Stap Wantem Wok Strong

I Kam long Elda M. Rasel Balad

Blong Kworom blong Olgeta Twelef Aposol


M. Rasel Balad
Ol bigfala samting oli kam blong hapen, mo ol trabol oli nomo hevi tru long ol hadwok blong plante han “we oli tingting strong blong mekem wan gud wok.”

Elda Peri, mi ting se yu yu man we i moa yangfala long ful Jos ia wetem 90 yia blong yu. Yufala i luk olsem wanem hem i jiamaot long jea blong hem.

Ol brata mo sista we mi lavem tumas. Evri taem we mi stap drink gud, wota blong wan fres tomato, o kakae wan raep pij we i gat fulap jus we i jes kamaot long tri, tingting blong mi i gobak 60 yia i pas, taem papa blong mi i gat wan smol plantesen blong pij tri long Holadei, Yuta. Hem i stap lukaotem ol sugabag long ples ia blong oli mekem pij tri i karem flaoa we bae i givim ol bigfala pij frut we i naes.

Papa i laekem ol naesfala sugabag mo i sapraes long wei we plante taosen long olgeta oli stap wok tugeta, mo mekem swit jus we oli karemaot long pij flaoa i kam wan swit, braon hani—wan kaekae we yumi yusum plante. Yes, ol man blong lukaotem kaekae oli talem se hem i wan long ol kakae ia we i karem evri samting—ol defren kaen kaekae mo wota—we i nid blong sapotem laef.

Oltaem, papa blong mi, i traem blong mekem mi wok wetem hem blong lukaotem ol sugabag ia, be mi glad nomo blong letem hem i lukaotem ol sugabag blong hem. Be, stat long taem ia i kam, mi bin lanem moa abaot ol sugabag ia we oli oganaes gud—wan grup blong 60 taosen sugabag.

Ol sugabag, oli stap maredem ol sid blong flaoa, pulum swit jus blong flaoa i kam tugeta, mo mekem jus ia i kam hani. Hem i wanem oli stap mekem oltaem, we i kam olsem fasin blong olgeta we i kam long Krieta blong yumi. Oli ting se blong mekem haf kilo blong hani nomo, samples 20 taosen kasem 60 taosen bi ia, oli mas visitim plante milian flaoa mo travel olsem 2 taem raon long wol. Ova long sot laef blong hem blong sam wik mo fo manis nomo, wan sugabag i givim kontribusen blong hem blong hani i bigwan olsem wan pat aot long twelef blong wan tispun.

Nomata, hemia i no bigwan tumas taem yu komperem wetem totol, be wan pat aot long twelef ia blong wan tispun blong hani, i impoten long laef blong wan ful bed blong sugabag. Ol sugabag oli dipen long wanwan long olgeta. Wan wok we i bigwan tumas long sam sugabag blong mekem, i nomo kam hevi from se evriwan long ol sugabag ia oli fetful blong mekem pat blong olgeta.

Bed blong sugabag, oltaem i bin wan impoten simbol blong Jos Histri blong yumi. Yumi lanem insaed long Buk blong Momon, se ol man blong Jared oli bin tekem ol sugabag wetem olgeta (luk long Ita 2:3) taem oli travel i go long ol Amerika, sam taosen yia i pas. Brigham Yang i jusum simbol blong bed blong sugabag blong leftemap tingting mo givim insperesen long grup paoa we i stap long medel blong ol paeonia blong oli tanem draeples ia we i no gat samting long hem raon long Bigfala Sol Lek, i kam ol vale we samting i gro long hem we yumi stap long hem tedei. Yumi nao, yumi mekem yus long grup visen mo grup wok ia.

Simbol blong bed blong sugabag, oli faenem tugeta, insaed mo aotsaed long plante long ol tempol blong yumi. Pulpit, we mi stanap long hem tedei, i kamaot long wan wolnat tri we Presiden Godon B. Hinkli i planem mo oli kavem ol pikja blong bed blong sugabag long hem.

Evri simbol ia i talemaot wan samting: Ol bigfala samting oli kam blong hapen, mo ol trabol oli nomo hevi tru long ol hadwok blong plante han we oli tingting strong blong mekem wan gud wok (luk long D&C 58:27). Traem tingting wanem nao ol milian Lata-dei Sent bae oli save mekem long wol, sapos yumi stap wok olsem ol sugabag ia, wetem tingting we i lukluk nomo long ol tijing blong Lod Jisas Kraes.

Sevya i bin tijim yumi se fas mo bigfala komanmen i:

“Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu. …

“Mo narawan we klosap i sem mak long hem, i talem se ‘Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.’

“Tufala loa ya i stamba blong Loa we God i givim long Moses, wetem ol tok blong ol profet tu” (Matiu 22:37, 39–40).

Ol toktok blong Sevya oli simpol—yet mining blong olgeta i bigwan mo i dip bigwan. Yumi mas lavem God, mo mas lavem mo kea long ol neiba blong yumi semmak olsem yumi lukaot long yumiwan. Traem tingting se wanem gud nao bae yumi mekem long wol, sapos yumi evriwan i joen tugeta, we yumi stap wan, olsem ol man blong folem Kraes, mo yumi wok strong mo bisi blong lukluk long ol nid blong ol narawan mo givhan long olgeta raon long yumi—ol famle blong yumi, ol fren blong yumi, ol neiba blong yumi, mo ol sitisen blong yumi.

Olsem leta blong Jemes i talem, seves i stret mining blong relijin we i klin gud mo i stret gud (luk long Jemes 1:27).

Yumi stap ridim abaot seves we ol memba blong Jos oli givim raon long wol mo speseli long yumaniterian seves we oli givim long taem blong disasta—faea, bigfala wota we i ron, hariken, wael win. Ol givhan ia we oli nidim mo oli glad from, i mas gohed olsem wan wei blong tekemaot trabol blong wanwan. Be olsem wanem long laef blong yumi evri dei? Wanem nao bae i risal blong ol hip blong ol milian smol aksen blong sore we bae yumi mekem evri dei from se yumi filim Kristin lav long ol narawan? Wetem taem, hemia bae i jenisim laef blong evri pikinini blong Papa blong yumi long Heven tru long lav we Hem i gat long olgeta mo Hem i soem tru long yumi. Trabol wol blong yumi ia i nidim lav ia blong Kraes tedei, moa bitim eni taem bifo, mo bae i nidim moa yet long ol yia we i stap kam.

Ol simpol evri dei aksen blong seves ia, ating yufala i luk se oli no bigwan tumas, be taem yu tekem olgeta evriwan i kam wanples, oli kam olsem smol drop blong hani long tispun wan sugabag i givim long ful grup. I gat paoa insaed long lav blong yumi we yumi gat long God mo ol pikinini blong Hem, mo taem lav ia i kamaot tru long ol milian aksen blong kaen fasin blong Kristin, bae i mekem wol i kam swit mo bae i fidim hem wetem swit jus we i sapotem laef, we i fet, hop mo jareti.

Wanem nao yumi nidim blong mekem blong kam olsem ol sugabag we yumi wok strong mo mekem strong tingting ia i kam pat blong fasin blong yumi? Plante long yumi i mekem gud blong kam long ol Jos miting, mo yumi wok had long ol koling blong yumi, speseli long ol Sandei. Hemia mi presen yufala from. Be olsem wanem long maen mo hat blong yumi? Oli stap wok strong long ol gud samting long narafala dei blong wik? Yumi stap go wetem win we i blo, o yumi jenisim yumi blong folem gospel blong Jisas Kraes? Olsem wanem nao yumi tekem sid blong fet we i bin groap long maen blong yumi mo planem sid ia dip long gudfala graon blong sol blong yumi? Olsem wanem nao yumi mekem bigfala jenis ia long hat we Alma i talem se i nid blong yumi gat, blong kasem hapines mo pis we i no save finis? (luk long Alma 5:12–21).

Tingbaot, hani i wan kaekae ia nomo we insaed, i gat evri kaekae we i nid blong sapotem laef blong bodi blong yumi. Mo doktrin mo gospel blong Kraes i wan rod ia nomo, blong kasem laef we i no save finis. Taem nomo testemoni blong yumi i soemaot wanem i stap long maen mo hat i andastanem gud hemia, nao bae strong tingting blong lavem mo givhan long nara man bae i kam olsem hemia blong Sevya. Long taem nomo, mo long taem ia nomo, bae yumi kam ol disaepol blong Kraes we yumi jenisim laef tru, mo yumi gat paoa tru long Spirit blong kasem hat blong ol narafala man.

Taem hat blong yumi i nomo stap long ol samting blong wol, bae yumi nomo stap lukaotem ol pres blong ol man, o lukaot blong stap fidim hae tingting blong yumi (luk long D&C 121:35–37). Be, bae yumi tekem ol kwaliti olsem hemia blong Kraes we Jisas i bin tijim:

  1. Yumi gat tingting i stap daon, yumi no flas mo stap safa longtaem (luk longD&C 121:41).
  2. Yumi kaen, yumi no gat tufes, o fasin blong no stap ones (luk long D&C 121:42).
  3. Yumi gat bigfala lav long evri man (luk long D&C 121:45).
  4. Ol tingting blong yumi, oltaem oli klin (luk long D&C 121:45).
  5. Yumi nomo wantem blong mekem nogud samting (luk long Mosaea 5:2).
  6. Tabu Spirit i stap olsem kompanion blong yumi oltaem, mo ol doktrin blong prishud oli go insaed long sol blong yumi semmak olsem smol ren blong moning i foldaon long heven i kamdaon (luk long D&C 121:45–46).

Nao, ol brata mo sista, mi no stap talem se yufala i tekem relijin i go tumas. No i no olsem! Mi stap talem nomo se yumi mas tekem stret nekis step blong jenis fulwan long gospel blong Kraes taem yumi tekem ol doktrin blong hem dip insaed long hat mo sol blong yumi, blong mekem se yumi mekem samting mo laef folem oltaem—mo wetem tru fasin—folem wanem we yumi talem se yumi biliv long hem.

Tru fasin ia, i mekem laef blong yumi i simpol, mo i mekem yumi lisin moa long Spirit mo ol nid blong ol narawan. Hem i tekem glad i kam insaed long laef blong yumi, mo pis insaed long sol blong yumi—kaen glad mo pis ia we i kam long yumi taem yumi sakem ol sin blong yumi mo folem Sevya taem yumi obei long ol komanmen blong Hem.

Olsem wanem nao yumi mekem jenis ia? Olsem wanem nao yumi mekem lav ia blong Kraes i kam pat blong hat blong yumi? I gat wan simpol samting blong mekem evri dei, we i save jenisim samting long evri memba blong Jos, mo i blong yufala tu, ol boe mo gel, yufala ol yang man mo yang woman, yufala ol yang singgel adalt, mo yufala ol papa mo ol mama.

Simpol samting ia i: Long moning prea blong yufala, evri niu dei, askem Papa long Heven blong lidim yu blong luksave wan janis blong givhan long wan long ol gudfala pikinini blong Hem. Afta, gohed long dei wetem hat blong yu we i fulap long fet mo lav, mi lukaotem wan blong givhan. Stap oltaem tingting long hemia, semmak olsem ol sugabag we oltaem oli lukluk nomo long ol flaoa, ples we bae oli tekem ol sid mo swit jus blong olgeta. Sapos yu mekem hemia, filing blong spirit blong yufala bae i kam bigwan, mo bae yu faenem ol janis blong givhan we yu neva ting mo luk se i posibol bifo.

Presiden Tomas S. Monson i bin tijim se long plante taem, Papa long Heven i ansa ol prea blong wan narafalawan tru long yumi—tru long yu mo mi—tru long gudfala toktok mo wok blong yumi—tru long ol simpol aksen blong seves mo lav.

Mo Presiden Spensa W. Kimbol i bin talem: “God i luk yumi, mo Hem i stap lukaot long yumi. Be hem i tru long wan narafala man nao, we Hem i lukluk long ol nid blong yumi. Taswe, hem i impoten blong yumi givhan long wanwan long yumi.” (Teachings of Presidents of the Church: Spencer W. Kimball [2006], 82).

Mi save se sapos yu mekem hemia—long hom, long skul, long wok, mo long jos—Spirit bae i lidim yu mo bae yu save luksave olgeta we oli stap long nid blong stret seves ia we, ating yu nomo, yu save givim. Bae Spirit i talem long yu mo bae yu gat strong tingting blong help blong fulumap wol wetem stret lav blong Kraes mo gospel blong Hem.

Mo tingbaot. Semmak olsem smol pat blong hani long tispun we sugabag i givim long bed blong hani, sapos yumi dabdabolem ol wok blong yumi long plante ten mo taosen mo iven ol milian blong gud wok wetem prea blong serem lav ia we God i gat long ol pikinini blong Hem tru long Kristin seves, bae i gat wan bigfala risal blong gud samting we bae i tekem Laet blong Kraes long wol ia we i tudak nomo. Taem yumi joen tugeta, bae yumi tekem lav mo sore ia i go long famle blong yumiwan, mo long hem we i stap hemwan, long ol pua, hem we i harem nogud, mo long olgeta pikinini blong Papa long Heven we oli stap lukaotem trutok mo pis.

Hem i prea blong mi we mi mekem wetem tingting we i stap daon, ol brata mo sista, se bae yumi askem, long prea blong yumi evri dei, blong kasem insperesen blong faenem wan we yumi save givhan tru long sam seves we i gat mining, mo tu, seves blong serem trutok blong gospel mo ol testemoni blong yumi. Long en blong wanwan dei, bae yumi save talem “yes” blong ansa long ol kwestin ia “Mi mi mekem wan gud samting long wol tedei? Mi mi helpem wan we i stap long nid?” (Hymns, no. 223).

Hemia i wok blong God. Bae yumi mekem wok ia long fetful fasin semmak olsem ol smol sugabag ia we oli gat strong tingting blong mekem wok blong olgeta, mi prea olsem, long nem blong Jisas Kraes, amen.