Doktrin blong Kraes

I Kam long Elda D. Tod Kristofeson

Blong Kworom blong Olgeta Twelef Aposol


I Kam long Elda D. Tod Kristofeson
Insaed long Jos tedei, semmak olsem bifo, blong talemaot doktrin blong Kraes o blong stretem ol defren wei blong doktrin, i wan poen blong tabu revelesen we i go long olgeta we Lod i givim raet blong aposol long olgeta.

Bigfala tangkyu mo lav blong yumi i go long Sista Bek, Sista Olred, mo Sista Tomson, mo Rilif Sosaeti bod.

Yumi bin luk, long ol manis we i jes pas, wan bigfala intres long ol bilif blong Jos blong Jisas Kraes blong Ol Lata-dei Sent. Hemia i wan samting we yumi glad long hem, from se, stamba wok blong yumi, i blong tijim gospel blong Jisas Kraes, doktrin blong Hem, long ful wol (luk long Matiu 28:19–20; D&C 112:28). Be mifala i mas talem se i bin gat, mo i gat yet, sam tingting we oli no andastanem doktrin blong yumi mo olsem wanem nao hem i kam blong stanap. Hemia topik we mi wantem tokbaot tedei.

Sevya i bin tijim doktrin blong Hem long medel blong ol taem mo ol Aposol blong Hem oli bin traehad bigwan blong holemtaet doktrin ia agensem wan atak blong ol giaman kastom mo wei blong tingting. Ol leta blong Niu Testeman oli tokbaot plante samting we i bin hapen, we i soemaot se i bin gat wan bigbigfala apostasi i stap kam antap finis long taem blong ministri blong ol Aposol.1

Ol yia afta, oli kasem sam laet blong gospel nomo kasem long namba 19 senturi, wan gudfala dei blong Restoresen i bin hapen long wol, mo gospel blong Kraes, we i fulwan mo i komplit, i bin stap bakegen long wol. Dei blong glori ia i stat, taem we insaed long wan laet we i stap antap i kam daon, we i saen i bitim laet blong san, (Joseph Smith—History 1:16), God Papa mo Pikinini blong Hem we Hem i lavem tumas, Jisas Kraes, i bin visitim yangfala Josef Smit mo i bin mekem hem i rere long wanem bae i kam olsem ol bigfala revelesen we oli go wetem tabu paoa mo atoriti.

Long ol revelesen ia, yumi faenem wanem yumi talem se i stamba doktrin blong Jos blong Jisas Kraes we i kambak bakegen long wol. Jisas Hemwan, i bin talem mining blong doktrin ia long ol toktok we oli stap long Buk blong Momon: Wan Nara Testeman blong Jisas Kraes:

“Hemia i doktrin blong mi, mo hem i doktrin we Papa i bin givim long mi; mo mi talemaot Papa, mo Papa i talemaot mi, mo Tabu Spirit i talemaot Papa mo mi; mo mi talemaot se Papa i givim oda long evri man, long evri ples, blong sakem sin mo biliv long mi.

“Mo olgeta we i biliv long mi, mo i kasem baptaes, semfala man ia bae i sev; mo oli olgeta we bae oli kasem kingdom blong God.

“Mo olgeta we i no biliv long mi, mo i no kasem baptaes, bae i kasem panis.

“… Mo olgeta we i biliv long mi hem i biliv long Papa tu; mo long hem bae Papa i talemaot mi, from bae hem i visitim hem wetem faea mo wetem Tabu Spirit.  …

“I tru, i tru, mi talem long yufala, se hemia i doktrin blong mi, mo eni man we i bildimap long hemia, hem i bildimap long ston blong mi, mo ol get blong hel i no save winim agensem hem.” (3 Nifae 11:32–35, 39).

Hemia nao mesej blong mifala, ston we yumi stanap long hem, fandesen blong evri nara samting insaed long Jos. Olsem evri samting we i kam long God, doktrin ia i klin, i klia, i isi blong andastanem—iven blong wan pikinini. Wetem glad hat, mifala i invaetem evriwan blong kasem mesej ia.

Insaed long Jos blong Jisas Kraes blong Ol Lata-dei Sent, “yumi biliv long evri samting we God i bin talemaot, mo i stap talemaot naoia, mo yumi biliv se bae Hem i talemaot yet ol plante bigfala mo impoten samting long saed blong Kingdom blong God” (Ol Toktok blong Bilif 1:9). Hemia i blong talem se nomata i gat fulap samting we yumi no save yet, ol trutok mo doktrin we yumi bin kasem oli bin kam mo bae oli gohed blong kam tru long tabu revelesen. Long sam bilif, ol man blong stadi relijin oli talem se oli gat semmak raet wetem lidasip blong relijin, mo ol poen blong doktrin oli save kam wan poen blong kompetisen bitwin olgeta. Sam oli dipen long ol wol kaonsel blong Taem Bifo mo ol tijing blong olgeta. Sam narawan oli folem tingting blong ol man we oli kam afta long ol aposol, o ol stadi blong Baebol o intepretesen blong Baebol mo blong faenem rong blong ol narawan. Yumi tu, yumi welkamem stadi we i mekem man i gat save, be insaed long Jos tedei, semmak olsem long blong Jos bifo, blong talemaot doktrin blong Kraes o blong stretem ol defren wei blong doktrin, i wan poen blong tabu revelesen we i go long olgeta we Lod i givim raet blong aposol long olgeta.2

Long 1954, Presiden J. Ruben Klak Junia, we i bin kaonsela long Fas Presidensi, i bin eksplenem olsem wanem nao Jos i kam blong save doktrin, mo bigfala wok blong Presiden blong Jos. Taem hem i bin stap tokbaot ol memba blong Fas Presidensi mo Kworom blong Olgeta Twelef Aposol hem i talem: “Yumi mas save se sam long ol Jeneral Atoriti oli kasem wan spesel koling; oli gat wan spesel presen; oli sastenem olgeta olsem ol profet, sia mo reveleta, we i mekem se oli kasem wan spesel presen we i go wetem wok blong tijim ol pipol. Oli gat raet, paoa, mo atoriti blong talemaot maen mo tingting blong God long ol pipol blong Hem mo oli stap anda long ful paoa mo atoriti blong Presiden blong Jos. Ol nara Jeneral Atoriti, oli no kasem spesel endaomen mo atoriti ia long saed blong spirit blong oli tij; oli gat limit, mo limit ia i stap long paoa mo raet blong olgeta blong tij mo i semmak long evri nara ofisa mo memba blong Jos, from we i no gat wan i kasem presen blong spirit olsem wan profet, sia, mo reveleta. Moa long hemia, olsem we mi talem finis, Presiden blong Jos i gat wan moa mo spesel presen blong spirit long saed ia, from we hem i Profet, Sia mo Reveleta ia blong ful Jos.”3

Olsem wanem nao Sevya i stap talemaot tingting mo doktrin blong Hem long ol profet, sia mo reveleta? Hem i pas tru long ol mesenja o Hemwan nomo. Hem i save toktok wetem voes blong Hemwan, o tru long voes blong Tabu Spirit— wan komunikesen blong Spirit blong God i go long spirit blong yumi, we i save talemaot long toktok o filing we i mekem man i andastanem samting bitim we toktok i save talem. (luk long 1 Nifae 17:45; D&C 9:8). Hem i save toktok long wanwan long ol wokman blong Hem o long wan kaonsel blong ol wokman (luk long 3 Nifae 27:1–8).

Bae mi talemaot tu eksampol we i stap long Niu Testeman. Faswan, i wan revelesen we i go long hed blong Jos. Long ol fas pat long buk blong Ol Wok, yumi faenem se ol Aposol blong Kraes oli bin stap talemaot mesej blong gospel nomo long ol man Jiu, folem paten blong ministri blong Jisas (luk long Matiu 15:24), be naoia, long taemtebol blong Lod, taem i kam blong jenis i hapen., Long Jopa, Pita i bin gat wan drim we long drim ia, Hem i bin luk ol defren animol we oli slakem i kamdaon long heven insaed long “wan bigfala tapolen, we oli holem ol fo kona blong hem,” (Ol Wok 10:11) mo i kasem komanmen blong “kilimded mo kaekae” (Ol Wok 10:13) ol animol ia. Pita i no bin wantem from se sam long ol animol ia oli no klin o no oraet folem loa blong Moses, mo Pita i neva brekem komanmen blong no kakae ol samting ia. Be, voes long drim blong Pita i se: “Samting we mi God mi talem finis se i klin, yu no save talem se i no klin” (Ol Wok 10:15).

Mining blong drim ia i kam klia taem we, i no longtaem afta, sam man we Konelias blong Rom i sendem oli kasem haos blong Pita blong hem i kam tijim masta blong olgeta. Konelias i tekem wan bigfala grup blong famle mo fren oli kam, mo i faenem se oli wet blong kasem mesej blong hem, nao Pita i talem se:

“God i soemaot long mi we mi no save luk sam man se oli doti long fes blong hem, no oli rabis.  …

“… Mi mi luk we God i stap mekem i semmak nomo long olgeta man.

“Spos wan man i ona long God, mo i mekem ol samting we i stret long fes blong hem, bae God i glad long hem” (Ol Wok 10:28, 34–35; luk tu long ol ves 17–24).

“Taem Pita i stap toktok yet, Tabu Spirit i kamdaon long olgeta ya we oli stap lesin long tok blong hem.

“Nao olgeta ia we oli folem Pita … oli sapraes tumas, … from se oli no laen blong Isrel be God i givim Tabu Spirit long olgeta.

“… Nao Pita i talem se:

“Ol man ya oli kasem Tabu Spirit finis, stret olsem we yumi kasem. Hu nao i save blokem olgeta se oli no save baptaes long wota?” (Ol Wok 10:44–47).

Tru long eksperiens ia mo revelesen i go long Pita, Lod i bin jenisim fasin blong Jos mo i talemaot wan moa ful save blong doktrin i go long ol disaepol blong Hem. Mekem se, fasin blong prij i go blong i kasem evri kaen man.

Afta, long buk blong Ol Wok, yumi faenem wan stori we i kolosap semmak, be long taem ia i soem olsem wanem nao ol revelesen long saed blong poen blong doktrin i save kam long wan kaonsel. Fasin blong no agri i stat blong girap long saed blong fasin blong sakomsaes, we i nid blong hapen anda long loa blong Moses i mas gohed olsem wan komanmen blong gospel mo blong Jos blong Kraes (luk long Ol Wok 15:1, 5). “Nao ol aposol mo ol elda blong jos oli mekem miting blong tokbaot bisnes ya” (Ol Wok 15:6). Rekod blong mifala blong kaonsel ia i no fulwan, be oli talem se “afta we oli tokbaot longtaem lelebet,” (Ol Wok 15:7) Pita, senia Aposol, i bin girap mo talemaot wanem we Tabu Spirit i bin konfemem long hem. Hem i talemaot long kaonsel se taem oli stap blong prijim gospel long olgeta we oli no blong laen blong Isrel insaed long haos blong Konelias, oli bin kasem Tabu Spirit semmak nomo olsem olgeta Jiu we oli sakomsaes oli kasem. Hem i se: “God i no mekem i narafala long olgeta, Hem i tekemaot ol sin blong olgeta from we oli bilif long hem stret olsem we i mekem finis long yumi.

“Be from wanem yufala i wantem traem God? Weswe yufala i girap blong putum loa ya long olgeta we i olsem wan hevi samting long solda blong olgeta? Yumi, ol olfala blong yumi tu, evriwan i no naf blong karem hevi samting ya.

“Be yumi bilif we Jisas, Masta blong yumi hem i stap sevem yumi long gladhat blong hem, mo we hem i stap mekem olsem nomo long olgeta” (Ol Wok 15:9–11; luk tu long ves 8).

Afta long hemia, Pol, Banabas, mo ating sam narawan oli toktok blong sapotem toktok blong Pita, Jemes i bin muvum se desisen ia, wan leta i go long Jos bae i talemaot blong man i folem mo kaonsel i bin joen wan (luk long Ol Wok 15:25; luk tu long ol ves 12–23). Long leta we i stap anaonsem desisen blong olgeta, ol Aposol oli se: “Mo mifala i glad blong folem tingting we Tabu Spirit i soem long mifala” (Ol Wok 15:28), o long nara toktok, desisen ia i bin kam tru long tabu revelesen tru long Tabu Spirit.

Yumi mas folem ol sem rod ia nomo tedei insaed long Jos blong Jisas Kraes we i kambak. Presiden blong Jos i save anaonsem o talem mining blong ol doktrin folem ol revelesen we i kam long hem (blong gat wan eksampol, luk long D&C 138). Eksplenesen blong doktrin i save kam tu, tru long joen kaonsel blong Fas Presidensi mo Kworom blong Olgeta Twelef Aposol (blong gat eksampol, luk long Official Declaration 2). Ol toktok blong kaonsel bae oli folem ol skripja, ol tijing blong ol lida blong Jos, mo ol praktis we i bin hapen bifo. Be long en, semmak olsem long Jos blong Niu Testeman, stamba tingting i no blong ol memba blong kaonsel oli agri nomo, be revelesen i kam long God. Hem i wan rod we i tekem stret wei blong tingting mo fet blong kasem maen mo tingting blong Lod.4

Long sem taem, yumi mas tingbaot se i no evri toktok we wan lida blong Jos, blong bifo o tedei, i stap olsem wan doktrin. Yumi andastanem insaed long Jos se wan toktok we wan lida nomo i mekem long wan taem, i olsem tingting blong hemwan, we hem i tingting hevi long hem, be i no minim se i ofisol o se bae ful Jos i folem. Profet Josef Smit i bin tijim se “wan profet i wan profet nomo taem hem i stap mekem wok olsem profet.”5 Presiden Klak we mi yusum toktok blong hem fastaem i bin talem:

“Blong tokbaot poen ia, i gat wan simpol stori we papa blong mi i talem long mi taem mi smol, mi no save long wanem atoriti, be i wan eksampol. Stori hem i we, long taem we man i ronron olbaot from oli glad se Ami blong Jonston i stap kam, Brata Brigham Yang i bin prij long ol pipol long wan moning miting, mo talem wan toktok we i blong agensem o sendem bak ami ia. Long aftenun miting, hem i bin girap mo talem se Brigham Yang i stap toktok long moning, be Lod bae i toktok naoia. Afta, hem i givim wan toktok, mo i talem defren long toktok blong moning.  …

“… Jos bae i save, tru long testemoni blong Tabu Spirit we i stap insaed long bodi blong ol memba, sapos ol Brata oli stap talem tingting blong olgeta nomo, o Tabu Spirit i toktok, mo long stret taem, bae save ia bae i kamaot.6

Profet Josef Smit i bin konfemem se Sevya i stap long medel insaed long doktrin blong yumi long wan impoten toktok : “Stamba prinsipol blong relijin blong yumi oli testemoni blong Ol Aposol mo ol Profet, long saed blong Jisas Kraes, se Hem i ded, oli bin berem Hem, mo Hem i bin girap bakegen long nambatri dei, mo i bin go long heven; mo evri narafala samting long saed blong relijin blong yumi oli hang long hemia.”7 Testemoni blong Josef Smit abaot Jisas, i we Hem i stap laef, from we Hem i bin luk Hem, i stap long raet han blong God; mo hem i bin harem voes we i talem se Jisas i Stret Pikinini blong Papa (luk longD&C 76:23; luk tu long ves 22). Mi askem evriwan we i harem o ridim mesej ia blong lukaotem, tru long prea mo tru long stadi blong ol skripja sem testemoni ia abaot tabu man ia, Atonmen, mo laef bakegen long ded blong Jisas Kraes. Akseptem doktrin blong Hem taem yu sakem sin, mo afta, akseptem doktrin ia taem yu sakem sin, kasem baptaes, mo kasem presen we i Tabu Spirit, mo afta, truaot long laef blong yu, stap folem ol loa mo ol kavenan blong gospel blong Jisas Kraes.

Taem Ista selebresen i stap kam kolosap, mi talemaot witnes blong mi se Jisas blong Nasaret i bin mo Hem i Pikinini blong God, stret Mesaea blong profesi blong bifo. Hem i Kraes we i bin safa long Getsemane, i bin ded long kros, oli bin berem, mo i tru, i bin girap bakegen long nambatri dei. Hem i Lod we i laef bakegen long ded, tru long Hem bae evriwan i laef bakegen long hem, mo tru long Hem, evriwan bae i fri mo kam olsem wan god long kingdom blong Hem long heven. Hemia nao doktrin blong yumi, we i konfemem evri testeman blong bifo abaot Jisas Kraes, mo i statem bakegen long taem blong yumi. Long nem blong Jisas Kraes, amen.

Soem Ol Refrens

  1.  

    1. Luk long Neal A. Maxwell, “From the Beginning,” Ensign, Nov. 1993, 18–19: “Jemes i toktok agensem ‘ol wo mo ol raorao insaed’ long Jos (Jemes 4:1). Pol i bin harem nogud from ‘ol seraot’ insaed long Jos mo olsem wanem ‘ol wael dog’ bae oli ronemaot ‘ol sipsip’ (1 Korin 11:18; Ol Wok 20:29–31). Hem i bin save se wan taem blong apostasi i stap kam mo hem i bin raet i go long ol man Tesalonaeka se seken kaming blong Jisas bae i no save hapen kasem taem we ‘ol man oli agens long God’; mo afta i talem se ‘naoia fasin blong brekem loa i stap gohed’ (2 Tesalonaeka 2:3, 7). “Kolosap long en, Pol i luksave se fasin blong brekem loa i bigwan olsem wanem: ‘olgeta fren blong mi long ol ples ya long Esia, wetem tufala man ya Fugelas mo Hemogenes, olgeta evriwan oli ronwe long mi finis’ (2 Timoti 1:15). … “Bigfala fasin blong silip wetem man bifo long mared mo fasin blong wosipim aedol i bin mekem se apostasi i bin kam (luk long 1 Korin 5:9; Efesas 5:3; Jud 1:7). Jon mo Pol, tufala i bin tok agensem ol giaman Aposol we oli stap stanap (luk long 2 Korin 11:13; Revelesen 2:2). Jos i stap anda long atak. Sam oli nomo stap long Jos, be afta, oli kam agensem Jos. Long wan taem, Pol i bin stanap hemwan mo talem se ‘evriwan oli ronwe long mi finis’ (2 Timoti 4:16). Hem i tokbaot tu olgeta tu we oli tantanem ol haos (luk longTaetas 1:11). “Sam lokol lida oli agens, be wan, we i bin laekem blong gat hae nem, i no bin wantem blong toktok wetem ol brata (luk long 3 Jon. 1:9–10). “From hemia nao Presiden Brigham Yang i bin talem: ‘Oli talem se prishud i kamaot long Jos, be hem i no olsem. Jos i kamaot long Prishud’ (insaed long Journal of Discourses, 12:69).” Wetem taem, olsem we Elda Makswel i tokbaot, ‘fasin blong tingting stret, fasin blong ol man Gris blong stap tingting, i kam nambawan, afta i tekem rus, mo i tekem ples blong revelesen; hemia wan risal we sam Kristin man wetem gud tingting oli yusum blong mekem bilif blong olgeta i kam long kalja blong taem blong olgeta. … “… Bae yumi tu, yumi mas wari, mo no stap mekem fasin blong stap talem mining blong ol revelesen blong i go stret wetem wanem plante pipol oli biliv long hem” (Ensign, Nov. 1993, 19–20).

  2.  

    2. Ol Aposol mo ol profet olsem Josef Smit oli talemaot toktok blong God, be antap long hemia, yumi biliv se ol man mo ol woman, mo ol pikinini oli save lanem mo kasem daereksen we i kam long heven taem oli gat ansa long prea mo taem oli stadi long ol skripja. Semmak olsem long ol dei blong ol Aposol blong bifo, ol memba blong Jos blong Jisas Kraes, oli kasem presen we i Tabu Spirit, we i mekem se i gat toktok oltaem wetem Papa long Heven, o long nara toktok, revelesen we i kam long yuwan (luk long Ol Wok 2:37–38). Long wei ia, Jos i kam olsem wan grup blong ol man mo ol woman we oli givim ful tingting long saed blong spirit, we fet blong olgeta i no blaen, be oli luk—mo Tabu Spirit i konfemem long olgeta. Hemia i no minim se evri memba i toktok long bihaf blong Jos, o i save talem mining blong ol doktrin, be i blong talem se wanwan i save kasem daereksen we i kam long heven taem hem i stap fesem ol jalenj mo ol janis blong laef blong hem.

  3.  

    3. J. Reuben Clark Jr., “When Are Church Leaders’ Words Entitled to Claim of Scripture?” Church News, 31 Julae 1954, 9–10; luk tu long Doctrine and Covenants 28:1–2, 6–7, 11–13.

  4.  

    4. Wanem we olgeta we oli tekem pat oli mas rere from mo mas gat oli, stret mo gud fasin, stap tabu, gat hat i stap daon, no stap flas mo save safa longtaem, fet mo klin fasin, mo save, fasin blong gat disiplin, fasin blong save wet longtaem, fasin olsem hemia blong God, stap kaen wetem ol narafala man, mo jareti; From se promes i stap. Mo sapos oli gat ol samting ia, bae oli save kasem fulap save we i kam long Lod (luk long Doctrine and Covenants 107:30–31).

  5.  

    5. Joseph Smith, insaed long History of the Church, 5:265.

  6.  

    6. J. Reuben Clark Jr., “Church Leaders’ Words,” 10. Abaot stori we papa blong hem i bin talem long hem abaot Brigham Yang, Presiden Klak i ademap: “Mi no save se samting i bin hapen o no, be hem i talem se i tokbaot wan prinsipol—se iven Presiden blong Jos, bae i no oltaem we “bae hem i toktok wetem Tabu Spirit,” taem hem i toktok long ol pipol. Hemia i bin hapen abaot ol poen blong doktrin (oltaem long wan wei we i go tumas) taem we ol Presiden blong Jos mo ol pipol tu oli bin filim hemia taem oli tokbaot wan doktrin, man we i toktok “Tabu Spirit i bin talem long hem ol samting ia.’ “Olsem wanem nao bae Jos i save taem ol kaen taem olsem we ol brata, wetem ol prinsipol mo ol doktrin oli mitim ol standet ia se ol man we oli givim toktok oli toktok wetem Tabu Spirit? Jos bae i save tru long testemoni blong Tabu Spirit, insaed long bodi blong ol memba, se ol brata ia oli stap talem tingting blong olgeta, o Tabu Spirit i lidim olgeta; mo long stret taem, bae save ia bae i kamaot” (J. Reuben Clark Jr., “Church Leaders’ Words,” 10).

  7.  

    7.  Teachings of Presidents of the Church: Joseph Smith (2007), 49.