Mu Ning pi Missionary! Yow ra Ayuwegem!

Rok Elder Russell M. Nelson

Ko fare Ulung ko Ragag nge L’agruw e Apostles


Russell M. Nelson
Gubin e missionary, nib fel’ yangrad mab elel, be muruwliy ni nge yog ni ngan ayuweged e yafos ko reb e gidii’.

Pi walageg nib pum’on nge ppin, nge pi fagaer romad nib t’uf, gu pii’ ngomed gubin e adag nge falflaen’ romad. Gamaed be falflaen’ ko pin’en ni ke yoeg President Thomas S. Monson re kakadbul ney, ni kan thiliyeg e duw nib t’uf ko pi missionary ni 18 ko pum’on nge 19 ko pi ppin. Udakaen e ren’ey, ra yib ngak bo’or nib yo’or e gidii’ rodad e ta’wath ko mission.

L’agruw e duw faram mab bayay nib gel kakadbul daba’, ke yoeg President Monson ni “urnging e pou’mon nib yul’yul’, mab rayog thingariy fel’eg rogom ni ngan pigpig nag e mission. Muruwel ko mission mab t’uf ko priesthood,--n’en kan dugily Somoel ngodad ni kug athapaged tin nib yo’or.”1 Bayay, ke weliy ni ko pi ppin, rayog ni nngar pigpig gad, machane de t’ufeged riy’. Ma bayay ke pinning picha’ nib ilal ni ngar pigpig gad.

Fel’eg rogom ko mission mab ga’fan. Mission e n’en ni ngan rin’ ni ngam pigpig nag Got nge pifak rok. Pi missionary be chiyliy e salpiy rorad ni fan ko muruwel ney. Pi gallibthir, pi tabinaw, pi fagaer, ma picha’ nibe pii’ e salpiy rorad ko General Missioanry Fund ku rayog ni ngar ayuweged riy. Gubin e missionary, nib fel’ yangrad mab elel, be muruwliy ni nge yog ni ngan ayuweged e yafos ko reb e gidii’.

Fare me’leg ni ngan pigpig nag e mission ran fel’eg rogon e yafos ko re missionary, ppin fa pum’on rok, nge pifak rad ko bo’or e mfen. Ra ba’adag bee’ ni nge serve nag e mission fa’anra be yul’yul’, michaen’, mab fel’eg rogon.

Bay yo’or e gidii’ u bang ko fayleng nibe motoyil ko pin’ey ni dowriy mang chongin e Galasia ku Yesus Kristus nifan ko Gidii’en Got ko Tin Tomur e rran, ma gimew be nang buchuw mornga’agmad nge pi missionary romad. Kam sap ko ren’ey ni bachan gamananged mornga’agen e pi Mormon, ma ba’adag ni ngam nanged e tin nibe fil pi missionary romad. Napan gabe fil yug boech mornga’agmad, gara pirieg ni bay rodad bo’or e yalen nib t’ab rogon. Bugithin romad e ngan matangiy e tin nib fel mab riyul’, nge musap fa’anra rayug nggu pii’ed ngom yug boech. Bay yo’or e sikeng ko yafos ney, ma gad b’tuf ayuw boechngiyal’. Galasia, tin riyul’ nge pi missionary romad e pi bang ko ayuw nem.

Pi missionary romad ni fel’ yangren be soen nag ko skool, muruwel, tafagaer rorad, nge urngin e tin nibe rin’ pi gidii’ nib t’abrogon e duw rorad. Ko 18 fa 24 e pul, be soen nag ko gubin, ni bachan be gel u wun’rad ni ngar pigpig gad Somoel.2 Ma boech e missionary romad be pigpig nag napan yow elal. Gu manang ni be ta’wath nag pi tabinaw rorad. Ko tabinaw romow, bay meruk nibe serve nag pi mission rorad e chiney—dalip e bitir nib ppin, pi pum’on rorad, reb e bitir nib pin ko fakag, ma reb e pumon nu fakag.

Sana boech i med be lemnag mang fan Mormon. Be reb e fithingan romad. Gathi fithingmad nib riyul, machane bo’or e gidii’ ma nang dad riy. Ke yib re fithingan ney ku e babyor nib thothup kan noeg e Babyor ku Mormon.

Fithingan e Galasia romad e Fare Galasia ku Yesus Kristus ni fan ko Gidii’en Got ko Tin Tomur e Rran. I’r e Galasia kan sulweg bayay nib t’abrogon ko kakrom rok Yesus Kristus. Napan ke paer nga dakaen e fayleng, ke yarimy e Galasia Rok. Me pinning Apostles, pi Medlip i Ragag, nge yug boech e tapowiy’ ni ke pii’ ngak e matawon ko priesthood ngay’ ni ngan muruwliy e tin Rok.3 Tomuren kar m’aed Kristus nge pi Apostles rok, ke thiliyeg e gidii’ pi gam’ing nge machib. Kan malog e Galasia nge fare Priesthood. Tomuren pi duw kan noeg e Dark Ages ngay’, ma u tungin e lowan’ ko Chitimangdad nu Tharimy, ke sulweg Yesus Kristus e Galsia Rok. Chiney ni ba’ bayay, kan sulweg riy’, ma be yaen udakaen e thogthog Rok ni be pii’.4

Gadad be leak Somoel ni Yesus Kristus ma gu machibnag riy’. Gumananged ni tomuren ke gel nag e yam’, ke fas ko yam’ nge m’ug ngak pi gachalpen Rok nib yo’or e yay. Ke ka’ e gan rorad. Ke yaen nga but’ rorad. U’mon ke Sul Ngalan bin tomur, ke motochiyel nagrad “mmarod ngak girdi’en e pi nam u gubin yang ngam pingeged yad ngar manged pi gachalpeg, mi gimed tawfe nagrd nga fithingan e Chitamangiy, nge Fak nge fare Kan Nthothup.” Ke fol riy’ pi Apostles.5 Ma kar pinninged yug boech e gidii’ ni ngar ayuwegrad ko re motochiyel rok Somoel.

Daba’ u tangin e liyeg ko pi profet nge apostle u tiney e rran, be t’ab rogon e motochiyel kan pii’ ngak pi missionary ko fare Galassia ku Yesus Kristus ni fan ko Gidii’en Got Rok ko Tin TOmur e Rran. Pi missionary be serve nag u 150 e nam. Bachan yad pi tapigpig ku Somoel ni Yeus Kristus, yad be gay rogon ni ngar mugu’uliyed fare motochiyel nem—kan sulweg bayay u tiney e rran rok Somel—ni ngan fekey e gospel ni polo’ u bang ko fayleng min ta’wath nag pi gidii’ u gubin yang riy’.6

Pi missionary ko 19 fa 20 e duw rorad be chig’chig’ ko yalen nu fayleng. Machane kan ta’wath nagrad ko n’en nib fel—boed e gelingin e Kan Thothup, fare adag rok Got, nge michaen’ ko tin riyul—nibe fel’eg rad e pi tapgpig nib gel rok Somoel. Yad be pii’ e thin nib fel’ ko gospel ni ran fekey e falflaen’ nge gapas nu manechuboeg ngak en nra motoyil ngorad. Ma nib yo’or e yay, yad be rin’ ngay’ u nam nge thin nib thil rorad.

Pi missionary be gay rogon ni ngan lek Yesus Kristus ko pi thin nge ngongol rorad. Yad be machib mornga’agen Yesus Kristus nge fare Bayul Rok.7 Yad be machib nag mornga’gen fare sulweg ni ke buch ko fare Galasia rok Kristus nu kakrom udakaen bin som’on e profet u tiney-tomur e rran ni Joseph Smith ngay’.

Sana kam mada’nag, fa kam pii’ keru’ rom, ngak pi missionary romad. Gu athapeg ni dam rus rorad, machane ni ngam fil rorad. Yad rayog ni ngar manged e taayuw nu tharimy rom.

Ke buch ngak Jerry, pum’on ni Protestant nib nil i rigag e duw rok, ma paer u Mesa, Arizona. Chitaman rok Jerry e tamachib ni Baptist; chitingin rok e tamachib nu Methodist. Reb o rran, fagaer rok Jerry ni fithingan Pricilla, ke yoeg ngak e amith ni bay rok ni bachan ke yim’ bitir rok napen ke gargeleg ma fare divorce ni ke tay rok de’ n’uw napan tomuren riy’. Pricilla be gel e yafos rok, ya bay aningeg e bitir, dalip e ppin nge t’areb e pagael, ma dariy e pum’on rok. Napan ke yoeg ngak Jerry, ke yoeg ni ke lenang sana ran fek pogofan rok min yim’. Jerry nu fithik e gelingin nge adag, ke gay rogon ni nge weliy ngak nib ga’fan e yafos rok mab tolang pulwon’ riy. Ke pinning ir ni nge un ko glasia, machane, ke weliy ni de michaen’ rok ngak Got.

De nang Jerry e n’en ni ngan rin’. Tabuch, napen ke pii’ e raen ko pi gakiy u yoror rok, cha’ney nib michaen’ ke meybil ngak Got ni fan ko ayuw. Napan e meybil rok, ke rungag laman u tafney ni ga’ar, “Mu tal’eg galli cha’ney nibe yaen ko rhat.” Ke gin’ Jerry ma de nang fan. Ke lemnag ko ren’ey, me sap nga kanawo me guy l’agruw e nii’ kan chuw ab kengin nib wechwech nge tie. Yo ma yaen nga but’ dakaen pi rhat u barba’ e tabinaw rok’. Ke gin’ Jerry, me sap ngorow. Ma tomuren ke nang fan riy’, ke tolul, “Gimew, wenig ram tal’egew! B’tuf nggu gog ngomew!”

Yow gin’ machane falflaen’, mar tal’egew. Napan kar ronow ngak, ke gu’ Jerry ni bay e name tag rorow nibe yoeg yow e missionary ko fare Galasia rok Yesus Kristus ni fan ko Gidii’en Got Rok ko Tin Tomur e Rran. Ke sap Jerry ngorow me yoeg, “Sana ab thil e n’en ngu gog, machane kug meybil me yoeg ngog nggu ‘tal’eg gali cha’ nibe yaen ko rhat.’ Kug sap nga kanawo ma ba’ gimew. Rayog ni ngam ayuweg neg?”

Kar sminmin gow me fulweg ni, “Arragon, gu lemnag ni rayog.”

Ke weliy fan Jerry ngorow mornga’agen Pricilla. Ma de’ n’uw napan galli missionary kar mada’gow Pricilla, pifak rok, nge Jerry. Kar puriy niged ko mang fan e yafos nge tunom rok Got ni fan rad. Jerry, Pricilla, nge pifak rok kar ga’ niged e mch rorad udakaen meybil rorad, fil rogon e Babyor ku Mormon, nge udakaen e adag ko pi chongin e Galasia. Mich rok Jerry ngak Kristus nib gel riy’ ke ga’ nag. Ma pi tafney rok Pricilla ni ngan fek pogofan rok min nim’ ke chel nga athap nge falfalan. Kar tawfe gad mar manged pi giddi’ ko Galasia rok Kristus ni ke sulweg bayay.8

Arragon, pi missionary ran ayuwegem nib yo’or rogon. Sasun, boech i med ran ba’adag ni ngam nang mornga’agen pi gidii’ rom nu kakrom. Sana gamanang galibthir rom nge aningeg e labthir rorad, machane ke gamanang e meruk e labthir rorad? Ke gamanang fithingrad? Ra gabad ni ngam nang mornga’agrad? Mu ning pi missionary! Yow ran ayuwegem!9 Ya ba’ chepin e tabinaw kan matangiy e Galasia ku Yesus Kristus ni fan ko Gidii’en Got Rok ko Tin Tomur e Rran.

Boech i med e chongin e galasia machane dab mue un riy’. Ga ba’adag Somoel ma bo’or gabe lemnag ni ngam sul ngak. Machane dam nang ke uragon. Gu gog ngom ni ngam nin pi missionary!10 Yo ran ayuwegem! Rayog ni ngar ayuwegew gur min fil ngak pi gidii’ nib t’uf rom. Gur rib t’uf romad ma ngak pi missionary, ma ba’adag mad nggu sulweg ngom e tamilang ko gospel nga lan e yafos rom.

Boech gimed ba’adag ni ngam nanged ke urogon rayog ni ngam gel e macham ko ban’en fa paer nib n’uw napan ni dariy’ m’aer. Mu ning pi missionary! Rayog ni ngar ayuwegem! Bo’or e research e kan rin nibe dag ni fare ulung ko Galasia rok Yesus Kristus ni fan ko Gidii’en Got rok ko Tin Tomur e Rran be lich e m’ar romad. Buchuw e gidii’ rorad kar m’aed ko m’ar nib papay, ma yad be paer nib n’uw napan ngak yug gidii’ ni kan fil rogon riy.11

Boech i med be thamiy ni yafos ney mab papay nge michiyang, machane u gum’racha’med gabe thamiy ni kan luf e bang riy’, ma dariy fan e yafos chiney. Mu ning pi missionary! Yo ran ayuweg nem! Ku rayog ni ngar ayuwegem ni ngam nang fan mang fan e yafos—mang fan ka bay e fayleng ney, ma uw’uw ram uthmed’ riy’ tomren ngad m’aed. Rayog ni ngam fil ni uragon e gospel ku Yesus Kristus ran ta’wath nag e yafos rom nib fel’ ko gubin e tin gabe lemnag riy’ chiney’.

Fa’anra gabe kirebaen’ ko n’en u tabinaw rom, mu ning pi missionary! Yow ran ayuweg nem! Be ga’fan ngak pi Gidii’en Got ko Tiney e Rran ni ngan gel nag pi tabinaw. Ya rayog ni ngan paer e tabinaw ni dabi mus’ bi’id. Mu ning pin missionary ni ngar fil gow ke uragaon rayog rom nge tabinaw rom.

Pi missionary ke rayog ni ngar ayuwegew gur fa’anra gabadag e llowan’. Fare ya’el ko bee’ ran ba’adag e nangaen’. Ya fa’anra me yib udakaen e laboratory nu science fa dakaen e thogthog rok Got, gad be t’uf riy’! Re fla’ab rok Got e nangaen’.12

Ga’ nag ko lowan’ ma un ko nangaen’ nu tharmiy ma nu fayleng. Gamaed be yoeg ni rib ga’fan ni ngan nang fan e thin nib thothup. Reb e study ke pirieg ni Gidii’en Got ko Tiney Tomur e Rran yad be lowan’ ko yug gidii’ mornga’agen Kristiano nge Bible.13 Fa’anra ga ba’adag ni ngam fil rogon e Bible nib fel’ rogon, ni ngam nang fan e Babyor ku Mormon nib fel rogon, ma fa’anra ba’adag ni ngam nang fan mang fan e gidii’ nge mang fan Got, mu ning pi missionary! Yo ra ayuwegem!

Bo’or i gimed ni ba’adag ni ngam ayuweg e gidii’ nib t’uf. Bachane gamaed be lek Yesus Kristus, Gidii’en Got ko Tiney Tomur e Rran ma fol ko pin’ay.14 Urngin e gidii’ rayog ni ngar uned gamaed ko ayuw nge ngongoliy ni fan ko gidii’ nib gafgow u bang ko fayleng. Fa’anra ba’adg ni ngam ayuweg, mu ning pi missionary! Yow ra ayuwegem!

Ma fa’anra ga ba’adag ni ngam nang mornga’agen e yafos ni tomuren e yam’, mornga’agen tharimy, mornga’agen tunom rok Got rom; fa’anra ga ba’adag ni ngam nang mornga’agen Somoel ni Yesus Kristus, fare Bayul Rok, nge fare Sulweg ko Galasia rok nib chilen rogon, mu ning pi missionary! Yo ra ayuweg em!

Gu manang be fas Got. Yesus e Kristus. Kan sulweg nga chilen rogon e Galasia. Mug meybil nib gel ni ran ta’wath nigem Got nge pi missionary riy’, u fithingan ni Yesus Kristus, amen.

Show References

  1.  

    1. Thomas S. Monson, “As We Meet Together Again,” Liahona and Ensign, Nov. 2010, 5–6.

  2.  

    2. Muguy Doctrine and Covenants 4:3.

  3.  

    3. Muguy Matthew 10:1; Luke 6:13; 10:1; Ephesians 4:11–12.

  4.  

    4. Muguy Doctrine and Covenants 1:30.

  5.  

    5.  Matthew 28:19.

  6.  

    6. Muguy Doctrine and Covenants 68:8; 84:62; 112:28.

  7.  

    7. Muguy 1 Corinthians 2:2; 2 Nephi 25:26.

  8.  

    8. Thin ni ke pii’ W. Tracy Watson, president ko Arizona Mesa Mission faram.

  9.  

    9. Ko thin ni kug gog ni ngam “ning pi missionary,” ku rayog nin gam ning fagaer rom ni’ir e chongin e Galasia ko ayuw.

  10.  

    10. Gidii’ rom nibe yaen nge Galasia romad, fagaer rom nibe yaen riy’, nge pi tapowiy’ ko Galasia ku ran falfaln’ ni ngar ayuweg nem.

  11.  

    11. Muguy James E. Enstrom nge Lester Breslow. “Lifestyle and Reduced Mortality among Active California Mormons, 1980–2004.” Preventive Medicine, vol. 46 (2008), 135.

  12.  

    12. Muguy Doctrine and Covenants 93:36.

  13.  

    13. Muguy U.S. Religious Knowledge Survey (Pew Forum on Religion and Public Life, Sept. 28, 2010), 7.

  14.  

    14. Muguy Ram Cnaan, Van Evans, and Daniel W. Curtis, Called to Serve: The Prosocial Behavior of Active Latter-day Saints (University of Pennsylvania School of Social Policy and Practice, 2012); “Mormon Volunteerism Highlighted in New Study” (Mar. 16, 2012), http://www.mormonnewsroom.org/article/mormon-volunteerism-report; Mormons in America: Certain in Their Beliefs, Uncertain of Their Place in Society (Pew Forum on Religion and Public Life, Jan. 12, 2012), 43; Robert D. Putnam and David E. Campbell, American Grace: How Religion Divides and Unites Us (2010), 444–54.