kina, me rawa ni keirau vakabula na luvei keirau, keirau sega tale ni gadreva e dua na soqoni ni tuvatuvanaki. Keirau a cakacaka ga, keirau lako yani ka vakasaqara na dua sa yali. Keirau vulica talega ni a sega mada ga ni kila na luvei keirau ni sa lakosese voli.

Kemuni na taciqu kei na ganequ, era tu beka eso, ena vuku ni so na ka, era sa yali voli kina mai matada ka ra sega ni kila ni ra sa lakosese voli. Kevaka eda lokuyara, e rawa ni ra yali yani vakadua mai vei keda.

Vei ira na lewe vuqa era gadreva tu na noda veivuke, e sega ni gadrevi me da bulia vou eso na parokaramu se cakava na veika dredre ka isau levu. E gadrevi ga kina na noda tu vakarau me da veiqaravi—me da cakava na ka dodonu ena kena gauna donu, me kua na lokuyara.

Ena nona a rairai vei ira na tamata ena iVola i Momani na iVakabula, a solia vei keda o Koya e dua na ivakaraitaki cecere me baleta na noda sega ni wawa ena kena soli na veivuke vei ira sa yali vei ira na yalo ni mamarau kei na reki. Ni sa vakavulici ira na tamata, a raica ko Koya ni a sega ni rawa vei ira me ra kila kece na Nona vosa. A sureti ira ko Koya me ra lesu ki na nodra veivale ka laki vakasamataka vakatitobu na veika sa tukuna vei ira. A tukuna vei ira me ra masu vei Tamada ka vakarautaki ira me ra lesu tale mai ena mataka, ena lesu tale mai ko Koya me vakavulici ira.3

Ni tinia a rai yani vei ira na lewe vuqa ka raica ni ra sa tagi, ni ra sa gadreva vakalevu me tikoga vata kei ira.

“A sa kaya vei ira: Raica sa vuabale dina na noqu lomani kemudou.

“Sa tiko li eso na nomudou tauvimate? Dou kauti ira mai. Io, dou kauti ira mai na lokiloki, na mataboko, na gera, na mudu, na vukavuka, ko ira sa malai, ko ira na didivara kei ira kecega sa tauvimate tu? Dou kauti ira mai kau na vakabulai ira, niu sa lomani kemudou; io sa vuabale sara na noqu loloma.”4

Era sa kauta mai na nodra tauvimate ki Vua, ka sa vakabulai ira ko Koya. Era sa cuvaki sobu ki yavana na lewevuqa ka qaravi Koya ka reguca na yavana, “ka sa suasua na yavana ena wai ni matadra.” Sa qai vakaroti ira me ra kauti ira mai na nodra lalai, sa vakalaougatataki ira yadudua ko koya.5 Oqori na ivakarau sa solia vei keda na iVakabula. Na Nona loloma sa baleti keda kece, ia sa sega sara ni yali mai Matana e dua.

Au kila ni dau loloma, dau veitaqomaki, ka dauvosota na Tamada Vakalomalagi. Sa lomani keda vakakina na Luvena, o Jisu Karisito. Era sa dau vukei keda mai vei ira na Nodrau parofita. Au sa vulica ni da na taqomaki vakavinaka sara ena noda muri ira na parofita. Se toso tikoga na “na veivueti.” E kaya vaqo o Peresitedi Monson: “E namaka tu na Turaga na noda vakasama. E namaka tiko na noda ivalavala. E namaka tiko na noda cakacaka. E namaka tiko na noda ivakadinadina. E namaka tiko na noda yalodina.”6

E dua na noda itavi kei na dua na madigi cecere. E lewe vuqa era gadreva me ra vakila tale mada na kamica ni mamarau kei na reki ena nodra vakaitavi ena Lotu. Na mamarau oqori ena basika mai na noda ciqoma na veicakacaka vakalotu, noda cakava na veiyalayalati tabu, ka da rokova tiko. E gadrevi keda na Turaga me da vukei ira. Me da cakava na ka dodonu ena kena gauna donu, kua ni lokuyara.

Au vakadinadinataka ni bula tiko na Kalou ka Tamada. E bula tiko o Jisu Karisito ka sa solia na Nona bula me rawa kina ni da lesu tale ki na iserau ni Tamada Vakalomalagi. Au kila ni o Koya na noda iVakabula. Au kila ni Nodrau yalovinaka tawavakaiyalayala sa dau vakatakilai tiko e veigauna. Au vakadinadinataka ni o Peresitedi Thomas S. Monson na Nodrau parofita ka ni sai koya oqo na Lotu dina duadua ga ena dela i vuravura. Au kila ni Parofita o Josefa Simici na parofita ni Veivakalesui Mai. Au vakadinadinataka ni iVola i Momani na vosa ni Kalou. Sa dau tuberi keda ka vakatakilakilataka vei keda na sala me da muria me rawa ni da vaka na Kalou kei na Luvena Lomani. Au vakaraitaka oqo ena yaca ni noda Turaga ko Jisu Karisito, emeni.

Show References

  1.  

    1.  Mosaia 2:17.

  2.  

    2. Thomas S. Monson, “Ki na Veivueti,” Liaona, Julai 2001, 57, 58.

  3.  

    3. Raica na 3 Nifai 17:1–3.

  4.  

    4.  3 Nifai 17:6–7; raica talega na tikina e 5.

  5.  

    5. Raica na 3 Nifai 17:9–12, 21.

  6.  

    6. Thomas S. Monson, Liaona, Julai 2001, 58.