Sosot ne Pworacho Ngeni

Seni Preseten Henry B. Eyring

Awemon Chon Aninis non ewe Aewin Presetensi


Seni Preseten Henry B. Eyring
Ika mi wor ach nuku non Jises Kraist, ekkewe fansoun mi weires me ekkewe fansoun mi mecheres non manauch mi tongeni usun eu feioch.

Non eu kinikinin mwichenap ua rongorong Preseten Spencer W. Kimball nupwen a tingorei Kot an epwe ngeni weires ne pworacho ngeni. A apasa: “Mi wor weires mi napanap mi nom mwach, tufich mi watte ach sipwe apwonueta. Ua etiwa ena tufich me ua mochen apasa ngeni ewe Samon, non netip tekison, ‘Ngeniei ei chuuk,’ ngeniei ekkei osukosuk.”1

Ekkei kapas mi aururu netipei, pokiten ua sineiochu usun ekkoch osukosuk me sosot a fen weri. Ua mefi ai mochen ne winiti usun chok i, emon chon angangen Kot mi nukuchar. Ekisino chok mwirin, non eu pwin ua iotek faniten eu sosot ne pwari ai tipepochokun. Ua chechemeniochu. Ua fotopukutiw non rumwei we ren eu sokkun nuku a usun nge ita netipei epwe ureno ren.

Mwirin eu ika ru chok ran ai we iotek a ponu. Ua men mairu me tipetekison ren ai angei eu sosot mi weires seni meinisin mi fen toriei. A aitiei ru nesen. Aewin, a wor eu minen pwarata mi fatafatoch pwe Kot a rongorong o ponueni ai iotekin nuku. Nge oruan, ua poputa eu nesen mi sopweno tori ikenai ne kaeo pwata ua mefi ren nukunukoch non ena pwinin pwe eu watten feioch a tongeni feito seni sosot me awora niwinin mi murrino nap seni weiresin.

Ewe sosot a toriei non ena ran me nom a usun nge ita mi chok kukkun non ai awewe fengeni met a fis seni ena atun—ngeniei me ekkewe ua tongei. Iei chommong neimi oua weri osukosuken inis, ekiek, me memef iwe oua pupuchoreta usun chok emon chon angangen Kot mi nukuchar ngang mi sineiochu. Noun we chon tumunu a rongorong an puchoreta non meteketek chapur seni an we pet. “Pwata ei weires a fis ngeniei nupwen ua achocho ne fofforoch ren unusen manauei?”

Oua sinei ifa usun ewe Samon a ponueni ena kapaseis faniten ewe Soufos Joseph Smith nupwen a nom non kanapus:

Ewe Samon a ereni Joseph Smith ika pwe a katurenong non ewe pwang, are nepoun chon nii-manau, me ewe kopungun mano a tori i; ika pwe a katurenong nematau anonnon,; ika pwe nowatte ra pwennieno; ika pwe asepwan me monumon ra fiu ngeni; ika ekkewe nang mi kirocheno, me mettoch meinisin mi chufengen ne eppeti an fefetan; me nap seni meinisin, ika pwe ekkewe awen hell mi suk watte ne orumano, mi namwot epwe sinei pwe fisin ekkei mettoch epwe ngeni i an pochokun, me epwe fis pwe feiochun.

Ewe Samon a era pwe ewe Noun Aramas a fen weri osukosuk meinisin. Met, Joseph mi nap seni I?

Ewe Samon a era pwe epwe chok nikitu, iwe ewe pristut epwe nonnom ren; pwe aukukur mi fat, rese tongeni wesino. Nangatamen manauen Joseph mi fen fatetiw, iwe esap mano me mwen a tori fansoun; ete niweiti met aramas ra tongeni fori, pwe Kot epwe nom ren feinfeino chok.2 (nengeni D&C 122:7–9)

Me rei ese wor ponuen ewe kapaseis usun pwata sia weri osukosuk me met sipwe fori nap seni pwisin anon ewe Samon, ewe a weri osukosuk fanasengesich mi weires nap seni sia tongeni weweiti.

Oua chechemeni Anon nupwen A pesei kich ach sipwe, aier, seni ach nuku non I:

Ewe Chon Amanau a annuku kich ach sipwe aier pwe ete wichi kich ren ewe wokun Awan seni an song me an ningeringer, me ach riaffou epwe meteketek chapur—ifa watten metekin sise sinei, ifa watte riaffoun sise sinei, ifa weiresin ne mwarei sise pwan sinei.

Ewe Chon Amanau a era pwe a riaffouni ekkei mettoch faniten aramas meinsin pwe ete namwot repwe riaffou ika pwe repwe aier.

Ewe Chon Amanau a era pwe ika aramas rese aier mi namwot repwe riaffou usun chok I.

Ina mo pwe I Kot, ewe emon mi, napanap nein meinisin, an riaffou a fori pwe a chechech ren ewe metek, cha a surutiw ekkis meinisin seni inisin, me a men riaffou non inis me ngun. Ewe metek a fakkun napanap iwe a tingor an epwe ngase seni ika pwe mi tufich;

Nge ina mo, a chok eningano ewe Sam. A pwinitanong won inisin ewe riaffou, me a awesano an angang fanasengesich(nengeni D&C 19:15–19).3

Mi wor ach nuku pwe ewe anen ach sipwe pworacho ngeni sosot ena pwe sipwe nuku pwe mi wor “safei non Gilead”4 me ewe Samon a pwon, “Usap tongeni … nikitukeno.” 5 Ena met Preseten Thomas S. Monson a aiti kich ne anisi kich me ekkewe sia angang ngeni non sosot a usun nge ita sise tongeni pworacho ngeni.6

Nge Preseten Monson a pwan mirit ne aiti kich pwe fansoun mi namwot ne forata eu nongonongen nuku non ekkana pwon. Meni oua kuna namwotan ena nongonong, ussi chok, nepekin emon a monnota ne fangeta non ewe fiu ne nikitu tori nesoponon. Ika pwe ewe nongonongen nuku ese nom non netipach, ewe pochokun ne nikitu epwe taropwaseno.

Popunapen ai afanafan ikenai ena ne awewe met ua sinei won ifa usun sia tongeni forata eu nongonong mi nukuchar. Ua fori non ennetin netip tekison ren ru popun. Aewin, meni met ua apasa epwe apwangapwanga ekkoch ir mi osukosuk ren watten sosot me ra mefi pwe ar nongonongen nuku a poputa ne taropwas fesen. Oruan, ua sinei pwe sosot mi fakkun napanap mi chuen nom mwei. Iwe, ewe aurour ua atora ngeni kemi ese mo pwarano pungochun non pwisin manauei ren ai nikitu tori nesoponon.

Nupwen ngang emon anuon ua angang ren emon a wisen fori nongonongen imw minafo. Non fansoun pwichikar a men weires ne ammonata ewe puun pwe aupwe ninanong ewe siment ren ewe nongonong. Ese wor masin. Aua chok aea efoch turupwas me efoch sofon. Foratan nongonongen iwm mi pochokun a men weires non ekkana ran.

A pwan anamwota tipepos. Mwirin aua ninanong simentin ewe nongonong aua witiwit an epwe pwaseno. Ina mo aua mochen muttir ne angang, aua chok witiwit ne uwau ekkewe pisekin apochokun tori a pwas ewe nongonong.

Non ai poputa ei angang ua pwan mwar ren weiresin me tipetipengawen ewe angangen wanong wokun mecha me non ekkewe pisekin apochokun me mwen aua ninanong ewe siment pwe ewe nongonong epwe pochokun newesinon.

Non eu napanap mi wewe fengen, mi namwot sipwe ammonataochu ewe pun ren ach nongonongen nuku pwe epwe pochokun ngeni ekkewe monumon epwe tori kich meinisin. Pwisin wenechar ena ewe popunapen eu nongonongen nuku.

Seni ach fini mi pung iteiten fansoun mi wor met sipwe finata epwe apochokuna ewe pun mi nom fan ach nuku. A tongeni poputa nekukunuch pokiten kich meinisin sia uputiw ren niffangen ewe Ngunun Kraist. Ren ena Ngun sia tongeni sinei nupwen sia fori mi pung mwen mesen Kot me nupwen sia fori mi mwan fan mesan.

Minne sia finata, fan fitupuku iteiten ran, epwe awora sonosonochun ewe imwen nuku sia kouta won. Ewe kapas allimen Jises Kraist, fitifengen ren meinisin ekkwe pwon, efeioch, me nongonong ra usun chok ewe pisekin apochokun minen mecha minne sia ninanong ach nuku non.

Eu kien nuku mi nikitu ena ach sipwe pungoch non ach anafochu ewe fansoun mi namwot pwe epwe pochokuneno. Ena popun ua tipwaroch nupwen ua iotek faniten chuuk mi tekia me sosot mi napanap nupwen ua chok kukkun.

Apochokunen nuku ese pwisin feito ren fetanin fansoun, nge fansoun mi ennetin namwot. Ach watteno ese pwan pwisin apochokuna nuku. Ach angang ngeni Kot me aramas ren unusen netipach me ngunuch epwe ekkisiwini ach kapasen pwaratan ennet ngeni pochokunen ngun mi nukuchar.

Iei, ua mochen apochokuna ekkewe ir ra nom nein sosot mi weires, ekkewe ra mefi pwe ar nuku mi apwangapwangeno fan choun me weiresin osukosuk. Sosot a tongeni winiti ewe anen om kopwe apochokuna me anukuchara om nuku. Moroni, noun Mormon non ewe Puken Mormon, a ereni kich ifa usun ena feioch a tongeni feito. A aiti ochun ewe ennet pwe ach anganga ekis chok nuku a mut ngeni Kot an epwe amarita ach nuku.

Moroni a aiti kich pwe nuku a wewe ngeni ekkewe mettoch sia epinukunuku nge sise tongeni kuna; iwe, sisap ngunungun pokiten sise kuna, pwe sisap angei eu minen pwarata tori fansoun mwirin ach nuku mi sosot.

A era pwe me ren nuku Kraist a pwari inisin ngeni semer kewe, mwirin a manaueta seni mano; iwe ese pwari inisin ngenir tori ewe fansoun mwirin ra nuku non I; Iei minne, sia kuna pwe ekkoch ra nuku non I, pwe ese pwari inisin ngeni chon fonufan.

Nge pokiten ewe nukun aramas A pwari inisin ngeni ewe fonufan, me a eningano iten ewe Sam, me a ammonata eu an pwe aramas repwe pwan angei ewe niffangen nang pwe repwe epinukunuku ekkewe mettoch rese mo kuna.

Iei minne, sia pwan tongeni epinukunuk, pwe sipwe chon angei ewe niffang, ika pwe sipwe chok nuku7 (nengeni Ether 12:6–9).

Ena foun pwukun nuku mi kon auchea minne kopwe tumunuochu me aeaochu non menni chok napanap ka tongeni ena nuku non ewe Samon Jises Kraist. Moroni a aiti usun ewe manamanen nuku seni an apasa pwe ese wor fansoun nupwen aramas ra fori manaman tori ewe fansoun mwirin ra nuku; iei minne ra achifoua non ewe Noun Kot me akkom.8 (nengeni Ether 12:18)

Ua poporaus fengen ren emon fefin a angei ewe manamanen pochokun ne nikitu ngeni watten riaffou pokiten an tufich ne apasa fan chommong ekkewe kapas “Ua sinei pwe ai Chon Angasano a manau.”9 Ena nuku me ekkana kapasen pwarata ra chuen nom nupwen ekkewe achechemen weiresin nekukunun ra ekis fatingaw nge rese unusen morono.

Ua men mairu ne kaeo pwe pwan emon fefin a omusano emon a fofforungaw ngeni fan chommong ier. Ua mairu me ua eisini pwata a finata ne omusano me monnukano chommong ierin fofforungaw.

A mosonoson ne era, “A men weires nap seni mettoch meinisin ua fen fori, Nge ua chok sinei pwe mi namwot upwe fori. Iwe ua chok fori.” An nuku pwe ewe Chon Amanau epwe omusano tipisin ika pwe a omusano tipisin ekkoch a awora ngeni eu memefin kinamwe me epinukunuk nupwen a fetan ngeni an mano fitu maram chok mwirin a omusano ewe chon u ngeni i.

A eisiniei, “Nupwen ua feino nang, epwe ifa usun?”

Iwe ua era, “Ua sinei seni met ua kuna usun om pochokun ne anganga nuku me omusano pwe epwe eu fansoun mi fokkun amwarar fan itom.”

Mi wor pwan eu ai kapasen apochokun ngeni ekkewe ra anchangei ika ar nuku non Jises Kraist epwe nafoch pwe repwe nikituoch tori nesoponon. Ekkoch neimi oua ausening iei, ua feioch ne sinei kemi nupwen a kukkun ieremi, watte pochokunen inisimi, me oua nipwakoch nap seni chommong chienemi, nge oua chok finata ne fori met ewe Chon Amanau epwe fen fori. Seni chommongun feiochumi oua kuna tufich ne anisi me tumunu ekkewe oupwe fen tongeni amonugnawa are esita seni ochun manauemi.

Nupwen sosot mi weires ra feito, ewe nuku ne nikituoch epwe chok nonnom, pokiten a kouta seni om anganga ewe tongen Kraist, ren om angang me omusomus usun chok ewe Chon Amanau epwe fen fori. Ka kouta eu nongonongen nuku seni om tong usun chok ewe Chon Amanau me seni om angang fan itan. Om nuku non I a emwen ngeni fofforun tong ennet minne repwe chuen awora om epinukunuk.

Ese tori fansoun kese chuen tongeni apochokununo eu nongonongen nuku. Epwe chok wor fansoun. Ren nuku non ewe Chon Amanau, ka tongeni aier me titingor an omusomus. Mi wor emon a tongeni omusukeno. Mi wor emon ka tongeni kinisou ngeni. Mi wor emon ka tongeni angang ngeni. Ka tongeni fori ia chok ka nonnom ia ese nifinifin ika ka mefi akkanamon.

Use tongeni pwon pwe om weires epwe wesino non ei manau. Use tongeni pwon pwe om sosot epwe mefi usun nge ita fansoun mochomoch chok. Ekkewe sosoten ei manau ra fori pwe a usun chok nge ita fansoun a mangeno chippu epwe fen unusen kouno.

Mi wor popun ekkei sosot. Ese awora watten ach kinamwe, nge a tongeni awora ngonuk eu memefin tipepos. Ekkena popun ra feito seni eu chok mettoch: non Ar tong mi unusoch fanitom, Semach won Nang me ewe Chon Amanau ra mochen kopwe monnota ne nom Rer me chon om famini feinfeino chok. Ekkewe ir chok ra unusen nimenimoch ren ewe Achasefanin Jises Kraist ra tongeni nom ikkewe ia.

Inei we a fiu ngeni semwenin cancer ren ukukun 10 ier. Safei, angangen reirei, me namwotan an epwe chok kokon won pet mi chok fitu nein an kewe sosot.

Ua chechemeni anon semei we nupwen a katon an weires ne ngasengas, “Emon kukkun nengin a niwiniti nenian we ne asoso.”

Emon chon afanafan non an we mi-ma ena tettenin mongean me chienan we Preseten Spencer W. Kimball. Me nein an kapasen ingeiti, ua chechemeni ekkei kapas: “Meni ekkoch neimi oua ekiek pwe Mildred a riaffou watte me nangatam pokiten och mettoch a fori mi mwan mi anamwota ekkewe sosot.” Mwirin a apasa, “Apii, a fis pokiten Kot a chok mochen enimenimochu pwan ekkis.” Ua chechemeni ai ekieki non ena fansoun, “Ika pwe ena fefin mi fokkun wenechar a namwot an epwe pwan ekkis nimoch, met a nom mwei?”

Ika mi wor ach nuku non Jises Kraist, ekkewe fansoun weires pwan ekkewe fanoun mecheres mi tongeni fis pwe feiochuch. Non nonnomun meinisin, sia tongeni fini mi pung ren emwenin ewe Ngun mi Fel. Ewe kapas allimen Jises Kraist a nom rech ne emweni kich ika pwe sipwe fini. Iwe ren ekkewe soufos ir mi pwarata ngeni kich neniach non ewe kokkotun manau ese much sia tongeni manau ren epinukunuk allim me eu memefin kinamwe. Ese wor namwotan ach sipwe mefi pwe sia akkanamon non angangen ewe Samon pokiten esap iei usun. Sia tongeni mefi ewe tongen Kot. Ewe Chon Amanau a pwon pwe epwe wor chon nang nepekich me ruefoch ne apochokuna kich.10 Iwe I mi kapas wenechar fansoun meinisin.

Ua pwarata pwe Kot ewe Sam a manau me Noun we Achengicheng i ach Chon Amanau. Ewe Ngun mi Fel a fen apungano ennet non ei mwichenap me epwe for sefan nupwen oua kutta, nupwen oua ausening, me nupwen oua kaeo ekkewe poraus seni ekkewe chon angangen ewe Samon ra nom ikkei. Preseten Thomas S. Monson i ewe soufosun Kot ngeni unusen fonufan. Ewe Samon mi tumunuk. Kot ewe Sam mi manau. Noun we Achengicheng, Jises Kraist, I ach Chon Angasano. An tong ese much. Ua pwarata non iten Jises Kraist, amen.

Show References

  1.  

    1. Spencer W. Kimball, “Give Me This Mountain,” Ensign,Nov. 1979, 79.

  2.  

    2. Nengeni Doctrine and Covenants 122:7–9.

  3.  

    3. Nengeni Doctrine and Covenants 19:15–19.

  4.  

    4.  Jeremiah 8:22.

  5.  

    5.  Joshua 1:5.

  6.  

    6. Nengeni Thomas S. Monson, “Look to God and Live,” Ensign, May 1998, 52–54.

  7.  

    7. Nengeni Ether 12:6–9.

  8.  

    8. Nengeni Ether 12:18.

  9.  

    9. “I Know That My Redeemer Lives,” Kon Fel, nampa  136.

  10.  

    10. Nengeni Doctrine and Covenants 84:88.