Aiti Nouch Semirit ne Weweiti

Seni Cheryl A. Esplin

Oruemon Chon Aninisin ewe Presetensin Kinter Unusan


Seni Cheryl A. Esplin
Aiti nouch kewe ne weweiti mi nap seni ach sipwe chok awora ar tipachem. Mi namwot sipwe anisir pwe ekkewe nongonong repwe tonong non netiper.

Nupwen a fetan fansoun, chommong mettoch ua chechemeni seni manauei mi kukunutiw, nge och mettoch ua chechemeni mi chuen fat ena uputiwen nei kewe meinisin. A usun nang mi kan ngeniei, me ika ua achocho, ua tongeni mefi ekkana memefin mosonoson me amwarar ua mefi iteiten fansoun ua komoch ekkewe monukan.

Nouch “semirit ew niffang seni ewe Samon” (Konupin 127:3). A sinei me tongei emon me emon ren tong mi unusuch (nengeni Moroni 8:17). Semach won Nang a ngeni kich eu wis mi pin ne fiti I ne anisi Noun kewe ngun mi unusun auchea ne winiti met A sinei ra tongeni winiti.

Ei tufich mi unusun auchea ne amarita nouch kewe mi eu wis mi watte seni met sia tongeni fori anaemon chok nukun aninisin ewe Samon. A sinei met mi namwot pwe nouch kewe repwe sinei, met mi namwot repwe fori, me met mi namwot repwe winiti ne niwin ngeni fan mesan. A ngeni in me sam kapasen emwen me aurour me ren ekkewe pukfel, Noun soufos, me ewe Ngun mi Fel.

Non pwarata non ei fansoun soponon seni ewe Soufos Joseph Smith, ewe Samon a aiti sam me in ne aiti nour semirit ne weweiti ekkewe nongonongen aier, nuku non Kraist, papatais, me ewe niffangen ewe Ngun mi Fel. Nengeni pwe ewe Samon ese chok era pwe sipwe aiti ekkewe nongonong; A annuku pwe sipwe aiti nouch semirit ne weweiti ekkewe nongonong.(nengeni D&C 68:25, 28; esisin mi kapachenong.)

Non Konupin sia anneani, “Kopwe awewei ngeni ei om we annuk, pwe upwe anneasosichi. Upwe apwonueta seni unusen netipei” (Konupin 119:34).

Ach aiti nouch kewe semirit ne weweiti mi nap seni ach chok ngeni ir mirit. A pwan wewen pwe sipwe aiti nouch kewe semirit ne anomu ekkewe nongonong non netiper pwe a winiti nikinikiner me pwe epwe pwa non napanaper me ar foffor non unusen manauer.

Nifai a aiti pwe wisin ewe Ngun mi Fel ne atononga ewe ennet “non netipen aramas meinisin” (2 Nifai 33:1).Wisach sam me in pwe sipwe fori mettoch meinisin ne awora eu neni pwe nouch kewe repwe tongeni mefi arurun ewe Ngun mi Fel me mwirin sipwe anisir ne esinna met ra mefi.

Ua chechemini nupwen ua angei eu koko fitu ier ano seni emon noum nengin Michelle. A era, “Mama, eu mettoch mi amwarar mi chok fis ren Ashley.” Ashley i noun nei we nengin a chok nimu ierin non ena fansoun. Michelle a era pwe non ewe nessesor Ashley me Andrew emon mi unungat ierin ra chok anini fengen—emon ese mochen aea fengen ar pisekin urumot me ewe emon a afounu ewe emon. Mwirin a awesano ar osukosuk, Michelle a no cheki ewe monukan.

Mwirin ekkis fansoun, Ashley a sanong, a song pun Andrew ese mochen aea fengen ekkewe pisek. Michelle a achema ngeni Ashley usun ewe pwon ra fori non pwinin famini pwe repwe kirokiroch ngeni emon me emon.

A kapas eis ngeni Ashley ika a mochen iotek me tingor aninis seni Semach won Nang, nge Ashley, a chuen song a era, “Ap.” Nupwen a eisini ika a nuku pwe Semach won Nang mi tongeni ponueni an iotek, Ashley a era ese sinei. Inan we a tingor ngeni i pwe epwe sotuni me a komoch poun me ra fotupukutiw.

Michelle a ereni Ashley pwe Semach won Nang a tongeni anisi Andrew ne aea fengen pisekir—me anisi i pwe epwe kirokiroch. An ekieki pwe Semach won Nang a tongeni anisi mongean ne aea fengen pisekir a apwapwaiti Ashley, me a poputa ne iotek, akkom a tingor pwe Semach won Nang epwe anisi Andrew ne aea fengen pisekir. Nupwen a tingor ne anisi i pwe epwe kirokiroch, a poputa ne kechiw. Ashley a osupwano an iotek me konutiw mokuran won afarn inan. Michelle a komoch ewe nengin me eis pwata a kechiw. Ashley a era ese sinei.

Inan a era, “Ua ekikeki pwe ua sinei pwata ka kechiw. Ka mefi pwapwa non netipom?” Ashley a chimwachimw me inan a sopweno, “Ena ewe Ngun mi Fel a anisuk ne mefi ina usun. Ina usun Semach won Nang a pwa ngonuk pwe A tongek me epwe anisuk.”

A kapas eis ngeni Ashley ika a nuku met a era, ika a nuku pwe Semach won Nang a tongeni anisi i. A kechiw, me Ashley a era pwe a nuku.

Fan ekkoch ewe napanap mi pochokun ne aiti nouch kewe ne weweiti ekkewe nongnong ena pwe sipwe aitir ren met mi fis non ena chok fansoun. Ekkei fansoun mi chok fis rese kokot me ra chok fis non mokutokuten manauen ach famini. Ra muttir ne feito me feino, ena popun mi namwot pwe sipwe moneta me esinna ekkewe tufichin aiti nouch kewe nupwen ra feito ngeni kich ren kapas eis ika osukosuk, nupwen rese kinamwe ren pwiir me fefiner ika chiener kewe, nupwen mi namwot repwe amuchu ar song, nupwen ra mwanino, ika nupwen repwe finata mettoch. (Nengeni Teaching, No Greater Call: A Resource Guide for Gospel Teaching [1999], 140–41; Marriage and Family Relations Instructor’s Manual [2000], 61.)

Ika sia monata me sipwe mut ngeni ewe Ngun mi Fel ne emweni kich non ekkei fansoun, nouch kewe repwe weswesen kaeo me weweiti.

Mi pwan nonno auchean ekkewe tufichin aiti nouch kewe ra feito nupwen sia akota mokutokuten famini usun iotekin famini, anneani pukfel ren famini, pwinin famini, me pwan ekkoch mokutokuten famini.

Iteiten tufichin aiti nouch kewe ar repwe kaeo me weweiti a fisioch ika mi fis non eu neni mi kinamwe me uren tong ian ewe Ngun mi Fel mi tongeni nom ia.

Ru maram me mwen noun kewe ra winiti wanu ier, emon sam a otota och fansoun iteiten wik ne anisir ne ammonata ngeni ar papatais. Noun nengin a era pwe nupwen a tori an fansoun, a ngeni i eu puken mak me ra momot fengen, ir chok, me ra poraus usun mefier usun ekkewe nongonongen ewe kapas allim. Ewe sam a ereni ewe nengin ne chungani met ra poraus usun. A chungani ewe manau mwen uputiw, ei fonufan, me ekkewe mettoch epwe fori pwe epwe tongeni manau ren Semach won Nang. Ewe sam a apasa an kapasen pwarata usun iteiten kinikinen ewe kokkotun manau ese much nupwen a aiti noun we.

Nupwen noun we nengin a ekieki usun met a fis nupwen a watte, a era, “Usap monukano ekkewe memefin tong ua mefi seni semei nupwen a chufengen rei. … Ua nuku pwe met a fis ena popun mi wor ai kapasen pwarata usun ewe kapas allim nupwen ua papatais.” (Nengeni Teaching, No Greater Call, 129.)

Ach aiti pwe emon epwe weweiti mi anamwota ach akachocho me nikitu. Mi anamwota ach aiti ekkewe nongonong me ren awewe me ach anisi nouch kewe ne manaueni met ra kaeo.

Preseten Harold B. Lee a aiti, “Ika ese wor ewe tufich ne kuna angangen eu nongonongen ewe kapasen allim non manauom, a anapano weiresin om kopwe nuku non ena nongonong” (Teachings of Presidents of the Church: Harold B. Lee [2000], 121).

Ua akkaewin kaeo ne iotek ren ai fotupukutiw ren ai famini non am iotekin famini. Ua kaeo ekkewe kapasen iotek nupwen ua ausening ngeni semei me inei nupwen ra iotek me ar anisiei ne itoek. Ua kaeo pwe ua tongeni kapas ngeni Semach won Nang me kutta emwen.

Iteitien nesesor, inei me semei ra ioni fengeni kich unukun ewe chepen me mwen mongon nesesor, me aua fotupukutiw me iotek fengen. Aua iotek iteiten fansounen monga. Nepwin me mwen aupwe annut, aua fotupukutiw non eu rumwen imwem me osupwano ewe ran ren iotekin famini.

Ina mo pwe ese chommong met ua weweiti usun iotek nekukuni, a winiti eu kinikinen manuaei mi chok nom rei. Ua chuen sopweno ne kaeo, me ai weweiti usun ewe manamanen iotek a sopweno ne mamarita.

Elter Jeffrey R. Holland a era, “Kich meinisin mi weweiti pwe fisiochun porausen ewe kapas allim mi anongonong won akkom aramas repwe kaeo me mwirin repwe weweiti me mwirin repwe manaueni pwe repwe kuna apwonuetan ekkewe pwonen pwapwa me manau ese much” (Teaching and Learning in the Church” [worldwide leadership training meeting, Feb. 10, 2007], Liahona, June 2007, 57; Ensign,June 2007, 89).

Ach kaeo ne weweiti ekkewe nononognen ewe kapas allim mi fis unusen manauach me a feito efou me efou mesen mak, eu me eu tettenin kapas, o ekis me ekis. (2 Nifai 28:30). Nupwen semirit mi kaeo me fori met ra kaeo, ar weweiti a fefeita, me a efisi pwan och kaeo, pwan och foffor, me a awatteno me apochokunata ar weweiti.

Sia tongeni sinei pwe nouch kewe ra poputa ne weweiti ekkewe nongonong nupwen sia kuna pwe a pwa non napanaper me ar foffor nupwen sise achimwer me ese wor niwinir. Nupwen nouch kewe mi kaeo ne weweiti ekkewe nongonongen ewe kapas allim, ra anongonong won pwisin ir. Ra winiti ponuen ekkewe osukosuken ach kewe fanimi me ra efisi kinamwe non imwach me feiochun ach kewe famini.

Sipwe aiti nouch kewe ne weweiti nupwen sia aea iteiten tufichin aiti, anenia ewe Ngun mi Fel, fori met sia afanafan usun, me anisir ne manaueni met ra kaeo.

Nupwen sia nenong non mesan emon monukan, sia chechemeni ewe kon:

Ngang emon noun Kot,
O ngang use mirit;
Aitiei wewen anon Kot
Pwe upwe mirit ren.
Emweniei, ewinaiei, o fitiei,
Anisiei kutta ewe an.
Aitiei mettoch meinisin mi pung
Pwe upwe nom reom eu ran.
(“Ngang Emon Noun Kot,” Kon mi Fel, nampa.  57; a kapachenong essisin)

Amo sipwe fori ina usun. Fan iten Jises Kraist, amen.